Suwat si Pol pa mman Baanan Sukuꞌ si Isa ndooy ni Rom 11 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹ Na adakala kanna kasohean hantak bitsala ku siꞌ tud lay na tinikutan meꞌ Tuhan sukuꞌ na bangsa Israil. Sugaꞌ saꞌ silay meꞌ looy. Ndaun bi jaꞌ aku. Jama Israil du situ ku. Aku itu panubuꞌ Nabi Ibrahim ka Boꞌ Benjamin.

² Sangkon tumatandaꞌ na Tuhan yaꞌ bay nikutan bangsa ma bay peneꞌ na sukuꞌ na maruhuꞌ. Intomun bi doꞌ ilooy ma bay sinuwatan njawom kitab meꞌ bay jaman Nabi Eliyas. Lay ya masamba pa Tuhan kalaatan siga pagkahi na bangsa Israil, yuk na,

³ “Ndaun doꞌ ba Papuꞌ. Bbuwatan da lay mapatoy siga nabi nu, sampay lay gi langkat da siga pangulbanan man kami magtaat ningkau. Aku sa bitu takapin ngisbat kau, boꞌ pinagdautan lagi meꞌ da nyawa ku.”

⁴ Sugaꞌ tampung Tuhan niiya, “Luu gi baw bilay pituꞌ libu ma masi itung ku sukuꞌ ku, batan yaꞌ sila bay mmeꞌ sujud numba Baal.”

⁵ Batnaa pun ina, luu gi du kasohean Yahudi, san lasa dangkitiꞌ, bay pineneꞌ meꞌ Tuhan sukuꞌ na ni kaehe timbang na ninsila.

⁶ Dari pagka aseꞌ Tuhan man da bay dari sukuꞌ na, tumatandaꞌ saꞌ du sangsāꞌ da buwat jinisan taat kon da bay pineneꞌ. Bong siꞌ ilay sila bay tapeneꞌ sabapan sangsāꞌ da, yaꞌ silay taawnan aseꞌ ninsila arapun yana tungbas atawa hasil ni bay sangsāꞌ da.

⁷ Dari batnaa, meꞌ tuu na situ kaadaan bangsa Israil: kaintongan ma bay pinagdautan meꞌ da, yaꞌ bay tinimaꞌ meꞌ kaekahan pag taabut na bay ndean ninsila. Ilooy du bay nimaꞌ, yana sagannap ma bay pineneꞌ meꞌ Tuhan. Boꞌ ilooy kasohean, gam pin lay gi patohas kōk da.

⁸ Boꞌ sikatuwaꞌ du ka suwat njawom kitab, ilooy ma yuk na, “Pamiki da meꞌ bay na pinatuli meꞌ Tuhan. Dari ngabut sampay batnaa, san luu tinga da, yaꞌ du sila kale. San luu mata da, yaꞌ du sila ngita.”

⁹ Dari sumpaꞌ njawom kitab Nabi Daud lay na labuꞌ pa sila, ilooy ma yuk na, “Ū Tuhan, kamura-murahan mimon supaat ma bay dean nu sila gam pin ilooy na poonan da binasa. Batan inaa hisab pataꞌ ninsila.

¹⁰ Kamura-murahan tinambunan na mata da supaya sila yaꞌ ngita kabanahan. Kamura-murahan paya na sila leꞌ jinisan kamalasahiyan.”

¹¹ Na san ku ilay siꞌ bay nabbut si Isa meꞌ karuha batu man bangsa Yahudi sumantuk, saꞌ baw lay ga yaꞌ na luu dapat da sinalamat. Sugaꞌ sabapan dusa da nuwak umanat kasalamatan, lay na takka kasalamatan pa mman siga kabangsa-bangsahan ma saꞌ Yahudi. Maksud Tuhan ilay meꞌ looy, kawu-kawu ilohan na siga Yahudi ni kasalamatan ma bay tinuwak meꞌ da pag takita da na eka jama ma saꞌ Yahudi salamat.

¹² Dari bong kabangsa-bangsahan ma saꞌ Yahudi bay koleꞌ supaat mehe sabapan dusa siga Yahudi yaꞌ pitsayaꞌ ni Almasi, labi na saꞌ mehe supaat taꞌ junyaꞌ bong mintu lay na siga Yahudi pitsayaꞌ.

