Suwat si Pol pa mman Baanan Sukuꞌ si Isa ndooy ni Rom 4 - Sabahagiꞌ Kitab Tawrat: Panagnaan ni Awwal Jaman maka Kitab Injil

Nabi Ibrahim bay initung intong sabap meꞌ na pitsayaꞌ ni palman Tuhan

¹ Na pasal jama initung meꞌ Tuhan intong, mamintang jaꞌ kam ni bay jaman bboꞌ kami Nabi Ibrahim, yana poonan bangsa kami Yahudi.

² Iya ilay bay initung intong, saꞌ ga man sabapan siga pabuwatan na. Bong siꞌ ilay bay man sabapan siga pabuwatan na, malaingkan luu na pinag-abbu meꞌ na. Sugaꞌ bong pa Tuhan, tud yaꞌ luu tapag-abbu leꞌ Nabi Ibrahim.

³ Boꞌ magbēꞌ du ka ilooy ma bay sinuwatan njawom kitab, ilooy ma yuk na, “Lay pitsayaꞌ si Ibrahim ni palman Tuhan sampay ilooy na man na bay initung meꞌ Tuhan intong.”

⁴ Dari mandooy siꞌ, katoonan tabi na bay jaman Nabi Ibrahim bay initung intong, yana ladjikiꞌ man Tuhan sabap meꞌ na bay pitsayaꞌ, saꞌ ga tungbas ni bay pabuwatan na. Ladjikiꞌ man Tuhan ina tadalil pa sīn ndean jama. Bong jama bay binuwanan sīn, boꞌ yaꞌ san bay luu pabuwat na oy maka oy na, ilooy inawnan ladjikiꞌ. Boꞌ jama ma bay magtuyuꞌ buwat ni tawki, taabut na binuwanan sīn, yaꞌ taawnan ladjikiꞌ, arapun gadji.

⁵ Dari bong ina jama buwat mahap sabap kanna da ilooy na man dusa da pinuwasan, magsāꞌ sila. Batan man Tuhan ngitung siga baldusa intong, saꞌ ga sabap pabuwatan da, arapun sabap meꞌ da pitsayaꞌ ni si Isa.

⁶ Bitsala ku itu siꞌ sikatuwaꞌ du ka bitsala Nabi Daud njawom kitab pasal kagakan sagannap ma initung meꞌ Tuhan intong san yaꞌ luu bay pabuwat da.

⁷ Yuk na, “Njawom supaat sagannap ma bay inampun, yana sagannap ma bay pinuwasan dusa da.

⁸ Njawom supaat sagannap ma yaꞌ na kinira meꞌ Tuhan dusa da.”

⁹ Na ni hāl supaat njataꞌ jama ma lay pinuwasan dusa da, tilaw ta teꞌ kam, tuwaꞌ pa bangsa ma bay inislam sadjaꞌ kilay, atawa sampay pa siga bangsa ma yaꞌ bay inislam? Bong yaꞌ katoonan bi, supaat looy ilay para ni bangsa sikamimon. Mindoga jaꞌ kam ni salsila Nabi Ibrahim. Meꞌ bay halling sambat ku na siꞌ, kon na bay initung intong sabap meꞌ na bay pitsayaꞌ,

¹⁰ saꞌ ga sabap meꞌ na bay pingkaꞌ inislam. Batan saꞌ ba, ndang lai na ya initung intong yaꞌ gi san ya bay inislam?

^11-12 Na danan na ilay bay sinohoꞌ ngislam mari luu sipat ni baran na ndang lai na ya initung intong sabap meꞌ na bay pitsayaꞌ ni palman Tuhan. Dari poonan man salsila Nabi Ibrahim, tahati tabi na kon jama initung intong, sabap meꞌ da pitsayaꞌ, saꞌ ga sabap meꞌ da bay inislam. Sangkon binilang na Nabi Ibrahim mmaꞌ mimon ma pitsayaꞌ ni Almasi, bay inislam atawa niyaꞌ. Batan saliꞌ-saliꞌ na du sila ngikut Nabi Ibrahim pitsayaꞌ.

Sagannap ma pitsayaꞌ koleꞌ ilooy ma bay njanjiꞌ meꞌ Tuhan

¹³ Na ni awwal jaman, ndang bay nganjanjiꞌ Tuhan ni Nabi Ibrahim ngandean junyaꞌ niiya sampay ni ga panubuꞌ na bbos-bbos. Na Tuhan ilay bay nganjanjiꞌ meꞌ looy, saꞌ ga sabap meꞌ Nabi Ibrahim bay mogbogan saraꞌ, arapun sabap meꞌ na pitsayaꞌ pa Tuhan. Sampay ilooy na man na bay initung intong. Sangkon, bong inawnan mogbogan saraꞌ, yaꞌ luu kabigiꞌ-bigian na ni bay janjiꞌ Tuhan ni Nabi Ibrahim.

