Salsila siga Rasul 19 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Pol masaplag ni Epesus

¹ Sasang si Apolos ndooy ni Korin, kuwan si Pol, lay pilay pa Epesus man taꞌ dile. Takka pa Epesus, lay ya sitammu ka ga kasohean jama ma pitsayaꞌ ni si Isa.

² Tilaw na ninsila, “Waktuhan bi bohoꞌ pitsayaꞌ ni si Isa, luu kilay Rū Sutsiꞌ bay pinatannaꞌ njawom atay bi?” Tampung da, “Yaꞌ san bilay bay taaka kami ga luu inawnan Rū Sutsiꞌ.”

³ Dari yuk si Pol, “Na bong kam masi awam pasal Rū Sutsiꞌ minsan kam bay na pingkaꞌ pinandi, pandihan oy baw lay man bi bay pinandi?” Pag tampung da, “Man kami bay pinandi yana pandihan meꞌ ilooy ma bay tinōꞌ meꞌ si Yahiya ma Tukang Mandi.”

⁴ Pag halling si Pol, “Pandihan si Yahiya ilay yana sipat sadjaꞌ lay na tawbatan jama dusa da. Sugaꞌ si Yahiya ilay, lay gi du baw māꞌ subay jama pitsayaꞌ ni ilooy ma pasunuꞌ niiya. Ilooy ilay siꞌ ma awnan na yana si Isa na. Dari pagka luu na du si Isa bay pitu pa junyaꞌ, sapatut na, soysoy pitsayaꞌ niiya subay du pinandi ka pandihan na.”

⁵ Pag lay jaꞌ takale da meꞌ looy, lay du sila nohoꞌ pinandi ni awon Papuꞌ Isa.

⁶ Pus da pinandi, lay na tinappak bumbunan da meꞌ si Pol sampay sarunduun du patannaꞌ Rū Sutsiꞌ ninsila. Dari mitsala na ga sila ni jinisan pallun ma yaꞌ san bay pingkaꞌ kapandoyan da. Sampay lay na ga sila mōꞌ siga umanat man Tuhan ma pinalahil meꞌ Rū Sutsiꞌ ninsila.

⁷ Eka da siꞌ bay meꞌ looy luu ga sapu-duwa.

⁸ Na ndooy siꞌ ni Epesus, njawom tallum buwan, bbuwatan si Pol nōꞌ njawom langga siga Yahudi. Boꞌ tud nawakka ya masaplag sampay mmeꞌ magbilmaarup ka sila bong pin pitsayaꞌ jaꞌ sila ni umanat na pasal pamarinta Tuhan.

⁹ Sugaꞌ kasohean jama ndooy tud tohas kōk da, yaꞌ kuhi pitsayaꞌ. Gam pin tuktuk si Pol noan jama lān pa Tuhan, pinalaat lagi meꞌ da tōꞌ na ni pag-awpan sikamimon. Dari lay na pōꞌ si Pol man langga looy ka ga sagannap ma mmeꞌ ni si Isa, boꞌ da bay halin pa iskul si Tirannus. Dari labba mandooy, ndooy na man si Pol nōꞌ llaw-llaw sampay magbilmaarup ka jama.

¹⁰ Njawom duwan taun meꞌ looy na jaꞌ siꞌ bay pabuwatan na. Dari mimon jama ma maglahat ni Asiya, bangsa Yahudi atawa saꞌ Yahudi, lay na pingkaꞌ kale umanat pasal Papuꞌ Isa.

Siga anak si Eskeba

¹¹ Ndooy siꞌ ni Epesus, lay na baw si Pol buwanan Tuhan kawasa mōꞌ jinisan pabuwatan kahaylan-haylan.

¹² Minsan ga saputangan sadjaꞌ atawa sammek ma bay purut si Pol, bong pinatappak ni baran jama sakihan, sarunduun du sila kaulian. Bong jama sineytan, magti pōꞌ siga seytan man baran da.

^13-14 Na jaman looy du siꞌ, luu du ndooy baanan Yahudi ma tukang nawa jama sineytan padisu-padisu kawum. Ni baanan da siꞌ, luu pituꞌ lalla yana anak disu imam langkaw inawnan si Eskeba. Pag taaka ga lalla looy siꞌ mehe kawasa awon Papuꞌ Isa, lay suwayan da ngakig si Pol. Dari yuk dangan ni seytan jom baran disu lalla, “Ni kawasa awon si Isa ma pinasaplag meꞌ si Pol, sohoꞌ ta na ko pōꞌ man jawom baran lalla tuu.”

