Yahiya 9 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Isa ngulian jama buta

¹ Na disu waktu, sasang ga si Isa lumān, lay na baw sila ngita lalla buta man jawom kūn induꞌ na lagi.

² Dari tilaw ga mulit na siꞌ, “Tuwan, ongoy na la lalla naa buta man jawom kūn induꞌ na lagi? Man iya kina dusahan atawa man ga induꞌ-mmaꞌ na?”

³ Pag tampung si Isa, “Saꞌ bina man dusa na atawa dusa induꞌ-mmaꞌ na, arapun kon na meꞌ naa supaya takita meꞌ jama kawasa Tuhan ngulian iya.

⁴ Batnaa tu, padpad luu gi dapat tabi, subay pabuwat tabi na pabuwatan ma bay sohoꞌ ilooy ma bay mapitu aku. Bong nnaꞌ ta pa disu llaw, huwas-huwasan tabi na buwat padpad masi ninag mataallaw, batan pag taabut sangom na, yaꞌ na luu tapabuwat tabi.

⁵ Halloman ku masi luntuu ni junyaꞌ, aku na situ sūꞌ ma muwan dantaꞌ ni manusiyaꞌ.”

⁶ Lupus si Isa siꞌ bay mitsala, ilooy ma lay ya ngaluraꞌ taꞌ tanaꞌ, boꞌ na ngaddun momok tanaꞌ ka boheꞌ luraꞌ na binuwat pesak. Pag lupus, lay pineesan meꞌ na taꞌ mata lalla looy siꞌ ma buta,

⁷ boꞌ na halling, “Kosoan nu na mata nu pilay pa boheꞌ Silowam.” (Hatiyan Silowam, “sinohoꞌ”.) Dari lay na pilay lalla looy ngosoan mata na. Lupus jaꞌ siꞌ, ngita na ya sampay lay na ya moleꞌ.

⁸ Pag lay jaꞌ ya takita meꞌ siga jama ni bihing lumaꞌ da sampay ga kasohean ma bay pingkaꞌ ngita iya magpamaku sīn, ilooy ma yuk da, “Saꞌ gi kina inaa lalla looy ma wā ningkōꞌ-ningkōꞌ magpamaku sīn?”

⁹ Tampung kasohean siꞌ, “Iya na bina.” Sugaꞌ yuk kasohean baw, “Ssaꞌ bina, arapun ingbas jaꞌ sila.” Sugaꞌ yuk lalla looy, “Aku na bitu la.”

¹⁰ Pag tilaw da, “Bong baw meꞌ naa, pooy lay la meꞌ mata nu bay kaulian?”

¹¹ Pag tampung na, “Luu ba siꞌ ndooy lalla looy inawnan si Isa bay ngaddun pesak boꞌ pineesan taꞌ mata ku. Pag-anu, boꞌ ku lay sohoꞌ na ngosoan mata ku pilay pa boheꞌ Silowam. Dari paddus jaꞌ ku bay ngosoꞌ ndooy, ilooy ma ngita na ku.”

¹² Tilaw da siꞌ niiya, “Ninggai na lalla looy?” Yuk na, “Tau ta na la.”

¹³ Dari siꞌ, lay boo da lalla looy pa mman ga Parisi inaruhan.

¹⁴ Batan llaw man si Isa bay buwat pesak sampay ngulian mata lalla looy yana Llaw Pahali.

¹⁵ Pag takka da, tinilaw na lalla looy meꞌ siga Parisi bong pooy meꞌ mata na bay kaulian. Yuk na ninsila, “Lay jaꞌ pineesan ka pesak meꞌ lalla looy ma inawnan si Isa. Pag lay jaꞌ kosoan ku, ilooy ma ngita na ku.”

¹⁶ Yuk kasohean Parisi baw siꞌ tu, “Lalla ma bay buwat meꞌ looy ilay, saꞌ silay lakka man Tuhan batan llangga meꞌ na saraꞌ pasal Llaw Pahali.” Sugaꞌ yuk kasohean baw, “Bong baw bilay ya baldusa, pooy baw meꞌ na nduwan buwat kahaylan-haylan meꞌ tuu?” Dari ilooy ma magsulemaꞌ na pamiki da.

¹⁷ Pag-anu, tinilaw na baw meꞌ da lalla looy ma bay buta, yuk da, “Bong kau, oy kumpas nu pasal lalla looy pagka iya sambat nu bay ngulian mata nu?” Pag tampung lalla looy siꞌ, “Bistahan ku, nabi ya.”

¹⁸ Sugaꞌ siga Yahudi looy siꞌ tu, yaꞌ kuhi pitsayaꞌ lalla looy bay pingkaꞌ buta. Dari lay doꞌ tawag da induꞌ-mmaꞌ na.

¹⁹ Takka jaꞌ siꞌ sila, lay sila tinilaw meꞌ siga Parisi, “Ituu na kitu anak bi? Bana kitu buta man jawom battong nu lagi? Pooy meꞌ mata na bay kaulian?”

