Salsila siga Rasul 14 - Sabahagiꞌ Kitab Tawrat: Panagnaan ni Awwal Jaman maka Kitab Injil

Ga si Pol magnasihat ni Ikoniyum

¹ Na pag takka si Pol ka si Balnabas ndooy ni Ikoniyum, yaꞌ hallom, lay na baw sila paasok pa langga siga Yahudi sampay magnasihat meꞌ ndang bay pabuwatan da du ndooy ni Antiyok. Dari sabap lay na ngotab njawom atay jama ndooy bay bitsala da, meka na banahan bangsa Yahudi sampay siga saꞌ Yahudi bay pitsayaꞌ ni Papuꞌ Isa.

² Sugaꞌ kuwan siga Yahudi ma yaꞌ kuhi pitsayaꞌ, bbuwatan da ngoyo-ngoyohan ga jama saꞌ Yahudi lagi supaya gigitan na du sila ni siga sukuꞌ si Isa sampay nulang na ga.

³ Sugaꞌ san baw meꞌ looy, masi gi du baw bay humallom ga si Pol ka si Balnabas ndooy. Boꞌ amu-amu lagi sila nawakka masaplag pasal Papuꞌ Isa. Boꞌ na, lay gi sila binuwanan meꞌ Papuꞌ kawasa mōꞌ pabuwatan kahaylan-haylan ka sipat kawasa Tuhan tandaꞌ na mawjud du umanat da pasal timbang Tuhan ni manusiyaꞌ.

⁴ Sugaꞌ ga jama ndooy ni Ikoniyum magsulemaꞌ pamiki. Kasohean mmeꞌ ni siga Yahudi ma yaꞌ pitsayaꞌ, kuwan kasohean, mmeꞌ ni ga si Pol.

⁵ Dari song hallom, lay na isun kasohean Yahudi ka ga jama saꞌ Yahudi sampay ga pa-mmean da minsanaꞌ ga si Pol sampay ngahiyak sila ka batu mari sila matoy.

⁶ Pag taaka ga si Pol bay pag-isunan da, lay sila lahi pa siga daira Listra ka Delbe ndooy ni Laykawniya. Maka lay gi sila ngalataan kakawum-kawman ma ngaliput ga daira looy.

⁷ Ndooy siꞌ, lay na darahan da meꞌ da masaplag umanat mahap pasal Papuꞌ Isa.

Si Pol ka si Balnabas ni Listra

⁸ Na ndooy siꞌ ni Listra, luu disu lalla yaꞌ kapalān lakka man kūn induꞌ na lagi.

⁹ Iya ilay siꞌ luu na pin ndooy pakale ni umanat si Pol. Pag ndaꞌ si Pol pa mman na, tabistu na na lalla looy manganna taulian ya meꞌ Papuꞌ Isa.

¹⁰ Dari siꞌ mitsala na si Pol pahaddo niiya, yuk na, “Nangge na ko!” Pag-anu, magti du lalla looy palambung boꞌ na magbeleng-beleng lumān.

¹¹ Pag takita jaꞌ meꞌ baanan jama ndooy bay pabuwatan si Pol, lay sila ngahowap ni pallun da Laykawniya, yuk da, “Luu bitu hati siga tuhan lay duwai luꞌ pitu pa mman tabi manyalupa meꞌ dagbos manusiyaꞌ.”

¹² Dari lay na ga awnan da si Balnabas si Zus, yana disu tuhan-tuhan da. Kuwan si Pol, pagka iya tukang mitsala, lay na awnan da si Helmes, disu tuhan-tuhan da du.

¹³ Na ni poan daira looy, luu langga man ga jama ndooy numba tuhan-tuhan da si Zus. Dari bbuwatan imam langga looy, luu bay boo na pa behe lawang kutaꞌ daira looy siga sapiꞌ lalla bay nilantayan ka sumping-sumping. Boꞌ meka gi jama bay mmeꞌ niiya. Maksud imam looy numbaliꞌ siga sapiꞌ looy man da ngulban sinongan pa mman si Pol ka si Balnabas.

¹⁴ Sugaꞌ pag tasayu ga si Balnabas ka si Pol meꞌ looy maksud da, magti du sila nganggeret badjuꞌ da mismu tandaꞌ da yaꞌ kasulutan. Pag-anu, boꞌ da sonse pa jawom baanan jama ndooy sambayan da ngahowap, yuk da,

¹⁵ “Kaam sikamimon, ongoy kam magtuhan ningkami? Kami itu manusiyaꞌ jaꞌ meꞌ kaam du. Kami itu pitu masaplagan kaam jaꞌ umanat mahap pasal Tuhan sabanna ma llum saumu-umu. Iya na silay bay mapayak gumi ka langit sampay dilawut ka mimon-mimon isi da. Kahandak na ina, tikutan bi na siga tuhan bi. Ndang-ndang yaꞌ du silay luu kawasa da nabang kaam.

