Salsila siga Rasul 3 - Sabahagiꞌ Kitab Tawrat: Panagnaan ni Awwal Jaman maka Kitab Injil

Lalla yaꞌ kapalān inulian meꞌ si Pitel

¹ Pag-anu, luu disu llaw, lay pilay si Pitel ka si Yahiya pa langga mehe ga lisag tallu kohap, yana disu waktu man jama pōꞌ maku duwaa pa Tuhan.

² Na ndooy ni behe lawang paga haman langga looy, yana lawang pinag-awnan “Lawang Lingkatan,” luu disu lalla magpamaku sīn. Yaꞌ ya kapalān man jom kūn induꞌ na lagi. Sangkon llaw-llaw llanggung ya pilay supaya ya kapaku saraka ni jama ma paasok.

³ Takita na jaꞌ siꞌ ga si Pitel ka si Yahiya song paasok, lay du sila pakuhan lalla looy.

⁴ Pag-anu siꞌ, pinatong na ya meꞌ si Pitel ka si Yahiya. Maka yuk si Pitel niiya, “Nges, ngandaꞌ ko pitu pa mman kami.”

⁵ Dari siꞌ, lai na du lalla looy ngandaꞌ pa mman da. Kanna na binuwanan na ya.

⁶ Sugaꞌ yuk si Pitel niiya, “Yaꞌ la luu sīn ku sugaꞌ buwanan ta na ko ma luu niyaku. Man kawasa-kapatut awon si Isa Almasi, lalla looy man Nasaret, nangge na ko, boꞌ nu lumān.”

⁷ Pag-anu siꞌ, ilooy ma hinelaꞌ na tangan na meꞌ si Pitel pinatangge. Dari sarunduun du takka na anggawtaꞌ battis na sampay buku-buku na.

⁸ Maka lay na ga ya palambung boꞌ na magliputan lumān. Sampay lay na ya mmeꞌ ni si Pitel ka si Yahiya paasok pa jawom haman langga mehe sambayan na maglambungan lumān mudji Tuhan.

⁹ Boꞌ sikamimon na jama bay ngita iya lumān sambayan na muwan pudji pa Tuhan.

¹⁰ Tud bay haylan sila batan takila da na iya na lalla looy ma yaꞌ bay kapalān magpamaku sīn ni behe Lawang Lingkatan.

Umanat si Pitel ni langga mehe

¹¹ Na lalla looy siꞌ masi nguwangkutan si Pitel ka si Yahiya ngabut sampay ni Sawrung Sultan Sulayman ni haman langga mehe. Dari siꞌ, bahuklud na jama sonse pilay ngandaꞌ iya ni kajayip da.

¹² Pag ndaꞌ si Pitel meꞌ looy, yuk na ninsila, “Kaam, pagkahi ku jama Israil, ongoy kam inu-inu? Maka ongoy kam matong kami na pin saula-ula danan lalla tuu kapalān na man kawasa kami atawa sabap basag kami ngisbat Tuhan?

¹³ Saꞌ situ man kami, arapun man kawasa Tuhan ma bay inisbat meꞌ Nabi Ibrahim, Nabi Isahak, Nabi Yaꞌkub sampay na kabboꞌ-bboan tabi kasohean. Tuhan ilay siꞌ bay ngulian lalla tuu man na muwan kabantugan mehe ni si Isa, lalla ma wā ngasip ni kahandak Tuhan. Ilooy na silay Isa ma bay pa-ntan bi pa mman Gubnul Pilatu sinohoꞌ pinapatoy. San ya adak na bay paddusan Gubnul Pilatu, lay gi sinaggaꞌ meꞌ bi.

¹⁴ Mingkan si Isa ilay sutsiꞌ maka intong, sugaꞌ lay jaꞌ ya tuwak bi. Minsan doman na Gubnul Pilatu maddusan iya, yaꞌ du kam kuhi. Gam pin ilooy ya pogos bi pinaddusan jama pamomonoꞌ.

