Taytus 2 - Sabahagiꞌ Kitab Tawrat: Panagnaan ni Awwal Jaman maka Kitab Injil

Tōꞌ ni siga matatoa

¹ Sugaꞌ kau Taytus, inaa jaꞌ pasampayun, yana tōꞌ ma sikatuwaꞌ ka kabanahan.

² Baan nu sagannap matatoa ma lalla, subay sila pandoy ngagak dī da. Maka subay sila pahatu-hatu ka patong mamiki mari sila tawop pinag-aratan. Subay sila tattap mmeꞌ ni tōꞌ ma kinapitsayaan meꞌ tabi ka maaseꞌ ni jama, sampay natas njawom katiksaan.

³ Damikiyan baan nu du sagannap matatoa ma danda, arat-tabiat da subay moo kabantugan pa Tuhan. Subay sila yaꞌ mitna maka subay yaꞌ minarat ni inuman kalango. Subay sila noan

⁴ karandahan ma yaꞌ gi toa mari sila pandoy maasean lla da sampay ga anak da,

⁵ maka supaya sila patong mamiki sampay mōꞌ kawul-piil sutsiꞌ. Maka subay karandahan ma yaꞌ gi toa tinoan mari sila hutu buwat ni lumaꞌ ka buwat kaayaran sampay maglillaꞌ ni lla da. Bong siꞌ ina bogbogan da meꞌ naa, malaingkan yaꞌ luu danan man umanat Tuhan ma pasaplag tabi binitsala pa kalaatan.

⁶ Damikiyan kalallahan pun ma yaꞌ gi toa, sohoun du sila papatong mamiki.

⁷ Labi na kau Taytus, subay bogbogan nu hāp kawul-piil nu mari luu suntuan ayad inakig meꞌ siga soheꞌ nu. Maka mimon tangge-tingkōꞌ nu subay magbēꞌ jaꞌ ka kabanahan ma tinōꞌ meꞌ nu.

⁸ Amay-amay bila ko mitsala, subay bana jaꞌ supaya yaꞌ luu man nu tasahawi. Meꞌ naa inaa, alang-kapalang sagannap ma nulang kitabi mitsala kitabi pa kalaatan.

⁹ Na ni kapasal siga ata ni baanan sukuꞌ si Isa nnaa, baan nu sila subay sila wā ngasip ni papuꞌ da. Maka subay pagbuli-bulihan da kanaalla buwat paayad mari kasulutan papuꞌ da ninsila. Daa sila meꞌ kasohean ata nganjawap

¹⁰ atawa tangan-tanganan. Arapun subay sila makitahan papuꞌ da tud tapangandohan sila. Dari bong ina mahap du mimon kawul-piil da meꞌ naa, tumatandaꞌ na ni jama tud mahap du tōꞌ tabi pasal Tuhan, yana poonan kasalamatan tabi.

¹¹ Kitabi itu sikamimon ma pitsayaꞌ ni si Isa, subay ayad kawul-piil tabi pagka luu na bay pinalahil meꞌ Tuhan aseꞌ-tabang na ningkitabi. Batan luu na si Isa bay papitu na pa junyaꞌ supaya luu na dapat man mimon manusiyaꞌ koleꞌ kasalamatan.

¹² Aseꞌ-tabang Tuhan ina ningkitabi matomoꞌ kainagon tabi nimanan kawul-piil ma yaꞌ nulut ni kahandak na sampay nimanan oy-oy napsu ma maat. Maka aseꞌ-tabang Tuhan sina matomoꞌ kainagon tabi papatong mamiki ka buwat kaintongan sampay ngakig arat-tabiat na halloman tabi ni junyaꞌ tuu.

¹³ Ilooy ilay siꞌ subay isbat tabi sasang tabi ngagad llaw kagak-gāk ma pinagdautan meꞌ tabi. Awnan ku ilay siꞌ katakka si Isa Almasi, yana Tuhan tabi Sangat Kawasa ma tukang nalamat kitabi.

¹⁴ Iya ilay, lay na ga bay nongan umu na kalnaꞌ kitabi supaya tapaddusan na na kitabi man tabiat tabi buwat dusa, maka supaya tapasutsiꞌ na kitabi. Batan kahandak na ina, luu na sukuꞌ na ma tinagi buwat mahap, ma pabiddaꞌ man kasohean manusiyaꞌ.

¹⁵ Na Taytus, ituu siꞌ sikamimon ma bay suwat ku ningkau, pasampayun sa ni siga baanan sukuꞌ si Isa nnaa. Buwansangan nu sila mmeꞌ ni tōꞌ tuu. Bong luu pagkahi nu yaꞌ doman mmeꞌ ni tōꞌ tuu, daa pabiyahun. Ndang-ndang luu du kapatut nu naup sila.