Siga Pakaradjaan bay Pinalahil 7 - Sabahagiꞌ Kitab Tawrat: Panagnaan ni Awwal Jaman maka Kitab Injil

Dahatus mpatpuꞌ-mpat libu panubuꞌ si Israil sinapan

^1-2 Paddus meꞌ looy siꞌ, luu na baw takita ku mpat malaikat nangge ni sika-mpat pidju alam lay binuwanan kapatut makaat gumi ka dilawut. Dari lay sila mampan mimon baliyu lakka man sika-mpat pidju alam mari yaꞌ niyup pa dile pa dilawut sampay taꞌ kakayu-kayuhan. Pag-anu, luu gi takita ku disu malaikat pōꞌ man mataallaw ngantanan sāp Tuhan, yana Tuhan sabanna ma llum saumu-umu. Bbuwatan na lay ngahowapan siga malaikat looy siꞌ sika-mpat,

³ yuk na, “Daa doꞌ darahan bi makaat gumi ka dilawut sampay kakayu-kayuhan ngkod-ngkoran yaꞌ gi bay tasapan kami tundun sagannap ma ngisbat Tuhan tabi.”

⁴ Pag-anu siꞌ, lay ku kabaan luu konoꞌ dahatus mpatpuꞌ-mpat libu jama bay sinapan, turunan siga anak si Israil sikasapu-duwa.

⁵ Sapu-duwa libu yana panubuꞌ si Juda, sapu-duwa libu yana panubuꞌ si Ruben, sapu-duwa libu yana panubuꞌ si Ged,

⁶ sapu-duwa libu yana panubuꞌ si Asel, sapu-duwa libu yana panubuꞌ si Naptali, sapu-duwa libu yana panubuꞌ si Manasse,

⁷ sapu-duwa libu yana panubuꞌ si Simiyun, sapu-duwa libu yana panubuꞌ si Libay, sapu-duwa libu yana panubuꞌ si Isakal,

⁸ sapu-duwa libu yana panubuꞌ si Zebulun, sapu-duwa libu yana panubuꞌ si Yusup, sapu-duwa libu yana panubuꞌ si Benjamin.

Sakiyan manusiyaꞌ ni awpan Tuhan

⁹ Pus meꞌ looy, ngita na baw ku sakiyan manusiyaꞌ nangge ni awpan ilooy ma ningkōꞌ taꞌ paningkoan mehe looy ka ni awpan Bili-bili looy. Ni kaeka da, yaꞌ na taitung. Luu na ndooy manusiyaꞌ lakka man mimon kalahat-lahatan ka mimon kabangsa-bangsahan, kaniya-kaniya ka jinisan pallun da. Boꞌ saliꞌ-saliꞌ sila jubahan poteꞌ maka saliꞌ-saliꞌ sila ngalabad-labaran pappaꞌ kalapaꞌ-sawit ni kagāk da.

¹⁰ Maka haboy-haboy sila ngahowap, yuk da, “Pudji tabi Tuhan, ilooy ma magsultan njataꞌ mimon-mimon. Maka pudji tabi Bili-bili looy, batan yaꞌ kitabi salamat bong saꞌ sabapan da.”

¹¹ Pag-anu siꞌ, lay na baw takita ku sikamimon malaikat nangge ndooy ni sikaliput paningkoan mehe looy ka ga matatoa looy siꞌ sikaduwampuꞌ-mpat sampay ga balnyawa looy siꞌ sika-mpat. Bbuwatan da sujud sampay numba Tuhan,

¹² yuk da, “Bana-bana du Tuhan tabi subay binuwanan kabantugan sampay pagsukuhan. Tawop ya pinaehe. Pudji mehe niiya batan iya ngantanan gaos saꞌ na gantaꞌ na ka akka lawom ma yaꞌ luu sibuꞌ sabanding na. Iya Sangat Kawasa saumu-umu. Amin.”

¹³ Pag-anu siꞌ, kuwan disu ni baanan ga matatoa looy lay nilaw aku, yuk na, “Ga jama looy ma jubahan poteꞌ, katoonan nu kilay bong soy sila atawa lakka man ninggai sila?”

¹⁴ Pag tampung ku, “Tuwan, yaꞌ katoonan ku. Kau ya bina toon.” Dari yuk na niyaku, “Inaa na sina ga jama ma bay na lumingkaꞌ njawom kabinsanaan mehe. Labbasakayi sila bay mopoan juba da ka lahaꞌ Bili-bili looy supaya poteꞌ na, hati na, puwas na dusa da.

¹⁵ Sangkon luu na sila ntuu ni awpan paningkoan Tuhan ni sulgaꞌ. Bbuwatan da ina makutuꞌ kahandak Tuhan sangom-llaw njawom langga ntuu ni okoman Tuhan. Dari Tuhan na mismu soheꞌ da dambuwaꞌ sampay iya na ngayaran sila.

¹⁶ Yaꞌ na sina luu masa da lingantu atawa pun katohoan kallong. Maka yaꞌ na sila kapasuan atawa malasahi leꞌ pasuꞌ llaw,

¹⁷ batan inipat sila meꞌ Bili-bili looy ma ni bihing paningkoan Tuhan. Binoo na sila meꞌ na pa siga poon boheꞌ ma muwan kaallum ma yaꞌ luu katapusan na. Maka puusan Tuhan na sina mimon boheꞌ mata da, hati na, yaꞌ na sila susa pabalik.”