¹⁶ Sibuwa, bong inawnan kabangsa-bangsahan ma saꞌ Yahudi, lay gi kam pinabiya meꞌ Tuhan magmundaan dī bi.

¹⁷ Sugaꞌ san meꞌ looy, man awwal jaman lagi, ndang luu na siga sipat man bi kabistu ndang luu Tuhan maka iya du buwat kaayaran ni manusiyaꞌ. Batan iya na sina muwanan kitabi uwan sampay masulig jinisan tinanom tabi ngabut sampay timpu ngattom. Dari man sabapan na, sukup na balanjaꞌ tabi ka kagakan tabi.”

¹⁸ Na ga jama looy ilay siꞌ, san sila bay binaan meꞌ looy, kanna da masi sila subay ngulban man numba si Pol ka si Balnabas. Sugaꞌ hangat sila sigi-sigi binitsalahan nohoꞌ patagong, bohoꞌ da lay na ngasip.

Si Pol hiniyak ka batu

¹⁹ Na sasang ga si Pol masi ndooy ni Listra, luu na baw takka siga Yahudi lakka man Antiyok ka man Ikoniyum. Sasang da ndooy, meka na baw jama bay takoleꞌ da binoo-boo mmeꞌ ninsila nulang ga si Pol. Dari lay na ga paglupung-lupungan da si Pol hiniyak ka batu. Pag ndaꞌ da meꞌ bantuk lay na matoy si Pol, lay na guyud da pa poan daira looy, boꞌ lay jaꞌ mbanan da.

²⁰ Sugaꞌ pag liput jaꞌ si Pol meꞌ sagannap ma mmeꞌ ni si Isa ndooy, lay na ya bangun sampay lay na du ya mmeꞌ ninsila pabeleng pa jawom daira looy. Pag meꞌ sumawung, lay na baw ga si Pol ka si Balnabas song pilay pa Delbe.

Si Pol ka si Balnabas pabeleng pa Antiyok ndooy ni Siriya

²¹ Takka ndooy, lay du sila masaplag umanat mahap sampay meka na jama lay taboo da mmeꞌ ni si Isa. Lakka mandooy, lay na baw sila pabeleng pa Listra, pa Ikoniyum sampay pa Antiyok ndooy ni Pisidiya.

²² Ni siga daira looy siꞌ, bbuwatan da mataggu iman siga sukuꞌ si Isa sampay muwansangan sila yaꞌ nohoꞌ ngalabbahan pangando da ni Papuꞌ Isa. Maka lay gi sila maintoman sila ndooy, yuk da, “Mastiꞌ luu jaꞌ sina jinisan katiksaan talingkaꞌ tabi boꞌ tabi nakka pa jawom pamarinta Tuhan ni sulgaꞌ.”

²³ Na ni siga daira looy siꞌ man da bay pilay, ninggai-ninggai luu baanan sukuꞌ si Isa, lay sila binoo meꞌ si Pol ka si Balnabas kumpo-kumpo. Boꞌ lay gi sila puwasa ka maku duwaa pa Tuhan. Pus meꞌ looy, lay na baw ga si Pol nguwakilan kasohean sila binuwat siga pa-mmean. Pag-anu, boꞌ ga si Pol makuhan siga pa-mmean looy ka sikamimon ndiyoan da duwaa mari sila inayaran meꞌ Papuꞌ Isa ma kinapitsayaan na meꞌ da.

²⁴ Pag-anu, lay na ga si Pol ka si Balnabas lakka man Pisidiya sampay lay na sila pabeleng pa Pampilya.

²⁵ Sasang da ndooy, luu duwa daira man da bay masaplag umanat mahap, duhuꞌ ndooy ni Pelga, boꞌ da palūd pa Attaliya.

²⁶ Lakka man Attaliya, lay na baw sila mmeꞌ taꞌ adjung lān da pabeleng pa Antiyok ndooy ni Siriya. Antiyok looy ilay yana daira man da sibuwa bay kawakilan binuwat siga sosohoan Tuhan nohoꞌ lumān masaplag. Maka ndooy na du silay man da bay pinakuhan meꞌ siga sukuꞌ si Isa duwaa supaya sampulnaꞌ palanan da man tabang Tuhan. Boꞌ lay du bana magjatu maksud ni palanan da.

²⁷ Luu jaꞌ siꞌ sila takka ni Antiyok, lay tawag da sagannap sukuꞌ si Isa ndooy. Kumpo jaꞌ siꞌ sila, lay na ga si Pol nuntut mimon bay pabuwat da man tabang Tuhan ni jataꞌ da. Maka lay gi sila nuntut bong pooy meꞌ Tuhan bay mukaꞌ puad siga bangsa saꞌ Yahudi pitsayaꞌ na ni si Isa.

²⁸ Pus meꞌ looy, hallom gi ga si Pol bay tamban ndooy mman ga pagkahi da ma mmeꞌ ni si Isa.