Salsila siga Rasul 23 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹ Na luu jaꞌ siꞌ si Pol, lay doꞌ ya ngandaꞌ pa mman baanan Sanhidrin looy, boꞌ na mitsala ninsila, yuk na, “Siga mbuwaꞌ danganakan, labba man sibuwa ngabut sampay batnaa, yaꞌ situ ku bay buwat oy maka oy na bong bistahan ku maat ni mata Tuhan.”

² Pag takale jaꞌ siꞌ bay bitsala na meꞌ panghuluꞌ imam, yana si Ananiyas, lay doꞌ sohoꞌ na si Pol tinimpopok ni jama ma nangge ndooy ni bihing na.

³ Dari yuk si Pol ni si Ananiyas, “Kau pun ina, tinimpopok du sina ko meꞌ Tuhan. Bbuwatan nu ningkōꞌ nnaa ngahukum aku saula-ula hukuman nu magbēꞌ ka saraꞌ Nabi Musa. Mingkan bbuwatan nu ngalangga saraꞌ na. Magbawuꞌ-bawuꞌ jaꞌ ko intong. Tatammu nu na ga nohoꞌ aku tinimpopok yaꞌ gi san ku bay sinumariya.”

⁴ Yuk siga jama ma nangge ni bihing si Pol, “Uy, kau bitu, tud tawakka baw ko makiyaꞌ panghuluꞌ imam bay pineneꞌ meꞌ Tuhan!”

⁵ Yuk si Pol baw, “Uy la, ga mbuwaꞌ danganakan, panghuluꞌ imam bilay hati ya. Bong siꞌ ndang bay takila ku, yaꞌ ku bay halling meꞌ looy, batan yuk suwat njawom kitab, ‘Daa kam malaat ilooy ma magtakōk ningkaam.’ ”

⁶ Na si Pol ilay siꞌ, ndang katoonan na kasohean paki ni baanan Sanhidrin looy lakka man palhimpunan Parisi, kuwan kasohean, lakka man palhimpunan Saddusi. Maka katoonan na du ndang yaꞌ magbēꞌ pangahati da pasal kitab. Dari lay ya mitsala pahaddo ninsila, yuk na, “Siga mbuwaꞌ danganakan, aku itu Parisi, mmaꞌ ku pun iyadu. Dari sibuꞌ du situ ku ka mimon Parisi pitsayaꞌ jama matoy pinakallum du bbos-bbos. Ituu na situ kon ku hinukum.”

⁷ Lay jaꞌ siꞌ si Pol mitsala meꞌ looy, magti pōꞌ pagjawapan ni antaraꞌ ga Saddusi ka ga Parisi ndooy.

⁸ Bong ni ntan siga Saddusi, yaꞌ na konoꞌ luu masa jama matoy pinakallum bbos-bbos. Maka yaꞌ sila pitsayaꞌ ga luu siga malaikat atawa siga rū. Boꞌ Parisi ilay, pitsayaꞌ ni ilooy siꞌ labbasakayi.

⁹ Dari magdaruhun na kalingogan ndooy sampay sipaspad na ga sila. Boꞌ luu na ga kasohean guru saraꞌ agama ma tabeꞌ du ni palhimpunan Parisi ngandapitan si Pol, yuk da, “Yaꞌ bina la luu kasaan lalla naa. Marean ta bana luu malaikat atawa disu rū bay malahil kabanahan niiya.”

¹⁰ Na pag sikapasuꞌ jaꞌ ga Parisi ka ga Saddusi ndooy, hanggaw na komandel looy taggahaꞌ salik-manalik na baw baran si Pol meꞌ da. Dari lay sohoꞌ komandel looy llakkahan si Pol mandooy, boꞌ nohoꞌ binoo pabeleng pa kampu ni siga sundalu na.

¹¹ Na pag sangom, luu na baw Papuꞌ Isa nammuhan si Pol, nangge ni bihing na. Yuk Papuꞌ niiya, “Pahallotun na pin ba tawakka nu. Yana meꞌ nu bay masaplag kabanahan pasal aku ntuu ni Jerusalem, subay du meꞌ naa meꞌ nu buwat pag mintu ndooy ni Rom.”

Siga Yahudi isun mapatoy si Pol

¹² Pag taabut sayu, lay na baw kumpo-kumpo kasohean Yahudi isun mapatoy si Pol. Boꞌ lay gi subalihan da basta yaꞌ doꞌ sila nginum atawa mangan ngkod-ngkoran yaꞌ gi bay tapapatoy da si Pol.

¹³ Eka da siꞌ bay isun labi mpatpūꞌ.

¹⁴ Dari lay na sila pilay pa mman siga imam langkaw ka ga matatoa ni agama mahati, yuk da, “Kami itu lay na nubali basta yaꞌ na doꞌ kami nginum atawa mangan ngkod-ngkoran yaꞌ gi bay tapapatoy kami si Pol.

¹⁵ Dari paku kami ningkaam sampay na ni baanan Sanhidrin, sōn bi doꞌ pinuhunan si Pol pa mman komandel nohoꞌ binoo pa mman bi. Baan bi komandel bahasa doman na pin kam numariya si Pol. Kuwan kami, nganggapa na ni tangngaꞌ lān mari ya tapapatoy kami na padpad yaꞌ gi ya bay takka pa mman bi.”

¹⁶ Lipara luu disu lalla, anak-anak bahau, yana anak danganakan si Pol ma danda, bay kasundung ni bay pag-isunan baanan ga Yahudi looy. Dari lay ya pa kampu mahati si Pol.

