شُله رسولا 17 - کتاب مقدس به زبان کردی شیکاکی

پولس و سیلاس شَهره تسالونیکیه دا

¹ پاشه هِنده گو پولس و سیلاس ژه شَهره آمْفیپولیس و آپولونیا دَرباز بون، هاتنَ شَهره تسالونیکیه، گو وِدَره دیرَگه یهودیا هَبو.

² پولس گورَیَگی عادَتا خو یا همو جاره چو ناو دیره دا. اَوی سه رُژه شَنبیه دوویِگرا راستا نِویسارِت مُقدس گَل واندا بَحث دِگِر،

³ و بُ وان وَدِگِر و ایثبات دِگِر گو لازِم بو مسیحْ زَجره بِکِشیت و ژه ناو مِریادا رابیت. اَوی دِگُت: «اَو عیسایه گو اَز بُ وَ باس دِگَم، هَمَن مسیحَ.»

⁴ هِندَگ ژه وان و هَ وِسا جَماعَتَگه مَزِنَ دیندارَ یونانی و هَمژی ژِنگه رِزدار گو هَژمارا وان گِم نَبون، قانع بون و کَتنَ گَل پولس و سیلاس دا.

⁵ بله یهودیا حسادت دِگِرِن و هِندَ مِرُوه شُل پیسَ بازاره خِر گِرِن و دَستَگَگ ره اِخِستِن و ناو شَهری دا هِنگامَ چه گِرِن. اَوان هجوم بِرِنَ مالا یاسون گو پولس و سیلاس بیننَ دَروَ لاره خلقه.

⁶ وقته نَگارین اَوان پَیدا گَن، یاسون و هِندَ بِرایه دی کِشان بِرِنَ لاره حاکِمِت شَهری. اَوان بِ هَواران دِگُتن: «وان مِرُوا گو دُنیا سَر و بِن گِرِنَ، هاتنَ اِرَ ژی،

⁷ و یاسونی اَو بِرِنَ مالا خودا. اَونَ همو رابونَ له ضِدّ قانونه قیصری و دِبِژِن گو پاشایَگه دی هَیَ گو ناوه وی عیسایَ.»

⁸ وقته خلقه و حاکِمِت شَهری اَو قِسَنَ بیهیستِن، پَرِشَ بون.

⁹ اَوان ژه یاسون و بِرایِت دی هِندَ دِراو بُ وثیقه اِستاندِن و پاشه اَو آزاد گِرِن.

پولس و سیلاس شَهره بیریه دا

¹⁰ بِرایا جیدا پولس و سیلاس شَودا رِگِرِنَ شَهره بیریه. وقته اَو گَهَشتِنَ وِدَره، چُنَ دیرا یهودیادا.

¹¹ یهودیه وِدَره ژه وان یهودیه گو تسالونیکیه دا بون خُدان اصل و نصبتِر بون. اَوان کلام بِ اشتیاقه قَبول گِرِن و همو رُژه نِویسارِت مُقدس باش دِخاندِن گو بِبینِن کانه اَو دِشدَنَ هَ وِسانَ گو اَو مِرُوَنَ دِبِژِن آن نه.

¹² بَجا وِسا گَلَک یهودیا ایمان اینا و هَمژی هَژمارا ژِن و مِره رِزدارَ یونانی گو ایمان اینان بون گِم نَبون.

¹³ بله وقته یهودیه اَهله تسالونیکیه زانین گو پولس بیریه دا ژی باسه کلاما خدا دِگَت، اَو هاتنَ وِدَره ژی و شَهر ناویِگ دان و خلق تحریک گِرِن.

¹⁴ ایجا بِرایا جیدا پولس رِگِرِنَ بَ لِوا بَحره، بله سیلاس و تیموتائوس مانَ بیریه دا.

¹⁵ اَونه گو گَل پولس دا چو بون، حَتا شَهره آتنه گَل ویدا چُن و پاشه پولس دَستور دا وان گو ژه وِدَره بِزُورِن و گَلَک زو سیلاس و تیموتائوس رِگَنَ لاره وی.

پولس آتنه دا

¹⁶ وقته پولس شَهره آتنه دا هِویا وان بو، ژه دیتِنا وه هِنده گو شَهَر تِژی بُت بون، رِحا خودا گَلَک پَرِشَ بو.

¹⁷ بَجا اَوی ناو دیره دا گَل یهودیا و مِرُوه دیندار و هَمژی همو رُژه ناو بازاره دا بَحث دِگِر.

