Suwat si Pol pa mman Baanan Sukuꞌ si Isa ndooy ni Rom 10 - Sabahagiꞌ Kitab Tawrat: Panagnaan ni Awwal Jaman maka Kitab Injil

Isu-isu pitsayaꞌ ni si Isa lān man manusiyaꞌ initung intong

¹ Siga danganakan, ituu na pin pagdautan ku banahan: kainagon ku, takita ku na ga sibuꞌ pagkahi ku Yahudi salamat man mulkaꞌ Tuhan. Boꞌ inaa na pin sina paku ku pa Tuhan.

² Sila ina, katoonan ku du baw magtuyuꞌ sila matangge awon Tuhan, sugaꞌ pangahati da pasal meꞌ nulut kahandak Tuhan yaꞌ tuwaꞌ.

³ Ni kaawam da, yaꞌ sila kuhi mmeꞌ ni jalan bahau man manusiyaꞌ initung meꞌ Tuhan intong. Ninsila, ilooy ya patangge da jalan sibuwa, yana hāl meꞌ da magtuyuꞌ mogbogan saraꞌ Nabi Musa.

⁴ Yaꞌ tahati da lay na ginantian meꞌ Tuhan jalan sibuwa ka jalan bahau. Batnaa tu, Almasi na yana jalan bahau man manusiyaꞌ initung intong, basta sila pitsayaꞌ jaꞌ niiya.

Kaintongan ka kasalamatan ni soysoy pitsayaꞌ

⁵ Na ni kapasal jama mogbogan saraꞌ man da initung intong, luu bay sinuwatan meꞌ Nabi Musa, ilooy ma yuk na, “Bong jama mogbogan panohoan labbasakayi njawom saraꞌ, koleꞌ sila kasampulnaan nyawa.” Salla na, bong inawnan manusiyaꞌ, yaꞌ luu san disu kabogbog saraꞌ labbasakayi.

⁶ Tandaꞌ jama mista saraꞌ Tuhan kalanduꞌ awod binogbogan, kasohean magsambatan na ga subay jama bay doꞌ duhuꞌ dutai pa sulgaꞌ boꞌ na nammu kasalamatan. Sugaꞌ daa na sila susa. Luu na du Almasi bay duwai man sulgaꞌ nalamat manusiyaꞌ. Boꞌ inaa na sina umanat ma sohoꞌ kami kinapitsayaan ni manusiyaꞌ.

⁷ Damikiyan, kasohean magsambatan na ga subay jama bay doꞌ duhuꞌ duwai pa jawom tahanan jama matoy boꞌ na nammu kasalamatan. Sugaꞌ meꞌ halling sambat ku na siꞌ, daa na sila susa. Lai na du Almasi bay pingkaꞌ pilay. Pag-anu, lay na ya lakka mandooy pag taabut na bay pinakallum pabalik tandaꞌ luu na kasalamatan ni soysoy pitsayaꞌ niiya.

⁸ Dari pagka umanat mahap pasal pitsayaꞌ ka pangando ni Almasi pinasaplag na pin, yaꞌ na sina kaawran manusiyaꞌ nammu kasalamatan. Boꞌ magtuntun du ka suwat njawom kitab, ilooy ma yuk na, “Umanat Tuhan ina luu na pin mman bi. Luu na njawom behe bi sampay njawom atay bi.” Na mimon ma bay sabbut ku ilay siꞌ tabeꞌ du silay ni umanat ma pinasaplag meꞌ kami pasal pangando ni si Isa. Dari tuktuk kami masaplag, yuk kami,

⁹ “Bong kam māꞌ ni pagkahi bi manusiyaꞌ si Isa yana Papuꞌ sampay bana-bana kam pitsayaꞌ lay ya pinakallum meꞌ Tuhan pabalik, salamat na sina kam.

¹⁰ Batan bong ina jama bana-bana pitsayaꞌ ni si Isa, malaingkan initung ya intong. Damikiyan, bong ya mangaku mmeꞌ ni si Isa, salamat na du ya.

