Suwat si Pol pa mman Baanan Sukuꞌ si Isa ndooy ni Rom 7 - Sabahagiꞌ Kitab Tawrat: Panagnaan ni Awwal Jaman maka Kitab Injil

Siga sukuꞌ si Isa lay pinaddusan man jawman sakup saraꞌ

¹ Na siga danganakan, yaꞌ du sina kam awam pasal saraꞌ. Katoonan bi du njawman sakup saraꞌ sadjaꞌ kitabi halloman tabi llum. Sugaꞌ bong itu kitabi lay na matoy, yaꞌ na luu kawasa-kapatut saraꞌ njataꞌ tabi.

² Nnaꞌ ta na pa disu danda llahan. Pamāꞌ saraꞌ, njawman sakup lla na ya halloman lla na masi llum. Sugaꞌ bong ina lla na lay na matoy, paddus na ya man jawman sakup na.

³ Sugaꞌ bong sasang lla na masi llum, boꞌ lay na baw ya halla pa sarī, malaingkan pamāꞌ saraꞌ jina ya. Sugaꞌ bong lla na lay na matoy, yaꞌ tinagga meꞌ saraꞌ bong ya halla pa sarī, maka yaꞌ na ya taawnan jina.

⁴ Na siga danganakan, meꞌ naa du sina karuha tabi batnaa. Sibuwa, njawman sakup saraꞌ kitabi. Sugaꞌ batnaa, paddus na kitabi, batan meꞌ tabi ngingat, lay na kitabi tabeꞌ ni kapatoy Almasi taꞌ tehang. Dari pagka lay na kitabi tabeꞌ ni kapatoy na, sibuꞌ na du karuha tabi ka danda ma sumunsayaꞌ halin pa sakup sarī. Pag batnaa, luu na kitabi njawman sakup Papuꞌ tabi ma bay pinakallum pabalik. Kon meꞌ looy supaya kitabi kaboo kabantugan pa Tuhan. Kitabi itu sibuwa, yaꞌ luu kapansahaliyan tabi pa Tuhan. Ibaratan poon kayu, sibuwa yaꞌ kitabi bay buwaꞌ, pag batnaa bohoꞌ kitabi buwaan.

⁵ Maruhuꞌ, jaman tabi yaꞌ gi mmeꞌ ni si Isa, bay jaꞌ kitabi nganduwan napsu tabi buwat jinisan ma tagga ni saraꞌ. Batan mangkin na luu pabuwatan ma tasayu tabi tinagga meꞌ saraꞌ, mangkin na tomoꞌ dawom tabi ngalangga. Boꞌ ilooy du bay takoleꞌ tabi bay ngalangga saraꞌ, yana katiksaan nyawa.

⁶ Kahapan batnaa, pagka lay na kitabi tabeꞌ ni kapatoy Almasi, paddus na kitabi man jawman sakup saraꞌ. Dari pagka luu na kaallum tabi bahau, yaꞌ na kitabi makutuꞌ meꞌ mogbogan saraꞌ man tabi maehe Tuhan. Ilooy ya man tabi maehe Tuhan batnaa, yana meꞌ tabi ngasip ni Rū Sutsiꞌ ma patannaꞌ njawom atay tabi.

Saraꞌ maka dusa

⁷ Na adakala luu na baw mintu mista hatiyan bitsala ku siꞌ ga maat saraꞌ. Sugaꞌ daa kam hidjab. Mahap sina saraꞌ batan inaa na man tabi bay kasayu bong oy pabuwatan tagga pa Tuhan. Bistahun bi doꞌ, bong yaꞌ bay halling njawom saraꞌ, “Daa ko magnapsu ni altaꞌ pagkahi nu,” pooy meꞌ tabi toon ga kalaatan ningkitabi buwat meꞌ looy?

⁸ Salla na, takdil pa baran ku, pag tasayu ku jaꞌ luu saraꞌ meꞌ looy siꞌ, mangkin llum na dawom ku ngalangga sampay magnapsu na ga ku ni jinisan altaꞌ jama. Sangkon, bong yaꞌ bay luu saraꞌ, yaꞌ du tomoꞌ napsu ku buwat dusa.

⁹ Jaman yaꞌ gi bay katoonan ku saraꞌ, sangka ku jama mahap na ku. Sugaꞌ pag katoonan ku jaꞌ saraꞌ, mangkin takka na dawom ku ngalangga. Dari man sabapan bay dusa ku ngalangga saraꞌ, sibuꞌ du karuha ku ka jama matoy pa Tuhan.

