Yahiya 2 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Isa madari boheꞌ pa tubaꞌ anggul

¹ Pag lay jaꞌ pingkaꞌ duwa ngallaw, luu na baw ngawin ni kawum inawnan Kana ndooy ni Jalil. Nneꞌ si Isa pun luu du ndooy.

² Ga si Isa pun ka ga mulit na, lay du bay kinaddoꞌ.

³ Dari yaꞌ gi lupus paballangan looy, lay na katis tubaꞌ anggul da. Pag ndaꞌ nneꞌ si Isa meꞌ looy, yuk na ni si Isa, “Yaꞌ na bitu luu tubaꞌ anggul da.”

⁴ Sugaꞌ yuk si Isa niiya, “Sinneꞌ baw tu, oy doꞌ ina lamud ta nnaa? Saꞌ gi bitu ituu waktu ku.”

⁵ Pag-anu siꞌ, yuk nneꞌ na ni siga tukang motang ndooy, “Bong ya nohoꞌ kaam, asipun bi jaꞌ, ha?”

⁶ Na ndooy siꞌ, luu nnom poga mehe man ngannaꞌ boheꞌ halliꞌ man siga Yahudi ngikut arat agama da nutsiꞌ tangan da. Njawom disu poga kira-kira ngisi ga dahatus liter.

⁷ Pag-anu, yuk si Isa ni siga tukang motang ndooy, “Pannoan bi doꞌ siga poga naa ka boheꞌ.” Na pannoꞌ jaꞌ siꞌ banahan sikamimon,

⁸ yuk si Isa na baw ninsila, “Nganggayung doꞌ kam boꞌ boonun bi pa mman tukang magpandoy ni pangawinan tuu mari takindahan na.” Lai jaꞌ siꞌ boo da,

⁹ lay na kindahan lalla looy ma tukang magpandoy. Na kuwan boheꞌ looy siꞌ, lay na hati dari tubaꞌ anggul, sugaꞌ yaꞌ gi bay tasayu leꞌ tukang magpandoy bong pooy hāl-hiwal na. Ilooy du bay kasayu, siga tukang motang ma bay nganggayung. Dari pagka tud mahap lassa tubaꞌ anggul looy, kuwan tukang magpandoy, lay magti ngalinganan pangantin ma lalla pa bihing na,

¹⁰ boꞌ na halling niiya, “Pooy tu la, Nges? Jama mimon, bong mainum, pinaduhuꞌ doꞌ tubaꞌ anggul ma mahap banahan. Noy jama yaꞌ na kasilang lassa na sabap meka na bay inum da, boꞌ pinōꞌ ilooy ma kulang ayad na. Boꞌ kau baw tu, sarī. Noy batnaa na bohoꞌ nu mōꞌ ilooy ma mahap banahan.”

¹¹ Na ilooy siꞌ ma bay pabuwat si Isa ndooy ni kawum Kana ni Jalil, yana pabuwatan sibuwa kahaylan-haylan man na bay makita ehe kawasa Tuhan njataꞌ na. Dari sabap meꞌ looy, magsasōng na meꞌ siga mulit na pitsayaꞌ niiya.

¹² Paddus meꞌ looy siꞌ, lay na baw ga si Isa palūd pa Kapelniyum ka ga nneꞌ na, ga danganakan na ma lalla sampay ga mulit na. Pag-anu siꞌ, lay doꞌ sila pahantiꞌ ndooy daka dangoy ngallaw du.

Si Isa malakka siga padadagang man langga mehe

¹³ Na pagka tapit na paballangan bangsa Yahudi inawnan Ngalingkaꞌ lay na ga si Isa patukad pa Jerusalem mmeꞌ ballang.

¹⁴ Takka ndooy, lay sila pa langga mehe. Ndooy ni haman na, luu ga jama dagangan ga sapiꞌ, bili-bili ka atsang para man ngulban. Boꞌ luu gi ga tukang nambian sīn ningkōꞌ ni siga lamisahan da.

¹⁵ Pag ndaꞌ si Isa meꞌ looy, lay ya buwat talagpiꞌ ingkot, boꞌ na ngahuka siga sapiꞌ ka ga bili-bili looy man jawom haman langga looy. Boꞌ lay gi bulikad na ga lamisahan siga tukang nambian sīn ndooy sampay lay na ga magkanatan sīn da.

¹⁶ Maka yuk na ni sagannap ma dagangan atsang ndooy, “Lakkahan bi na dagangan bi labbasakayi mantuu! Daa pabuwatun bi lumaꞌ Mmaꞌ ku subay ga tabuꞌ!”

¹⁷ Na sasang ga mulit si Isa siꞌ maiman, taintom da na suwat njawom kitab, ilooy ma yuk na, “Ni kaehe sēng ku ni lumaꞌ nu, meꞌ lassa api noleyab njawom atay ku.”

¹⁸ Pus meꞌ looy, yuk kasohean Yahudi, “Ntan oy doꞌ tu meꞌ kau taggahaꞌ ilu na ga ko buwat meꞌ naa? Bong bana-bana luu kapatut nu man Tuhan, pakitahan teꞌ kami sipat kawasa na.”

¹⁹ Iya tampung si Isa, “Bong itu langkat bi langga tuu, pabalik ku du situ njawom tallu ngallaw.”

²⁰ Pag tampung siga Yahudi looy, “Uy, pooy meꞌ na sikatuwaꞌ? Langga tuu bitu, mpatpuꞌ-nnom taun halloman na bay pinabuwat. Boꞌ kau baw tu, tatammu nu ga tapabalik nu njawom tallu ngallaw du!”

²¹ Na sila siꞌ tu, yaꞌ bay tabista da ilooy ma bay awnan si Isa langga, yana baran na mismu.

²² Siga mulit na pun, yaꞌ du bay kahati. Sugaꞌ pag lay jaꞌ si Isa pinakallum pabalik, taintom da na bay sambatan na. Sampay bohoꞌ da pitsayaꞌ ni tunaꞌ njawom kitab pasal Almasi pinakallum. Maka tabista da na yaꞌ du bay karapatan si Isa bay magsambatan.

²³ Na sasang ga si Isa ndooy ni Jerusalem mmeꞌ ni paballangan Ngalingkaꞌ, luu siga pabuwatan kahaylan-haylan bay pabuwat na. Dari meka na bay pitsayaꞌ iya na Almasi.

²⁴ Sugaꞌ san meꞌ looy, yaꞌ du baw si Isa bay mangando ninsila sabap katoonan na du tabiat manusiyaꞌ.

²⁵ San yaꞌ na ya binaan pasal tabiat da batan ndang tasayu na du bong oy njawom atay manusiyaꞌ.