Yahiya 12 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Mariyam numpahan battis si Isa insallan hamut

¹ Na nnom ngallaw gi siꞌ boꞌ nagnaꞌ paballangan Ngalingkaꞌ, lay na baw ga si Isa pilay balik pa Betani, yana kawum si Lasarus, lalla looy ma bay pinakallum meꞌ na.

² Takka jaꞌ sila, lay ballang jama lahat looy man da ngalak si Isa. Si Malta pun luu du ndooy motangan sila. Si Lasarus pun luu du ndooy tabeꞌ ni baanan jama mmeꞌ paharung ni si Isa.

³ Mindangoy ko, luu na baw si Mariyam moo katsaꞌ-katsaꞌ insallan hamut inawnan nalda, ga tongaꞌ liter. Pag-anu siꞌ, lay tumpahan na ni battis si Isa boꞌ pinuusan ka dūn kōk na. Na nalda looy ilay tud hagaan batan porol, boꞌ muhag-muhag na bawu na ni sikaliput lumaꞌ looy.

⁴ Na ndooy siꞌ luu disu mulit si Isa, yana si Judas Iskariyut ma bay muwan tipu-akka njataꞌ si Isa song hallom. Pag takita na meꞌ looy siꞌ, yuk na,

⁵ “Uy, gam na bilay la bay pinaballihan insallan hamut looy, boꞌ ndean jama miskin ballihan na. Lay jaꞌ bilay pasensengan na hagaꞌ gadji dantaun.”

⁶ Na sabana na, yaꞌ silay luu luuy si Judas ni jama miskin, arapun kon na bay halling meꞌ looy sabap panangkaw ya. Minsan iya bay hinalap ngantanan pangannaan sīn ni baanan ga si Isa, bbuwatan na daran ngulangan sīn da para ni dī na.

⁷ Dari yuk si Isa ni si Judas, “Pabiyahun na jaꞌ. Danda tuu bitu buwat meꞌ tuu tabilang man na manyapan baran ku duhuꞌ para ni llaw ku kinubu.

⁸ Ni kapasal jama miskin, luu na jaꞌ du sina ninggai-ninggai mman bi. Boꞌ aku tu, yaꞌ na ku humallom dambuwaꞌ ka kaam.”

Siga imam langkaw isun mapatoy si Lasarus

⁹ Na taaka jaꞌ meꞌ siga Yahudi ni Jerusalem luu na si Isa ndooy ni Betani, tud meka bay bahuklud pilay. Sugaꞌ sarī man si Isa, doman du sila ngita sampay si Lasarus ma bay pakallum na.

¹⁰ Dari pag tasayu siga imam langkaw meꞌ looy, lay sila isun mapatoy sampay si Lasarus.

¹¹ Batan sabapan na, meka na Yahudi patatak man baanan da sampay pitsayaꞌ na ni si Isa.

Si Isa pinudji pag takka na pa Jerusalem

¹² Na pag llaw disu, lay na baw taaka leꞌ siga baanan jama ma mmeꞌ ballang ndooy ni Jerusalem, luu na du ga si Isa pawus pa daira da.

¹³ Dari lay sila ngaddoꞌ siga pappaꞌ kalapaꞌ-sawit boꞌ binoo pōꞌ man daira song pilay nampang iya. Takita da jaꞌ si Isa, bbuwatan da maghowapan mudji iya, yuk da, “Pudji tabi Tuhan! Sinupaatan jama naa ma pitu ni kawasa-kapatut Papuꞌ tabi Tuhan! Sinupaatan ko, sultan bangsa Israil!”

¹⁴ Na sila siꞌ mudji sasang si Isa bakuraꞌ taꞌ kuraꞌ baddung ma bay inindam meꞌ na. Dari lay na binakbul tunaꞌ njawom kitab, ilooy ma yuk na,

¹⁵ “Kaam, siga jama ni Jerusalem, san kam yaꞌ na tawu. Takka du sina mintu sultan bi bakuraꞌ taꞌ kuraꞌ baddung song pilu pa mman bi.”

¹⁶ Na kuwan siga mulit si Isa baw, yaꞌ lagi bay tabista da lay na binakbul tunaꞌ looy. Noy bay na si Isa pinakallum pabalik sampay inangkat pa sulgaꞌ boꞌ taintom da na ndang luu tunaꞌ njawom kitab hāl meꞌ looy. Boꞌ ndooy na bohoꞌ tabista da na tunaꞌ looy bay sinuwatan pasal si Isa.

^17-18 Na kon sakiyan jama bay bahuklud pilay nampang si Isa sabap bay sila kaakahan bay bbuwatan na makallum si Lasarus. Batan sagannap ma bay ngita si Isa nohoꞌ si Lasarus pōꞌ man jawom kubu, yaꞌ na luu hantiꞌ da nuntutan jama.

