Salsila siga Rasul 5 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Ananiyas ka si Sapira

¹ Na ni baanan da siꞌ, luu du baw disu lalla inawnan si Ananiyas ka nda na si Sapira lay du bay maballihan tanaꞌ da kasohean.

² Sugaꞌ bay pag-isunan da ka nda na, kasohean ballihan na lay na nnaꞌ da para ninsila. Kuwan kasohean, lay na boo si Ananiyas pa mman siga rasul. Sugaꞌ pag taabut na ma-ntan, baꞌ-bāꞌ na ilooy na sikamimon ballihan tanaꞌ na.

³ Dari yuk si Pitel niiya, “Ananiyas, ongoy taggahaꞌ kuhi-kuhi jaꞌ ko pinagbayaan meꞌ Ibilis. Tatammu nu na ga ngandustaan Rū Sutsiꞌ. Baꞌ-bāꞌ nu, luu na ntuu mimon ballihan tanaꞌ nu, mingkan luu gi kasohean bay nnaꞌ nu para ni dī nu.

⁴ Tanaꞌ looy bilay siꞌ, kau du dapu. Maka kau du kapagbayaꞌ bong paballihan nu atawa niyaꞌ. Maka bong lay na paballihan nu, kau du kapagbayaꞌ pooy-pooy meꞌ nu buwat ballihan na. Dari ongoy baw taggahaꞌ lay gi talangga piki nu ngandustaꞌ? Sīn looy ilay siꞌ lay sinongan pa Tuhan. Sangkon, iya bay dustaan nu, yana Tuhan, saꞌ ga kami!”

^5-6 Pag takale jaꞌ meꞌ si Ananiyas bay halling si Pitel, sarunduun du ya palonyok sampay lay na matoy. Pag-anu siꞌ, lay na mayat na kinimbonan meꞌ kasubulan ndooy, boꞌ na binoo pa poan sampay lay na kinubu. Dari jama siꞌ tu ma bay kaaka bong oy bay katuwaꞌ si Ananiyas, tud bay mehe meꞌ da tawu.

⁷ Luu jaꞌ siꞌ ga tallun jām bay pingkaꞌ, luu na baw pasunuꞌ paasok nda si Ananiyas, sugaꞌ yaꞌ gi bay tasayu na bong oy bay katuwaꞌ lla na.

⁸ Dari yuk si Pitel niiya, “Baan nu doꞌ ku bong ituu na siꞌ sikamimon ballihan tanaꞌ bi ka lla nu.” Iya tampung na, “Ohoꞌ, inaa na sina sikamimon.”

⁹ Pag tilaw si Pitel, “Ongoy doꞌ ina pagsaliꞌ-salian bi na ka lla nu ngandustaꞌ? Yaꞌ kina tasayu bi bbuwatan bi nuway-nuwayan Rū Papuꞌ? Ndaun ba, alay na ni behe lawang kalallahan ma bay ngubu lla nu nsiniꞌ. Kau gi sina pasunuꞌ.”

¹⁰ Dari sarunduun du palonyok si Sapira ni awpan si Pitel sampay lay na du matoy. Pag-anu siꞌ, lay paasok ga kalallahan looy siꞌ. Pag ndaꞌ da tud matoy na ya, lay na pūt da mayat na boꞌ na boo da pa poan sampay lay na du kinubu ni bihing lla na.

¹¹ Dari siꞌ, mimon ma pitsayaꞌ ni si Isa sampay ga jama sikamimon ma bay kale aka bong oy bay katuwaꞌ ninsila, tud bay mehe meꞌ da tawu.

Pabuwatan kahaylan-haylan pinōꞌ meꞌ siga rasul si Isa

¹² Ni jaman looy du siꞌ, meka pabuwatan kahaylan-haylan ka sipat kawasa Tuhan bay pinōꞌ meꞌ siga rasul ni mayran ndooy ni Jerusalem. Daran sila kumpo-kumpo ka mimon pagkahi da sukuꞌ si Isa ndooy ni langga mehe, ni Sawrung Sultan Sulayman.

¹³ Kuwan sagannap jama Jerusalem baw ma yaꞌ pitsayaꞌ ni si Isa, yaꞌ sila nawakka palamud ni baanan sukuꞌ si Isa minsan mehe maltabat da ninsila.

