Salsila siga Rasul 12 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Pitel sinungkuban

¹ Na jaman looy siꞌ, Sultan Herod Agripa na baw nagnaꞌ ngalaugan kasohean ma mmeꞌ ni si Isa.

² Boꞌ lay gi sohoꞌ na pinonggolan kallong si Yaꞌkub, yana danganakan si Yahiya.

³ Dari pag tasayu Sultan Herod kasulutan du siga Yahudi ni bay pabuwatan na, lay gi sohoꞌ na si Pitel sinungkuban. Ilooy siꞌ bay magkadarihan meꞌ looy sasang paballangan bangsa Yahudi inawnan paballangan Tinapay Yaꞌ Magpasulig.

⁴ Pag lay jaꞌ siꞌ tasungkub si Pitel, lay na njīl, boꞌ na nohoꞌ njagahan ni sapu-nnom sundalu. Meꞌ da nganjaga, mpat-mpat magsing-sīng. Niyat Sultan Herod ilay siꞌ, pag lupus paballangan looy, hinukum na si Pitel ni mayran.

⁵ Kuwan siga sukuꞌ si Isa baw siꞌ tu, pag taaka da si Pitel lay njīl, buwatan da sigi-sigi makuhan iya duwaa pa Tuhan.

Si Pitel pinōꞌ meꞌ malaikat man jawom jīl

⁶ Na pag taabut dangallaw sa timpu man si Pitel binoo na pa jawom mayran hinukum, pag sangom, lay ya pinatuli ni sallangan duwa sundalu. Boꞌ lay gi pinaglingtan langngon na sikaduwambilaꞌ ka karina ni langngon ga sundalu looy. Maka luu gi ga sundalu nganjaga ni bihing lawang jīl.

⁷ Mindangoy ko, sarunduun du tulun disu malaikat man Papuꞌ sampay dantaꞌ na ga njawom jīl looy. Pag-anu siꞌ, lay tabbok malaikat looy saddi si Pitel mari ya kabatiꞌ. Maka yuk na, “Bangun na ko deꞌ-dēꞌ!” Pag-anu, magti du lay na bay makkas ga karina looy ni langngon na.

⁸ Yuk malaikat looy, “Badjuꞌ na ko boꞌ nu tumpaꞌ!” Pus si Pitel mamakoy, yuk malaikat looy na baw, “Patukun na jaket nu, boꞌ nu mmeꞌ na niyaku!”

⁹ Pag-anu siꞌ, lay na mmeꞌ si Pitel ni malaikat looy pōꞌ man bilik looy, sugaꞌ pangissahan na meꞌ ga yaꞌ sa bana ilooy siꞌ ma bay katuwaꞌ niiya. Kanna na ga ngupi jaꞌ ya.

¹⁰ Lay jaꞌ siꞌ sila kapingkaꞌ man sundalu ma nganjagahan lawang sibuwa sampay ma nganjagahan lawang ni kaduwa, lay na baw sila pawus pa lawang bassi man jama pōꞌ pa jawom daira. Takka jaꞌ siꞌ sila ni lawang looy, magti du mukaan dī na sampay lay na sila pōꞌ. Sasang da lumān, sarunduun du lanyap malaikat looy.

¹¹ Pag-anu, bohoꞌ tabista si Pitel mimon ilooy siꞌ tud saꞌ du upihan. Dari yuk na ni dī na, “Tud malaikat du bilay hati siꞌ bay papitu Papuꞌ nohoꞌ nabang aku. Lay na ku hawasan na man jawom komkoman Sultan Herod sampay man mimon kabinsanaan ma kinahandak meꞌ siga Yahudi njataꞌ ku.”

¹² Pag tabista si Pitel sumunsayaꞌ na ya, lay ya pilay pa lumaꞌ si Mariyam, nneꞌ si Yahiya Malkus. Ndooy siꞌ, meka sukuꞌ si Isa ndang lay kumpo maku duwaa.

¹³ Pag tugtug si Pitel lawang, luu disu tindog danda inawnan si Roda bay pilay ngandaꞌ bong soy.

