Salsila siga Rasul 13 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Balnabas ka si Sol pineneꞌ meꞌ Rū Sutsiꞌ masaplag

¹ Na ni baanan sukuꞌ si Isa ndooy ni Antiyok, luu siga tukang masampay siga umanat ma pinalahil meꞌ Rū Sutsiꞌ ninsila, maka luu du siga jama alistu nōꞌ. Sila ilay siꞌ yana si Balnabas, si Simiyun ma pinagdē si Itom, si Lusiyus yana jama Sayrin, si Sol, maka si Manean. Si Manean ilay bay pingkaꞌ samod ka Gubnul Herod jaman da anak-anak lagi.

² Na luu disu llaw, sasang da numba Tuhan sampay puwasa, yuk Rū Sutsiꞌ ninsila, “Pasarihun bi niyaku si Balnabas ka si Sol. Luu situ pabuwatan sukuꞌ ku ninsila.”

³ Dari siꞌ pus da bay puwasa ka maku duwaa pa Tuhan, lay na sila nappak bumbunan ga si Balnabas ka si Sol muwanan sila kapatut. Pag-anu, lay na sila sinohoꞌ ngalataan lahat masaplag.

⁴ Dari siꞌ man panohoan Rū Sutsiꞌ, lay na ga si Balnabas ka si Sol pilay pa daira Selusiya. Takka ndooy, lay na baw sila mmeꞌ taꞌ adjung song pa nusa Kiprus.

⁵ Pag dungguꞌ da ni daira Salamis ndooy ni Kiprus, lay sila pilay pa siga kalangga-langgahan pagkahi da bangsa Yahudi masaplag umanat Tuhan ni siga jamaa ndooy. Boꞌ luu gi soheꞌ da si Yahiya Malkus nabangan sila.

Si Bal-isa, disu jama ma tukang mōꞌ majik

⁶ Na hangat da ngalataan lahat looy, lay na sila takka pa daira Papos. Ndooy siꞌ, lay sila sitammu ka disu Yahudi inawnan si Bal-isa. Iya ilay tukang mōꞌ majik. Baꞌ-bāꞌ na iya tukang masampay siga umanat man Tuhan, mingkan ssaꞌ.

⁷ Si Bal-isa ilay disu bagay gubnul lahat looy yana Gubnul Selgus Paulus, jama halul-akka. Na disu llaw, lay tawag gubnul ga si Balnabas ka si Sol sabap doman ya kale umanat Tuhan.

⁸ Sugaꞌ sasang da masampay umanat Tuhan ni gubnul, bbuwatan tukang mōꞌ majik looy siꞌ, ma inawnan du si Elimas ni pallun Greek, lay nulang sila. Maksud na moo-moo gubnul yaꞌ pitsayaꞌ ni si Isa.

⁹ Na si Sol siꞌ tu ma inawnan du si Pol ssob na meꞌ Rū Sutsiꞌ. Pag ndaꞌ na meꞌ looy na kadari si Elimas, lay pinatong meꞌ si Pol sambayan na pinahallingan, yuk na,

¹⁰ “Anak Ibilis bina ko! Mimon kaintongan saggaꞌ nu jaꞌ. Njawom atay nu pannoꞌ meꞌ dustaꞌ. Maka nabiat ko moo jama magsiꞌ. Wā tabid nu kabanahan pasal Papuꞌ.

¹¹ Batnaa, kissahan nu na mulkaꞌ Tuhan njataꞌ nu. Buta na sina ko. Yaꞌ na sina takita nu sinag mataallaw njawom daka dangoy ngallaw.” Dari siꞌ, sarunduun du ngalindom pangandaan si Elimas sampay bagagap na ga ya miha jama nohoꞌ nondaꞌ iya.

¹² Pag ndaꞌ gubnul meꞌ looy na bay katuwaꞌ si Elimas, tud bay haylan ya ni kawasa Papuꞌ Isa ma pinasaplag meꞌ da. Dari magti ya pitsayaꞌ ni si Isa.

Si Pol noan siga Yahudi ni Antiyok ndooy ni Pisidiya

¹³ Paddus mandooy, lay na baw ga si Pol ka ga soheꞌ na mmeꞌ taꞌ adjung lakka man Papos song pilay pa daira Pelga ndooy ni Pampilya. Takka jaꞌ sila ndooy, lay na baw si Yahiya Malkus pasakkat sampay lay na ya pabeleng pa Jerusalem.

