Yahiya 11 - Sabahagiꞌ Kitab Tawrat: Panagnaan ni Awwal Jaman maka Kitab Injil

Kapatoy si Lasarus

¹ Pag-anu siꞌ, luu disu lalla inawnan si Lasarus lay tuwaꞌ saki. Iya siꞌ tu ka ga danganakan na si Mariyam ka si Malta maglahat ni disu kawum inawnan Betani ndooy ni Yahudiya.

² Si Mariyam siꞌ tu, ilooy na danda ma bay numpahan insallan hamut ni battis Papuꞌ Isa boꞌ na muusan battis na maka dūn kōk na. Dari pagka saki si Lasarus,

³ lay ga danganakan na nugun pa mman Papuꞌ Isa nohoꞌ binaan saki paya bagay na ma kinaasean meꞌ na.

⁴ Lay jaꞌ siꞌ si Isa kabaan, yuk na ni siga mulit na, “Saki na bilay, saꞌ gi du kapatoy katobtoban na. Arapun pinakoy jaꞌ silay mintu man malahil kawasa Tuhan supaya koleꞌ kabantugan mehe Anak na.”

⁵ Na si Isa ilay siꞌ, ndang maaseꞌ ni ga si Malta ka si Mariyam ka si Lasarus.

⁶ Sugaꞌ san ya bay binaan saki si Lasarus, yaꞌ du ya bay magti pilay pa mman na. Lay gi abut na duwa ngallaw pahantiꞌ ni kawum looy mman da.

⁷ Paddus duwa ngallaw looy siꞌ, yuk si Isa ni ga mulit na, “Sūng bi na. Pabeleng na tabi pa Yahudiya.”

⁸ Yuk siga mulit na baw siꞌ tu, “Uy la, Tuwan Guru, bohoꞌ nu bilay paddus man bahaya baanan Yahudi ndooy ma bay doman mapatoy kau ka batu. Hati, pilay na baw ko pabalik?”

⁹ Pag tampung si Isa, lay ya makoy sumping bitsala, yuk na, “Mataallaw ina, bong pasilak na, yaꞌ sumaddop bong yaꞌ gi taabut sapu-duwan jām. Basta ina jama lumān sasang llaw, yaꞌ ya sumantuk sabap ngita na pin ya meꞌ dantaꞌ mataallaw.

¹⁰ Sugaꞌ bong ya lumān sangom, mastiꞌ sumantuk jaꞌ ya sabap yaꞌ luu sūꞌ na.”

¹¹ Paddus si Isa bay halling meꞌ looy, yuk na, “Bagay tabi si Lasarus lay na tuli, sugaꞌ pilay sa ku matiꞌ iya.”

¹² Yuk ga mulit na siꞌ tu, “Papuꞌ, bong bilay lay na ya kapatuli, malaingkan paayad-ayad na parasahan na.”

¹³ Sila siꞌ tu, sangka da tud bana-bana tuli jaꞌ du si Lasarus, boꞌ ko, hantak bitsala si Isa, tud lay na matoy.

¹⁴ Dari lay na pinatallak meꞌ si Isa maan sila, yuk na, “Si Lasarus bilay lay na matoy.

¹⁵ Sugaꞌ kalnaꞌ kaam, gāk ku yaꞌ ku bay kasabuhan ndooy supaya magsasōng gi mintu meꞌ bi pitsayaꞌ niyaku. Sūng bi na. Pilay na tabi pa mman na.”

¹⁶ Pag-anu siꞌ, yuk si Tomas ma pinagdē si Kamba ni siga pagkahi na mulit, “Sūng bi na ba. Bong hati ya pinapatoy, basta paunung na kitabi matoy.”

Si Isa poonan kaallum

¹⁷ Pag takka ga si Isa pa Betani, taaka da na luu na mpat ngallaw halloman si Lasarus njawom kubu.

¹⁸ Na Betani ilay siꞌ tapit pa Jerusalem, ga tallu batu sa lawak na.

¹⁹ Dari meka Yahudi bay pōꞌ man Jerusalem pilay pa mman si Malta ka si Mariyam ngug-ngugan sila.

²⁰ Taaka jaꞌ siꞌ meꞌ si Malta luu na si Isa bay takka pa kawum da, lay du ya pilay nampang. Kuwan si Mariyam, lay tamban ni lumaꞌ.

²¹ Pag takka si Malta pa mman si Isa, yuk na, “Papuꞌ, bong siꞌ ko la bay luntuu, yaꞌ na bay matoy danganakan kami.