¹⁴ Sugaꞌ san meꞌ looy, paeka boꞌ paeka na pin manusiyaꞌ, danda-lalla, pitsayaꞌ na ni Papuꞌ Isa. Sampay lay na du sila matabeꞌ dī da ni siga sukuꞌ na.

¹⁵ Na sabapan siga pabuwatan kahaylan-haylan ma pinabuwat meꞌ siga rasul, meka na jama bay binoo pinabāk taꞌ tipo da pa bihing siga lān man si Pitel magpapingkaꞌ. Honaꞌ-honaꞌ da, bong bay tumiluꞌ pa mman da san lasa lingu si Pitel, kawu-kawu kaulian na sila.

¹⁶ Maka meka na du jama man kakawum-kawman ni bihing Jerusalem lay du moo jama sakihan sampay jama malasahi meꞌ siga seytan pa mman siga rasul, boꞌ lay du kaulian sikamimon.

Siga rasul si Isa tajīl

¹⁷ Na pag taaka panghuluꞌ imam ka siga soheꞌ na man palhimpunan Saddusi pasal pabuwatan siga rasul looy, tud bay dangkiꞌ sila.

¹⁸ Dari lay sohoꞌ da sinungkuban, boꞌ njīl.

¹⁹ Sugaꞌ pag sangom, luu disu malaikat Papuꞌ lay mukisan ga lawang jīl looy, boꞌ na moo ga rasul looy pa poan. Pag-anu siꞌ, yuk na ninsila,

²⁰ “Pilay na kam pabalik pa langga mehe, boꞌ bi noan jama ndooy bong pooy meꞌ da koleꞌ kasampulnaan nyawa.”

²¹ Dari siꞌ, pag kallat llaw, lay na du sila pilay pa langga mehe sampay lay na sila noan jama ndooy. Kuwan panghuluꞌ imam baw siꞌ tu ka ga soheꞌ na, kanna da masi na pin luu siga rasul looy njawom jīl. Dari bbuwatan da lay nawag baanan kapakihan inawnan Sanhidrin ka ga matatoa ni agama bangsa Israil. Luu jaꞌ siꞌ kumpo labbasakayi, lay na sohoꞌ da kinaddoꞌ siga rasul looy siꞌ man jawom jīl binoo pa mman da sinumariya.

²² Sugaꞌ pag takka jama ma bay sohoꞌ da ngaddoꞌ pa jawom jīl, yaꞌ na luu ga rasul looy. Dari lay na sila pabeleng nuntut, yuk da,

²³ “Pag takka kami pa lawang jīl looy, ndaꞌ kami tud bay hallot meꞌ bay ngunsiꞌ. Damikiyan, kuwan ga ilooy ma tukang jaga, tud masi du nganjaga banahan. Sugaꞌ pag bukaꞌ da lawang, yaꞌ na luu jama njawom!”

²⁴ Pag lay jaꞌ siꞌ kabaan kapitan ga tukang jaga langga mehe sampay na ga imam langkaw looy siꞌ, tud bay gundalaꞌ pamiki da. Maka papiha-piha na ga sila bong ongoy bay magkadarihan meꞌ looy siꞌ.

²⁵ Yaꞌ gi siꞌ hallom, luu na takka jama moo aka, yuk na, “Ga kalallahan looy ma bay jīl bi, luu na la ndooy ni langga mehe batnaa noan jama.”

²⁶ Dari siꞌ, lay du pilay kapitan looy ka ga pagkahi na tukang jaga langga nungkuban siga rasul looy pabalik. Sugaꞌ yaꞌ sila bay mapaddihan ga rasul looy batan hanggaw sila taggahaꞌ hiniyak na baw sila ka batu meꞌ baanan jama ndooy.

²⁷ Luu jaꞌ siꞌ siga rasul looy ni awpan baanan Sanhidrin, kinalasuhan na sila meꞌ panghuluꞌ imam, yuk na,

²⁸ “Kaam baw tu, bay na kam binandaan meꞌ kami yaꞌ nohoꞌ noan jama pasal lalla looy, gam pin amu-amu kam masaplag tōꞌ bi ni sikaliput Jerusalem. Boꞌ ilooy lagi laat na, yaꞌ sannang atay bi ngkod-ngkoran kami yaꞌ bay kalabuan hukuman ni kapatoy lalla looy!”

²⁹ Pag tampung si Pitel ka ga pagkahi na rasul, “Sapatut na baw bina, subay kahandak Tuhan bean kami, saꞌ ga kahandak manusiyaꞌ.

