Salsila siga Rasul 25 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Pol binoo pa awpan Gubnul Pestus

¹ Na luu jaꞌ siꞌ tallu ngallaw halloman Gubnul Pestus marinta ndooy ni Sesariya, lay na baw ya pilay pa Jerusalem.

² Ndooy siꞌ, lay na baw siga imam langkaw ka ga pa-mmean Yahudi makalluman palkalaꞌ si Pol ni Gubnul Pestus. Boꞌ lay gi puhunan da si Pol

³ nohoꞌ hinalin pa Jerusalem. Angan-angan da nganggapahan iya ni tangngaꞌ lān pinapatoy.

⁴ Sugaꞌ iya tampung Gubnul Pestus, “Si Pol ilay lay na njawom jīl ni Sesariya. Sangkon subay ndooy du man na hinukum. Yaꞌ na situ hallom pabeleng na du ku pilay.

⁵ Bong hati kam doman, pag ku mintu pilay, sohoun bi jaꞌ mmeꞌ kasohean pa-mmean bi niyaku. Ndooy sa boꞌ bi malkalaꞌ iya bong hati tud luu dusa na.”

⁶ Luu jaꞌ siꞌ ga wawuꞌ sampay pa sapū ngallaw halloman Gubnul Pestus ni Jerusalem, lay na ya pabeleng pa Sesariya. Takka ndooy, pag meꞌ sumawung, lay na ya ningkōꞌ ni tingkoan man gubnul ngahukum, boꞌ lay na sohoꞌ na si Pol binoo pa awpan na.

⁷ Luu jaꞌ siꞌ si Pol, magti liput na ya meꞌ siga pa-mmean Yahudi looy lakka man Jerusalem. Maka lay na sila mōꞌ jinisan palkalaꞌ bohat njataꞌ na, sugaꞌ yaꞌ du luu buktiꞌ bay tapōꞌ da.

⁸ Pag-anu siꞌ, lay na si Pol ngandaawa, yuk na, “Aku bitu, yaꞌ ku bay pingkaꞌ ngalangga saraꞌ agama ga pagkahi ku Yahudi. Siga aturan langga mehe pun, yaꞌ du bay langga ku. Damikiyan, yaꞌ du ku bay pingkaꞌ ngalangga siga saraꞌ Panghuluꞌ Sultan.”

⁹ Na pagka doman Gubnul Pestus nulut siga pa-mmean Yahudi looy, yuk na ni si Pol, “Pooy bong tabi pabeleng na doꞌ pa Jerusalem, boꞌ ndooy sa salassay ku palkalaꞌ nu?”

¹⁰ Iya tampung si Pol, “Tuwan Gubnul, bong siꞌ kadarihan ningkau, san daa na kitabi pilay. Katoonan nu na du ndang yaꞌ luu dusa ku ni siga pagkahi ku bangsa Yahudi. Dari pagka aku raayat parinta Rom, sapatut na, ntuu na jaꞌ ku hinukum ni awpan nu. Ndang-ndang kau du bay inuwakilan maghuwis meꞌ Panghuluꞌ Sultan ni Rom.

¹¹ Bong siꞌ baw tu ku bay ngalangga saraꞌ, boꞌ magtūk du dusa ku ka hukuman kapatoy, lillaꞌ na du ku san pinapatoy. Sugaꞌ pagka yaꞌ du luu kabanahan palkalaꞌ siga Yahudi naa njataꞌ ku, nulang na sina ni saraꞌ parinta Rom bong ku pina-ntan na baw ninsila. Sangkon, bong siꞌ kadarihan ningkau, pa-ntanun na ku pa mman Panghuluꞌ Sultan hinukum ndooy ni Rom.”

¹² Dari siꞌ, lay doꞌ isun Gubnul Pestus ka ga kunsihal na. Pag lupus, yuk na, “Pagka bay na ko muhun nohoꞌ hinukum ni Panghuluꞌ Sultan, sohoꞌ ta na ko binoo pa mman na.”

Gubnul Pestus mangaruha ni Sultan Agripa pasal si Pol

¹³ Luu jaꞌ siꞌ daka dangoy ngallaw bay pingkaꞌ, takka na baw Sultan Agripa ka siyali na si Belnisa pa Sesariya ngandaꞌ-ngandaꞌ Gubnul Pestus.

