Salsila siga Rasul 18 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Pol masaplag ndooy ni Korin

¹ Pag-anu, lay na lakka si Pol man Aten, boꞌ na pilay pa Korin.

² Ndooy siꞌ ni Korin, lay ya sitammu ka disu Yahudi inawnan si Akila, jama man Pontus. Iya siꞌ tu bahau jaꞌ takka man Itali ka nda na si Prisila. Kon da bay lakka mandooy batan lay na pinalahi mimon bangsa Yahudi man Rom meꞌ Sultan Kalawdiyus. Na yaꞌ gi siꞌ hallom, lay na baw si Pol pilay ngandaꞌ-ngandaꞌ ga si Akila.

³ Dari pagka saliꞌ du sila tukang buwat lumaꞌ luna, lay na si Pol tamban ni lumaꞌ da sampay lay na ya mmeꞌ buwat ndooy.

⁴ Na tuktuk Llaw Pahali, pilay si Pol pa langga Yahudi. Ndooy siꞌ, daran ya magbilmaarup ka siga Yahudi sampay na bangsa Greek kawu-kawu taboo na na sila pitsayaꞌ ni si Isa.

⁵ Na yaꞌ gi siꞌ hallom, takka na ga si Saylas ka si Timuti man Masidunya. Ni katakka da, ndaꞌ da si Pol masaplag na pin umanat Tuhan. Bbuwatan na, mahati ni siga Yahudi ndooy pasal si Isa yana Almasi, tukang nalamat bay njanjiꞌ meꞌ Tuhan.

⁶ Sugaꞌ song hallom, lay si Pol sinulang meꞌ da sampay lay gi ya pinitnahan. Dari lay na pappagan na momok tanaꞌ ma ngakkot ni badjuꞌ na tandaꞌ yaꞌ na luu lamud na ninsila. Pag-anu, boꞌ na halling, “Bong ina kam mintu minulkaan meꞌ Tuhan, man kaam na sina, saꞌ na man aku. Labba man batnaa, pa mman siga bangsa saꞌ Yahudi na ku masaplag.”

⁷ Dari lay na ya lakka man langga looy, boꞌ na tamban ni lumaꞌ si Taytus Justus. Si Taytus ilay saꞌ bangsa Yahudi sugaꞌ numba du ya Tuhan. Lumaꞌ na ni bihing langga looy du siꞌ.

⁸ Pag-anu, yaꞌ hallom, kuwan pa-mmean langga looy, yana si Kirispus, lay na du mmeꞌ pitsayaꞌ ni si Isa sampay na mimon jama lumaꞌ da. Maka meka na jama ni Korin ma bay kale umanat si Pol lay na du pitsayaꞌ ni si Isa sampay lay na pinandi.

^9-10 Pag-anu, luu disu sangom, lay na baw si Pol pinakitahan pandapat meꞌ Papuꞌ Isa. Njawom pandapat na, halling Papuꞌ, “Daa na ko tawu masaplag. Luu du ku ngunungan kau. Yaꞌ du sina luu makaat kau ntuu. Daa ko diyam-diyam, basta masaplag jaꞌ ko batan meka na sina mintu ni daira tuu pitsayaꞌ niyaku.”

¹¹ Dari lay na tamban si Pol ndooy ni Korin dantaun ka tongaꞌ masaplagan jama umanat Tuhan.

¹² Na kuwan siga Yahudi ndooy ni Korin ma yaꞌ pitsayaꞌ ni si Isa, lay isun naggaꞌ si Pol. Dari lay na baw ya sungkuban da boꞌ na binoo pa mman si Galliyo pinalkalaꞌ. Si Galliyo ilay maggubnul ndooy ni Akaya jaman looy.

¹³ Yuk siga Yahudi looy siꞌ tu ni gubnul, “Lalla tuu tu, meꞌ na noan jama numba Tuhan, tud nulang ni lanan saraꞌ agama kami.”

¹⁴ Saddong adak pabongat behe si Pol ngandaawa, yuk Gubnul Galliyo, “Kaam tu, siga Yahudi, bong ilay siꞌ tud bohat palkalaꞌ lalla tuu atawa luu kalaatan bay pabuwat na, pataꞌ du kam pinakale meꞌ ku.

¹⁵ Sugaꞌ bong ya du sat palkalaꞌ pasal kabtangan ka ga awon jama sampay saraꞌ agama bi, kaam na jaꞌ ba nalassay. Yaꞌ na ku doman palamud ngahukum bong sat hāl meꞌ naa.”

¹⁶ Dari siꞌ, lay na jaꞌ sila sohoꞌ gubnul palakka man lumaꞌ hukum.

