Yaꞌkub 5 - Sabahagiꞌ Kitab Tawrat: Panagnaan ni Awwal Jaman maka Kitab Injil

Kasusahan ni jama dayahan

¹ Na kuwan kaam ma dayahan ma mumpung altaꞌ para ni dī bi sadjaꞌ, ituu bitsala ku ningkaam. Subay kam magtangisan sampay mag-ulawi sabapan kamalasahiyan ma song takka pa mman bi bbos-bbos.

² Altaꞌ bi ina ma bay nnaꞌ bi, gabuk jaꞌ. Siga pamakoy bi pun ma bay nnaꞌ bi, kineket jaꞌ meꞌ mananap.

³ Damikiyan, mmas ka pilak porol ma bay pumpung bi, ginahaꞌ jaꞌ du. Boꞌ inaa na sina mintu tandaꞌ bi bay magnapsu mulakab pag taabut llaw hukuman bbos-bbos. Lagiꞌ na, napsu mulakab bi ina mintu kabinasa na ni baran bi meꞌ karuha api katutung ni oy-oy taabut na.

⁴ Kaam ina, saꞌ ba, yaꞌ san pinōꞌ meꞌ bi gadji sagannap jama ma bay buwat ni tanaꞌ bi, labba man siga ilooy ma ngalabas pa ilooy ma ngattom? Daa kam mista ga yaꞌ takale Tuhan Sangat Kawasa bitsala da magdubduban kaam.

⁵ Kaam ina, lay jaꞌ ngumpohan dī bi altaꞌ ka nganduwan oy-oy jaꞌ ma kinanapsuhan meꞌ bi ntuu ni junyaꞌ. Sibuꞌ du karuha bi ka sapiꞌ pinalammok yaꞌ san tabista na song sinumbaliꞌ na ya.

⁶ Luu gi sina kam bay kaaku malkalaꞌ jama ma yaꞌ san luu dusa da sampay man da pinapatoy sabapan bi. Boꞌ yaꞌ san luu dapat da ngatu.

Siga sukuꞌ Papuꞌ Isa subay natasan kabinsanaan

⁷ Na kuwan kaam siga danganakan, bong hati kam bininsanaꞌ, tatasan bi jaꞌ halloman bi ngagad katakka Papuꞌ. Akigun bi jaꞌ pasensiya siga pahuhuma ngagad buwaꞌ tinanom da. Pus da bay tanom, agad da jaꞌ du uwan sibuwa ngabut sampay katapusan panguwan, boꞌ da ngattom.

⁸ Kaam pun, subay du luu pasensiya bi ngagad. Patagguhun bi iman bi mmeꞌ ni Papuꞌ tanne-pasuꞌ batan tapit na sina katakka na.

⁹ Siga danganakan, daa kam mitsala pagkahi bi pa kalaatan taggahaꞌ kalabuan na baw kam mintu hukuman. Batan tapit na sina katakka Huwis looy ma Patingkat. Dari ko ngawon, luu na ya nangge ni poan lawang bi.

¹⁰ Na siga danganakan, ni kapasal tatas njawom kabinsanaan, ikutun bi jaꞌ bay kadarihan siga kanabi-nabihan ma bay malahil palman Tuhan mattoꞌ. Atas da bay natasan jinisan kabinsanaan kalnaꞌ Tuhan.

¹¹ Siga sukuꞌ Tuhan meꞌ sila ilay ma bay natas njawom kabinsanaan, katoonan tabi na du, pag toklas na, sinupaatan sila. Pamintangan bi na Boꞌ Job. Bay du taaka bi bong pooy ehe tatas na naggaan jinisan kamalasahiyan mattoꞌ. Damikiyan, tasayu bi na du bong pooy ehe supaat bay hinudhuran meꞌ Tuhan niiya ni katapusan. Dari mandooy, tabista tabi na, basta pannoꞌ atay Tuhan leꞌ luuy ka timbang ningkitabi.

Katapusan palbiatan si Yaꞌkub

¹² Siga danganakan, luu gi situ bāꞌ ku puntukan banahan ningkaam. Subay kam yaꞌ napa. Meꞌ kitabi itu sukuꞌ si Isa, pagka kitabi bonto, san kitabi yaꞌ na napa batan yaꞌ kitabi maluba bitsala tabi. Sangkon, daa na kam napa ni awon sulgaꞌ atawa junyaꞌ atawa awon oy maka oy na. Bong yuk bi, “Ohoꞌ,” saddong ohoꞌ sadjaꞌ. Bong yuk bi, “Niyaꞌ,” saddong niyaꞌ sadjaꞌ. San daa na kam napa, taggahaꞌ dari laat bi na baw ni bandingan Tuhan.

¹³ Bong luu ni baanan bi tuwaꞌ kasusahan, subay ya maku tabang pa Tuhan. Kuwan kaam baw ma njawom kagakan, subay kam ngalang pudji pa Tuhan.

¹⁴ Bong luu kam bay tuwaꞌ saki, subay nohoꞌ kinaddoan siga pa-mmean langga nohoꞌ makuhan iya duwaa pa Tuhan. Njawom da maku duwaa, subay sila muusan bumbunan na ka insallan ni awon Papuꞌ Isa.

¹⁵ Na bong ina tud mangando du siga pa-mmean bi pa Tuhan ngabbul duwaa da, malaingkan kaulian jaꞌ sina jama looy ma saki. Maka pinabalik na sina anggawtaꞌ na meꞌ Papuꞌ. Maka bong luu dusa na lay na akuhan na ni pag-awpan da, inampun na du sina ya meꞌ Papuꞌ.

¹⁶ Sangkon bong kam bay kapabuwat dusa, subay du kam mangaku ni pagkahi bi sampay sipaku-paku duwaa supaya kam kaulian meꞌ Tuhan. Na bong ina jama intong maku duwaa pa Tuhan, mastiꞌ kawasahan jaꞌ duwaa na.

¹⁷ Pamintangan bi na bay jaman Nabi Eliyas. Iya ilay meꞌ kitabi du manusiyaꞌ sadjaꞌ. Ni kaintong na, jaman na bay maku duwaa pa Tuhan yaꞌ nohoꞌ uwan, yaꞌ du bay uwan lahat njawom tallun taun ka nnom buwan.

¹⁸ Pag-anu siꞌ, lay na baw ya maku duwaa pabalik mari uwan na lahat. Dari lai du bay uwan palandos sampay lay na tomoꞌ pabalik katumbu-tumbuhan maka luu na balik balanjaꞌ ni lahat da.

¹⁹ Siga danganakan ku, bong luu ni baanan bi bay magsiꞌ man kabanahan, boꞌ luu kam disu bay moo iya mmeꞌ ni kabanahan pabalik, tud mahap sina.

²⁰ Batan subay katoonan bi, bong ina luu jama bay takoleꞌ bi nohoꞌ ngalabbahan siga dusa na, lay na ya paddusan bi man jawom katiksaan nyawa. Dari san bay meka dusa na, lay na puwas. Ngkod tuu jaꞌ bitsala ku. Wassalam