Yahiya 8 - Sabahagiꞌ Kitab Tawrat: Panagnaan ni Awwal Jaman maka Kitab Injil

Danda bay taabut magjina

¹ Na kuwan si Isa siꞌ tu, lay pilay pa taꞌ Punu Jaytun.

² Pag deꞌ sayu, lay na baw ya pabeleng pa langga mehe. Yaꞌ hallom, liput na baw ya meꞌ jama ndooy sampay lay na ya ningkōꞌ nganasihatan sila.

³ Yaꞌ hallom, takka na baw baanan Parisi ka ga guru saraꞌ agama moo disu danda bay taabut magjina. Ndooy siꞌ, lay ya pinatangge ni awpan sikamimon.

⁴ Yuk da ni si Isa, “Tuwan, danda tuu tu lay bay taabut magjina.

⁵ Na njawom saraꞌ bay dean Nabi Musa ningkitabi, bong danda meꞌ tuu, subay situ hiniyak ka batu mari matoy. Bong kau, subay pooy?”

⁶ Ngkon da ilay siꞌ bay nilaw meꞌ looy man da jaꞌ nallok-nallok iya kawu-kawu luu na danan man da malkalaꞌ iya. Sugaꞌ si Isa siꞌ tu, yaꞌ bay nampung, gam pin lay jaꞌ ya pakokoꞌ boꞌ na nuwat ka timbōꞌ na taꞌ tanaꞌ.

⁷ Sugaꞌ siga Parisi baw siꞌ tu, amu-amu nilaw iya. Dari ilooy ma lay ya nangge boꞌ na maan sila, yuk na, “Soysoy kam ba yaꞌ dusahan, iya na duhuꞌ ngahiyak danda tuu.”

⁸ Pag-anu siꞌ, lay na baw balik si Isa pakokoꞌ boꞌ na nuwat taꞌ tanaꞌ.

⁹ Pag takale siga Parisi ka ga guru looy siꞌ bay tampung si Isa, lay na sila magsunuꞌ-sunuꞌ palakka. Duhuꞌ, siga matatoa, boꞌ pauru ilooy kasohean ngabut sampay si Isa sa tamban ka danda looy ni tangngaan ga jama ndooy.

¹⁰ Pag-anu siꞌ, nangge na si Isa boꞌ na nilaw danda looy, yuk na, “Ninggai na Nang ga jama looy siꞌ ma bay moo kau pitu? Yaꞌ na la luu san disu bay tamban malkalaꞌ kau, saꞌ ba?”

¹¹ Pag tampung danda looy siꞌ, “Yaꞌ na la luu, Tuwan.” Dari yuk si Isa, “Aku pun, yaꞌ du ku malkalaꞌ kau. San ko moleꞌ na. Daa jaꞌ ko balik buwat dusa.”

Si Isa yana sūꞌ manusiyaꞌ

¹² Pag-anu, luu na baw disu waktu si Isa noan jama, yuk na, “Aku tu yana sūꞌ marantaan pamiki manusiyaꞌ. Soysoy mmeꞌ niyaku, yaꞌ na sila bagagap njawom lindom batan luu na sūꞌ da man da ngita lān pa kasampulnaan nyawa.”

¹³ Pag-anu siꞌ, halling siga Parisi na baw, “Kau du bina māꞌ. Bong sat kau du, yaꞌ tatantu bong bana bitsala nu.”

¹⁴ Pag tampung si Isa, “San bitu dangan-dangan ku jaꞌ mahati pasal dī ku, basta bana jaꞌ mimon bitsala ku. Batan luu katoonan ku pasal dī ku ma yaꞌ katoonan bi. Katoonan ku bong lakka maninggai ku maka paninggai tiluꞌ ku.

¹⁵ Boꞌ kaam ina manding aku, mindoga jaꞌ kam ka pamiki manusiyaꞌ ma mandang hāl junyaꞌ. Boꞌ aku baw tu, yaꞌ situ kon ku bay pitu manding jama.

¹⁶ San sabagay ku manding, mastiꞌ intong jaꞌ bandingan ku, batan saꞌ sat aku manding, luu gi limbang ku, yana Mmaꞌ ku ma bay mapitu aku.

