Yahiya 3 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Isa ka si Nikodimus

¹ Na ndooy siꞌ, luu disu pa-mmean siga Yahudi inawnan si Nikodimus tabeꞌ ni palhimpunan Parisi.

² Disu sangom, lay ya pilay pa mman si Isa. Takka ndooy yuk na, “Tuwan, katoonan kami kau guru lakka man Tuhan. Yaꞌ sina ko kapōꞌ siga pakaradjaan kahaylan-haylan meꞌ ilooy ma bay pabuwat nu bong yaꞌ luu kawasa Tuhan njataꞌ nu.”

³ Pag halling si Isa, “Baan ta ko banahan, yaꞌ sina luu kapatabeꞌ ni pamarinta Tuhan bong yaꞌ doꞌ bay duhuꞌ pinamaddihan pabalik.”

⁴ Yuk si Nikodimus baw siꞌ tu, “Uy, pooy gi doꞌ lay la meꞌ jama pinamaddihan pabalik katoa-toa na na? Hati, bahasa subay doꞌ ya paasok balik pa jawom kūn induꞌ na boꞌ na pōꞌ pabalik?”

⁵ Pag tampung si Isa, “Baan ta ko banahan, yaꞌ sina jama kapatabeꞌ ni pamarinta Tuhan bong yaꞌ doꞌ duhuꞌ bay pinamaddihan meꞌ boheꞌ ka Rū Sutsiꞌ.

⁶ Batan sagannap ma pinamaddihan leꞌ manusiyaꞌ, malaingkan anak manusiyaꞌ jaꞌ sila. Boꞌ ilooy ma pinamaddihan meꞌ Rū Sutsiꞌ, malaingkan anak Tuhan sila.

⁷ Daa ko jayip ni bay halling ku siꞌ subay ko pinamaddihan pabalik.

⁸ Meꞌ tuu karuha na. Baliyu ina niyup paninggai-paninggai karomanan na. Takale ta bahunus na maka luu takita ta usik oy-oy ma tiniyup meꞌ na, sugaꞌ yaꞌ takita ta. Yaꞌ katoonan ta bong lakka maninggai atawa pun tiluꞌ paninggai. Meꞌ naa du sina karuha Rū Sutsiꞌ maddihan manusiyaꞌ. Yaꞌ du ya takita ta, sugaꞌ takita ta ni kawul-piil bay hinalin meꞌ na ni jama ma bay pinamaddihan pabalik.”

⁹ Tilaw si Nikodimus baw siꞌ tu, “Pooy doꞌ ina meꞌ na dari meꞌ naa?”

¹⁰ Pag tampung si Isa, “Hati, kau disu guru langkaw ni bangsa Israil, yaꞌ lagi kina katoonan nu hāl meꞌ naa?

¹¹ Baan ta ko banahan, kami itu, yaꞌ kami mitsala hāl ma yaꞌ katoonan kami atawa pun ma yaꞌ bay tasakup kami. Salla na, yaꞌ kam pitsayaꞌ ni bitsala kami.

¹² Bong ina kam yaꞌ pitsayaꞌ ni bitsala ku ni hāl ma takita bi ntuu ni junyaꞌ, labi na kam yaꞌ pitsayaꞌ bong ku maan kaam hāl sulgaꞌ ma yaꞌ takita bi.

¹³ Boꞌ ni hāl sulgaꞌ ilay, yaꞌ luu toon sabap yaꞌ luu bay dutai pilay. Ilooy du toon aku, yana Anak Manusiyaꞌ, batan aku bay duwai lakka mandooy.”

¹⁴ Maka yuk si Isa, “Bay jaman Nabi Musa ka bangsa tabi ndooy ni lahat lau-lau yaꞌ maglumaꞌ, meka sila bay pinagtinduk meꞌ siga sō latsunan. Maka katoonan nu du, bbuwatan Nabi Musa, lay buwat sō tumbagaꞌ, boꞌ siniitan ni tōng tigablok. Pag-anu, boꞌ inangkat meꞌ na pa jataꞌ. Dari soysoy bay tininduk, bong sila ngahangad sō tumbagaꞌ looy, mastiꞌ kaulian jaꞌ sila. Damikiyan Anak Manusiyaꞌ pun, talpaksaꞌ du sina mintu inangkat taꞌ tehang ni mayran

¹⁵ supaya soysoy pitsayaꞌ niiya koleꞌ kasampulnaan nyawa saumu-umu.”

Maaseꞌ Tuhan ni manusiyaꞌ

¹⁶ Biddaꞌ na sina ehe aseꞌ Tuhan ni manusiyaꞌ. Sangkon lay na pinaglillaꞌ meꞌ na Anak tungga na pinapatoy supaya soysoy pitsayaꞌ niiya yaꞌ na tanalkaꞌ, gam pin koleꞌ gi kasampulnaan nyawa ma yaꞌ luu katapusan na.

¹⁷ Tuhan ilay bay mapitu Anak na pa junyaꞌ, maksud na nalamat manusiyaꞌ, saꞌ ga ngalabuan sila hukuman.

¹⁸ Dari sagannap ma pitsayaꞌ ni Anak na, puwas na man hukuman Tuhan. Boꞌ sagannap ma yaꞌ pitsayaꞌ, ndang kinamulkaan na sila sabap yaꞌ sila kuhi pitsayaꞌ ni Anak tungga Tuhan.