¹⁰ Bong binista, subay siꞌ pangahati ku ni saraꞌ bay nampulnaꞌ kaallum ku, boꞌ ko, ilooy ya bay katiksaꞌ ni nyawa ku.

¹¹ Batan pag lay jaꞌ ku kale saraꞌ, mangkin lay na llum dawom ku ngalangga. Dari lay na ku takoleꞌ ndupang meꞌ napsu ku buwat dusa, boꞌ ilooy na poonan ku bay koleꞌ katiksaan nyawa.

¹² Kamasaꞌ bong inawnan saraꞌ, mastiꞌ yaꞌ luu laat na samasakali. Mimon panohoan njawom saraꞌ intong sadjaꞌ maka mahap sabap lakka man Tuhan.

¹³ Na adakala yuk kasohean na baw mintu, “Bong meꞌ naa, sat nu saꞌ māꞌ pakaradjaan mahap bay moo kitabi pa jawom katiksaan nyawa.” Sugaꞌ daa kam hidjab, batan ilooy ya ilay poonan katiksaan nyawa tabi, yana napsu tabi buwat dusa. Sangkon tabista tabi na maksud Tuhan bay ngandean saraꞌ na supaya tumatandaꞌ na ningkitabi ehe kalaatan tabi.

Kahalan si Pol bay jaman na njawman sakup saraꞌ

¹⁴ Na kitabi itu, ndang katoonan tabi saraꞌ mahap sabap lakka man Tuhan. Sangkon, bong ni dī ku, doman ku mean saraꞌ. Salla na, wā ku kalangga sabap sibuꞌ du ku ka pinahata meꞌ napsu ku ma wā kaboo-boo niyaku buwat dusa.

¹⁵ Yaꞌ tahati ku dī ku sabap san ku doman buwat kaintongan, yaꞌ baw pabuwat ku. Boꞌ na, gam pin pabuwat ku lagi kalaatan ma sinukang meꞌ ku.

¹⁶ Na pagka ku gigitan ni dī ku sabap meꞌ ku bay ngalangga saraꞌ, tumatandaꞌ na manganna ku mahap saraꞌ.

¹⁷ Maka tabista ku na bila ku buwat kalaatan, yaꞌ luu niyat atay ku buwat meꞌ looy, arapun lay jaꞌ ku taboo-boo meꞌ napsu ku buwat dusa ma ndang luu na pin ni baran ku.

¹⁸ Sangkon, katoonan ku bong kinawnan tabiat pagkajama ku, yaꞌ luu kaayaran ku samasakali. Batan san ku doman buwat kaintongan, yaꞌ luu gaos ku ni dī ku buwat mahap.

¹⁹ Dari meꞌ halling sambat ku na siꞌ, kaintongan ma karomanan ku pinabuwat, yaꞌ baw pabuwat ku. Boꞌ na, kalaatan ma sinukang meꞌ ku, ilooy ya pabuwat ku.

²⁰ Kamasaꞌ bong ku ilay buwat ilooy ma sinukang meꞌ ku, tumatandaꞌ na yaꞌ luu niyat atay ku buwat meꞌ looy, arapun lay jaꞌ ku taboo-boo meꞌ napsu baran ku buwat dusa.

²¹ Pangissahan ku, san luu dawom ku wā buwat kaintongan, luu na pin napsu ni baran ku kaboo-boo niyaku buwat jinisan dusa.

²² San njawom atay ku tud doman ku mean saraꞌ Tuhan,

²³ luu na pin napsu ku naggaꞌ. Dari sibuꞌ du ku ka ata pinagbayaan meꞌ napsu ku buwat dusa sabap nabiat ku nganduwan iya.

^24-25 Sangkon, tud kaluuy-luuy situ ku, batan minsan njawom pikilan ku magkainagon mean saraꞌ Tuhan, gam pin sigi-sigi ku nganduwan napsu ku. Dari njawom atay ku, “Soy sa tu katabang niyaku mari ku kapaddus man komkoman napsu baran ku ma wā niksaꞌ nyawa ku?” Kahapan, magsuku pa Tuhan, lay na ya maddusan aku. Batan lay na ya muwanan aku kasalamatan njataꞌ Papuꞌ tabi si Isa Almasi.