¹⁵ Sugaꞌ yaꞌ kuhi pōꞌ seytan looy, gam pin yuk na ninsila, “Katoonan ku du bina si Isa ka si Pol, sugaꞌ bong kaam, soy doꞌ kam ina?”

¹⁶ Dari gam pin, bbuwatan jama looy ma sineytan, lay gi ngalompat ga lalla looy sikapituꞌ boꞌ na monoꞌ sila yaꞌ na luu hād gantaꞌ na. Boꞌ tud yaꞌ du sila bay kaatu. Maka lay gi sinalik-salik pakayan da. Dari lay na sila sonse man lumaꞌ nantang jaꞌ sampay bakat na ga baran da.

¹⁷ Pag bay taaka meꞌ mimon Yahudi ka siga jama saꞌ Yahudi ndooy ni Epesus bong oy bay katuwaꞌ ni ga lalla looy, takkahan tawu na ga sila. Maka pinaehe na ga meꞌ da awon Papuꞌ Isa.

¹⁸ Maka meka na sukuꞌ si Isa ma yaꞌ gi bay ngalabbahan dusa da labbasakayi, lay na māꞌ ni awpan baanan pagkahi da kalaatan ma bay pabuwat da.

¹⁹ Damikiyan, meka na du sila ma bay pingkaꞌ nawa atawa mōꞌ majik bay ngumpo būk ilmuꞌ da, boꞌ tinunu ni mayran. Bong binista hagaꞌ siga būk looy, luu ga limampūꞌ libu dublun pilak porol.

²⁰ Dari sabap meꞌ looy, patanyag na pin umanat mahap pasal Papuꞌ Isa. Boꞌ umanat looy ilay tud kawasahan batan meka na pangatayan jama bay hinalin pag lay jaꞌ sila pitsayaꞌ.

Kalingogan ni Epesus

²¹ Yaꞌ gi siꞌ hallom, maru na baw si Pol pabeleng pa Masidunya ka Akaya boꞌ na pawus pa Jerusalem. Maka angan-angan na, paddus man Jerusalem, subay du ya pilay pa Rom.

²² Sugaꞌ lay doꞌ ya maduhuꞌ limbang na duwa yana si Timuti ka si Irastus luꞌ pilay pa Masidunya. Kuwan iya, hallom-hallom gi bay patamban ndooy ni Asiya.

²³ Na sasang si Pol masi ndooy ni Epesus, luu na baw hiluhalaꞌ mehe ndooy sabapan tōꞌ na pasal si Isa yana lān pa Tuhan.

²⁴ Na jama ma bay mōꞌ hiluhalaꞌ meꞌ looy siꞌ yana disu lalla inawnan si Dimitrius. Iya ilay disu tukang maba magpabuwat siga langga-langga dikiꞌ ka pilak porol pinadagangan. Ga langga-langga looy ilay siꞌ yana limbagan disu langga mehe man jama Epesus numba tuhan-tuhan da ma danda pinag-awnan si Altemis. Dari ilooy na bay dari paluntungan mehe ni si Dimitrius sampay na ga pagkahi na tukang maba ndooy.

²⁵ Dari bbuwatan si Dimitrius siꞌ tu lay nawag siga pagkahi na tukang maba. Luu jaꞌ siꞌ sila kumpo, yuk na, “Kaam, siga pagkahi ku, tabista bi na du sina pabuwatan tabi yana paluntungan mehe ningkitabi.

²⁶ Sugaꞌ song lungay na situ usaha tabi man sabapan tōꞌ lalla looy ma inawnan si Pol. Takita bi na du bong pooy na eka jama ntuu ni Epesus bay takoleꞌ na binitsalahan nohoꞌ ngalabbahan siga tuhan da. Baꞌ-bāꞌ na, siga tuhan ma pinabuwat meꞌ manusiyaꞌ saꞌ tuhan bana. Maka lay na du taaka bi saꞌ na sat jama ntuu bay takoleꞌ na binitsalahan, sampay ni sikaliput Asiya, meka na du pitsayaꞌ ni tōꞌ na.

²⁷ Bong itu kala meꞌ jama pakale na pin niiya, yaꞌ na hallom diyoꞌ na meꞌ da ngandaꞌ pabuwatan tabi. Sarī gi, song hallom, yaꞌ na du luu kapuspusan langga mehe man numba tuhan tabi si Altemis ma yaꞌ luu sibuꞌ sabanding na. Ilooy gi laat na, kabantugan njataꞌ si Altemis ma sinumba meꞌ jama Asiya sampay jama ni sikaliput junyaꞌ lungay na du.”