¹⁹ Na pag ndaꞌ siga Parisi meꞌ looy na, yuk da padisu-padisu, “Tud yaꞌ na bitu luu sōng bay sangsāꞌ tabi noan ga jama looy. Ndaun bi doꞌ ba pilay! Katis na jama junyaꞌ mmeꞌ niiya.”

²⁰ Na ni mimon jama ma bay pilay pa Jerusalem mmeꞌ numba ni paballangan looy siꞌ, luu du tabeꞌ kasohean bangsa Greek.

²¹ Pag-anu, lay sila pa mman si Pilip, yana disu mulit si Isa man Betsayda ndooy ni Jalil. Yuk da niiya, “Tuwan, doman kami la sitammu ka si Isa.”

²² Dari lay doꞌ si Pilip maan si Andru, boꞌ da pa mman si Isa mahati.

²³ Yuk si Isa ninsila, “Tapit banahan na situ waktu ehe kabantugan Anak Manusiyaꞌ pinalahil.

²⁴ Sugaꞌ pingkaꞌ doꞌ ya duhuꞌ meꞌ karuha bigi tinanom llabbong. Baan ta kam banahan, tiyap-tiyap bigi, bong yaꞌ bay pingkaꞌ llabbong, dalamba na sadjaꞌ sina ya saumu. Sugaꞌ bong bay na pingkaꞌ llabbong, ndooy na boꞌ na dari tinanom ma labung buwaꞌ na.

²⁵ “Soysoy ina numbul satu niiya nulut dī na halloman na ntuu ni junyaꞌ, mastiꞌ tiksaꞌ nyawa na. Sugaꞌ soysoy ina yaꞌ mean kahandak na bong pin tabean na kahandak ku, sampulnaꞌ nyawa na saumu labba man junyaꞌ sampay pa ahirat.

²⁶ Soysoy doman buwat kahandak ku, subay du nūs lān ku supaya nnoy-nnoy mman ku, ndooy du ya. Maka sagannap ma buwat kahandak ku, mastiꞌ pinaehe sina mintu meꞌ Mmaꞌ ku.”

Si Isa nunaꞌ kapatoy na

²⁷ Pag-anu siꞌ yuk si Isa, “Tud susa atay ku batnaa sabapan kamalasahiyan ma song inawop meꞌ ku. Tud sobot pamiki ku bong oy subay halling ku ni Mmaꞌ ku. Bong ku nohoꞌ pinuwasan niiya, yaꞌ baw sikatuwaꞌ sabap ituu na situ ndang bay maksud ku pitu.”

²⁸ Dari yuk na pa Tuhan, “Maꞌ, ilooy jaꞌ pabuwatun niyaku ma moo kabantugan ni awon nu.” Pag-anu siꞌ, ilooy ma pōꞌ suwara man sulgaꞌ nampungan iya, yuk na, “Ndang lay na situ ku koleꞌ kabantugan njataꞌ nu. Boꞌ koleꞌ gi ku sina mintu kabantugan njataꞌ nu pabalik.”

²⁹ Halling ga baanan manusiyaꞌ ma nangge-nangge ndooy, ma bay kale suwara looy siꞌ, “Uy, guntu bitu lahat!” Sugaꞌ yuk kasohean baw, “Malaikat bilay bay mitsala niiya.”

³⁰ Yuk si Isa baw ninsila, “Suwara looy ilay bay pōꞌ, saꞌ du silay kalnaꞌ aku, arapun kalnaꞌ kaam.

³¹ Taabut na situ waktu man Tuhan ngalabuꞌ hukuman na ni kapasal mimon dusa manusiyaꞌ. Maka taabut na du waktu man maā Ibilis ma panghuluꞌ ni manusiyaꞌ ma yaꞌ pitsayaꞌ niyaku.

³² Batan pag taabut ku ina mintu inangkat taꞌ tehang, inaa na lān man ku ngaliyun jama man mimon kabangsa-bangsahan pa mman ku.”

³³ Na ngkon ilay si Isa bay halling pasal meꞌ na inangkat taꞌ tehang, man na mahati sila bong pooy meꞌ na mintu matoy.

³⁴ Pag-anu siꞌ, tilaw kasohean ni baanan jama ndooy, yuk da, “Tuwan, pasal bay halling nu siꞌ talpaksaꞌ Anak Manusiyaꞌ inangkat taꞌ tehang, soy lay la Anak Manusiyaꞌ looy ma bay awnan nu siꞌ? Bong iya na Almasi, pooy meꞌ nu kabāꞌ pinapatoy ya inangkat taꞌ tehang? Batan pamāꞌ kitab, inawnan Almasi, llum saumu-umu.”