¹⁷ San njawom saraꞌ bi, saꞌ ba, luu du bay sinuwatan basta magbēꞌ palsaksian duwa jama, malaingkan dari binana?

¹⁸ Pagka meꞌ looy, mastiꞌ subay binana meꞌ bi bitsala ku pasal dī ku, batan duwa naksian aku; disu, yana aku, kaduwa na, yana Mmaꞌ ku ma bay mapitu aku.”

¹⁹ Tilaw da baw siꞌ tu niiya, “Ninggai man Mmaꞌ nu?” Pag tampung si Isa, “Kaam ina, yaꞌ ku katoonan bi maka yaꞌ du katoonan bi Mmaꞌ ku. Batan bong siꞌ ilay ndang bay ku katoonan bi, mastiꞌ katoonan bi jaꞌ du Mmaꞌ ku.”

²⁰ Si Isa siꞌ bay mitsala meꞌ looy sasang na ndooy ni langga mehe nōꞌ ni tagan pangannaan man ngalabuꞌ saraka. Kasohean baw siꞌ tu, san sila doman nungkuban iya, yaꞌ gi du bay luu dapat da sabap yaꞌ gi bay taabut waktu bay ginantaꞌ niiya.

Si Isa māꞌ bong lakka maninggai ya

²¹ Pag-anu siꞌ, lay na baw si Isa mitsala balik ninsila, yuk na, “Yaꞌ hallom, palakka na ku. Boꞌ lahat ma tiluꞌ ku, basta yaꞌ kam kapilay. Piha bi du sina ku mintu, sugaꞌ matoy jaꞌ sina kam sampay taboo bi jaꞌ sina dusa bi pa ahirat. Basta yaꞌ du ku tatammu bi.”

²² Yuk siga pa-mmean Yahudi ndooy padisu-padisu, “Marean ta luu garaꞌ na mapatoy dī na. Ongoy taggahaꞌ yuk na yaꞌ kitabi kapilay pa lahat ma tiluꞌ na?”

²³ Yuk si Isa baw siꞌ tu ninsila, “Ndang meꞌ kaam bina lakka man junyaꞌ, pamiki bi ngkod hāl junyaꞌ du. Boꞌ aku tu lakka man sulgaꞌ. Dari pamiki ku hāl sulgaꞌ du. Kaam ina sukuꞌ junyaꞌ sadjaꞌ. Boꞌ aku ssaꞌ.

²⁴ Sangkon meꞌ halling sambat ku na siꞌ, taboo bi jaꞌ sina dusa bi matoy. Batan bong kam yaꞌ pitsayaꞌ aku na Almasi, basta yaꞌ sina kuhi puwas dusa bi.”

²⁵ Yuk da baw siꞌ tu, “Kau tu! Bong siꞌ pinaamu soy doꞌ ina ko?” Yuk si Isa baw siꞌ tu, “Uy, yaꞌ bitu hati siꞌ luu pūs bay bitsala ku ningkaam!

²⁶ Baan ta kam banahan, meka situ bitsala tapōꞌ ku man nusunan kaam, sugaꞌ daa na. Ituu jaꞌ pamāꞌ ku siga pakaradjaan ma bay takale ku man ilooy ma bay mapitu aku, ma sabana-bana bonto.”

²⁷ Na siga pa-mmean Yahudi ndooy siꞌ tu, yaꞌ tahati da awnan si Isa yana Mmaꞌ na Tuhan.

²⁸ Dari yuk si Isa ninsila, “Pag ina mintu taabut na Anak Manusiyaꞌ inangkat meꞌ bi taꞌ tehang, ndooy na sina mintu bohoꞌ tasayu bi aku na Almasi. Maka ndooy na du bohoꞌ tabista bi yaꞌ ku buwat oy maka oy na lakka man pamiki ku dī ku, arapun bean ku jaꞌ sohoꞌ Mmaꞌ ku. Damikiyan, iya du maan aku bong oy bitsala subay pōꞌ ku.

