Yaꞌkub 1 - Sabahagiꞌ Kitab Tawrat: Panagnaan ni Awwal Jaman maka Kitab Injil

YAꞌKUB

¹ Ituu itu aku, si Yaꞌkub, disu ata Tuhan ka Papuꞌ tabi si Isa Almasi. Itu suwat ku pa mman bi siga sukuꞌ Tuhan ma magkanatan ni kalahat-lahatan, yana kaam ma meꞌ aku du tabeꞌ ni panubuꞌ siga anak Nabi Yaꞌkub sikasapu-duwa. Salam duwaa ningkaam sikamimon.

Palbiatan ni jama njawom kasusahan

² Siga danganakan, bila kam tumabbaꞌ njawom jinisan kasusahan, bilangun bi jaꞌ kagakan.

³ Batan kaam pun ina, katoonan bi du katabang ningkaam. Batan luu-luu kasusahan bi ma nuwayan pangando bi pa Tuhan, bong kam amu-amu mangando niiya, malaingkan pataggu na pin sina iman bi natasan oy-oy kamalasahiyan.

⁴ Sangkon tatasan bi jaꞌ san gi oy katuwaꞌ ningkaam. Bong siꞌ ina kam natas, pag toklas na, taggu na iman bi ngabut sampay yaꞌ na luu salla ni kawul-piil bi samasakali.

Subay kitabi maku pangahati pa Tuhan

⁵ Bong luu ni baanan bi kulang pangahati, maku jaꞌ kam pa Tuhan. Kabuwanan jaꞌ sina kam batan Tuhan ina gāk nabangan mimon jama ma maku niiya. Boꞌ yaꞌ sina luu loog-loog atay na bong kitabi maku.

⁶ Sugaꞌ bila kam maku, subay kam tattap manganna nduwan meꞌ Tuhan. Batan jama hawal-hawalan ina, sibuꞌ du karuha na ka parang maghapoy-hapoy meꞌ baliyu.

⁷ Jama meꞌ looy ilay, san niyaꞌ na ya ngaholat koleꞌ oy maka oy na man Tuhan,

⁸ batan duwa-duwa jaꞌ pamiki na. Bosbos ya mangando pa Tuhan, bosbos niyaꞌ. Oy-oy pabuwat na, yaꞌ luu katantuhan na.

Palbiatan ni jama miskin ka dayahan

⁹ Siga danganakan, kaam ma miskin, luu du baw sina man bi gāk san kam miskin batan bong pa Tuhan, kaam jama balkanan.

¹⁰ Kuwan kaam ma sawraga, luu du baw sina man bi gāk, batan meꞌ kaam siga sukuꞌ si Isa na, lay na kam magpadiyoꞌ mangasa pa Tuhan, saꞌ na altaꞌ bi asahan bi. Katoonan bi na kaallum bi ka altaꞌ bi sibuꞌ du karuha da ka sumping jambangan, samantalaꞌ du tatas da.

¹¹ Boꞌ inawnan jambangan ina, bong kapasuan kalanduꞌ leꞌ mataallaw, mastiꞌ layu jaꞌ sina sampay maglatakan na sumping da. Maka mimon lingkat da lungay du. Siga sawraga pun ina, meꞌ naa du sina karuha da. Njawom da magtuyuꞌ ngusaha, song hallom mastiꞌ matoy du sila, boꞌ yaꞌ du taboo da altaꞌ da.

Pasal kasusahan ka siga sasat

¹² Na sagannap ma amu-amu natas njawom kasusahan ma nuwayan pangando da ni si Isa, mastiꞌ sinupaatan jaꞌ sina. Batan pagka tumatandaꞌ na takkoꞌ pangando da, koleꞌ jaꞌ sina sila kasampulnaan nyawa saumu-umu ma ndang bay njanjiꞌ meꞌ Tuhan ni sagannap ma maaseꞌ niiya.

