Siga Pakaradjaan bay Pinalahil 9 - Sabahagiꞌ Kitab Tawrat: Panagnaan ni Awwal Jaman maka Kitab Injil

Tabuliꞌ ni kalima na tiniyup

¹ Pag-anu siꞌ, malaikat looy na baw ni kalima na pasīng niyup tabuliꞌ na. Pag pōꞌ halling na, luu takita ku meꞌ bantuk disu potean lay labuꞌ pa taꞌ junyaꞌ. Pag-anu, lay na baw ndean iya kunsiꞌ tangkop lowang tangob ma yaꞌ mag-ngkoran lawom na.

² Pag ungkad na tangkop na, ilooy ma pōꞌ humbu kapa pa jataꞌ meꞌ humbu lakka man api mehe banahan. Tandaꞌ kapa humbu looy, sampay mataallaw ka langit ngalindom na ga.

³ Maka luu pōꞌ man jawom humbu looy tompang yaꞌ taambat ngalataan junyaꞌ. Boꞌ lay gi sila binuwanan kawasa mapaddihan manusiyaꞌ meꞌ lassa keket patikāꞌ.

⁴ Sugaꞌ yaꞌ sila pinadari meꞌ tabiat tompang biyasa makaat kakayu-kayuhan ka katumbu-tumbuhan sampay tinanom. Ilooy du bay sinukuꞌ ninsila, mapaddihan sagannap manusiyaꞌ ma yaꞌ luu sāp Tuhan taꞌ tundun da.

⁵ Sugaꞌ yaꞌ baw bay nohoꞌ pinapatoy ninsila. Ilooy du kapatut bay ndean sila nohoꞌ mapaddihan ga jama looy njawom limam buwan ka bisa meꞌ lassa keket patikāꞌ.

⁶ Ga manusiyaꞌ looy ilay ni waktu looy mintu, ni kapaya da, kainagon da matoy na sila, sugaꞌ yaꞌ sila nduwan. San du pooy meꞌ da magdaut matoy, yaꞌ du luu dapat da.

⁷ Na bantuk ga tompang looy siꞌ, subay ga kuraꞌ tahan binoo pa jawom bonoꞌ mehe. Saliꞌ-saliꞌ luu taꞌ kōk da meꞌ bantuk karuna mmas. Luwa da ingbas ka manusiyaꞌ.

⁸ Maka luu dūn kōk da meꞌ tahaꞌ dūn kōk karandahan. Boꞌ luu gi impon da meꞌ taling halimaw.

⁹ Maka luu gi meꞌ bantuk ampi bassi ni dakan da. Sila ilay lomeng, nagubtub na pikpik da subay ga baanan kuraꞌ pinasu ddas ka kalesa da lān sibonoꞌ.

¹⁰ Maka luu gi ingko da meꞌ ingko patikāꞌ man da nabbok. Boꞌ ilooy na poonan kawasa da man da mabisahan manusiyaꞌ njawom limam buwan.

¹¹ Maka luu sultan da, yana malaikat ma ngantanan lowang tangob looy ma yaꞌ mag-ngkoran lawom na. Awon na bong ni pallun Hibrani, “Abaddon”; bong ni pallun Greek, “Apoliyon”. Hatiyan na, Tukang Ngahansu.

¹² Na ilooy ilay siꞌ bohoꞌ balaꞌ sibuwa, batan luu gi duwa pasunuꞌ.

Tabuliꞌ ni ka-nnom na tiniyup

¹³ Pag-anu siꞌ, tiniyup na meꞌ malaikat ni ka-nnom na tabuliꞌ na. Pag pōꞌ halling na, kale na baw ku suwara pōꞌ man tagan sika-mpat tanduk ni sika-mpat pidju lamisahan mmas looy man nunu bbūg ndooy ni awpan Tuhan.

¹⁴ Yuk suwara looy ni malaikat looy siꞌ ni ka-nnom ma bay niyup tabuliꞌ na, “Paddusan nu na malaikat looy sika-mpat ma pinusas ndooy ni bihing Sōng Yupretes.”

¹⁵ Na siga malaikat looy ilay siꞌ sika-mpat ndang hallom na bay sinaddiya meꞌ Tuhan. Sinukuꞌ ninsila mapatoy manusiyaꞌ sabahagiꞌ tallu taꞌ babaw junyaꞌ. Sugaꞌ noy taabut na taun na, ka buwan na, ka llaw na sampay jām na bay ginantaꞌ meꞌ Tuhan boꞌ da llappahan. Dari siꞌ, ilooy ma lay na du sila llappahan.

¹⁶ Pag-anu siꞌ, ndaꞌ ku, luu patuhut ninsila baanan sundalu taꞌ kuraꞌ. Lay ku kabaan eka da duwa hatus milyun.

¹⁷ Njawom pandapat ku, lay na du takita ku bantuk ga sundalu looy ka ga kuraꞌ da. Kuwan ga sundalu looy siꞌ, saliꞌ-saliꞌ luu ampi bassi para dakan da. Walnaꞌ ampi dakan da akketan api ka biluhan itom maka kunitan manilang. Kuwan kōk ga kuraꞌ da meꞌ kōk halimaw. Boꞌ luu gi pōꞌ man jawom behe da api ka humbu haboyan manilang.

¹⁸ Dari sabahagiꞌ tallu manusiyaꞌ taꞌ junyaꞌ lay matoy sabapan api, humbu ka manilang ma bay pōꞌ man jawom behe ga kuraꞌ looy.

¹⁹ Kuwan tōng ingko ga kuraꞌ looy, meꞌ bantuk kōk sō. Boꞌ ninduk lagi man da mapaddihan jama. Dari labba man behe ga kuraꞌ looy sampay pa ingko da, ilooy na man da mapaddi sampay mapatoy jama.

²⁰ Sugaꞌ san meꞌ looy, kuwan manusiyaꞌ ma yaꞌ bay matoy leꞌ siga balaꞌ looy, masi du yaꞌ bay kuhi magsiddik. Gam pin amu-amu sila numba siga seytan ka ga tuhan-tuhan ma bay jaꞌ pinabuwat ka mmas, pilak porol, tumbagaꞌ, batu atawa kayu. Mingkan siga tuhan-tuhan meꞌ looy ilay, yaꞌ san ngita, yaꞌ san kale, sampay yaꞌ san kapalān.

²¹ Ga jama looy ilay siꞌ masi yaꞌ kuhi nawbatan dusa da mapatoy jama, makoy ilmuꞌ seytan, nangkaw sampay magjina.