²⁹ Ilooy ma bay sabbut ku siꞌ bay mapitu aku, luu na pin ya ngunungan aku. Yaꞌ situ ya nakkatan aku batan wā ku buwat ilooy ma nulut ni kahandak na.”

³⁰ Dari sabapan bay bitsala si Isa, meka na bay pitsayaꞌ niiya.

Jama sumunsayaꞌ ka jama pinahata

³¹ Pag-anu, yuk si Isa ni siga Yahudi ndooy ma pitsayaꞌ niiya, “Bong ina kam tattap mmeꞌ ni tōꞌ ku, malaingkan kaam na mulit ku sabanna

³² maka katoonan bi na kabanahan. Boꞌ kabanahan ina, inaa na maddusan kaam mari kam yaꞌ na pinahata meꞌ oy maka oy na.”

³³ Pag-anu, yuk siga pa-mmean Yahudi ndooy siꞌ, “Kami bitu la panubuꞌ Nabi Ibrahim. Yaꞌ kami bay pingkaꞌ pinahata. Ongoy taggahaꞌ tatammu nu na baw ga māꞌ pinaddusan kami mari kami yaꞌ na pinahata?”

³⁴ Pag tampung si Isa, “Baan ta kam banahan, soysoy buwat dusa, pinahata meꞌ napsu na nohoꞌ buwat dusa.

³⁵ Boꞌ inawnan ata ina, yaꞌ luu kapatut na ni paglūng papuꞌ na. Sugaꞌ anak papuꞌ na, mastiꞌ luu jaꞌ kapatut na saumu ni paglūng mmaꞌ na.

³⁶ Sangkon, bong anak papuꞌ bay maddusan disu ata, mastiꞌ paddus jaꞌ ya man pagkaata na. Damikiyan ningkaam, bong Anak Tuhan bay maddusan kaam, malaingkan bohoꞌ sabana-bana paddus na kam man pagkaata bi.

³⁷ “Pasal kaam, ndang tasayu ku du sina panubuꞌ Nabi Ibrahim kam. Salla na, yaꞌ kam nutu arat-tabiat na. Batan kaam, doman kam mapatoy aku sabap meꞌ bi dugahan ni tōꞌ ku.

³⁸ Mingkan ilooy ma tinōꞌ meꞌ ku siga pakaradjaan bay pinakitahan meꞌ Mmaꞌ ku niyaku. Kaam pun ina, oy-oy pakaradjaan bay takale bi man mmaꞌ bi, mastiꞌ pabuwat bi du.”

³⁹ Tampung da baw siꞌ tu, “Nabi Ibrahim baw bilay Mmaꞌ kami.” Pag halling si Isa, “Bong siꞌ kam bay mattan anak Nabi Ibrahim, mastiꞌ akig bi jaꞌ kawul-piil na.

⁴⁰ Boꞌ kaam baw itu, amu-amu ngulihal meꞌ mapatoy aku san yaꞌ luu bay pabuwat ku sarī man noan kaam kabanahan ma bay takale ku man Tuhan. Nabi Ibrahim ilay yaꞌ bay pingkaꞌ buwat meꞌ kadari bbuwatan bi.

⁴¹ Boꞌ kaam ina, ilooy ya akig bi pabuwatan mmaꞌ bi ilooy disu.” Iya halling da baw siꞌ tu, “Uy, saꞌ bitu kami anak halambiyaraꞌ! Disu du bilay mmaꞌ kami, yana Tuhan.”

⁴² Yuk si Isa baw siꞌ tu, “Bong siꞌ bay mattan Tuhan Mmaꞌ bi, mastiꞌ maaseꞌ jaꞌ kam niyaku batan aku tu bay pitu lakka mman na. Yaꞌ ku bay pitu ni pamiki ku dī ku, arapun iya mismu bay mapitu aku.

⁴³ Tud yaꞌ bitu tahati bi bitsala ku batan yaꞌ tatimaꞌ bi tōꞌ ku.

⁴⁴ Kaam ina, Ibilis mmaꞌ bi. Dari ilooy karomanan bi pinabuwat, siga pabuwatan ma nulut ni kahandak na. Ibilis ina ndang tukang mapatoy labba man tagnaꞌ. Bong inawnan hāl kabanahan, yaꞌ ya doman palamud sabap yaꞌ luu niiya kabanahan. Bong ya mitsala, dustaꞌ jaꞌ, batan ndang pangandustaꞌ ya. Lagiꞌ na, ndang iya poonan dustaꞌ.