¹⁹ Anak Tuhan ilay bay pitu pa junyaꞌ bilang sūꞌ ni manusiyaꞌ, sugaꞌ lay jaꞌ ya tikutan da. Ilooy ya katigian da njawom lindom sabap maat pabuwatan da. Sangkon kinamulkaan na sina sila.

²⁰ Manusiyaꞌ ina, sagannap ma buwat maat, ndang sinukang meꞌ da dantaꞌ. Yaꞌ sila doman pa jawom dantaꞌ taggahaꞌ tumampak kalaatan da.

²¹ Boꞌ sagannap ma nabiat buwat kaintongan ina, ilooy karomanan da njawom dantaꞌ batan yaꞌ luu subay na pin tinapuk meꞌ da. Katoonan da sumilan-sumilan nililing siga pabuwatan da, tarang-tarang magbēꞌ jaꞌ ni kahandak Tuhan.

Bitsala si Yahiya ma Tukang Mandi pasal si Isa

²² Na song hallom, lay na baw si Isa pilay ka ga mulit na pa kadilehan Yahudiya. Ndooy siꞌ, lay jaꞌ sila pahantiꞌ daka dangoy ngallaw. Maka lay gi sila mandi jama.

²³ Kuwan si Yahiya, lay du mandi jama ndooy ni Aynon, tapit pa Salim, sabap meka boheꞌ ndooy. Manusiyaꞌ siꞌ tu ndooy, yaꞌ na luu hantiꞌ na pilay nohoꞌ pinandi.

²⁴ (Waktu looy siꞌ, yaꞌ gi si Yahiya bay tajīl.)

²⁵ Na sasang ga si Yahiya ndooy, kasohean mulit na lay magjawap ka disu pagkahi da Yahudi pasal aturan agama da hāl meꞌ nutsiꞌ.

²⁶ Dari ilooy ma lay sila pa mman si Yahiya mangaruha. Sugaꞌ duhuꞌ yuk da niiya, “Tuwan Guru, lalla looy ma bay soheꞌ nu sitammu ndooy ni dambilaꞌ Sōng Juldan, ilooy ma bay awnan nu lakka man Tuhan, meꞌ kau na du la batnaa mandi jama. Boꞌ bahuklud na ga jama mimon pilay pa mman na nohoꞌ pinandi.”

²⁷ Tampung si Yahiya ninsila, “Yaꞌ bilay luu jama ngantanan kawasa-kapatut buwat meꞌ looy bong yaꞌ bay kabuwanan leꞌ Tuhan.

²⁸ Boꞌ aku tu, minsan kaam mismu, lay du tasaksiꞌ bi bay halling ku, saꞌ aku Almasi. Lay jaꞌ ku sinohoꞌ duhuꞌ man iya mahati pasal katakka na.

^29-30 Ndang katoonan ku du pag luu jaꞌ Almasi, talpaksaꞌ pasōng kabantugan na, boꞌ niyaku tu, talpaksaꞌ pakulang. Iya ilay meꞌ sapantun disu pangantin ma lalla, boꞌ sagannap ma mmeꞌ niiya meꞌ sapantun pangantin ma danda. Sangkon bong sikamimon bahuklud pa mman na, malaingkan biddaꞌ na ehe kagakan ku, batan inawnan pangantin ma danda, ndang sukuꞌ na. Boꞌ aku tu meꞌ sapantun bagay pangantin ma lalla sadjaꞌ nangge ni bihing na. Maka gāk ku pakale ni bitsala na.

³¹ “Na Almasi ilay lakka man sulgaꞌ. Sangkon patingkat ya man sikamimon. Boꞌ kitabi itu manusiyaꞌ ma ndang ni junyaꞌ sadjaꞌ, ngkod pakaradjaan ni junyaꞌ jaꞌ du katoonan tabi. Sangkon meꞌ iya lakka man sulgaꞌ, mastiꞌ patingkat jaꞌ ya man sikamimon.

³² Maka ni kapasal umanat na, binitsala meꞌ na hāl ma bay takita na maka bay takale na ndooy ni sulgaꞌ. Salla na, agon yaꞌ luu pitsayaꞌ niiya.

³³ Sugaꞌ soysoy baw ina pitsayaꞌ ni umanat na, malaingkan sibuꞌ du ya ka bay mangaku bana palman Tuhan.

³⁴ Batan pagka Almasi bay pinapitu meꞌ Tuhan, mastiꞌ masampay jaꞌ ya palman Tuhan. Boꞌ tumatandaꞌ du batan njataꞌ na man Tuhan bay matannaꞌ mimon kawasa Rū Sutsiꞌ.

³⁵ Biddaꞌ na sina aseꞌ Tuhan ni Anak na sampay lay na pa-ntan na mimon-mimon niiya.

³⁶ Dari soysoy ina pitsayaꞌ ni Anak na, luu na kasampulnaan nyawa na saumu-umu. Sugaꞌ soysoy ina yaꞌ pitsayaꞌ ni Anak Tuhan, malaingkan yaꞌ sina koleꞌ kasampulnaan nyawa sabap yaꞌ kuhi lakka mulkaꞌ Tuhan njataꞌ na.”