¹⁷ Lay jaꞌ siꞌ si Pol kabaan, ilooy ma lay ya ngalinganan disu kapitan sundalu, yuk na, “Kapitan, bong siꞌ dari ningkau, boonun doꞌ lalla tuu pa mman komandel nu. Luu situ bitsala na niiya.”

¹⁸ Dari lay na binoo meꞌ na kamanakan si Pol pa mman komandel. Takka ndooy, yuk kapitan looy, “Sel, pilisu looy, yana si Pol, bay maku tulung niyaku nohoꞌ nuhiyan lalla tuu pa mman nu. Luu konoꞌ bitsala na ningkau.”

¹⁹ Pag-anu siꞌ, lay doꞌ tinondaꞌ lalla looy man tangan meꞌ komandel palawak dangkitiꞌ mari duwang-duwangan jaꞌ sila. Pag-anu siꞌ, tinilaw na ya meꞌ komandel, yuk na, “Oy siꞌ tu Toꞌ bāꞌ nu niyaku?”

²⁰ Pag tampung na, “Luu la siga pa-mmean Yahudi bay isun nohoꞌ muhunan Paꞌ Pol ningkau nohoꞌ binoo pa mman baanan Sanhidrin sumawung. Bahasa doman na pin sila numariya iya.

²¹ Sugaꞌ, daa busung, paku ku na junjung ningkau, daa na ko kuhi sabap luu labi mpatpūꞌ eka da bay isun nganggapahan iya. Boꞌ bay gi sila nubali basta yaꞌ doꞌ sila nginum atawa mangan ngkod-ngkoran yaꞌ gi ya bay tapapatoy da. Batnaa sakap na silay sila. Ngagad sa sila bong ko matugut du.”

²² Dari yuk komandel niiya, “Toꞌ, daa na ko maꞌ-māꞌ ni soy maka soy na ni hāl bay bitsala nu siꞌ niyaku.” Pag-anu, boꞌ na sinohoꞌ meꞌ komandel moleꞌ.

Si Pol tinuhiyan pa mman Gubnul Pilik ndooy ni Sesariya

²³ Pus meꞌ looy, lay na baw komandel looy nawag kapitan na duwa. Luu jaꞌ siꞌ, yuk na ninsila, “Ngumpo kam duwa hatus sundalu ka pitumpūꞌ sundalu taꞌ kuraꞌ, sampay duwa hatus sundalu ka budjak, boꞌ tuhiyanan bi na si Pol pa Sesariya. Sakap na kam boꞌ bi palakka mintu sangom ga lisag siyam.

²⁴ Kaddoan bi si Pol kuraꞌ. Maka jagahan bi paayad mari ya yaꞌ kongoy-kongoy ni palanan bi. Pag takka ndooy, pa-ntanun bi na ya pa mman Gubnul Pilik.”

²⁵ Na adak jaꞌ sila luꞌ pilay, luu gi suwat bay pinokonan meꞌ komandel pa mman Gubnul Pilik. Njawom suwat looy, yuk na,

²⁶ “Ituu itu aku, yana Komandel Kalawdiyus Laysiyas. Itu suwat ku pa mman nu Tuwan Gubnul Pilik. Salam duwaa ningkau.

²⁷ “Jama naa ina ma bay papilu ku pa mman nu lay sina sinungkuban meꞌ siga Yahudi sampay adak na ga pinapatoy. Sugaꞌ pag tasayu ku iya raayat parinta Rom, lay ya tabang kami ka ga sundalu ku.

²⁸ Dari pagka bay ku doman kahati bong oy bay dusa na ninsila, lay ya boo ku pa mman baanan siga paki da ma tukang ngahukum inawnan Sanhidrin.

²⁹ Ndooy siꞌ, jawom ku pakale ni bitsala da, tabista ku na yaꞌ du luu kasaan na pataꞌ man na pinapatoy atawa njīl. Ilooy du hati man na kinagigitan sabap meꞌ da yaꞌ magsulut ni hāl saraꞌ agama da sadjaꞌ.

³⁰ “Boꞌ ilooy gi laat na, song hallom, lay na baw ku kabaan luu garaꞌ kasohean Yahudi mapatoy iya. Dari ituu na situ man na lay na magti sohoꞌ ku tinuhiyan pa mman nu hinukum. Na sagannap siga Yahudi ma doman malkalaꞌ iya, sohoꞌ ku sa pilu pa mman nu mahati bong oy sāꞌ na. Dari ngkod naa jaꞌ bitsala ku.”

³¹ Na pag taabut sangom, lay du bean siga sundalu looy siꞌ panohoan komandel da. Lay na boo da si Pol ngabut sampay taabut da na daira Antipataris.

³² Pag meꞌ sumawung, kuwan ga sundalu looy ma taꞌ kuraꞌ, lay na pawus ka si Pol pa Sesariya. Kuwan siga pagkahi da sundalu ma lumān jaꞌ, lay na pabeleng pa kampu da ndooy ni Jerusalem.

³³ Na pag takka jaꞌ siꞌ baanan ga sundalu looy taꞌ kuraꞌ pa Sesariya, lay na pasampay da suwat komandel da ni gubnul sampay lay na pa-ntan da si Pol pa mman na.

³⁴ Pus gubnul bay matsa suwat looy, tilaw na ni si Pol, “Jama maninggai tu ko?” Pag tampung si Pol, “Aku itu jama man Silisiya.”

³⁵ Yuk gubnul niiya, “Pag mintu takka na siga jama ma ngandiklamu kau, bungka ku na palkalaꞌ nu.” Pag-anu siꞌ, lay na sohoꞌ na njagahan si Pol ndooy ni astanaꞌ bay pabuwat Sultan Herod.