Siga Pakaradjaan bay Pinalahil 8 - Sabahagiꞌ Kitab Tawrat: Panagnaan ni Awwal Jaman maka Kitab Injil

Kanjiꞌ ni kapituꞌ na llukapan

¹ Pus meꞌ looy, pag lukap Bili-bili looy kanjiꞌ ni kapituꞌ na, sarunduun du yaꞌ luu halling oy maka oy na ga tongaꞌ jām ndooy ni sulgaꞌ.

² Pag-anu siꞌ, ngita na baw ku pituꞌ malaikat, yana sikapituꞌ malaikat ma ndang luu nangge ni awpan Tuhan. Boꞌ lay gi sila binuwanan tabuliꞌ saliꞌ-saliꞌ.

³ Pag-anu siꞌ, luu gi disu malaikat pasōng ngantanan pinggan mmas man ngisi bbūg, boꞌ na pawus pa lamisahan mmas yana panunuhan bbūg ni awpan paningkoan mehe looy. Pag-anu, lay na baw ya binuwanan bbūg paeka tinunu ni awpan paningkoan looy supaya tapahaboy na humbu na ni siga duwaa sukuꞌ Tuhan sikamimon.

⁴ Dari pag nnaꞌ na bbūg looy taꞌ bā api ni pinggan looy, lay na patiluꞌ humbu na pa Tuhan haboy ka siga duwaa siga sukuꞌ Tuhan.

⁵ Lupus jaꞌ siꞌ meꞌ looy, lay na baw ya ngisihan pinggan looy siꞌ pabalik ka bā api lakka man taꞌ lamisahan looy man nunu bbūg. Pag-anu siꞌ, lay na baw hiyakan na pa taꞌ junyaꞌ sampay ngallub na ga lahat haboyan guntu ka mangirat. Boꞌ luu gi siga linug.

Siga malaikat niyup tabuliꞌ da

⁶ Na balik ta pa siga malaikat looy siꞌ sikapituꞌ, lay na sakap niyup tabuliꞌ da.

⁷ Pag tiyup malaikat looy ma duhuꞌ tabuliꞌ na, ilooy ma luu na sakiyan ayis batu labuꞌ taꞌ junyaꞌ haboyan api magsakot ka lahaꞌ. Dari lay tutung sabahagiꞌ tallu gumi maka sabahagiꞌ tallu kakayu-kayuhan sampay siga parang sikamimon.

⁸ Pag tiyup malaikat ni kaduwa na tabuliꞌ na, ilooy ma luu meꞌ bantuk punu mehe noleyab meꞌ api lay hiniyakan pa dilawut. Dari sabahagiꞌ tallu dilawut lay na dari lahaꞌ.

⁹ Maka lay na ga matoy sabahagiꞌ tallu balnyawa ni dilawut. Maka lay na du binasa sabahagiꞌ tallu mban ndooy.

¹⁰ Pag tiyup malaikat ni katallu na tabuliꞌ na, ilooy ma luu na potean mehe lay labuꞌ man taꞌ langit noleyab meꞌ karuha api paliyatut. Boꞌ lay labuꞌ pa taꞌ sabahagiꞌ tallu sōng ka siga poon boheꞌ taꞌ junyaꞌ.

¹¹ Awon potean looy siꞌ yana Pait. Dari lay na ga papait sabahagiꞌ tallu boheꞌ langngin taꞌ junyaꞌ, boꞌ meka jama bay matoy pag inum da boheꞌ looy.

¹² Pag tiyup malaikat ni ka-mpat na tabuliꞌ na, lay pinalindoman sabahagiꞌ tallu mataallaw, buwan sampay siga potean. Dari siꞌ, llaw pa dangallaw ngalindom du lahat sabahagiꞌ tallu njawom dangallaw. Maka sangom-sangom, lindom saꞌ alang-alang sabahagiꞌ tallu njawom dambahangi.

¹³ Pag-anu, ngita na baw ku belleꞌ lomeng ni antalaan. Boꞌ lay gi takale ku belleꞌ looy ngahowap, yuk na, “Tud kaluuy-luuy sina mintu manusiyaꞌ ma masi taꞌ junyaꞌ pag taabut tiniyup siga tabuliꞌ ga malaikat looy sikatallu ma dambuli.”