Palbiatan si Pol ni siga bangsa ma saꞌ Yahudi

¹³ Na kaam ina ma saꞌ bangsa Yahudi, katoonan bi du sina, lay ku pineneꞌ meꞌ Tuhan binuwat disu rasul si Isa nohoꞌ masaplag umanat mahap ningkaam. Dari man sabapan sangsāꞌ ku, meka na supaat man Tuhan lay na takoleꞌ bi. Boꞌ wā situ ku nuntutan siga pagkahi ku Yahudi pasal pabuwatan ku ningkaam.

¹⁴ Kainagon ku ilohan na sila ningkaam sampay man da na pitsayaꞌ, boꞌ da sinalamat.

¹⁵ Balik ta pa bay halling ku siꞌ, sabapan siga pagkahi ku Yahudi bay nuwak kasalamatan, meka na sina jama ma saꞌ Yahudi mahap na pa Tuhan. Sugaꞌ bong ina mehe supaat njawom junyaꞌ man sabapan siga Yahudi bay nuwak umanat mahap, labi na saꞌ mehe supaat njawom junyaꞌ bong mintu sila bay pitsayaꞌ. Bong ina mintu sila pitsayaꞌ na, sibuꞌ du sina karuha da ka jama lay na matoy llum na pabalik.

¹⁶ Siga Yahudi ina, meꞌ da mista, pagka sila panubuꞌ Nabi Ibrahim, sukuꞌ Tuhan sila labbasakayi. Sangkon luu sambatan da, ilooy ma yuk da, “Bong ina sabahagiꞌ addunan bay sinongan pa Tuhan, malaingkan labbasakayi addunan sukuꞌ Tuhan na du.” Maka yuk da, “Tiyap-tiyap poon kayu sukuꞌ Tuhan, malaingkan mimon engas na pun sukuꞌ Tuhan du.”

¹⁷ Bana du baw silay bangsa Yahudi meꞌ sapantun disu kayu jaytun bay tinanom meꞌ Tuhan sampay inipat paayad. Salla na, meka na Yahudi meꞌ kadari engas lay na sinappean sabap yaꞌ sila kuhi pitsayaꞌ ni Almasi. Boꞌ kaam ma saꞌ bangsa Yahudi, meꞌ sapantun siga engas poon jaytun ma bay jaꞌ tomoꞌ di-dī na jawom tawun. Sugaꞌ song hallom lay na kam kinaddoꞌ man jawom tawun boꞌ pinatunggu meꞌ Tuhan ni poon jaytun looy siꞌ ma inipat paayad. Dari pag batnaa, hampit na du kam ni mimon ayad sambuhan poon jaytun looy ma inipat meꞌ Tuhan.

¹⁸ Sugaꞌ daa na baw kam ngabbu saula-ula hagaan gi kam man siga Yahudi ma yaꞌ pitsayaꞌ. Intomun bi, saꞌ ga silay siga engas poonan kaallum poon kayu, arapun poon kayu ya poonan kaallum siga engas.

¹⁹ Sugaꞌ adakala pag tampung bi, “Bana silay, sugaꞌ kasohean engas lay na bay sinappean supaya kami na baw tapatunggu.”

²⁰ Bana du baw bilay, sugaꞌ intomun bi, danan da bay sinappean sabap yaꞌ sila pitsayaꞌ ni si Isa. Boꞌ kaam ina, danan bi bay pinatunggu isu-isu sabap pitsayaꞌ kam. Sangkon, daa kam malangkaw dī bi. Gam pin subay kam tawu taggahaꞌ binasa kam meꞌ abbu bi.

²¹ Batan bong ina Tuhan bay nappean siga engas pulnaꞌ man poon jaytun na, kaam pun ina, sappean na du bong kam mmeꞌ meꞌ uwahan da.

²² Dari tapamintangan tabi na bong pooy timbang Tuhan ka tohas na. Sila ina ma yaꞌ pitsayaꞌ, tohasan na. Boꞌ kaam ina, panimbangan na, basta yaꞌ jaꞌ labbahan bi meꞌ bi mangasa ni aseꞌ na. Sugaꞌ bong ina labbahan bi, malaingkan kaam pun, meꞌ karuha engas tinotoan du sina kam.