²² Kamasaꞌ katoonan ku du bina san batnaa masi gi du ko nduwan meꞌ Tuhan oy-oy paku nu.”

²³ Pag halling si Isa niiya, “Llum du bilay pabalik danganakan bi.”

²⁴ Tampung si Malta baw siꞌ tu, “Ohoꞌ Papuꞌ, ndang katoonan ku llum jaꞌ silay ya bbalik ni llaw dambuli pag taabut mimon manusiyaꞌ ma bay matoy pinakallum.”

²⁵ Pag halling si Isa niiya, “Aku na situ makallum jama bay matoy batan aku poonan kaallum. Soysoy pitsayaꞌ niyaku, minsan ya matoy, llum du sina ya pabalik.

²⁶ Maka sagannap ma llum, hati na, sagannap ma pitsayaꞌ niyaku, ni sabana na, yaꞌ na sila matoy saumu.” Pag-anu, yuk na ni si Malta, “Pooy bong kau? Pitsayaꞌ du ko?”

²⁷ Pag tampung si Malta, “Ohoꞌ Papuꞌ, pitsayaꞌ ku kau na Almasi, yana Anak Tuhan ma bay tinunaꞌ pitu pa junyaꞌ.”

²⁸ Pus si Malta halling meꞌ looy, lay na ya pabeleng pa lumaꞌ, boꞌ na ngambay danganakan na si Mariyam pa bihing na. Pag-anu, yuk na ni si Mariyam, “Luu na la Tuwan Guru nilaw kau gi siꞌ.”

²⁹ Lay jaꞌ siꞌ kabaan si Mariyam, ilooy ma lay du magti pōꞌ sampay lay na pilay pa mman si Isa.

³⁰ Na si Isa siꞌ tu, masi gi ndooy ni tagan man na bay sinampang meꞌ si Malta. Yaꞌ gi ya bay nakka kalumaan ni lahat looy.

³¹ Kuwan siga Yahudi ma ngug-ngugan si Mariyam njawom lumaꞌ, pag takita da si Mariyam nangge deꞌ-dēꞌ pōꞌ, lay du sila pauru. Kanna da ga pilay na baw ya pa kubu balik maglinduhan danganakan na.

³² Na pag takka jaꞌ siꞌ si Mariyam ndooy mman si Isa, bbuwatan na sujud ni awpan na sambayan na halling, “Papuꞌ, bong siꞌ ko la bay ntuu, yaꞌ na bay matoy danganakan kami.”

³³ Pag takita si Isa si Mariyam sampay ga Yahudi looy ma bay mmeꞌ niiya nangis na pin, ilooy ma lassa hansu na ga atay na.

³⁴ Dari tilaw na ninsila, “Ninggai lay man bi bay nampat iya?” Pag tampung da siꞌ, “Mmeꞌ na ko Tuwan, boꞌ takita nu.”

³⁵ Kuwan si Isa baw siꞌ tu, lay na kapanangis.

³⁶ Pag-anu, yuk siga Yahudi siꞌ tu, “Ndaun bi doꞌ ba. Biddaꞌ na aseꞌ na ni imuwa si Lasarus!”

³⁷ Sugaꞌ yuk kasohean baw siꞌ tu, “Saꞌ ba, lay taulian na lalla looy ma bay buta? Sugaꞌ ongoy baw taggahaꞌ yaꞌ bay pōꞌ na kawasa na supaya yaꞌ bay matoy imuwa si Lasarus?”

Si Lasarus pinakallum meꞌ si Isa

³⁸ Na kubu si Lasarus ilay, yana lowang pampang maka luu disu batu mehe man bay nambo. Pag takka si Isa pilay, lassa hansu na baw pabalik njawom atay na.

³⁹ Pag-anu siꞌ, yuk na, “Lakkahan bi na batu naa.” Sugaꞌ yuk si Malta, “Uy Papuꞌ, luu na mpat ngallaw halloman na bay kinubu. Haluꞌ na bilay mayat na.”

⁴⁰ Pag tampung si Isa, “Saꞌ ba, ndang bay ko baan ku bong ko pitsayaꞌ, malaingkan ngita na ko ehe kawasa Tuhan?”

⁴¹ Dari siꞌ, lay na du lakkahan da batu looy. Pag-anu, lay si Isa pahangad sambayan na halling, “Ū Maꞌ, magsuku lay ku duwan nu.

⁴² Ndang katoonan ku du wā ko pakale niyaku. Sugaꞌ lay jaꞌ ku halling meꞌ tuu kalnaꞌ baanan jama ntuu supaya sila pitsayaꞌ tud bana kau bay mapitu aku.”

