Taytus 3 - Sabahagiꞌ Kitab Tawrat: Panagnaan ni Awwal Jaman maka Kitab Injil

Arat-tabiat tawop ni siga sukuꞌ si Isa

¹ Paintoman nu siga danganakan ta nnaa nohoꞌ maglillaꞌ ni siga pa-mmean parinta sampay ngasip ni sagannap ma ngantanan saraꞌ. Maka subay sila pinaintoman nohoꞌ wā saddiya buwat mahap.

² Baan nu sila subay sila yaꞌ mitsala soysoy pa kalaatan. Maka daa sila sohoun sasaꞌ-manasaꞌ. Arapun subay lammaꞌ sampay diyoꞌ jaꞌ pangatayan da ni mimon manusiyaꞌ.

³ Ndang subay yaꞌ langkaw atay tabi batan jaman tabi ilay yaꞌ gi bay pitsayaꞌ ni si Isa, kitabi pun awam du ni kabanahan. Yaꞌ du tabi bay ngasip ni kahandak Tuhan. Bay du kitabi lingu. Bay jaꞌ kitabi maabak meꞌ tabi koleꞌ parasahan ayad para ni dī tabi. Sibuꞌ du kitabi ka bay pinahata meꞌ jinisan napsu ma maat. Llaw pa dangallaw, maat jaꞌ pamiki tabi ni pagkahi tabi manusiyaꞌ. Tud yaꞌ bay kuhi lakka man jawom atay tabi meꞌ tabi bay sikadangkiꞌ-kadangkiꞌ ka sikalammis-kalammis.

⁴ Lipara, pag taabut waktu bay ginantaꞌ meꞌ Tuhan, yana poonan kasalamatan tabi, lay na ya malahil timbang na ka aseꞌ na ni manusiyaꞌ.

^5-6 Lay na ya nalamat kitabi. Boꞌ tud kainu-inu silay batan yaꞌ luu kaayaran bay pabuwat tabi gantaꞌ man tabi pataꞌ sinalamat. Arapun kon Tuhan bay nalamat kitabi sabap ehe timbang na ni manusiyaꞌ. Dari man sabapan pabuwatan si Isa Almasi, tukang nalamat kitabi, lay na puwasan Tuhan dusa tabi. Dari ko ngawon, lay na kosoan na atay tabi supaya kinaddoan dusa tabi. Boꞌ lay gi ya nupaatan kitabi ka Rū na, yana Rū Sutsiꞌ bay pinaasok njawom atay tabi. Dari sabapan Rū Sutsiꞌ, sibuꞌ na du kitabi ka lay na pinamaddihan pabalik, batan luu na kaallum tabi bahau.

⁷ Ni kaehe aseꞌ Tuhan, lay na kitabi initung meꞌ na intong supaya tatantu tabi luu na kasampulnaan nyawa tabi saumu-umu.

⁸ Na siga tōꞌ ku itu tud kanaalla. Sangkon Taytus, sohoun na kinanna ni mimon nnaa ma mangando pa Tuhan. Meꞌ looy ilay, inisbat na meꞌ da buwat jinisan kaayaran ni siga pagkahi da manusiyaꞌ. Na bitsala ku itu, mahap jaꞌ labbasakayi, boꞌ kasampulnaꞌ ni jama.

⁹ Sugaꞌ kasohean jama yaꞌ doman ngahasi bitsala ku. Iya karomanan da magjaw-jawap jaꞌ hāl ma yaꞌ luu pus na. Tigiꞌ sila maglangkaw-langkawan ni hāl usuwan kabboꞌ-bboan maka magsaggaꞌ pasal jinisan aturan agama Yahudi. Sangkon daa na ko palamud. Tud yaꞌ sina luu sōng na, gam pin kalāt gi ni waktu.

¹⁰ Bong luu njawom baanan bi tigiꞌ mōꞌ pagsaggaan, sohoun patagong. Bong min duwa na sila bay sinaggong, boꞌ amu-amu yaꞌ ngasip, daa na kam palamud ninsila.

¹¹ Batan katoonan bi na du, jama meꞌ looy ilay bingkok maka ndang nabiat buwat dusa. Boꞌ na, muhung jaꞌ sila kalabuan hukuman Tuhan.

Katapusan bitsala si Pol

¹² Na Taytus, yaꞌ na situ hallom, sohoꞌ ku na du pilu si Altemas atawa si Tikikus. Pag mintu luu na takka, pagbuli-bulihan nu deꞌ-dēꞌ pilay pa Nikopolis. Ndooy sa kita sitammu, batan katikmoran pamiki ku ndooy na doꞌ ku pahantiꞌ halloman timpu tanne.

¹³ Na pag mintu patuwak na ga si Apolos ka si Abugaw Senas man naa, palangkapan nu sa sila mari yaꞌ luu kulang ninsila.

¹⁴ Kuwan siga pagkahi ta sukuꞌ si Isa nnaa, sohoun sila makutuꞌ meꞌ da buwat kaayaran. Maka sohoun sila nulung jama tiksaꞌ. Meꞌ naa ina, mehe kapansahaliyan da ni manusiyaꞌ.

¹⁵ Dambuli man inaa, mimon pagkahi ku ntuu lay nohoꞌ masampay salam duwaa da ningkau. Maka pasampayun doꞌ salam duwaa kami ni mimon nnaa ma maaseꞌ ningkami, yana siga pagkahi tabi sukuꞌ Papuꞌ Isa. Kamura-murahan binuwanan na pin kam sikamimon barakat meꞌ Tuhan. Wassalam