Biblia Todo Logo
Bìoball air-loidhne

- Sanasan -

Suwat si Pol pa mman Baanan Sukuꞌ si Isa ndooy ni Rom 5 - Sabahagiꞌ Kitab Tawrat: Panagnaan ni Awwal Jaman maka Kitab Injil


Mahap na kitabi pa Tuhan sabapan Papuꞌ Isa

1 Na kitabi itu, lay na kitabi initung intong sabap meꞌ tabi pitsayaꞌ ni si Isa Almasi. Dari sabapan Papuꞌ tabi si Isa, mahap na kitabi pa Tuhan.

2 Lagiꞌ na, sabapan si Isa Almasi maka pangando tabi niiya, tattap na sina kitabi koleꞌ aseꞌ ka tabang man Tuhan. Boꞌ tud gāk sina kitabi batan luu na holat tabi tumabeꞌ ni ehe kabantugan Tuhan.

3 Dari bila kitabi lumangga ni kasusahan, magsuku jaꞌ kitabi. Batan tabista tabi sabapan siga kasusahan tabi, magsasōng na pin meꞌ tabi pandoy natas.

4 Bong ina kitabi pandoy natas, kasulutan sina Tuhan ningkitabi. Boꞌ bila ina Tuhan kasulutan ningkitabi, mastiꞌ luu na holat tabi tumabeꞌ ni ehe kabantugan na.

5 Maka tiyap-tiyap ina tattap holat tabi ni siga janjiꞌ Tuhan, mastiꞌ yaꞌ kitabi kaap-apan. Batan tinuman du sina meꞌ Tuhan mimon janjiꞌ na ningkitabi. Man tabi katantu sabap takissa tabi na aseꞌ Tuhan njawom atay tabi sabapan Rū Sutsiꞌ lay na pinaasok meꞌ na ningkitabi.

6 Bistahun bi doꞌ aseꞌ Tuhan ningkitabi. Bay jaman yaꞌ gi luu gaos tabi nulut kahandak na, lay na ga ya mapitu Almasi nohoꞌ nongan umu na kalnaꞌ kitabi baldusa.

7 Jalangan sina jama nongan umu na kalnaꞌ pagkahi na manusiyaꞌ, san gi kalnaꞌ jama intong. Marean ta luu baw disu-disu kuhi nongan umu da kalnaꞌ jama ma bay buwat mahap banahan ninsila. Sugaꞌ bong kalnaꞌ jama maat, yaꞌ sina luu kuhi.

8 Boꞌ Tuhan ina, tandaꞌ ehe aseꞌ na ningkitabi, lay na ga bay pinaglillaꞌ meꞌ na Almasi pinapatoy kalnaꞌ kitabi jaman tabi masi gi baldusa.

9 Dari pagka lay na kitabi initung intong sabapan lahaꞌ Almasi bay tumpa, labi na kitabi saꞌ sinalamat meꞌ na man mulkaꞌ Tuhan ni sinōng pagka sukuꞌ na na kitabi.

10 Dan jinis meꞌ halling, bong jaman tabi masi lagi banta Tuhan, lay na kitabi mahap niiya sabapan kapatoy Anak na, labi na saꞌ kitabi sinalamat pagka llum na Anak na pabalik sampay tibuuk na kitabi ka iya.

11 Dari gāk na situ kitabi banahan batan lungbid na kitabi ka Tuhan sabapan pabuwatan Papuꞌ tabi si Isa Almasi. Isu-isu iya poonan man tabi mahap na pa Tuhan.


Palsilangan ni antaraꞌ Boꞌ Adam ka si Isa Almasi

12 Batnaa paintoman ta doꞌ kam toklas ni bay pabuwatan Boꞌ Adam ka bay pabuwatan Almasi. Sabapan dusa Boꞌ Adam bay ngalangga panohoan Tuhan, ilooy na poonan mimon manusiyaꞌ ngikut iya buwat dusa. Maka sabapan dusa Boꞌ Adam, lay na ya kalabuan hukuman kapatoy. Boꞌ lay lagi talapay mimon manusiyaꞌ batan labbasakayi sila lay kalihiyan meꞌ Boꞌ Adam buwat dusa.

13 Na hāl dusa ina, halloman yaꞌ gi luu saraꞌ bay ndean Nabi Musa, yaꞌ gi bay tumampak bong oy inawnan dusa. Sangkon, hallang-hallangan looy, san mimon jama bay buwat dusa, yaꞌ gi baw sila taitung dusahan batan yaꞌ gi luu saraꞌ man mindoga.

14 Sugaꞌ pagka dusa manusiyaꞌ poonan kapatoy, labba man jaman Boꞌ Adam ngabut sampay jaman Nabi Musa, tattap jaꞌ du manusiyaꞌ matoy san yaꞌ sibuꞌ dusa da ka Boꞌ Adam bay ngalangga panohoan Tuhan. Na Boꞌ Adam ilay ka si Isa Almasi ma bay pinapitu meꞌ Tuhan, luu pagkasibuꞌ da batan toklas pabuwatan da saliꞌ-saliꞌ lay labuꞌ pa jataꞌ mimon manusiyaꞌ.

15-16 Sugaꞌ luu du baw pagbiddaan da mehe. Batan ni Boꞌ Adam, sabapan dusa na, mimon manusiyaꞌ lay kalabuan hukuman kapatoy ka mulkaꞌ. Boꞌ ni si Isa Almasi, sabapan pabuwatan na, mimon manusiyaꞌ lay kaladjikian aseꞌ-tabang Tuhan. Batan san meka kalaatan bay pabuwat da, luu na dapat man dusa da puwas na labbasakayi.

17 Sangkon, sabasag-basag hukuman kapatoy ni manusiyaꞌ sabapan dusa Boꞌ Adam, mas basag gi ehe aseꞌ-tabang ka kaintongan ma pamuwan Tuhan sabapan pabuwatan si Isa Almasi. Boꞌ aseꞌ-tabang na ina, inaa na poonan sagannap ma tibuuk ka si Isa ngantanan kawasa man da tumanjataꞌ ni oy-oy katuwaꞌ ninsila.

18 Dari meꞌ halling sambat ku na siꞌ, sabapan disu dusa, mimon manusiyaꞌ lay talapay binotangan hukuman mulkaꞌ. Sugaꞌ sabapan disu pabuwatan intong, mimon manusiyaꞌ binuwanan na lawang man da initung intong sampay man da na koleꞌ kaallum bahau.

19 Bong pasiglaꞌ ta bitsala, poonan disu jama yaꞌ bay ngasip, sikamimon manusiyaꞌ bay dari baldusa. Sugaꞌ poonan disu jama bay ngasip ni panohoan Tuhan, meka na manusiyaꞌ bay initung intong.

20 Balik ta pa saraꞌ Nabi Musa, ngkon na ilay bay pinamuwan meꞌ Tuhan niiya supaya tasayu na meꞌ manusiyaꞌ meka na dusa da. Sugaꞌ saehe-ehe dusa manusiyaꞌ, mas mehe gi ampun ka aseꞌ Tuhan.

21 Sibuwa ilay, mimon manusiyaꞌ takawum meꞌ napsu da buwat dusa. Dari pag toklas na, matoy sila maka tiksaꞌ nyawa da. Sugaꞌ batnaa, sabapan aseꞌ Tuhan, lay na kitabi initung intong. Maka sabapan pabuwatan Papuꞌ tabi si Isa Almasi, luu na kasampulnaan nyawa tabi saumu-umu.

© 2021, Wycliffe Bible Translators, Inc. All rights reserved.

Wycliffe Bible Translators, Inc.
Lean sinn:



Sanasan