¹⁴ Dari bong itu kitabi subay na pin mogbogan saraꞌ boꞌ tabi koleꞌ ilooy ma bay njanjiꞌ meꞌ Tuhan, malaingkan yaꞌ luu pūs pitsayaꞌ tabi ni janjiꞌ Tuhan. Maka yaꞌ du luu guna janjiꞌ Tuhan.

¹⁵ Batan sabana na, bong ina jama mangasa ni hulas-sangsāꞌ da mogbogan saraꞌ man da koleꞌ siga supaat Tuhan, ilooy ya takoleꞌ da yana mulkaꞌ. Batan sikamimon manusiyaꞌ ngalangga saraꞌ. Disu du jalan man jama kailag meꞌ ngalangga saraꞌ, bong tud samasakali yaꞌ luu saraꞌ.

¹⁶ Sangkon, man gantaan Tuhan, isu-isu sila ma pitsayaꞌ niiya koleꞌ siga supaat ma bay njanjiꞌ meꞌ na. Siga supaat looy ilay ndean meꞌ Tuhan ni kaehe aseꞌ na ni sikamimon ma binilang meꞌ na siga anak Nabi Ibrahim. Na siga anak ma awnan ku ilay siꞌ, saꞌ silay sat siga Yahudi ma pitsayaꞌ, arapun sampay mimon bangsa ma pitsayaꞌ ni janjiꞌ Tuhan meꞌ bay jaman Nabi Ibrahim. Sangkon Nabi Ibrahim ilay binilang na mmaꞌ sikamimon manusiyaꞌ ma pitsayaꞌ.

^17-19 Boꞌ sikatuwaꞌ bana ka suwat njawom kitab, ilooy ma yuk Tuhan ni Nabi Ibrahim, “Lai na ko bay peneꞌ ku binuwat mmaꞌ jinisan bangsa.” Na palman looy ilay siꞌ, lay na silay bana binakbul. Batan bong pa Tuhan, basta jama ngikut Nabi Ibrahim pitsayaꞌ, binilang na sila panubuꞌ Nabi Ibrahim san gi oy bangsa da. Na Nabi Ibrahim ilay, halloman yaꞌ gi ya bay anakan, amu-amu ya pitsayaꞌ ni janjiꞌ Tuhan binuwanan anak san ndaꞌ mata tunmanūn meꞌ na tinuman. Bistahun bi doꞌ, mag-umu na ya ga dahatus taun. Inaa ko ngawon, mas mehe gi dapat jama lay na matoy hanak man iya. Sitti Sara pun, bantuk yaꞌ na du luu dapat na battong sabap tupa na. Sugaꞌ san meꞌ looy, yaꞌ du bay maglumba meꞌ Nabi Ibrahim pitsayaꞌ. Batan bistahan na, Tuhan ma asahan na, yaꞌ luu saꞌ yaꞌ tapabuwat na. San jama lay na matoy, tapakallum na du. Damikiyan, bbuwatan ma yaꞌ gi bay luu, mastiꞌ tapaluu na du.

²⁰ Sangkon yaꞌ bay pingkaꞌ hawal-hawalan Nabi Ibrahim ni bay janjiꞌ Tuhan niiya. Gam pin lay gi pabasag pangando na, pamaehe bantug pa Tuhan.

²¹ Tatantu na bong Tuhan bay nganjanjiꞌ, mastiꞌ tinuman jaꞌ.

²² Dari meꞌ bay sinuwatan njawom kitab, pagka Nabi Ibrahim lay pitsayaꞌ, lay ya initung intong.

²³ Na suwat looy ilay njawom kitab, saꞌ silay sat tuwaꞌ pa Nabi Ibrahim,

²⁴ arapun sampay kitabi pun, lay na du tabeꞌ. Batan soysoy ina pitsayaꞌ ni Tuhan ma bay makallum Papuꞌ tabi si Isa Almasi, initung na du intong.

²⁵ Si Isa ilay bay pinaglillaꞌ meꞌ Tuhan pinapatoy sabapan dusa tabi, boꞌ na pinakallum pabalik supaya kitabi taitung intong.