Yaꞌkub 4 - Sabahagiꞌ Kitab Tawrat: Panagnaan ni Awwal Jaman maka Kitab Injil

Poonan pagsaggaan

¹ Na ni kapasal pagsaggaan ka pagjawapan ni siga baanan bi, oy ilay bistahan bi poonan na? Saꞌ ba sabap luu napsu bi maat ma magsaggaꞌ ka pamiki bi ma mahap?

² Bila ina luu karomanan bi, boꞌ ya takoleꞌ bi, ilooy ma dangkiꞌ na kam sampay tomoꞌ na dawom bi mapatoy. San ina kam magsaggaꞌ sampay sasaꞌ-manasaꞌ, masi du yaꞌ takoleꞌ bi ilooy ma kinailohan meꞌ bi. Padahal, kon ina yaꞌ takoleꞌ bi bbuwatan ma karomanan bi sabap yaꞌ kam bay maku pa Tuhan.

³ Pun sakali lay na kam maku, boꞌ kam yaꞌ bay kabuwanan, pin ilay meꞌ looy sabap yaꞌ mahap niyat atay bi maku. Iya paku bi yana isu-isu pakaradjaan ma masannang dī bi sadjaꞌ.

⁴ Bong ina pakaradjaan meꞌ naa paabak bi, yaꞌ kam magkanaalla pa Tuhan. Ilooy ya meꞌ punu njawom atay bi hāl junyaꞌ. Bong yaꞌ katoonan bi, tiyap-tiyap ina pakaradjaan junyaꞌ inisbat meꞌ bi, malaingkan nikutan kam Tuhan maka sibuꞌ du kam ka manta iya.

⁵ Daa kam mista suwat njawom kitab meꞌ baliyu pingkaꞌ jaꞌ, ilooy ma yuk na, “Rū ma bay pinaasok meꞌ Tuhan pa jawom atay tabi pangimbu. Kainagon na subay Tuhan numbul satu kinaasean meꞌ tabi.”

⁶ Na sasat ni junyaꞌ tuu itu tud basag, sugaꞌ mas basag gi aseꞌ-tabang Tuhan njataꞌ tabi. Sat na jaꞌ, subay diyoꞌ pangatayan tabi. Batan yuk suwat njawom kitab, “Kinuntra meꞌ Tuhan sagannap ma abbuhan, sugaꞌ tabangan na sagannap ma diyoꞌ pangatayan da.”

⁷ Sangkon, subay kam wā lillaꞌ ni kahandak Tuhan. Maka saggaun bi siga sasat Ibilis, boꞌ na palakka na mman bi.

⁸ Patapit na kam pa Tuhan, boꞌ na patapit pa mman bi. Kaam ma amu-amu buwat dusa, labbahan bi na dusa bi. Kaam ma duwa-duwa pikilan bi, patattogun bi na pamiki bi mmeꞌ ni Papuꞌ.

⁹ Man bi nnaa tatto-tatto, gam na kam magtangisan ka magkarukkaan sabapan dusa bi. Man bi nnaa gāk, gam na kam sasso ni dusa bi.

¹⁰ Maka magpadiyoꞌ na kam pa Tuhan, boꞌ bi inangkat meꞌ na.

Daa kita os-os manding jama pa kalaatan yaꞌ san luu buktiꞌ ga dusahan sila

¹¹ Siga danganakan, daa kam mitsala pagkahi bi pa kalaatan. Bong ina kam buwat meꞌ naa atawa pun os-os manding pagkahi bi pa kalaatan, sat bi saꞌ māꞌ yaꞌ luu pūs saraꞌ Tuhan pasal meꞌ sikaaseꞌ-kaaseꞌ. Sibuꞌ du karuha bi ka bay buwat dī bi magpandoy-pandoy manding saraꞌ Tuhan bong tuwaꞌ atawa niyaꞌ. Boꞌ saꞌ sina sukuꞌ bi manding saraꞌ na. Kaam ina, sukuꞌ bi tinggal ngasip jaꞌ.

¹² Disu du sina poonan saraꞌ maka isu-isu iya huwis sabanna, yana Tuhan. Damikiyan, iya du ngantanan kawasa-kapatut nalamat manusiyaꞌ atawa ngahansu sila. Sangkon subay kam yaꞌ os-os manding pagkahi bi pa kalaatan batan yaꞌ luu kapatut bi ngahukum.

Yaꞌ tatantu ta kaadaan ta ni sinōng

¹³ Na adakala mintu ngabbu na baw kam pasal kaadaan bi ni sinōng. Pakale doꞌ kam. Kasohean ina, yuk da, “Sumawung atawa murambuwaꞌ lome doꞌ kami pa disu daira ngusaha. Ndooy na doꞌ kami dantaun maglitu, boꞌ kami magkadayahan.”

¹⁴ Na salla na, yaꞌ san katoonan bi bong oy katuwaꞌ kaam sumawung-sumilan. Kaallum bi ina meꞌ karuha humbu du, batan samantalaꞌ du luu, pag-anu, lanyap du.

¹⁵ Subay siꞌ gam na meꞌ tuu halling bi, “Bong malaingkan mintu kami tinugutan du meꞌ Tuhan sampay binuwanan umu, meꞌ tuu, meꞌ tuu pabuwat kami.”

¹⁶ Sugaꞌ kasohean baw kam ina, ngabbu jaꞌ kam saula-ula kaam magbayaꞌ ni mimon-mimon. Boꞌ ko, maat silay ngabbu meꞌ looy.

¹⁷ Indanan bi. Soysoy ina toon bong oy pataꞌ subay pabuwat na, boꞌ yaꞌ isbat na, ndusa sina ya.