Suwat si Pol pa mman Baanan Sukuꞌ si Isa ndooy ni Rom 6 - Sabahagiꞌ Kitab Tawrat: Panagnaan ni Awwal Jaman maka Kitab Injil

Sagannap ma pitsayaꞌ koleꞌ kaallum bahau

¹ Na adakala yuk kasohean na baw mintu, “Bong baw bilay saehe-ehe dusa ta mas mehe gi aseꞌ Tuhan, marean ta subay kita sigi-sigi buwat dusa supaya pasampun gi aseꞌ pakitahan Tuhan ningkita.”

² Sugaꞌ yaꞌ baw lay sikatuwaꞌ! Saꞌ ba, meꞌ tabi ngingat lay na kitabi tabeꞌ ni si Isa matoy? Dari pagka meꞌ looy, pooy gi baw meꞌ tabi sigi-sigi buwat dusa?

³ Ongoy, yaꞌ gi kina katoonan bi lay na kitabi tabeꞌ ni kapatoy si Isa Almasi takdang tabi bay pinandi tandaꞌ tabi tibuuk na ka iya?

⁴ Sangkon meꞌ tabi ngingat, lay na du kitabi kinubu tabeꞌ ni Almasi waktu tabi bay pinandi. Dari yana meꞌ Almasi bay pinakallum pabalik man kawasa Mmaꞌ na, kitabi pun lay na du binuwanan kaallum bahau mari kitabi kapōꞌ kawul-piil bahau.

⁵ Batan tiyap-tiyap ina lay na kitabi tabeꞌ niiya ni kapatoy na, mastiꞌ luu na kaallum tabi bahau batan lay na du kitabi tabeꞌ niiya pinakallum pabalik.

⁶ Dari tahati tabi na, pagkajama tabi maruhuꞌ ma maabak dusa, lay na tabeꞌ ni kapatoy si Isa nilansang taꞌ tehang. Sangkon batnaa, kawul-piil tabi yaꞌ na sibuꞌ ka maruhuꞌ. Sibuwa napsu tabi buwat dusa subay ga papuꞌ tabi magbayaan kitabi. Pag batnaa lay na lungay kawasa na njataꞌ tabi.

⁷ Batan tiyap-tiyap ina jama lay na matoy, paddus na ya man kawasa napsu na ma bay kaboo-boo iya buwat dusa.

⁸ Sangkon batnaa, pagka lay na kitabi tabeꞌ ni si Isa matoy, malaingkan pitsayaꞌ na kitabi tabeꞌ na du ni kaallum na.

⁹ Katoonan tabi na, pagka lay na pinakallum Almasi pabalik, yaꞌ na luu kawasa kapatoy ni jataꞌ na maka yaꞌ na ya matoy pabalik.

¹⁰ Iya ilay bay matoy supaya tatanggung na dusa mimon manusiyaꞌ sakayi labba du. Sugaꞌ batnaa llum na ya pabalik maka kaallum na wā moo kabantugan pa Tuhan.

¹¹ Kuwan kitabi, pagka kitabi tibuuk na ka si Isa Almasi, subay ingat tabi pagkajama tabi maruhuꞌ lay na matoy mari kitabi yaꞌ na buwat dusa. Pag batnaa, luu na kaallum tabi bahau ma moo kabantugan pa Tuhan.

¹² Sangkon, daa na kitabi kuhi pinagbayaan meꞌ napsu tabi ma moo-moo kitabi buwat dusa.

¹³ Amay-amay daa na pakoy tabi baran tabi buwat dusa. Gam pin paglillaꞌ tabi na baran tabi labbasakayi pa Tuhan supaya tapakoy man buwat kaintongan. Batan pagkajama tabi maruhuꞌ ma baldusa lay na matoy, pag batnaa, luu na kaallum tabi bahau.

¹⁴ Dari yaꞌ na kitabi pinagbayaan meꞌ napsu tabi buwat dusa sabap njawman sakup aseꞌ Tuhan na kitabi. Saꞌ na kitabi njawman sakup saraꞌ Nabi Musa.

Soy papuꞌ tabi?

¹⁵ Na adakala yuk kasohean na baw mintu, “Bong kitabi salamat sabapan aseꞌ Tuhan, boꞌ saꞌ sabap meꞌ tabi mogbogan saraꞌ, saꞌ ba, sumunsayaꞌ na kitabi buwat dusa?” Na pamiki meꞌ looy ilay yaꞌ luu katuwaꞌ-tuwaan na.

¹⁶ Bong yaꞌ katoonan bi, soysoy ina duwan ta, inaa na sina papuꞌ ta. Sangkon bong ina kita nganduwan napsu ta buwat dusa, malaingkan dusa yana papuꞌ ta mahata kita. Pag toklas na, tiksaꞌ nyawa ta. Sugaꞌ bong ina inaa ya duwan ta kahandak Tuhan, malaingkan Tuhan yana Papuꞌ ta. Kuwan kita yana ata na. Pag toklas na, intong na jaꞌ kawul-piil ta.

¹⁷ Na jaman bi ilay yaꞌ gi bay mmeꞌ ni si Isa, masi gi silay kam pinahata meꞌ napsu bi buwat dusa. Magsuku pa Tuhan, pag batnaa niyaꞌ na. Batan ni kahilas atay bi, lay na bean bi kabanahan ma bay tinōꞌ ningkaam.

¹⁸ Batnaa lay na kam pinaddusan man sakup dusa maka lay na kam maglillaꞌ pa Tuhan buwat kaintongan.

¹⁹ Na aku ilay siꞌ bay makoy bitsala “ata” ka “papuꞌ” man ku jaꞌ bay ngandalil mari kam yaꞌ kaawran ngahati. Maruhuꞌ, bay jaꞌ kitabi makoy baran tabi buwat kasabuhan ka jinisan kalaatan. Sangkon sibuꞌ du karuha tabi ka bay pinahata meꞌ napsu tabi. Pag toklas na, magsasōng na pin meꞌ tabi bay buwat kalaatan. Sugaꞌ batnaa, paglillaꞌ tabi na baran tabi pa Tuhan bilang siga ata na buwat kaintongan. Pag toklas na, magsasōng na pin kasutsian tabi.

²⁰ Bay jaman tabi masi pinahata meꞌ napsu tabi buwat dusa, kanna tabi dari na san kitabi yaꞌ buwat kaintongan.

²¹ Sugaꞌ yaꞌ silay luu paluntungan bay takoleꞌ tabi ni pamiki meꞌ looy. Gam pin lay gi kitabi koleꞌ katiksaan nyawa. Sarī gi, iyaꞌ na kitabi tuktuk taintom tabi bay kadarihan tabi.

²² Kahapan, lay na kitabi pinaddusan man kawasa napsu tabi ma bay kaboo-boo ningkitabi buwat dusa. Pag batnaa, lay na kitabi dari ata Tuhan. Dari sutsiꞌ na arat-tabiat tabi maka luu na kasampulnaan nyawa tabi saumu-umu.

²³ Dan jinis meꞌ halling, bong ina jama buwat dusa, mastiꞌ luu jaꞌ ka hisab na, yana katiksaan nyawa labba man junyaꞌ sampay pa ahirat. Boꞌ sagannap ma tibuuk ka Papuꞌ tabi si Isa Almasi, mastiꞌ binuwanan jaꞌ sina meꞌ Tuhan ladjikiꞌ, yana kasampulnaan nyawa saumu-umu.