¹⁴ Kuwan si Pol ka si Balnabas, lay na palakka man Pelga song pilay pa daira Antiyok ndooy ni Pisidiya. Pag taabut Llaw Pahali, lay sila pa disu langga siga Yahudi, boꞌ da ningkōꞌ pakale.

¹⁵ Pag-anu, luu lalla bay matsahan siga jamaa ndooy kasohean man saraꞌ Nabi Musa ka kasohean man kitab kanabi-nabihan. Pag-lupus, kuwan siga pa-mmean ni langga looy, lay nohoꞌ disu jama mahati ni ga si Pol, yuk na, “Kaam, pagkahi kami Yahudi, bong luu umanat bi gantaꞌ kapataggu na pin iman ga jamaa ntuu, bong anu, pakalehan bi doꞌ kami.”

¹⁶ Dari siꞌ ilooy ma, nangge du si Pol sambayan na ngisalatan sila ka tangan na yaꞌ nohoꞌ hibuk. Yuk na, “Kaam, pagkahi ku bangsa Israil, sampay na kaam bangsa sarī ma ngisbat Tuhan, pakale doꞌ kam.

¹⁷ Kaam ina, ndang yaꞌ na du kam awam pasal salsila kabboꞌ-bboan tabi bangsa Israil. Sila ilay ndang bay pineneꞌ meꞌ Tuhan binuwat sukuꞌ na. Boꞌ min meka gi bay llipat meꞌ Tuhan eka da halloman da bay ndooy ni Ejip. Ni kabasag kawasa Tuhan, lay du sila hawasan na man jawom komkoman bangsa Ejip sampay binoo pōꞌ mandooy.

¹⁸ “Pag lakka da man Ejip, san sila yaꞌ kanaalla pa Tuhan, lay na pin tatasan Tuhan arat da njawom mpatpūꞌ taun sasang da ndooy ni lahat lau-lau yaꞌ maglumaꞌ.

¹⁹ Pag takka da pa Kanan, lay gi sila ginaosan meꞌ Tuhan mabinasa pituꞌ bangsa ma bay ngantanan lahat looy. Sampay lay na dean Tuhan mimon lahat looy ni kabboꞌ-bboan tabi bilang pusaka ninsila.

²⁰ Na labba man jaman kabboꞌ-bboan tabi bay pilay pa Ejip ngabut sampay sila maglahat ni Kanan, luu ga mpat hatus limampūꞌ taun halloman na. Ndooy siꞌ ni Kanan, lay na baw sila binuwanan meꞌ Tuhan siga huwis magsunuꞌ-sunuꞌ marintahan sila ngabut sampay jaman Nabi Samwel.

²¹ “Na pag taabut jaman Nabi Samwel, lay na baw sila mogos binuwanan disu sultan marintahan sila. Pag dean Tuhan ninsila, yana si Sol, anak si Kis, disu panubuꞌ si Benjamin. Si Sol siꞌ tu bay magsultan njawom mpatpūꞌ taun.

²² Pag lay llakkahan si Sol man ntan na meꞌ Tuhan, lay na baw pinagantiꞌ si Daud magsultan. Boꞌ luu gi silay palman tuwaꞌ pa iya, ilooy ma yuk Tuhan, ‘Kasulutan ku ni si Daud, anak si Jesse, sabap dambuwaꞌ atay kami. Iya ina mmeꞌ ni kahandak ku.’ ”

²³ Yuk si Pol lagi ninsila, “Na hallom maka hallom na, luu na baw pōꞌ disu panubuꞌ Sultan Daud yana si Isa, tukang nalamat ma bay njanjiꞌ meꞌ Tuhan ni bangsa tabi Israil.

²⁴ Na yaꞌ gi siꞌ si Isa bay magpakila, ndang luu na duhuꞌ si Yahiya ma Tukang Mandi masaplag ni pagkahi tabi bangsa Israil nohoꞌ sila sikamimon nawbatan dusa da sampay pinandi.

²⁵ Na tapit jaꞌ siꞌ katapusan umu si Yahiya, yuk na ni pagkahi tabi bangsa Israil, ‘Kanna bi mareꞌ aku na tukang nalamat ma pinag-agad meꞌ bi. Boꞌ ko, saꞌ gi situ aku. Sugaꞌ tapit na du sina katakka na. Ni kaehe kawasa-kapatut na, yaꞌ san ku tawop makkasan ingkot tumpaꞌ na.’ ”

²⁶ Yuk si Pol lagi, “Siga danganakan, yana pagkahi ku panubuꞌ Nabi Ibrahim sampay na kaam ma saꞌ Yahudi ntuu ma mmeꞌ na du ngisbat Tuhan, pakale doꞌ kam. Ningkitabi na situ bay pinasampay umanat kasalamatan.

