Yaꞌkub 3 - Sabahagiꞌ Kitab Tawrat: Panagnaan ni Awwal Jaman maka Kitab Injil

Subay agak ta behe ta

¹ Siga danganakan ku, mas mahap gi sina bong yaꞌ kalanduꞌ eka bi dari guru. Batan kitabi itu siga guru, mas adil hukuman Tuhan njataꞌ tabi man sagannap ma saꞌ guru.

² Kamasaꞌ kitabi itu manusiyaꞌ, meka jaꞌ du jalan man tabi magsāꞌ, labi na ni bitsala tabi. Bong siꞌ ina luu jaꞌ jama yaꞌ kuhi magsāꞌ mitsala, malaingkan iya jama yaꞌ luu sutsutan niiya. Batan bong ina takaya na ngagak behe na, mastiꞌ takaya na du ngagak baran na labbasakayi.

³ Behe ta ina, minsan dikiꞌ, mehe kawasa na. Pamintangan bi na kakkang. Minsan ina dikiꞌ, bong sangon ta ni behe kuraꞌ, malaingkan tapagbayaan ta na baran na labbasakayi batan tapaling ta na paninggai-paninggai karomanan ta.

⁴ Damikiyan, sibuꞌ du sina karuha na ka adjung. San mehe kasku adjung sinugan leꞌ baliyu landos, ilooy man maling iya, bbuwatan dikiꞌ du, yana bansān. Dari tapaling na adjung looy paninggai-paninggai karomanan tukang mansān.

⁵ Meꞌ naa du sina hantangan behe manusiyaꞌ. Minsan ya kalangkapan dikiꞌ ni baran, ni kabasag na ngabbu, baꞌ-bāꞌ na takaya na buwat jinisan pakaradjaan mehe. Behe ina meꞌ karuha api dikiꞌ. Bong api yaꞌ njagahan, ngalelet na sampay tutung na guwangan mehe.

⁶ Damikiyan behe ta pun, bong yaꞌ du njagahan, subay ga api nalkaꞌ ma kabinasa ningkita sampay ni pagkahi ta manusiyaꞌ. Yaꞌ taambat kalaatan tapabuwat meꞌ behe ta. Boꞌ inaa na katamak ni pagkajama ta labbasakayi.

⁷ Kitabi itu manusiyaꞌ, takaya tabi magbayaan mimon jinisan sattuwa ka manuk-manuk ka balnyawa ma maglelehan taꞌ gumi sampay mimon balnyawa ni dilawut.

⁸ Sugaꞌ kinawnan behe manusiyaꞌ, yaꞌ luu jama bay kapagbayaan behe na supaya yaꞌ mitsala maat. Behe ina os-os jaꞌ mōꞌ kalaatan sampay kabinasa ni jama meꞌ karuha latsun makapatoy.

⁹ Bosbos kita makoy behe ta man mudji Mmaꞌ ta Tuhan; bosbos man ta numpaan pagkahi ta manusiyaꞌ ma bay pinapayak ni limbagan arat-tabiat Tuhan.

¹⁰ Dari poonan disu du behe, mandooy na pōꞌ pudji ka sumpaꞌ. Sugaꞌ siga danganakan ku, tud yaꞌ silay dari meꞌ looy.

¹¹ Pamintangan bi na poon boheꞌ. Yaꞌ sina luu haboy pōꞌ boheꞌ langngin ka boheꞌ maasin.

¹² Damikiyan, yaꞌ sina luu poon igira magbuwaꞌ jaytun, atawa poon anggul magbuwaꞌ igira. Maka yaꞌ du luu jama koleꞌ boheꞌ langngin man dilawut. Damikiyan behe ta pun, yaꞌ du dari bosbos mitsala mahap, bosbos maat.

Arat-tabiat jama halul-akka

¹³ Na soysoy kam mista dī bi halul-akka saltaꞌ na ngantanan pangahati lawom, subay buktian bi ka kawul-piil ayad. Boꞌ na, subay diyoꞌ pangatayan bi meꞌ ndang tabiat jama halul-akka.

¹⁴ Sugaꞌ bong ina luu dangkiꞌ atawa gigit njawom atay bi atawa pun isu-isu parasahan bi du pinaruli meꞌ bi, daa na kam ngabbu saula-ula luu pangahati bi lawom. Yaꞌ du sina luu kabanahan ni bitsala bi.

^15-16 Batan bong ina kita dangkiꞌ atawa baran ta jaꞌ kagampangan ta, mastiꞌ luu jaꞌ paantup kalingogan maka jinisan kalaatan. Akka meꞌ looy ilay, saꞌ ga lakka man Tuhan, arapun lakka man seytan. Maka ilooy ilay akka manusiyaꞌ ma mandang jaꞌ hāl junyaꞌ.

¹⁷ Boꞌ jama ma luu pangahati da lawom man Tuhan, duhuꞌ-duhuꞌ, sutsiꞌ kawul-piil da. Pasunuꞌ, tiggo sila ngulihal kasalassayan. Boꞌ na, gampang gi sila ni parasahan jama. Kuhi sila tinoan. Basag sila manimbang ni jama maka mōꞌ sila jinisan kaayaran. Yaꞌ sila minig jama maka arat-tabiat da wā magbēꞌ ka kabanahan ma kinapitsayaan meꞌ da.

¹⁸ Boꞌ na, jama meꞌ looy ilay ma tiggo ngulihal kasalassayan, bong dalil ta pa pahuhuma, pagka sila bay naburan kasalassayan, pag toklas na, meka du kaintongan tomoꞌ ni paglahat da.