¹⁴ Sugaꞌ pag takila na halling si Pitel, ni kagāk na, niyaꞌ gi doꞌ ya bay kabukaꞌ lawang. Gam pin lay doꞌ ya sonse pabeleng maan siga soheꞌ na luu si Pitel ndooy ni lawang.

¹⁵ Dari yuk da ni danda looy, “Uy, yaꞌ bitu ko kasayu!” Sugaꞌ amu-amu ya māꞌ, “Ē, tud iya na bilay siꞌ.” Iya halling da baw siꞌ tu, “Mura sina malaikat na.”

¹⁶ Si Pitel baw siꞌ tu, amu-amu nugtug lawang. Dari siꞌ bohoꞌ da lay mukaꞌ. Pag ndaꞌ da tud ilooy na si Pitel, tud bay jayip sila.

¹⁷ Bbuwatan si Pitel baw siꞌ tu ngisalat ka tangan na yaꞌ nohoꞌ sila hibuk. Pag-anu siꞌ, lay na sila tuntutan na bong pooy meꞌ Papuꞌ bay mapōꞌ iya man jawom jīl. Maka lay gi ya nohoꞌ sila nuntutan si Yaꞌkub sampay na mimon sukuꞌ si Isa pasal bay kahalan na siꞌ. Pag-anu siꞌ, lay na baw ya lakka mandooy song pa disu kawum.

¹⁸ Pag taabut subu, sikahipos na ga tukang jaga njawom jīl looy sabap yaꞌ na katoonan da bong ninggai na si Pitel.

¹⁹ Pag tasayu Sultan Herod yaꞌ na luu si Pitel njawom jīl, lay du sohoꞌ na piniha, sugaꞌ yaꞌ du bay tatammu da. Pag-anu siꞌ, sinumariya na meꞌ Sultan Herod siga tukang jaga looy sampay lay na nohoꞌ pinapatoy. Pag-anu, lay na baw lakka Sultan Herod man Yahudiya sampay lay na doꞌ ya maglahat ndooy ni Sesariya.

Kapatoy Sultan Herod

²⁰ Na ni jaman looy, tud lasu Sultan Herod ni ga jama ma maglahat ndooy ni siga daira Tayil ka Saydon. Dari lay na ga jama ndooy magtaayun pilay pa mman Sultan Herod kawu-kawu sila kinahopan na pabalik. Kon da miha kasalassayan batan balanjaꞌ ma inasahan meꞌ da lakka man lahat pinarintahan meꞌ Sultan Herod. Dari pag takka da ni Sesariya, lay doꞌ duhuꞌ binagay meꞌ da si Balastus, yana panghuluꞌ tindog ni astanaꞌ Sultan Herod. Dari iya na bay sohoꞌ da muhunan sila bong sila dari sitammu ka Sultan Herod.

²¹ Pag taabut llaw man da magbitsala ka Sultan Herod, lay doꞌ ya matuk juba bal-bangsa, boꞌ na pōꞌ ningkōꞌ ni tingkoan pagkasultan na. Sasang na mitsala ninsila,

²² bbuwatan ga jama looy ngahowap, yuk da, “Uy la, saꞌ na ga bina suwara manusiyaꞌ, subay ga bitsala disu tuhan.”

²³ Dari sabap Sultan Herod kuhi-kuhi jaꞌ pinudji saula-ula iya disu tuhan, sarunduun du ya llabuan mulkaꞌ meꞌ malaikat man Tuhan. Dari inuwot na ga baran na sampay lay na ya matoy.

Meka jama kale umanat mahap pasal si Isa sampay pitsayaꞌ

²⁴ Na jaman looy du siꞌ, patanyag na pin umanat Tuhan sampay pasampun boꞌ pasampun na pin eka jama ma pitsayaꞌ ni si Isa.

²⁵ Balik ta pa ga si Balnabas ka si Sol, lay jaꞌ tapasampay da tulung looy siꞌ ni ga pa-mmean siga sukuꞌ si Isa ndooy ni Jerusalem, lay na sila pabeleng pa Antiyok. Sampay lay gi binoo meꞌ da si Yahiya Malkus.