¹⁵ Boꞌ ilooy ma poonan kaallum ma yaꞌ luu katapusan na, iya ya bay papatoy bi. Lipara luu du Tuhan bay makallum iya. Kami itu, kon kami kabāꞌ mattan llum na ya pabalik batan kami mismu bay kasakup.

¹⁶ “Na lalla tuu itu, tasayu bi na du ndang yaꞌ ya bay kapalān lakka man kūn induꞌ na lagi. Pag batnaa, itu na ya bay inulian ni pag-awpan bi. Boꞌ poonan na baw itu siꞌ bay kaulian isu-isu man sabapan pangando kami ni si Isa ka ni kawasa awon na.”

¹⁷ Yuk si Pitel lagi, “Siga mbuwaꞌ danganakan, katoonan ku du kaam ina ka ga pa-mmean bi bay mapatoy si Isa ni kaawam bi. Yaꞌ san bay taingat bi ga tud iya na Almasi, tukang nalamat bay pinapitu meꞌ Tuhan.

¹⁸ Sabagay, man maruhuꞌ-ruhuꞌ lagi, ndang bay pinalahil meꞌ Tuhan njawom siga tunaꞌ kanabi-nabihan, bong inawnan Almasi, subay ya lumingkaꞌ njawom kabinsanaan. Dari sabapan ilooy ma bay pabuwat bi niiya, lay na du binakbul siga tunaꞌ da.

¹⁹ Sangkon, nawbat na kam boꞌ bi lillaꞌ na pa Tuhan supaya pinuwasan na dusa bi.

²⁰ Meꞌ looy ilay, koleꞌ gi kam kasannangan njawom atay bi sabapan pagkatibuuk bi ka Tuhan. Lagiꞌ na, papitu Tuhan du sina mintu si Isa pa mman bi, yana Almasi ma ndang bay pineneꞌ binuwat tukang nalamat kaam.

²¹ Batnaa ndooy na doꞌ ya ni sulgaꞌ ngkod-ngkoran yaꞌ gi taabut masa man Tuhan mabahauwan mimon-mimon meꞌ ndang bay tinunaꞌ meꞌ kanabi-nabihan mattoꞌ.

²² “Maka ni kapasal Almasi ina, ndang bay tinunaꞌ meꞌ Nabi Musa ni kabboꞌ-bboan tabi, yuk na, ‘Bbos-bbos ina, pinoan du kam meꞌ Tuhan disu nabi meꞌ aku du, turunan bangsa tabi du. Subay bean bi bitsala na sikamimon.

²³ Pag lahil nabi looy ilay mintu, sagannap ma yaꞌ ngahasi bitsala na, yaꞌ na tabeꞌ ni sukuꞌ Tuhan. Boꞌ na, ilooy na silay mintu poonan man da binasa.’ ”

²⁴ Yuk si Pitel lagi, “Sarī man Nabi Musa, mimon kanabi-nabihan nagnaꞌ man bay jaman Nabi Samwel, lay du bay nunaꞌ siga pakaradjaan ma binakbul na ni masa batnaa.

²⁵ “Kitabi itu siga Yahudi yana panubuꞌ siga kanabi-nabihan looy ma bay masampay siga janjiꞌ Tuhan ni bangsa tabi. Maka tabeꞌ na du kitabi ni pagsulutan Tuhan ka kabboꞌ-bboan tabi. Na njawom pagsulutan da, lay nganjanjiꞌ Tuhan ni bboꞌ tabi Nabi Ibrahim, yuk na, ‘Bbos-bbos mimon kabangsa-bangsahan sinupaatan man sabapan panubuꞌ nu.’

²⁶ Na panubuꞌ looy ilay siꞌ yana Ilooy ma Sutsiꞌ, ma wā mmeꞌ ni kahandak Tuhan, yana si Isa. Iya bay pinapitu meꞌ Tuhan duhuꞌ pa mman bangsa tabi Yahudi nabangan kitabi nikutan mimon kalaatan tabi.”