¹³ Na bong luu sasat moo-moo kam buwat dusa, daa kam halling man Tuhan. Batan Tuhan ina yaꞌ nasat manusiyaꞌ. Boꞌ na, niyaꞌ du ya tasasat.

¹⁴ Arapun ilooy ya moo sasat ni manusiyaꞌ yana napsu da mismu moo-moo sila buwat kalaatan.

¹⁵ Bong ina duwan da napsu da buwat kalaatan, malaingkan dari dusa ninsila. Maka bong kala meꞌ da buwat dusa, pag toklas na, tiksaꞌ nyawa da.

¹⁶ Sangkon siga danganakan, kakasi ku, tud magsāꞌ sina kam bong kam mista luu lamud Tuhan ni siga sasat njataꞌ bi.

¹⁷ Mmaꞌ tabi Tuhan ina tattap mahap. Mimon ladjikiꞌ sampay kaayaran ma takoleꞌ manusiyaꞌ lakka man ilooy ma bay mapayak mimon sūꞌ taꞌ langit, yana Tuhan. Yaꞌ luu meꞌ na baluba san dangkitiꞌ.

¹⁸ Man kahandak na, lay na ya muwanan kitabi kaallum bahau sabap meꞌ tabi pitsayaꞌ ni umanat kabanahan pasal Almasi. Maksud na supaya tumatandaꞌ na kitabi patingkat niiya man mimon-mimon ma bay pinapayak meꞌ na.

Palman Tuhan subay binean

¹⁹ Na siga danganakan, kakasi ku, indanan bi. Kitabi itu subay badja pakale. Daa hangat kitabi na jaꞌ mitsala. Maka daa kitabi os-os lasu.

²⁰ Batan bong ina jama lasu, yaꞌ luu tapōꞌ da arat-tabiat intong ma nulut ni kahandak Tuhan.

²¹ Sangkon labbahan bi na mimon ma katamak ningkaam ka mimon kalaatan ma pinaabak meꞌ jama, boꞌ bi magpadiyoꞌ na pa Tuhan. Maka ngasip na kam ni palman na ma lay na bay inannaꞌ njawom atay bi. Batan palman na ina kasalamat ningkaam.

²² Daa sat pakale jaꞌ kam ni palman na, arapun bean bi du. Batan bong ina yaꞌ bean bi, ngandupang jaꞌ kam dī bi bong kam mista salamat kam.

²³ Batan soysoy ina pakale ni palman Tuhan, boꞌ yaꞌ du bean na, sibuꞌ du karuha na ka jama bay jaꞌ nanding dī na ni sammin

²⁴ boꞌ yaꞌ san bay intu na. Boꞌ lay jaꞌ ya pōꞌ lumān sampay takupan na na salla ni dagbos na.

²⁵ Sugaꞌ soysoy ina maliksaꞌ palman Tuhan paayad sampay tattap mean iya, malaingkan mehe supaat njataꞌ na. Batan palman Tuhan ina, yaꞌ luu salla na samasakali. Boꞌ na, kaboo jama lagi pa jawom kasumunsayaan soysoy ngasip. Daa jaꞌ kita meꞌ kasohean, pus da bay kale palman Tuhan, magti lay du takupan.

Agama sabanna

²⁶ Na bong ina kam luu mangaku mag-agama boꞌ yaꞌ san pandoy ngagak behe bi, ngandupang jaꞌ kam dī bi. Agama meꞌ looy ilay yaꞌ luu kapuspusan na.

²⁷ Ilooy ya binilang meꞌ Mmaꞌ tabi Tuhan agama sabanna ma yaꞌ luu tamak na, meꞌ tuu: Subay kita nulung ga iluꞌ-iluꞌ iyatin ka ga bawu danda ma njawom tiksaꞌ. Maka subay kita patā man mimon kalaatan ma pinaabak meꞌ siga jama ma yaꞌ ngisbat Tuhan.