³⁵ Pag tampung si Isa, lay jaꞌ ya ngandalil dī na pa sūꞌ, yuk na, “Dangkitiꞌ lasa situ waktu sūꞌ ninag. Sangkon, padpad masi ninag, tusun bi na lān ma sinūꞌ meꞌ dantaꞌ na, taggahaꞌ lay na baw kam mintu kalindoman. Batan jama ina ma lumān njawom lindom, yaꞌ katoonan da bong luꞌ paninggai sila.

³⁶ Sangkon, padpad masi luu mman bi sūꞌ looy, pitsayaꞌ na kam niiya supaya kaam pun dari siga sūꞌ meꞌ iya du.” Lupus si Isa siꞌ bay mitsala meꞌ looy, lay na baw ya palakka boꞌ yaꞌ na ya bay magpakita ni baanan jama ndooy.

Tunaꞌ pasal siga jama ma yaꞌ kuhi pitsayaꞌ

³⁷ Na minsan siꞌ meka na kahaylan-haylan bay pabuwat si Isa ni pag-awpan ga jama ndooy, amu-amu sila yaꞌ kuhi pitsayaꞌ niiya.

³⁸ Dari lay na binakbul bay tunaꞌ Nabi Isaya, ilooy ma yuk na, “Ū Papuꞌ, yaꞌ bitu luu pitsayaꞌ ni umanat kami. Minsan sila bay na pinakitahan kawasa nu, masi sila yaꞌ pitsayaꞌ.”

³⁹ Na pagka amu-amu ga jama ndooy yaꞌ kuhi pitsayaꞌ ni si Isa, song hallom lay na tambo lawang man da pitsayaꞌ. Boꞌ magbēꞌ du ka disu ayat njawom kitab Nabi Isaya, ilooy ma yuk na,

⁴⁰ “Lay na sila pinabuta meꞌ Tuhan supaya sila yaꞌ ngita. Lay na pinalindoman meꞌ na pamiki da supaya sila yaꞌ kahati. Bong siꞌ saꞌ meꞌ looy, luu gi dapat da nawbat, boꞌ taulian ku pangatayan da.”

⁴¹ Na jaman Nabi Isaya ilay bay nuwat kabtangan “boꞌ da taulian ku,” saꞌ ga silay dī na awnan na tukang nguliꞌ, arapun bay jaꞌ ya nunaꞌ bitsala Almasi ni sinōng. Kon na bay nunaꞌ sabap ndang bay pinalahil ehe kawasa Almasi niiya.

⁴² Dari san kaekahan Yahudi yaꞌ pitsayaꞌ ni si Isa, meka gi du baw bay pitsayaꞌ sampay kasohean pa-mmean da. Sugaꞌ ni katawu da ni siga Parisi, yaꞌ du sila bay nawakka magpasayu taggahaꞌ yaꞌ na baw sila pinadari nindak langga.

⁴³ Mas mehe gi ninsila sanglit manusiyaꞌ man sanglit Tuhan.

⁴⁴ Pag-anu, luu na baw disu waktu sasang si Isa noan jama, pinahaddo meꞌ na suwara na, yuk na, “Soysoy pitsayaꞌ niyaku, malaingkan pitsayaꞌ du sampay ni ilooy ma bay mapitu aku.

⁴⁵ Damikiyan, soysoy ngita aku, takita na du ilooy ma bay mapitu aku.

⁴⁶ Aku tu bay pitu pa junyaꞌ bilang sūꞌ marantaan pamiki manusiyaꞌ supaya yaꞌ na njawom lindom soysoy pitsayaꞌ niyaku.

⁴⁷ “Na bong luu bay kale umanat ku, boꞌ yaꞌ kinanna meꞌ da, saꞌ du sina aku ngalabuan sila hukuman, batan maksud ku pitu pa junyaꞌ nalamat manusiyaꞌ, saꞌ ga ngalabuan sila hukuman.

⁴⁸ Sugaꞌ pag taabut llaw dambuli, mastiꞌ kalabuan jaꞌ sina hukuman sagannap ma bay nuwak aku ka tōꞌ ku. Boꞌ pindoga man da kalabuan hukuman, yana tōꞌ ku.

⁴⁹ Batan tōꞌ ku tu, yaꞌ lakka man pamiki ku dī ku, arapun lakka man Mmaꞌ ku ma bay mapitu aku. Iya nohoꞌ aku bong oy subay tinōꞌ meꞌ ku.

⁵⁰ Boꞌ katoonan ku, bong inawnan siga tōꞌ ma bay sohoꞌ na pinasaplag niyaku, mastiꞌ inaa na poonan kasampulnaan nyawa ma yaꞌ luu katapusan na. Sangkon bila ku mitsala, ilooy du pōꞌ ku ma bay sinohoꞌ meꞌ Mmaꞌ ku niyaku.”