²⁷ Sugaꞌ kuwan kaekahan jama ndooy ni Jerusalem ka ga pa-mmean da, yaꞌ bay tasayu da ga si Isa na yana Almasi, tukang nalamat bay pinapitu meꞌ Tuhan. Subay siꞌ katoonan da na batan sila ngantanan kitab man siga tunaꞌ pasal iya bay sinuwatan meꞌ kanabi-nabihan. Boꞌ ilooy na silay siꞌ pinagbatsa ni siga langga da tuktuk Llaw Pahali. Sangkon sapatut na, subay ya bay hinasi meꞌ da, sugaꞌ gam pin lay gi ya sohoꞌ da binotangan hukuman kapatoy. Dari sabapan pabuwatan da, lay na binakbul siga tunaꞌ njawom kitab.

²⁸ Minsan yaꞌ luu bay tatammu da poon sabap pataꞌ man na kalabuan hukuman kapatoy, lay gi du logos da Gubnul Pilatu nohoꞌ mapatoy iya.

²⁹ “Dari pag lay jaꞌ binakbul mimon ma bay tinunaꞌ njawom kitab pasal meꞌ da buwat iya, lay na pinaduwai mayat na man taꞌ tehang, boꞌ na kinubu njawom lowang pampang.

³⁰ Sugaꞌ lay du ya pinakallum meꞌ Tuhan.

³¹ Lay jaꞌ siꞌ ya llum pabalik, meka gi llaw man na bay patammu ni siga jama ma bay ngahaboyan iya lakka man Jalil luꞌ pilay pa Jerusalem. Dari sila na silay masampayan jama ni batnaa umanat mahap pasal iya.

³² “Kami pun itu, kon kami bay pitu, masampayan kaam na du umanat mahap meꞌ looy. Meꞌ tuu situ: Bay janjiꞌ Tuhan ni kabboꞌ-bboan tabi mattoꞌ,

³³ luu na bay tinuman ningkitabi, siga panubuꞌ da, ni masa batnaa. Batan tukang nalamat ma bay njanjiꞌ meꞌ Tuhan ningkitabi, luu na bay takka, yana si Isa na silay, sampay lay gi ya pinakallum pabalik meꞌ Tuhan. Boꞌ iya na silay bay awnan Tuhan Anak njawom Kitab Jabul, ni juran duwa, ilooy ma yuk na, ‘Kau ina Anak ku. Llaw tuu, lay na ku makitau aku yana Mmaꞌ nu.’

^34-35 “Maka yuk Tuhan lagi pasal si Isa, ‘Supaat ma bay janjiꞌ ku ni si Daud, tuman ku sa njataꞌ nu.’ “Maka luu gi disu tunaꞌ njawom Kitab Jabul, ilooy ma yuk Sultan Daud, ‘Yaꞌ du sina mintu pabiya nu ngahaluꞌ njawom kubu baran Ilooy ma Sutsiꞌ ningkau.’ Na tunaꞌ looy ilay siꞌ lay na binakbul njataꞌ si Isa. Batan san ya bay pinapatoy, lay na du ya pinakallum meꞌ Tuhan ddas ka baran ma yaꞌ kuhi ngahaluꞌ saumu.

³⁶ “Na tunaꞌ looy ilay siꞌ tumatandaꞌ na yaꞌ bay binakbul njataꞌ Sultan Daud batan paddus na bay majatu mimon ma bay ginantaꞌ meꞌ Tuhan niiya, lay na ya matoy sampay kinubu ni bihing kabboꞌ-bboan na. Boꞌ na, baran na ilay lay du bay ngahaluꞌ.

³⁷ Boꞌ si Isa ilay, yaꞌ na bay pingkaꞌ ngahaluꞌ baran na batan lay na ya pakallum Tuhan.

^38-39 “Sangkon siga mbuwaꞌ danganakan,” yuk si Pol, “subay tahati bi, luu na situ kaampunan man Tuhan ningkaam sabap lay na tinanggung meꞌ si Isa mimon dusa tabi. Dari soysoy ina pitsayaꞌ niiya initung na meꞌ Tuhan intong maka puwas na dusa na. Maka subay tahati bi san ina pooy meꞌ bi magtuyuꞌ mogbogan saraꞌ Nabi Musa, yaꞌ du kapuwas ni dusa bi.

