Salsila siga Rasul 26 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Pol ngandaawa ni awpan Sultan Agripa

¹ Pag-anu siꞌ, yuk Sultan Agripa ni si Pol, “Pilayun teꞌ. Mitsala na ko.” Dari ilooy ma ngisalat na si Pol ka tangan na boꞌ na mitsala, yuk na,

² “Ampun Sultan Agripa, kahapan la lay na ku kabuwanan lawang man ku ngandapitan dī ku ni awpan nu.

³ Itu man ku gāk sabap katoonan nu du mimon arat bangsa kami Yahudi sampay na hāl-hiwal man kami yaꞌ magsudjaꞌ pamiki. Sangkon Ampun Sultan, junjung ku na ningkau, buwanan doꞌ ku pasensiya sasang nu pakale niyaku.

⁴ “Sikamimon pagkahi ku Yahudi toon ni hāl kawul-piil ku labba man kadikiꞌ ku ni lahat man ku bay pinamaddihan ngabut sampay jaman ku ndooy ni Jerusalem.

⁵ Katoonan da du ndang hallom na ku bay tabeꞌ ni palhimpunan Parisi ma pinakaadil mogbogan mimon saraꞌ Nabi Musa. Bong siꞌ ina sila bonto, mastiꞌ mangaku jaꞌ sila bana bitsala ku.

⁶ “Na Ampun Sultan, ituu na baw tu man ku pinalkalaꞌ sabapan ilooy ma kinapitsayaan meꞌ ku pasal tukang nalamat ma bay janjiꞌ Tuhan ni kabboꞌ-bboan kami.

⁷ Padahal, aku itu sibuꞌ du ka siga pagkahi ku bangsa Israil pitsayaꞌ ni tukang nalamat looy. Inaa sina ngkon kami saliꞌ-saliꞌ makutuꞌ meꞌ kami numba Tuhan llaw-sangom. Sugaꞌ aku baw tu, pitsayaꞌ ku luu na bay takka tukang nalamat looy, yana si Isa. Maka pitsayaꞌ du ku san ya bay pinapatoy, lay du baw ya pinakallum pabalik. Dari ituu na situ kon ku pinalkalaꞌ meꞌ siga pagkahi ku Yahudi.

⁸ Sugaꞌ ituu baw tilaw ku ningkaam sikamimon, ongoy tu subay na pin kam kaawran pitsayaꞌ Tuhan kapakallum jama matoy?

⁹ “Maruhuꞌ ilay, minsan aku mismu, kanna ku kahandak Tuhan subay ku naggaꞌ sagannap ma pitsayaꞌ ni si Isa, lalla looy man Nasaret.

¹⁰ Dari daran ku naggaꞌ sila ndooy ni Jerusalem. Ni kapatut bay dean siga imam langkaw niyaku, meka na sagannap ma mmeꞌ ni si Isa bay njīl meꞌ ku. Boꞌ lay gi ku ngaminan sagannap ma motangan sila hukuman kapatoy.

¹¹ Maka kansang gi ku padisu-padisu langga miha sila ma mmeꞌ ni si Isa. Luu-luu tatammu ku, lay jaꞌ du pidjalaꞌ ku balangkali sila takoleꞌ ku na pinaggos nikutan si Isa sampay malaat iya. Ni kagigit tabbuk ku, lay gi ku ngalataan siga daira ni katāhan bong pin sila tapidjalaꞌ ku jaꞌ.

¹² Maka ilooy na silay kon ku bay pilay pa Damaskus maruhuꞌ. Boꞌ lay gi ku moo suwat katarangan lakka man siga imam langkaw muwanan aku kapatut nungkuban soysoy mmeꞌ ni si Isa ndooy.

¹³ “Dari, Ampun Sultan, lān ku siꞌ bay pilay, pag ga tangngaꞌ llaw, sarunduun du luu pōꞌ sinag man taꞌ langit dantaꞌ gi man mataallaw, boꞌ lay ninag njataꞌ ku sampay ni siga soheꞌ ku.

¹⁴ Pag-anu, lay na ga kami humantak sikamimon taꞌ tanaꞌ. Boꞌ luu gi takale ku suwara ni pallun kami Hibrani, yuk na, ‘Sol, ū Sol, ongoy ko ngalaugan aku? Midjalaꞌ jaꞌ bina ko dī nu nulang aku.’

¹⁵ “Yuk ku, ‘Tuwan, soy ina siꞌ ko?’ “Tampung na, ‘Aku itu si Isa, ilooy ma pinaglaugan meꞌ nu.

¹⁶ Nangge na ko. Kon ku itu patammu ningkau batan peneꞌ ta na ko binuwat disu sosohoan ku. Subay ko masaplag pasal meꞌ ku siꞌ bay nammuhan kau sampay mimon ma palahil ku ningkau ni sinōng.

