Salsila siga Rasul 8 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Sol ngalaugan siga sukuꞌ si Isa

^1-3 Pag-anu siꞌ, lay na kinubu si Esteben meꞌ siga jama ma ngisbat Tuhan. Boꞌ tud bay mag-ulawi sila. Sugaꞌ kuwan si Sol siꞌ tu, gam pin nanglitan sagannap ma bay mapatoy si Esteben. Boꞌ lay gi ya magtuyuꞌ-tuyuꞌ mabinasa baanan sukuꞌ si Isa. Bbuwatan na, padisu-padisu lumaꞌ ngangguyud-guyud sila pa poan, danda lalla, boꞌ da inisi njawom jīl. Dari siꞌ, labba man llaw kapatoy si Esteben, magdaruhun na pin basag laug sampay kabinsanaan njataꞌ mimon ma mmeꞌ ni si Isa ndooy ni Jerusalem. Na hangat sila bininsanaꞌ, meka na sila bay maglahiyan man Jerusalem, sampay lay na sila magsaw-simpāk pa kakawum-kawman ni sikaliput Yahudiya ka Samariya. Ilooy sa bay tamban ni Jerusalem yana siga rasul si Isa.

Umanat mahap pasal si Isa pinasaplag ni Samariya

⁴ Na ga ilooy siꞌ ma bay ngalataan kalahat-lahatan maglahiyan, amu-amu masaplag umanat mahap pasal si Isa ninggai-ninggai jaꞌ man da bay tumiluꞌ.

⁵ Disu ninsila, yana si Pilip, lay tumiluꞌ pilay pa disu daira ni Samariya. Ndooy siꞌ, lay du ya masaplag pasal Almasi.

⁶ Kuwan siga baanan jama ndooy, pag takale da bitsala si Pilip sampay takita da na siga sipat kawasa Tuhan bay pabuwat na, bukaꞌ na puad da pakale ni umanat na.

⁷ Meka na jama ma sineytan lay na kaulian meꞌ si Pilip. Kuwan siga seytan da, kakillahapan na ga sasang da pōꞌ. Maka meka jama matoy baran da ka ga jama tongkaꞌ lay na du kaulian leꞌ na.

⁸ Dari tud bay mehe meꞌ ga jama daira looy gāk.

Disu lalla tukang mōꞌ majik pinandi

⁹ Na ni daira looy siꞌ, luu disu lalla inawnan si Saymon. Iya ilay disu tukang mōꞌ jinisan majik. Hallom na ya bay mahaylan jama Samariya ni kapandoy na mōꞌ majik. Boꞌ tigiꞌ gi ya ngabbu bahasa iya pinakapandoy.

^10-11 Dari siꞌ mimon na jama ni daira looy, miskin-dayahan, tinagi pakale ni bitsala si Saymon sabap ndang hallom na sila haylan meꞌ jinisan majik na. Sambat da, “Lalla naa la ngantanan kawasa Tuhan. Yaꞌ luu sibuꞌ sabanding na.”

¹² Sugaꞌ pag luu jaꞌ si Pilip masaplag umanat mahap pasal pamarinta Tuhan ka si Isa Almasi, meka na du bay pitsayaꞌ ni si Isa sampay lay na pinandi, danda-lalla.

¹³ Sampay si Saymon siꞌ, lay na du pitsayaꞌ sampay lay na du ga pinandi. Boꞌ na, paninggai-paninggai jaꞌ siꞌ si Pilip lumān, luu na pin si Saymon patuhut niiya. Boꞌ tud bay haylan ya pag lay jaꞌ takita na siga sipat kawasa Tuhan ka pakaradjaan kahaylan-haylan bay pabuwat si Pilip.

¹⁴ Na pag kaakahan jaꞌ siꞌ siga rasul ndooy ni Jerusalem hinasi na umanat Tuhan ni Samariya, honaꞌ-honaꞌ da subay du sila luu song pilay ngandaꞌ-ngandaꞌ. Dari lay peneꞌ da si Pitel ka si Yahiya nohoꞌ patuhut pilay pa mman da.

¹⁵ Takka jaꞌ siꞌ sila ndooy, lay na sila makuhan sagannap ma pitsayaꞌ ni si Isa duwaa supaya pinaasokan na sila Rū Sutsiꞌ.

¹⁶ Bana na, lay na sila pingkaꞌ pinandi ni awon Papuꞌ Isa, sugaꞌ yaꞌ gi sila bay pinatannaan Rū Sutsiꞌ.

¹⁷ Dari pag lay jaꞌ si Pitel ka si Yahiya nappak bumbunan da, lai na du sila inasok meꞌ Rū Sutsiꞌ.

¹⁸ Na pag takita si Saymon siga rasul looy nappak bumbunan jama man da maasokan sila Rū Sutsiꞌ, tud bay ilohan ya kawasa meꞌ ninsila. Dari bbuwatan na, lay nongan sīn na pa mman si Pitel ka si Yahiya

¹⁹ sambayan na halling, “Ah ningkaam sīn. Bong anu, siga Tuwan, buwanan bi doꞌ ku kawasa meꞌ ningkaam mari inasok na du meꞌ Rū Sutsiꞌ soysoy tappak ku bumbunan da.”

²⁰ Sugaꞌ gam pin lay gi ya pinahallingan meꞌ si Pitel, yuk na, “Tanalkaꞌ sina ko mintu sampay sīn nu! Kau bitu, kanna nu taballi-balli nu ka sīn ladjikiꞌ ma dean Tuhan.