¹⁸ هِندَ فیلسوفه اپیکوری و رواقی ژی گَل پولس دا بَحث گِرِن. ناو واندا هِندَگا دِگُتن: «اَو مِرُوه چیرِگ دِرِژ چه دِخازیت بِژیت؟» اَونه دی دِگُتن: «اَو رَنگه مِرُوَگه دِدَت گو خدایانه بیانی وَعظ دِگَت.» چون گو پولس راستا عیسی دا و ژه ناو مِریادا رابونا وی وَعظ دِگِر.

¹⁹ اَوان پولس راگِرِن و اَو بِرِنَ شورایا آریوپاگوسه و گُتنَ وی: «اَم دِگارِن بِزانِن اَو دَرسا تازَ گو تِ دِدَی چیَ؟

²⁰ چون گو قِسه تَ بَ گوهه مَ عَجِب تِن. بَهنده اَم دِخازِن بِزانِن گو معنیا وان دِشدانَ چیَ.»

²¹ تواوی خلقه آتنه و اَو مِرُوه بیانیَ گو تِدا دِژیان، چه شُل نَدِگِرِن خِنجی هِنده گو راستا عَقیده تازَدا قِسَ گَن آن بِبیهیسِن.

²² ایجا پولس، ناوَگا آریوپاگوسه دا راوَستا و گُت: «گَلی مِره آتنه، اَز دِبینِم گو اون همو آلیادا گَلَک دیندارِن.

²³ چون گو وقته اَز ناو شَهری دا دِگَریام و مِن دِبَرخودا وان دِشده گو اون پَرستِش دِگَن، مِن قُربانگَهَگ پَیدا گِر گو سَر وه هاته بو نِویساندِن: ”بُ خدایه نَناس.“ نَهَ، اَز بُ وَ باسه اَوه نَناس دِگَم.

²⁴ «اَو خدایه گو دُنیا و هَچی دِشدا گو تِدایَ آفِراند، خُدانه اَسمان و عَردیَ و اَو ناو معبدِت گو بِ دَسته بَشَری هاتنَ چه گِرِن دا ناژیت.

²⁵ دَسته بَشَری نِگارِن بُ وی خِذمَته بِگَن، وِسا گو مِرُو بِژیت اَو محتاجی دِشدَگه یَ، چون گو اَو بوخو ژیانه دِدَتَ تواوی بَشَری و نَفَسه دِدَتَ همو دِشدی.

²⁶ اَوی تواوی مِرُوه همو مِلَتا ژه مِرُوَگه چه گِر گو سَر تواوی عَردی بژین؛ اَوی زَمانِت گو پِشتِر معلوم بونَ و اَو جیه گو اَو دِبی تِدا بژین کِفش گِر.

²⁷ گو خلق دوو خدا بِگَرِن، بَلگو بِچِنَ بُ آلیه وی و اَوی پَیدا گَن، دوزَ گو خدا ژه مَ چی یگا دور نینَ.

²⁸ چون گو: ”ناو ویدا اَم دِژین و دِقِلقِلِن و هَنَ؛“ هَ وِسا گو حتا هِندَ شاعره وَ گُتِنَ گو: بَراستی گو اَم ژه نَسلا وینَ؛“

²⁹ بَجا چون اَم ژه نَسلا خدانَ، اَم نابی فِکِر گَن گو خداتی بینا زِر و زیو و بَرَگه یَ گو بِ هُنر و هِشه بَشَری هاته بیتَ چه گِرِن.

³⁰ زَمانه به عاقلیتیه دا خدا چاوه خو سَر وان دِشدانَ گِردا. بله نَهَ اَو بُ تواوی مِرُوا له همو جیادا اَمِر دِگَت گو تَوبَ گَن.

³¹ چون گو خدا رُژَگ کِفش گِریَ گو وه رُژه دا بِ واسِطا اَو مِرُوه گو بوخو بِژارتیَ دیه سَر دُنیایه بِ عدالته قضاوته بِگَت؛ و خدا بِ راگِرِنا وی مِرُوی ژه ناو مِریادا، راستا وه شُله دا اطمینان دایَ همو کَسه.»

³² وقته راستا رابونا ژه ناو مِریادا بیهیستِن، هِندَگا پِکَنیه خو له گِرِن، بله اَونه دی گُتن: «اَمه جارَگه دی راستا وه یگه دا گوهه خو بِدَنَ تَ.»

³³ ایجا پولس ناو واندا دَرکَوت و چو.

³⁴ بله هِندَ مِرُو کَتنَ گَل ویدا و ایمان اینان. ناو وان مِرُوادا دیونیسیوس گو اَندامَگه شورایا آریوپاگوسه بو، ژِنِگَگ گو ناوه وی داماریس بو و هِندَ مِرُوه دیتِر ژی هَبون.