⁴⁵ Boꞌ aku tu, pagka kabanahan jaꞌ bitsala ku, yaꞌ kam kuhi pitsayaꞌ niyaku.

⁴⁶ “Doꞌ kam la. Luu kina kam nnaa san lasa disu kapōꞌ buktiꞌ bay ku buwat dusa? Pagka kabanahan jaꞌ bitsala ku, ongoy baw taggahaꞌ yaꞌ kam kuhi pitsayaꞌ niyaku?

⁴⁷ Bong ina jama sabana-bana sukuꞌ Tuhan, mastiꞌ gāk jaꞌ ya pakale ni umanat Tuhan. Boꞌ kaam itu, yaꞌ kam doman pakale sabap saꞌ kam sukuꞌ Tuhan.”

⁴⁸ Pag tampung siga Yahudi ndooy, “Tud bana du hati bay halling kami kau bangsa Samariya, boꞌ sineytan gi ko.”

⁴⁹ Pag halling si Isa, “Yaꞌ bitu ku sineytan. Itu na ku maehe Mmaꞌ ku, tatammu bi na baw madiyoꞌ aku lagi.

⁵⁰ Sugaꞌ biyahun na luu, ndang-ndang yaꞌ du ku muhung sinanglitan meꞌ manusiyaꞌ. Sugaꞌ luu du situ Mmaꞌ ku doman aku sinanglitan. Iya sa ngalabuꞌ hukuman njataꞌ sagannap ma madiyoꞌ aku.

⁵¹ Baan ta kam banahan, soysoy ina bay nganna bitsala ku, yaꞌ na sina sitammu ka kapatoy.”

⁵² Dari yuk siga Yahudi, “Oy na ko na? Batnaa mangkin bohoꞌ na bina tumatandaꞌ ningkami tud sineytan du ko! San baw bay jaman Nabi Ibrahim sampay na ga kanabi-nabihan bay du pingkaꞌ matoy. Boꞌ kau baw tu, magsambatan gi ko basta jama bay nganna bitsala nu, niyaꞌ na sitammu ka kapatoy!

⁵³ Uy, saula-ula patingkat gi ko man bboꞌ kami Nabi Ibrahim! San iya ka ga kanabi-nabihan, lay du matoy. Bong siꞌ pinaamu, soy doꞌ ina ko?”

⁵⁴ Pag tampung si Isa, “Bong aku mantug dī ku, yaꞌ du luu pūs na. Sugaꞌ luu muwanan aku kabantugan, yana Mmaꞌ ku ma inaku meꞌ bi Tuhan bi.

⁵⁵ Salla na, yaꞌ san ya katoonan bi. Boꞌ aku tu, katoonan ku ya. Bong baw tu ku halling niyaꞌ ya katoonan ku, malaingkan meꞌ kaam du ku pangandustaꞌ. Sugaꞌ ndang katoonan ku ya, maka mmeꞌ ku ni palman na.

⁵⁶ Balik ta pa Nabi Ibrahim, tud bay gāk silay ya batan holat na ngita katakka ku pitu. Boꞌ lai du takita na, sampay biddaꞌ na ehe kagakan na.”

⁵⁷ Yuk siga Yahudi baw siꞌ tu, “Uy la, kau bina, yaꞌ gi san ngabut limampūꞌ taun umu nu! Pooy meꞌ nu bay ngita Nabi Ibrahim?”

⁵⁸ Pag halling si Isa ninsila, “Baan ta kam banahan, yaꞌ gi Nabi Ibrahim bay pinamaddihan, ndang luu na ku.”

⁵⁹ Pag meꞌ looy jaꞌ siꞌ halling na, lay sila mūt batu man ngahiyak iya. Maksud da mapatoy iya, sugaꞌ yaꞌ bay luu dapat da sabap lay jaꞌ ya llimbuhan sampay lay na lakka man langga looy.