²¹ Tud yaꞌ sina luu kabigiꞌ-bigian nu ni pabuwatan bay sinukuꞌ ningkami sabap bingkok niyat njawom atay nu ni mata Tuhan.

²² Subay sina tawbatan nu na bay kalaatan nu siꞌ, boꞌ nu maku na timbang pa Papuꞌ. Balangkali inampun gi ko meꞌ na.

²³ Kon ku ilay siꞌ bay halling meꞌ looy batan tabistu ku pannoꞌ atay nu meꞌ dangkiꞌ. Masi ko pinahata meꞌ napsu nu moo-moo kau buwat dusa.”

²⁴ Pag-anu, yuk si Saymon ni ga si Pitel ka si Yahiya, “Bong bina la meꞌ naa, pakuhan bi doꞌ ku duwaa pa Papuꞌ mari yaꞌ na tuwaꞌ pa aku ilooy ma bay sabbut bi siꞌ.”

²⁵ Na halloman ga si Pitel siꞌ ka si Yahiya ndooy, bbuwatan da nuntut mimon ma bay tasakup da pasal Papuꞌ Isa. Maka lay gi sila masampay umanat na. Pag lupus, lay na sila pabeleng pa Jerusalem. Lān da pilay, meka gi kakawum-kawman ndooy ni Samariya man da bay maghāsan masaplag umanat mahap pasal si Isa.

Si Pilip mandi disu pa-mmean bangsa Etiyopiya

²⁶ Na kuwan si Pilip baw siꞌ tu, lay na baw tinammuhan meꞌ malaikat Tuhan, yuk na, “Pilay ko song pa sātan. Tusun jaꞌ lān lakka man Jerusalem song pilay pa Gasa ndooy ni lahat yaꞌ maglumaꞌ.”

²⁷ Dari siꞌ, lay na du si Pilip palakka. Sasang na ni tangngaꞌ lān, lay ya llingkaan meꞌ disu lalla taꞌ kalesa. Lalla looy ilay disu pa-mmean langkaw man Etiyopiya. Iya ilay manijel ni mimon altaꞌ si Kandake, yana danda ma panghuluꞌ ni lahat da. Lalla looy siꞌ tu moleꞌ na lakka man Jerusalem bay mmeꞌ numba Tuhan.

²⁸ Bbuwatan na siꞌ tu satahaꞌ-tahaꞌ lān, matsa kitab ma bay sinuwatan meꞌ Nabi Isaya.

²⁹ Pag-anu siꞌ, yuk Rū Sutsiꞌ ni si Pilip, “Pilay ko. Pahaboy ko ni kalesa looy.”

³⁰ Dari siꞌ lay na inonse meꞌ si Pilip kalesa looy. Pag takale na manijel looy matsa kitab, tilaw si Pilip niiya, “Tahati nu kina bitsala naa ma batsa nu?”

³¹ Tampung manijel looy siꞌ tu, “Niyaꞌ la. Bong siꞌ tu luu noan aku, balangkali tahati ku na.” Dari lay na sinohoꞌ meꞌ na si Pilip dutai, boꞌ nohoꞌ ningkōꞌ ni bihing na.

³² Na bitsala njawom kitab ma binatsa meꞌ manijel looy meꞌ tuu, yuk na, “Yaꞌ luu bay halling na oy maka oy na, subay ga ya bili-bili diyam-diyam jaꞌ tinondaꞌ lān na sinumbaliꞌ. Sibuꞌ du karuha na ka anak bili-bili yaꞌ hibuk-hibuk bong ginuntingan bū na.

³³ Pinabuwat ya kalabbiyan. Subay siꞌ yaꞌ bay luu hukuman bay labuꞌ pa jataꞌ na. Yaꞌ luu panubuꞌ na tasabbut sabap yaꞌ na bay pinatahaꞌ umu na taꞌ junyaꞌ tuu.”

³⁴ Na pus manijel looy matsa kitab looy siꞌ, yuk na ni si Pilip, “Tuwan, bong siꞌ kadarihan ningkau, baan teꞌ ku bong soy inawnan meꞌ nabi looy, dihan na kilay atawa luu gi ka sarī?”

³⁵ Pag bāꞌ si Pilip niiya, ilooy ilay siꞌ bay awnan na yana si Isa. Dari nagnaꞌ mandooy na siꞌ, lay gi si Pilip masampay umanat mahap pasal si Isa niiya.

³⁶ Sasang da palanja, lay na sila nakka disu lugar bohean. Pag-anu, yuk manijel looy ni si Pilip, “Alay la boheꞌ. Bong siꞌ kadarihan ningkau, pandihun doꞌ ku.”

³⁷ Pag tampung si Pilip, “Bong ko tud bana-bana pitsayaꞌ ni si Isa, dari ba.” “Ohoꞌ,” yuk manijel looy, “pitsayaꞌ na ku si Isa Almasi yana Anak Tuhan.”

³⁸ Dari lay na sohoꞌ manijel looy pinatagong kalesa na, boꞌ da duwai pa jawom boheꞌ looy, sampay lay na ya pinandi meꞌ si Pilip.

³⁹ Pag dutai da man jawom boheꞌ looy, sarunduun du lanyap si Pilip binoo palakka meꞌ Rū Sutsiꞌ. Yaꞌ na ya bay takita meꞌ manijel looy pabalik. Kuwan manijel looy, lay jaꞌ pawus moleꞌ, boꞌ tud bay gāk ya saꞌ alang-alang.

⁴⁰ Kuwan si Pilip, sakayi na kasayu, luu na ya ni daira Asutus. Lakka mandooy, lay na ya padisu-padisu daira masaplag umanat mahap pasal si Isa ngabut sampay pa Sesariya.