²⁰ Tampung ga induꞌ-mmaꞌ na siꞌ, “Ohoꞌ, inaa na bina anak kami, maka bana du ya bay buta labba man waktu na bay pinamaddihan.

²¹ Sugaꞌ pasal meꞌ na ngita batnaa, yaꞌ baw katoonan kami bong pooy atawa pun bong soy bay ngulian mata na. Tilawun bi na ya. Toa na du bina ya. Pandoy na du sina mitsalahan dī na.”

²² Na kon da siꞌ bay mitsala meꞌ looy sabap tawu sila ni siga pa-mmean Yahudi. Batan katoonan da pag-isunan siga pa-mmean ndooy yaꞌ pinadari paasok pa jawom langga soysoy bay mangaku si Isa yana Almasi.

²³ Ilooy silay sangkon yuk ga induꞌ-mmaꞌ na, “Tilawun bi na ya. Toa na du bina ya.”

²⁴ Pag-anu siꞌ, lay na baw linganan da pabalik lalla looy ma bay buta. Maka yuk da niiya, “Magsabanna na ko ba ni awpan Tuhan. Katoonan kami du saꞌ lalla looy bay ngulian kau batan baldusa ya.”

²⁵ Pag tampung na, “Baldusa ya atawa niyaꞌ, yaꞌ baw katoonan ku. Ilooy du katoonan ku, sibuwa bay ku buta, pag batnaa ngita na ku.”

²⁶ Pag-anu siꞌ, tilaw da niiya, “Bay ko batōy na? Pooy meꞌ na bay ngulian mata nu?”

²⁷ Pag tampung na siꞌ, “Saꞌ ba, bay na siꞌ kam baan ku? Ongoy kam yaꞌ bay pakale? Ongoy taggahaꞌ nohoꞌ na baw kam binaan pabalik? Doman du kam kina dari mulit na?”

²⁸ Pag meꞌ looy jaꞌ halling na, ilooy ma lay ya pinahallingan, yuk da, “Kau ya sina mulit lalla looy. Boꞌ kami tu, mulit Nabi Musa kami.

²⁹ Kami tu, katoonan kami Tuhan bay magpalman ni Nabi Musa. Boꞌ lalla looy, yaꞌ san katoonan kami bong lakka man ninggai ya.”

³⁰ Pag tampung lalla looy siꞌ ma bay buta, “Kainu-inu baw bilay la. Lay na takoleꞌ na mata ku inulian, masi yaꞌ katoonan bi bong lakka man ninggai ya!

^31-33 Lalla looy bilay, bong ya saꞌ lakka man Tuhan, mastiꞌ yaꞌ ya kapabuwat meꞌ tuu. Labba man panagnaan junyaꞌ, yaꞌ gi baw luu bay taaka jama lay kasay buta man jawom kūn induꞌ na lagi. Boꞌ na, saliꞌ-saliꞌ du tabi toon, tiyap-tiyap baldusa, yaꞌ nduwan meꞌ Tuhan. Ilooy du nduwan, yana sagannap ma ngisbat iya ka buwat kahandak na.”

³⁴ Pag tampung ga pa-mmean looy, “Kalalaan nu! Man jawom kūn induꞌ nu lagi, ndang baldusa na ko. Tatammu nu na baw ga magpandoy-pandoyan kami.” Dari siꞌ, lay na ga ya binandaan yaꞌ na nohoꞌ paasok balik pa jawom langga.

Buta siga Parisi ni kabanahan

³⁵ Na si Isa baw siꞌ tu, pag taaka na lay pinōꞌ lalla looy man langga, ilooy ma lay du piniha meꞌ na. Pag tatammu na, tilaw na niiya, “Pitsayaꞌ ko ni Anak Manusiyaꞌ?”

³⁶ Pag tampung lalla looy, “Baan doꞌ baw ba ku Tuwan bong soy ya, boꞌ ku pitsayaꞌ niiya.”

³⁷ Yuk si Isa, “Takita nu na bina, batan iya na situ mitsala ningkau.”

³⁸ Yuk lalla looy, “Pitsayaꞌ ku ningkau Papuꞌ.” Maka lay gi ya sujud numba si Isa.

³⁹ Yuk si Isa, “Kon ku tu bay pitu pa junyaꞌ mari luu man mindoga bong soy kalabuan hukuman ka niyaꞌ. Sabapan ku, sagannap ma yaꞌ toon Tuhan, ma pinag-awnan buta, ngita na. Sugaꞌ sagannap ma mangaku ngita, magdaruhun gi sina buta da.”

⁴⁰ Na luu kasohean Parisi ndooy ma bay kale bitsala si Isa. Dari tilaw da, “Uy, patabeꞌ-tabeꞌ nu na baw kina kami ni sagannap ma buta?”

⁴¹ Pag halling si Isa, “Bong siꞌ ina kam bay mangaku buta, luu na dapat man dusa bi puwas. Sugaꞌ pagka kam mangaku ngita, yaꞌ sina puwas dusa bi.”