²⁸ Pag lay jaꞌ takale da bitsala si Dimitrius, tud bay sinalaputan tabbuk da sampay sigi-sigi na ga sila maghowapan, yuk da, “Yaꞌ luu sibuꞌ sabanding si Altemis, tuhan jama Epesus.”

²⁹ Dari meꞌ looy na siꞌ, song paeka na pin jama hiluhalaꞌ ni sikaliput daira looy. Dari bbuwatan kasohean lay na ga nungkuban duwa soheꞌ si Pol yana ga si Gayus ka si Aristalkus, ga jama man Masidunya. Boꞌ lay gi sila hinelaꞌ-helaꞌ pilay pa plasa.

³⁰ Na si Pol siꞌ tu, doman na pin paasok pa jawom baanan ga jama looy moo sila magbitsala, sugaꞌ lay ya sinaggaan meꞌ siga pagkahi na sukuꞌ si Isa.

³¹ Sampay kasohean kabagayan si Pol ma luu ntan da ni parinta Asiya bay du nohoꞌ jama pilay pa mman na nganjunjung niiya yaꞌ nohoꞌ magpakita pilay pa plasa.

³² Na ni plasa looy siꞌ, yaꞌ na luu hantiꞌ na ga baanan jama ndooy hiluhalaꞌ. Kuwan kasohean, howap meꞌ tuu, kasohean meꞌ tuu. Mingkan ilay siꞌ, kaekahan ndooy yaꞌ san tasayu da bong oy sabapan man da bay kapalamud ni kahiposan looy.

³³ Pag-anu, luu disu jama inawnan si Aleksandel, lay sinohoꞌ meꞌ siga pagkahi na Yahudi pa awpan baanan jama ndooy. Maksud da subay ya mahati jama ndooy yaꞌ luu lamud bangsa Yahudi ni pabuwatan ga si Pol. Luu jaꞌ siꞌ si Aleksandel ni awpan da, lay doꞌ ya ngisalat nohoꞌ jama diyam-diyam mari ya kabitsala.

³⁴ Sugaꞌ tasayu da jaꞌ siꞌ iya bangsa Yahudi, gam pin lay ya pinagbaan-baanan hinowapan luu ga duwan jām, yuk da, “Yaꞌ bilay luu sibuꞌ sabanding si Altemis, tuhan jama Epesus.”

³⁵ Sakayi da takoleꞌ nohoꞌ diyam-diyam, noy luu na disu lalla ma luu ntan na ni upis parinta bay pa awpan da mitsala ninsila. Yuk na, “Kaam, siga pagkahi ku jama Epesus, kinatoonan du bina meꞌ manusiyaꞌ ni sikaliput junyaꞌ kitabi ngantanan langga man numba tuhan tabi si Altemis ma yaꞌ luu sibuꞌ sabanding na. Maka tanyag du kitabi jama Epesus tukang nganjagahan jama-jama limbagan si Altemis ma bay labuꞌ man taꞌ langit.

³⁶ Na bitsala ku ilay siꞌ tud bana. Yaꞌ na tapakilubaan. Sangkon njawom iman kam. Daa kam os-os madara kahandak bi.

³⁷ Subay siꞌ yaꞌ bay sungkuban bi ga lalla tuu binoo pitu. Ndang-ndang yaꞌ du sila bay nangkaw oy maka oy na njawom lumaꞌ tuhan tabi. Maka yaꞌ du sila bay malaat tuhan tabi.

³⁸ “Na bong ga si Dimitrius ka ga pagkahi na tukang maba doman malkalaꞌ jama, subay sila pilay pa lumaꞌ saraꞌ. Luu du silay ndooy huwis bay inuwakilan meꞌ parinta ngahukum.

³⁹ Na bong hati luu gi diklamu bi sarī, daa jaꞌ subay na pin kam hiluhalaꞌ. Subay kam moo diklamu bi pa siga saraꞌ nohoꞌ sinalassay.

⁴⁰ Batan piligru situ kitabi kalabuan hukuman bong kitabi bay sinumbung ni hāl kahiluhalaan tuu. Boꞌ yaꞌ san luu daawa tabi pataꞌ bong ongoy kitabi bay buwat meꞌ tuu.”

⁴¹ Na pag lupus jaꞌ siꞌ jama looy ma buwat ni parinta mitsala, lay na sohoꞌ na moleꞌ baanan ga jama ndooy.