¹¹ Batan yuk njawom kitab, ‘Soysoy pitsayaꞌ niiya yaꞌ kaap-apan.’ ”

¹² Na kasalamatan tuu itu para ni mimon bangsa, saꞌ biddaꞌ bong sila Yahudi atawa ssaꞌ, batan Tuhan yaꞌ magsitingka manusiyaꞌ. Mimon kitabi manusiyaꞌ, disu du Papuꞌ tabi. Boꞌ meka sina kaayaran ndean meꞌ na ni sikamimon ma maku tabang niiya.

¹³ Boꞌ magbēꞌ du baw ka suwat njawom kitab, ilooy ma yuk na, “Soysoy maku kasalamatan ni Papuꞌ, nduwan jaꞌ sina.”

¹⁴ Sugaꞌ yaꞌ baw sina luu jama nohoꞌ sinalamat ni Papuꞌ bong yaꞌ doꞌ sila bay duhuꞌ pitsayaꞌ niiya. Damikiyan, yaꞌ du luu pitsayaꞌ niiya bong sila yaꞌ bay duhuꞌ kale umanat mahap pasal iya. Maka yaꞌ du luu bay kale bong yaꞌ doꞌ luu bay duhuꞌ masaplagan sila.

¹⁵ Maka yaꞌ du sina luu masaplag bong yaꞌ bay sinohoꞌ meꞌ Tuhan. Ni kapasal sila ma bay sinohoꞌ, yuk njawom kitab, “Tud kagak-gāk katakka sagannap ma moo umanat mahap pasal kasalamatan.”

¹⁶ Salla na, dangkitiꞌ du jama pitsayaꞌ ni umanat mahap. Meꞌ bay halling Nabi Isaya njawom kitab, yuk na, “Ū Papuꞌ, adak yaꞌ bitu luu pitsayaꞌ ni umanat kami.”

¹⁷ Sugaꞌ san baw meꞌ looy, luu gi du baw tu pitsayaꞌ. Danan da pitsayaꞌ sabap lay sila kale umanat mahap pasal Almasi. Maka kon da bay kale sabap luu bay masaplagan sila.

¹⁸ Na adakala luu na baw mintu māꞌ ngkon meka Yahudi yaꞌ pitsayaꞌ ni umanat mahap sabap yaꞌ sila bay kabaan. Sugaꞌ daa kam hidjab, batan yuk njawom kitab, “Umanat pasal Tuhan pinamahalayak ni mimon kalahat-lahatan. Tanyag na umanat looy ni sikaliput junyaꞌ.”

¹⁹ Na adakala luu na baw māꞌ ngkon siga Yahudi yaꞌ pitsayaꞌ sabap yaꞌ tahati da umanat mahap. Sugaꞌ daa kam hidjab, batan minsan ina siga bangsa kasohean lay du kahati sampay pitsayaꞌ. Sangkon luu bay sinuwatan meꞌ Nabi Musa njawom kitab ma tuwaꞌ pa bangsa Yahudi, ilooy ma yuk Tuhan, “Padangkiꞌ ta kam sina sampay man bi na lasu sabap patabeꞌ ku na du sina mintu ni sukuꞌ ku kabangsa-bangsahan ma tanyag ningkaam awam pasal aku.”

²⁰ Nabi Isaya pun, lay du bay nuwat njawom kitab pasal siga bangsa ma saꞌ Yahudi, ilooy ma yuk Tuhan, “Lay ku tatammu meꞌ jama ma yaꞌ bay miha aku. Maka san sila yaꞌ bay pakiyaka pasal aku, aku mismu bay magpakila ninsila.”

²¹ Boꞌ ni kapasal bangsa Israil, yuk Tuhan, “Hallom na silay ku bay nganjunjung nohoꞌ sila patapit niyaku. Sugaꞌ ni katohas kōk da, doman jaꞌ sila nguntra aku sampay yaꞌ ngasip.”