¹⁴ Hallom-hallom jaꞌ siꞌ sila ndooy, lay na baw tuntutan Gubnul Pestus Sultan Agripa hāl palkalaꞌ si Pol, yuk na, “Luu situ ntuu disu pilisu yaꞌ gi san bay sinalassay palkalaꞌ na meꞌ si Pilik jaman na bay maggubnul.

¹⁵ Pag ku bay pilay pa Jerusalem, kuwan siga imam langkaw ka ga matatoa ni agama Yahudi ndooy bay ngandiklamu niyaku hāl palkalaꞌ na. Boꞌ lay gi paku da niyaku nohoꞌ iya binotangan hukuman kapatoy.

¹⁶ “Sugaꞌ yuk ku ninsila, ‘Yaꞌ bilay luu ni arat kami bangsa Rom os-os ngalabuꞌ hukuman ni jama yaꞌ gi san bay tapagsiawop ka ga jama ma bay malkalaꞌ iya. Arapun subay ya binuwanan na doꞌ dapat ngandaawa.’

¹⁷ Dari ituu na situ kon da lay mmeꞌ niyaku pitu pa Sesariya. Sampay yaꞌ na du bay llantan meꞌ ku palkalaꞌ looy. Batan ni katakka kami, pag meꞌ sumawung, lay na ku ningkōꞌ ni tingkoan hukum, boꞌ lay na sohoꞌ ku pilisu looy ma inawnan si Pol binoo pa awpan ku.

¹⁸ Sugaꞌ pag pōꞌ bitsala ga jama ma malkalaꞌ iya, tud bay jayip ku. Kanna ku ilay siꞌ ga luu dusa na mehe kon da malkalaꞌ iya, boꞌ ko, yaꞌ san luu.

¹⁹ Ilooy du pagjawapan da yana hāl agama da maka pasal disu lalla inawnan si Isa ma bay pinapatoy. Sugaꞌ pamāꞌ si Pol, lay na llum lalla looy pabalik.

²⁰ “Na sabap yaꞌ ku pandoy nguwalnaꞌ ni hāl palkalaꞌ meꞌ looy, lay tilaw ku si Pol bong ya kuhi pinabeleng pa Jerusalem hinukum.

²¹ Sugaꞌ gam pin, bay gi ya muhun nohoꞌ moo palkalaꞌ na pa mman Panghuluꞌ Sultan. Dari lay na doꞌ ya sohoꞌ ku njagahan ntuu halloman na yaꞌ gi bay tapokonan ku pilay pa mman na.”

²² Pag-anu siꞌ, yuk Sultan Agripa ni Gubnul Pestus, “Doman ku la pakale ni bitsala pilisu looy.” Pag tampung Gubnul, “Sigi ba, sumawung sa boꞌ nu pakale.”

²³ Pag meꞌ sumawung, lay na pilay ga Sultan Agripa ka si Belnisa pa lumaꞌ mehe man ngahukum. Takka ndooy, tud bay basag meꞌ ngalak sila. Boꞌ luu gi siga komandel sampay siga jama balkanan ni daira looy ngahaboyan sila. Pag-anu, lay na sohoꞌ Gubnul Pestus binoo si Pol pa jawom.

²⁴ Luu jaꞌ si Pol ni awpan da, yuk Gubnul Pestus, “Ampun Sultan Agripa sampay na mimon ma luntuu, inaa na sina lalla ma pinagdiklamu niyaku meꞌ mimon bangsa Yahudi ntuu ka ni Jerusalem. Wā sila ngahowap yaꞌ na ya pataꞌ pinakallum.

²⁵ Sugaꞌ bong inawnan dusa pataꞌ man na kalabuan hukuman kapatoy, tud yaꞌ luu bay tatammu ku. Sugaꞌ pagka bay ya muhun nohoꞌ hinukum ni Panghuluꞌ Sultan, katobtoban pamiki ku, pokonan ku na ya pa mman na.

²⁶ Salla na, yaꞌ ku pandoy māꞌ bong oy palkalaꞌ njataꞌ na njawom suwat pokonan ku pa mman Panghuluꞌ Sultan. Sangkon ituu na situ kon na bay sohoꞌ ku binoo pitu pa awpan bi sikamimon, awla na ningkau Sultan Agripa. Dari pag lupus tabi mintu numariya iya, kawu-kawu luu na tatuntut ku jawom suwat ku.

²⁷ Batan bong niyaku, yaꞌ luu katuwaꞌ-tuwaan na os-os nohoꞌ moo pilisu pilay pa mman Panghuluꞌ Sultan, yaꞌ san luu sangdanan pataꞌ man na pinalkalaꞌ.”