³⁰ Boꞌ kaam baw tu, gam pin lay gi sohoꞌ bi si Isa pinapatoy llansang taꞌ tehang. Lipara lay du ya pinakallum meꞌ Tuhan kabboꞌ-bboan tabi.

³¹ Pag batnaa, lay na ya pinatingkōꞌ meꞌ Tuhan pa bihing na huwin pa kawnan njawom kabantugan mehe. Maka lay na ya binuwat panghuluꞌ maka tukang nalamat. Kon meꞌ looy, supaya tabuwanan na na kitabi bangsa Israil lawang man tabi nawbatan mimon dusa tabi, boꞌ tabi koleꞌ na kaampunan.

³² Kami itu, lay jaꞌ kami pineneꞌ meꞌ si Isa tukang masaplag mimon ma bay tasakup kami ni bay kadarihan na. Subay kam pitsayaꞌ ni umanat kami batan luu na sina Rū Sutsiꞌ mōꞌ buktiꞌ tud mawjud bitsala kami. Boꞌ Rū Sutsiꞌ ina lay na ndean meꞌ Tuhan ni mimon ma ngasip niiya.”

³³ Pag takale meꞌ baanan Sanhidrin bitsala siga rasul looy, tud bay sinalaputan tabbuk da maka doman na ga sila mapatoy sila.

³⁴ Sugaꞌ luu gi baw ndooy disu Parisi njawom baanan da inawnan si Gamaliyel bay ngawalan sila. Iya ilay guru lahal ni saraꞌ agama boꞌ pinagmaltabatan lagi meꞌ sikamimon. Dari lay doꞌ sohoꞌ na binoo ga rasul looy pa poan samantalaꞌ.

³⁵ Likutan da siꞌ ni poan, yuk na, “Kaam, siga pagkahi ku jama Israil, paayad-ayad kam. Pamikihan bi doꞌ paayad bong pooy meꞌ bi buwat siga lalla looy.

³⁶ Bong ina pagtuyuan da siga pakaradjaan ma bay jaꞌ tinulun-tulun meꞌ manusiyaꞌ, yaꞌ du sina luu sōng na. Pamintangan bi na jaman lalla looy ma bay naggaꞌ parinta Rom, yana si Tiyudas. Saꞌ ba, bay ya ngangkat dī na saula-ula iya pa-mmean patingkat? Boꞌ luu na ga mpat hatus jama bay mmeꞌ niiya. Sugaꞌ song hallom, lay du ya pinapatoy meꞌ siga sundalu. Kuwan ga raayat na, lay na magkanatan sampay yaꞌ du bay lanjut garaꞌ da.

³⁷ “Damikiyan, meꞌ looy du silay bay katuwaꞌ ni lalla looy man Jalil, yana si Judas bay jaman sinsus bohoꞌ tinagnaan meꞌ parinta Rom. Meka du jama bay taboo na mmeꞌ niiya. Sugaꞌ damikiyan, lay du ya pinapatoy sampay lay na du magkanatan raayat na.

³⁸ Sangkon bong siꞌ aku kabean, daa na usik-usik tabi ga lalla looy. Bong ina bay jaꞌ tinulun-tulun meꞌ manusiyaꞌ garaꞌ da, yaꞌ du sina luu sōng na.

³⁹ Sugaꞌ bong ina tud bana-bana du lakka man Tuhan, yaꞌ du sina luu dapat bi nalloban sila batan sibuꞌ du sina kam ka nulang Tuhan.” Dari siꞌ, lay na du binean si Gamaliyel meꞌ baanan kapakihan ndooy.

⁴⁰ Sugaꞌ lay doꞌ duhuꞌ ga rasul looy nohoꞌ binoo pa jawom, boꞌ nohoꞌ llagpiꞌ. Maka lay gi sila binandaan yaꞌ na nohoꞌ noan jama pasal si Isa. Pag-anu siꞌ, lay na sila pinōꞌ.

⁴¹ Pag lakka ga rasul looy man baanan Sanhidrin, tud bay gāk sila batan kabantugan mehe ninsila bay natas pinakiyaꞌ kalnaꞌ awon si Isa.

⁴² Dari siꞌ llaw pa dangallaw yaꞌ du sila bay patagong nōꞌ ka masaplag umanat mahap pasal si Isa Almasi ndooy ni langga mehe sampay padisu-padisu lumaꞌ.