¹⁷ Bininsanaꞌ jaꞌ sina ko mintu meꞌ siga pagkahi nu Yahudi sampay siga bangsa sarī ma ngalaugan kau. Sugaꞌ paddusan ta sa ko man komkoman da. Sohoꞌ ta sa ko pa mman da

¹⁸ makallat mata da supaya sila kapōꞌ na man jawom lindom pa jawom dantaꞌ. Man sabapan pangahati ma pasampay nu ninsila, kapōꞌ na sina mintu sila man jawom sakup Ibilis pa jawom sakup Tuhan. Maka sabapan pangando da ina mintu niyaku, puwas na mimon dusa da, boꞌ da kapatabeꞌ na ni siga sukuꞌ Tuhan.’

¹⁹ “Dari Ampun Sultan Agripa, ilooy ilay siꞌ ma bay sohoꞌ Papuꞌ Isa niyaku jaman na mitsala niyaku man taꞌ langit, lay na du asip ku.

²⁰ Duhuꞌ-duhuꞌ man ku bay masaplag ndooy ni Damaskus. Pasunuꞌ, ndooy na baw ni Jerusalem. Paddus mandooy, boꞌ lay na ku ngalataan kakawum-kawman ni sikaliput Yahudiya. Lakka mandooy, lay na baw ku pilay pa kalahat-lahatan ga bangsa saꞌ Yahudi masaplag. Tōꞌ ku ninsila, subay sila nawbat ka maglillaꞌ pa Tuhan. Maka subay sila buwat kaayaran mari tumatandaꞌ lai na du labbahan da mimon dusa da.

²¹ “Na Ampun Sultan, sabapan mimon bay tōꞌ ku siꞌ, ilooy na silay man siga pagkahi ku Yahudi bay nungkuban aku ni langga mehe sampay adak na ga ku papatoy da.

²² Lipara, luu na pin tabang Tuhan niyaku labba man sibuwa ngabut sampay batnaa. Sangkon itu na ga ku nangge ni awpan bi masaplag ningkaam, balkanan atawa ssaꞌ. Boꞌ ituu tu siꞌ sikamimon ma bay tuntut ku ningkaam, yaꞌ luu saꞌ yaꞌ bay tinunaꞌ njawom kitab meꞌ kanabi-nabihan sampay na Nabi Musa.

²³ Njawom tunaꞌ da, tukang nalamat ma bay njanjiꞌ meꞌ Tuhan mastiꞌ lumingkaꞌ doꞌ njawom kabinsanaan sampay pinapatoy. Maka njawom tunaꞌ da, iya na silay duhuꞌ-duhuꞌ pinakallum ma yaꞌ na kuhi matoy saumu-umu. Maka pag lay na ya llum pabalik, pinamahalayak na umanat kasalamatan ni siga Yahudi sampay ma saꞌ Yahudi. Umanat looy ilay siꞌ meꞌ karuha sūꞌ man manusiyaꞌ ngita kabanahan.”

²⁴ Na sasang si Pol masi ngandapitan dī na, ilooy ma lay ngahowap Gubnul Pestus, yuk na, “Bilawan bina ko Pol! Kalanduꞌ na pangadjiꞌ nu, inaa na kabilaw ningkau!”

²⁵ Sugaꞌ tampung si Pol, “Tuwan Gubnul, yaꞌ bitu ku bilawan. Arapun mimon bitsala ku ilay siꞌ kabanahan jaꞌ, yaꞌ luu sāꞌ na.

²⁶ Ampun Sultan Agripa pun ina, tasayu na du kabanahan ni bay bitsala ku siꞌ. Ilooy na silay siꞌ kon ku yaꞌ na bay alang-kapalang mitsala ni awpan na. Kon ku kabāꞌ katoonan na du mimon hāl ma bay sabbut ku siꞌ batan ilooy ma bay katuwaꞌ ni si Isa yaꞌ bay sinipuk.”

²⁷ Dari yuk si Pol ni Sultan Agripa, “Ampun Sultan, bistahan ku pitsayaꞌ du ko ni siga suwat kanabi-nabihan, saꞌ ba?”

²⁸ Yuk Sultan Agripa ni si Pol, “Ongoy kanna nu, tadeꞌ-dēꞌ nu ku binitsalahan mmeꞌ ni si Isa Almasi?”

²⁹ Tampung si Pol, “Deꞌ-dēꞌ atawa niyaꞌ, paku ku baw duwaa pa Tuhan, kamura-murahan Ampun Sultan, labba man kau sampay na mimon ma pakale ntuu sumibuꞌ na niyaku mmeꞌ ni si Isa. Sugaꞌ kamura-murahan yaꞌ du kam mintu sumibuꞌ niyaku pinusas ka karina meꞌ tuu.”

³⁰ Pus meꞌ looy, lay na nangge sultan ka gubnul sampay si Belnisa ka ga soheꞌ da,

³¹ boꞌ da lay na pōꞌ. Lān da palakka mandooy, yuk da padangan-padangan, “Yaꞌ bilay la luu dusa lalla looy siꞌ pataꞌ man na binotangan hukuman kapatoy atawa pun njīl.”

³² Dari yuk Sultan Agripa ni Gubnul Pestus, “Bong siꞌ bilay lalla looy yaꞌ bay muhun nohoꞌ moo palkalaꞌ na pa mman Sultan Sisal, lay na ya bay tapōꞌ.”