¹⁷ Na kuwan siga bangsa Greek siꞌ tu ma ndang lundooy maiman, lay na labuꞌ duga da pa jataꞌ si Sostinis, disu pa-mmean langga Yahudi. Dari lay ya hinelaꞌ-helaꞌ meꞌ da sampay lay gi sinuntuk njawom lumaꞌ hukum. Sugaꞌ yaꞌ na du san bay pinaruli meꞌ Gubnul Galliyo.

Ga si Pol pabeleng pa Antiyok

¹⁸ Kuwan si Pol baw siꞌ tu, hallom-hallom jaꞌ siꞌ ya bay ndooy ni Korin, lay na ya muhun man siga pagkahi na sukuꞌ si Isa moleꞌ pa Siriya. Dari lay na ya lakka ka ga si Prisila ka si Akila song pa daira Kengkereya miha adjung man da patuwak pa Siriya. Na sasang da siꞌ ndooy ni Kengkereya, lay na si Pol kuku man na numan bay sasangiꞌ na pa Tuhan. Pag-anu, boꞌ da mmeꞌ taꞌ adjung pa Siriya.

^19-21 Na lān da siꞌ song pa Siriya, lay gi sila pahās ni Epesus. Ndooy siꞌ, lay si Pol pilay pa langga Yahudi magbilmaarup ka sila pasal si Isa. Pag lay jaꞌ takale da bay bitsala si Pol, kainagon da pahallom na pin si Pol ndooy, sugaꞌ yaꞌ na baw ya bay kuhi. Sugaꞌ pus na muhun moleꞌ, yuk na, “Bbeleng sa ku bong nugut du Tuhan.” Pag-anu siꞌ, lay na ya patuwak song pa Siriya. Kuwan ga si Akila, lay na jaꞌ tamban ndooy ni Epesus.

²² Pag dungguꞌ adjung looy pa Sesariya, lay doꞌ si Pol patukad pa Jerusalem ngandaꞌ-ngandaꞌ baanan pagkahi na sukuꞌ si Isa, boꞌ na pawus pa Antiyok ndooy ni Siriya.

²³ Hallom-hallom jaꞌ siꞌ ya ndooy ni Antiyok, lay na baw ya pilay pabalik pa Galatiya ka Pirigiya. Ndooy siꞌ, lay na baw ya ngalataan lahat mataggu iman sukuꞌ si Isa sikamimon.

Si Apolos magnasihat ni Epesus

²⁴ Na ni waktu looy du siꞌ, luu na baw disu Yahudi ma pitsayaꞌ na du ni si Isa takka pa Epesus. Awon na si Apolos, jama man Aleksandriya. Iya ilay pintal mitsala maka lahal ni kitab kanabi-nabihan.

²⁵ Maka lay gi ya bay pingkaꞌ tinoan pasal Papuꞌ Isa yana lān pa Tuhan. Boꞌ na, tud tinagi ya noan jama pasal iya. Mimon tōꞌ na pasal si Isa yaꞌ luu sāꞌ na. Sat na jaꞌ, yaꞌ gi sukup pangahati na, batan luu gi pandihan yaꞌ tasayu na. Ilooy du pandihan ma katoonan na yana pandihan si Yahiya ma Tukang Mandi.

²⁶ Na si Apolos ilay si, yaꞌ luu hanggaw na magnasihat pasal si Isa ni langga siga Yahudi. Sugaꞌ pag lay jaꞌ ya takale mitsala meꞌ si Prisila ka si Akila, tabista da na yaꞌ sukup pangahati na. Dari lay ya boo da pa lumaꞌ da, boꞌ na sinampunan meꞌ da pangahati na pasal garaꞌ Tuhan nalamat manusiyaꞌ.

²⁷ Na hallom maka hallom na, doman na baw si Apolos patuwak pa Akaya masaplag. Boꞌ lay du inaminan garaꞌ na meꞌ siga pagkahi na sukuꞌ si Isa ni Epesus. Sampay lay gi sila nuwat pa mman sagannap ma mmeꞌ ni si Isa ndooy ni Akaya supaya hinasi meꞌ da paayad si Apolos. Na pag takka na pa Korin ndooy ni Akaya, man sabapan gaos Tuhan njataꞌ na, tud bay mehe tabang tōꞌ na ni sagannap ma pitsayaꞌ na ni si Isa.

²⁸ Maka minsan daran siga Yahudi nual iya ni mayran, yaꞌ du luu meꞌ da tumunga. Kon meꞌ looy batan meka na buktiꞌ bay tapōꞌ na man jawom kitab pasal si Isa yana Almasi, tukang nalamat bay njanjiꞌ meꞌ Tuhan.