²³ Kuwan siga Yahudi ina ma yaꞌ pitsayaꞌ ni si Isa, san sila meꞌ karuha engas sinappean, bong mintu sila lay na pitsayaꞌ, tapatunggu du sina sila pabalik batan yaꞌ sina luu yaꞌ takaya Tuhan.

²⁴ Batan bong ina siga engas lakka man jawom tawun sadjaꞌ lay takoleꞌ pinatunggu pa poon jaytun looy siꞌ ma inipat paayad, labi na saꞌ takoleꞌ pinatunggu siga engas pulnaꞌ ma ndang bay pingkaꞌ langkit ka poon jaytun looy.

²⁵ Na siga danganakan, supaya kam yaꞌ ngabbu saula-ula patingkat kam man siga Yahudi, bakkasan ta na kam disu kabanahan ma yaꞌ gi bay tahati maruhuꞌ. Minsan kaekahan Yahudi tohas kōk da yaꞌ kuhi pitsayaꞌ, ndang ilooy silay gantaan ninsila ngkod-ngkoran yaꞌ gi tatuman garaꞌ Tuhan matabeꞌ kabangsa-bangsahan saꞌ Yahudi ni sukuꞌ na.

²⁶ Meꞌ looy ilay, sikamimon ma ginalla Israil salamat na. Boꞌ magbēꞌ du ka suwat njawom kitab, ilooy ma yuk Tuhan mattoꞌ, “Takka sina mintu disu tukang nalamat pōꞌ man Zayon. Iya sina mintu poonan man panubuꞌ Nabi Yaꞌkub ngalabbahan kalaatan da.

²⁷ Janjiꞌ ku ninsila, ni waktu looy ilay mintu, puwasan ku na mimon dusa da.”

²⁸ Bana na batnaa tu, meka gi Yahudi manta Tuhan sabap yaꞌ sila kuhi pitsayaꞌ ni umanat mahap pasal si Isa. Dari sabap kadarihan da, lay na labuꞌ pa kaam siga saꞌ Yahudi supaat kasalamatan. Sugaꞌ sabap Tuhan bay duhuꞌ meneꞌ bangsa Yahudi, masi gi du baw sina sila kinaasean meꞌ na sabapan kabboꞌ-bboan da.

²⁹ Sangkon masi luu dapat siga Yahudi salamat batan Tuhan ina, bong lay na muwan ladjikiꞌ, yaꞌ na mawiꞌ. Damikiyan, bong ya ngaliyun jama pa mman na, yaꞌ du ya nambo lawang.

³⁰ Kaam ina, siga bangsa saꞌ Yahudi, sibuwa yaꞌ kam bay pitsayaꞌ pa Tuhan. Pag batnaa, pitsayaꞌ na kam. Kon na ilay meꞌ looy sabap timbang ma bay tinuwak meꞌ bangsa Yahudi lay na takka pa mman bi.

³¹ Damikiyan siga Yahudi, san sila yaꞌ pitsayaꞌ ni si Isa, luu du sina mintu lawang man da pinanimbangan meꞌ bay jaman ningkaam du.

³² Batan man gantaan Tuhan, mimon manusiyaꞌ subay doꞌ bay pingkaꞌ duhuꞌ yaꞌ ngasip niiya sampay tawop minulkaan supaya tapakitahan na timbang na ni manusiyaꞌ labbasakayi.

Si Pol nanglitan Tuhan

³³ Tuhan ina, tud kahaylan-haylan kaayaran na. Yaꞌ tabista tabi ehe lawom akka na ka kapandoyan na. Tunmanūn meꞌ jama kahati siga garaꞌ na ka pabuwatan na.

³⁴ Meꞌ bay sinuwatan njawom kitab, yuk na, “Yaꞌ luu pangabut-ngabut manusiyaꞌ ni ehe lawom akka Tuhan. Yaꞌ luu san disu kapagpandoyan iya.

³⁵ Yaꞌ ya kabuddihan leꞌ manusiyaꞌ saula-ula luu bay tadean tabi niiya.”

³⁶ Kon na ilay meꞌ looy batan mimon-mimon lakka man Tuhan. Maka iya magbayaan labbasakayi. Maksud mimon-mimon bay pinapayak supaya labbasakayi kaboo kabantugan niiya. Sangkon, subay ya pinudji saumu-umu. Amin.