⁴³ Lupus jaꞌ siꞌ si Isa bay halling meꞌ looy, ilooy ma lay ya ngingan pahaddo, yuk na, “Ū Lasarus, pōꞌ na ko!”

⁴⁴ Dari siꞌ, sarunduun du pōꞌ si Lasarus. Boꞌ masi gi battis-tangan na bay talibod ka kuku poteꞌ sampay luwa na masi gi du luu ka putus na. Yuk si Isa ninsila, “Lakkahan bi na libod baran na mari sumunsayaꞌ na ya lumān.”

Siga Yahudi bagaraꞌ mapatoy si Isa

⁴⁵ Na kuwan siga Yahudi ma bay pilay pa lumaꞌ ga si Mariyam ngug-ngugan sila, tud bay haylan pag lay takita da pabuwatan si Isa sampay meka na sila pitsayaꞌ niiya.

⁴⁶ Sugaꞌ kasohean baw siꞌ tu, gam pin lay pilay pa mman ga Parisi boꞌ da maan sila bay pabuwatan si Isa.

⁴⁷ Dari bbuwatan siga Parisi ka ga imam langkaw, magti bay nawag baanan Sanhidrin binoo isun. Kumpo jaꞌ siꞌ sila sikamimon, yuk da, “Pooy tu pamiki tabi? Lalla looy ilay, meka na pabuwatan kahaylan-haylan bay pinōꞌ meꞌ na.

⁴⁸ Bong ilay ya pabiya tabi sigi-sigi buwat meꞌ looy, song hallom, sikamimon na pitsayaꞌ iya na Almasi, boꞌ na binuwat sultan da. Banti mintu, pag tasayu sultan parinta Rom, lay na baw tabi nilān, boꞌ hinansu langga tabi sampay bangsa tabi.”

⁴⁹ Sugaꞌ yuk Imam Kayapas, yana panghuluꞌ imam ni taun looy, “Awam bitu kam.

⁵⁰ Yaꞌ tabista bi gam na disu jama matoy gantiꞌ sikamimon man labbasakayi bangsa tabi lungay man taꞌ babaw junyaꞌ.”

⁵¹ Na bay bitsala Imam Kayapas ilay siꞌ, saꞌ pōꞌ man pamiki na dī na. Arapun pagka iya panghuluꞌ imam ni taun looy, lay jaꞌ Tuhan makoy iya man malahil ninsila ndooy song matoy na si Isa kalnaꞌ bangsa Yahudi.

⁵² Boꞌ kapatoy na ilay, saꞌ silay sat kalnaꞌ bangsa Yahudi, arapun sampay kalnaꞌ jama man mimon kabangsa-bangsahan. Batan tabeꞌ du sila dari siga anak Tuhan bbos-bbos. Kahandak Tuhan ina sagannap siga anak na ni sikaliput junyaꞌ, bangsa Yahudi sampay na siga bangsa saꞌ Yahudi, tibuuk na na pa disu baanan sa.

⁵³ Dari labba man llaw looy, lay na siga pa-mmean Yahudi miha jalan bong pooy meꞌ da mapatoy si Isa.

⁵⁴ Sangkon yaꞌ na si Isa pōꞌ pa jawom mayran palamud ni siga Yahudi. Gam pin yaꞌ jaꞌ hallom, lay na ya lakka ka ga mulit na pilay pa disu kawum inawnan Epraim tapit pa lahat lau-lau yaꞌ maglumaꞌ. Sampay ndooy na doꞌ sila bay pahantiꞌ.

⁵⁵ Na song hallom, tapit na baw pabalik paballangan bangsa Yahudi, yana paballangan Ngalingkaꞌ. Dari meka jama man kadilehan luꞌ pilay pa Jerusalem yaꞌ gi bay nagnaꞌ paballangan looy. Bbuwatan da siꞌ ngikut arat agama da mandi doꞌ duhuꞌ supaya sila sutsiꞌ ni paballangan looy.

⁵⁶ Sasang da nangge-nangge ni langga mehe, ngandaꞌ na pin sila pa dambilaꞌ pa dambilaꞌ kawu-kawu takita da si Isa bong ya bay luu pōꞌ. Yuk dangan pa dangan, “Kumpas bi, pasabu kina ya ni paballangan tuu?”

⁵⁷ Ngkon da halling meꞌ looy sabap siga imam langkaw ka ga Parisi bay nohoꞌ jama ndooy māꞌ bong luu bay ngita si Isa supaya tasungkub da na.