⁴⁰ Iyakin kam taggahaꞌ tuwaꞌ pa kaam na baw mintu palman looy ma bay sinuwatan meꞌ kanabi-nabihan, ilooy ma yuk Tuhan,

⁴¹ ‘Kaam ma tigiꞌ ngaludjum, indanan bi. Luu du sina mintu pabuwat ku ni masa bi man bi haylan. Sugaꞌ pag toklas na, binasa jaꞌ sina kam sabap yaꞌ kam bay kuhi pitsayaꞌ san luu na bay mahatiyan kaam.’ ”

⁴² Dari ngkod looy du silay siꞌ bitsala si Pol. Na lān ga si Pol ka si Balnabas pōꞌ man jawom langga, kuwan siga jamaa ndooy, lay gi maku junjung nohoꞌ sila pabeleng pag taabut Llaw Pahali balik. Masi gi sila doman pakale ni umanat da.

⁴³ Maka pag pōꞌ jamaa man jawom langga, meka na Yahudi sampay ga jama ma bay paasok ni agama Yahudi bay patuhut ni si Pol ka si Balnabas. Dari siꞌ binitsalahan na pin sila meꞌ ga si Pol. Sampay lay gi sila binuwansangan nohoꞌ matattog pangando da ni aseꞌ-tabang Tuhan.

⁴⁴ Na pag taabut Llaw Pahali balik, agon sikamimon na jama ni Antiyok bay pilay pa langga looy pakale ni umanat ga si Pol pasal Papuꞌ Isa.

⁴⁵ Sugaꞌ pag ndaꞌ siga pa-mmean Yahudi biddaꞌ na eka manusiyaꞌ bay bahuklud pilay pakale ni si Pol, takkahan dangkiꞌ na ga sila. Dari bbuwatan da nulang bitsala si Pol sampay lay gi ya pinitnahan.

⁴⁶ Minsan meꞌ looy, amu-amu si Pol ka si Balnabas nawakka mitsala ninsila, yuk da, “Kaam, siga Yahudi, wajib sina ningkaam pinakalehan duhuꞌ umanat Tuhan. Sugaꞌ pagka tuwak bi umanat na, sat bi sāꞌ māꞌ yaꞌ kam tawop binuwanan kasampulnaan nyawa ma yaꞌ luu katapusan na. Sangkon labba man batnaa, pilay na kami pa mman kabangsa-bangsahan saꞌ Yahudi.

⁴⁷ Ndang-ndang lay du kami sohoꞌ Tuhan pilay pa mman da, yuk na, ‘Kaam ina bay peneꞌ ku binuwat sūꞌ ni siga bangsa saꞌ Yahudi supaya luu na lawang man manusiyaꞌ salamat ni sika-mpat pidju alam.’ ”

⁴⁸ Na pag takale jaꞌ meꞌ sagannap ma saꞌ Yahudi bitsala si Pol, tud bay gāk sila sampay lay na ga sila mudji Tuhan. Dari sagannap ma ndang bay pineneꞌ meꞌ Tuhan binuwanan kasampulnaan nyawa ma yaꞌ luu katapusan na, lay na du pitsayaꞌ ni si Isa.

⁴⁹ Dari siꞌ, umanat pasal Papuꞌ Isa lataꞌ na ni sikaliput lahat looy.

⁵⁰ Sugaꞌ kasohean Yahudi baw ndooy, gam pin bbuwatan da ngoyo-ngoyohan ga pa-mmean ni daira looy ka ga karandahan balkanan ma bay paasok ni agama Yahudi nohoꞌ nulang ga si Pol ka si Balnabas. Dari lay du nilaugan meꞌ da ga si Pol sampay lay na ga pinalahi man lahat da.

⁵¹ Sugaꞌ tapit jaꞌ siꞌ ga si Pol lakka man lahat looy, lay doꞌ papasan da momok tanaꞌ ma ngakkot ni sinilas da tandaꞌ yaꞌ na luu lamud da ni jama daira looy. Pus meꞌ looy, lay na baw sila pilay pa Ikoniyum.

⁵² Na kuwan sagannap ma bahau jaꞌ mmeꞌ ni si Isa ndooy ni Antiyok, ssob na sila meꞌ Rū Sutsiꞌ sampay tud gāk na sila.