Taytus 1 - Sabahagiꞌ Kitab Tawrat: Panagnaan ni Awwal Jaman maka Kitab Injil

TAYTUS

^1-4 Ituu itu aku, si Pol, disu ata Tuhan saltaꞌ na rasul si Isa Almasi. Itu suwat ku pa mman nu Taytus. Meꞌ ku ngingat, sibuꞌ du ko ka anak ku rahasiyaꞌ sabap meꞌ ta dambuwaꞌ atay pitsayaꞌ ni umanat mahap pasal si Isa. Kamura-murahan binuwanan na pin ko kasannangan ka barakat meꞌ Mmaꞌ tabi Tuhan ka tukang nalamat kitabi, yana si Isa Almasi. Ndang katoonan nu du, meꞌ aku disu rasul, bay ku kawakilan noan sagannap ma bay peneꞌ Tuhan supaya patakkoꞌ pangando da ni si Isa. Kamura-murahan man sabapan umanat mahap ma pasampay ku, pasōng du dawom da ngakig arat-tabiat Tuhan. Boꞌ na, bong siꞌ ina umanat mahap kinapitsayaan, tatantu jama luu na kasampulnaan nyawa da saumu-umu. Kasampulnaan nyawa ina, ndang lay na bay njanjiꞌ meꞌ Tuhan ni manusiyaꞌ maruhuꞌ-ruhuꞌ lagi. Boꞌ bila ina Tuhan, yana tukang nalamat kitabi, bay nganjanjiꞌ, mastiꞌ mmeꞌ jaꞌ ya ni lapa na. Dari pag taabut masa ma bay ginantaꞌ meꞌ Tuhan, lay na pinalahil meꞌ na si Isa yana lān man manusiyaꞌ koleꞌ kaallum bahau. Na umanat mahap pasal kaallum bahau ina, yana umanat ma bay sinohoꞌ pinasaplag niyaku.

Arat-tabiat tawop ni jama ma binuwat pa-mmean baanan sukuꞌ si Isa

⁵ Na kau ina ndang katoonan nu na du, ngkon nu bay sohoꞌ ku pasangkod nnaa ni Krit supaya tapupus nu pabuwatan ma bay tagnaan ta. Boꞌ lay gi ko bay sohoꞌ ku nguwakilan jama binuwat siga pa-mmean ga baanan sukuꞌ si Isa ni mimon daira nnaa.

⁶ Bila ko meneꞌ pa-mmean, subay kalallahan ma yaꞌ luu sutsutan njataꞌ da. Subay disu du nda da. Maka siga anak da subay du pitsayaꞌ ni Papuꞌ Isa. Maka subay yaꞌ luu tuntut njataꞌ da bay buwat maat atawa pun yaꞌ ngasip ni induꞌ-mmaꞌ da.

⁷ Tiyap-tiyap pa-mmean ina, meꞌ halling sambat ku na siꞌ, subay yaꞌ luu sutsutan njataꞌ da. Tangge-tingkōꞌ da ndang subay sikatawop ka sila limbang Tuhan ngayaran siga sukuꞌ na. Subay yaꞌ langkaw atay da atawa pasuꞌ kōk da. Maka yaꞌ dari palalango. Subay sila yaꞌ bangis maka subay yaꞌ magnapsu mulakab ni sīn.

⁸ Iya pataꞌ ninsila, subay sila pangahulmat ka tigiꞌ buwat mahap ni jama. Subay patong mamiki maka subay sila intong. Subay sutsiꞌ kawul-piil da ka subay sila pandoy ngagak dī da.

⁹ Maka subay kuwangkutan da siga tōꞌ sabanna ma bay pinasampay meꞌ ta ninsila. Basta ina sila yaꞌ kuhi papagsiꞌ man siga tōꞌ looy, tapataggu da na sina iman siga pagkahi da. Sampay takaya da mōꞌ salla ni tōꞌ sagannap ma nulang sila.

Kahalan jama ni nusa Krit

¹⁰ Na nnaa ina ni Krit, meka sina jama nulang tōꞌ sabanna. Bbuwatan da ina magsian jama ka tōꞌ palsu. Boꞌ nabiat lagi sila mitsala manunsāp, awla na sagannap ma nanggehan hāl meꞌ ngislam.

¹¹ Tud subay sila yaꞌ padari nu noan siga jamaa nnaa sabap meka na paglūng magsiꞌ sabapan tōꞌ da. Isi tōꞌ da ina yaꞌ san pataꞌ sinabbut. Sugaꞌ amu-amu sila nōꞌ meꞌ looy sabapan eka sīn takoleꞌ da.

¹² Kadarihan da ina magbēꞌ du ka sambatan disu pagkahi da bangsa Krit ma halul-akka, ilooy ma yuk na, “Kinawnan bangsa Krit, pangandustaꞌ jaꞌ mimon. Maat jaꞌ kasurahan da, huskaw lagi, lagak lagi.”

¹³ Na bitsala looy ilay siꞌ, luu du bana na. Sangkon daa ko paagak maintoman sagannap ma ndiyoan nu supaya sila tattap mmeꞌ ni tōꞌ si Isa ma kinapitsayaan meꞌ ta.

¹⁴ Amay-amayan nu sila nnaa yaꞌ nohoꞌ maruli pali-pali siga Yahudi atawa pun siga aturan binogbogan meꞌ sagannap ma nuwak tōꞌ sabanna.

¹⁵ Jama meꞌ looy ilay ma yaꞌ pitsayaꞌ ni si Isa, ndang yaꞌ du bay sinutsiꞌ meꞌ Tuhan atay da. Yaꞌ luu niyat atay da sutsiꞌ batan ndang lamaꞌ pamiki da. Maka yaꞌ na san luu nulang ni honaꞌ-honaꞌ da bong sila buwat maat. Boꞌ sagannap ma pitsayaꞌ ni si Isa ina, lay na sinutsiꞌ atay da. Sangkon katoonan da na san gi oy sinagid atawa pun kinakan meꞌ da, yaꞌ du luu katamak ninsila.

¹⁶ Boꞌ sagannap ma nuwak tōꞌ sabanna, san ina sila māꞌ katoonan da Tuhan, tumatandaꞌ du ni tangge-tingkōꞌ da yaꞌ bana bitsala da. Pabuwatan da ina sinukang meꞌ Tuhan. Yaꞌ sila ngasip niiya. Maka yaꞌ sila tawop pinakoy ni oy-oy pabuwatan mahap.