Siga Pakaradjaan bay Pinalahil 6 - Sabahagiꞌ Kitab Tawrat: Panagnaan ni Awwal Jaman maka Kitab Injil

Bili-bili ngalukap kanjiꞌ logoran suwat looy

¹ Pag-anu siꞌ, sasang ku magliling-liling ndooy, ilooy ma lay na llukapan kanjiꞌ sibuwa meꞌ Bili-bili looy. Maka lay ku kale disu ni siga balnyawa looy siꞌ sika-mpat mitsala meꞌ halling guntu, yuk na, “Pōꞌ na ko pitu.”

² Pag ndaꞌ ku, luu na pōꞌ kuraꞌ poteꞌ. Ilooy ma bakuraꞌ luu ka panaꞌ na. Pag-anu siꞌ, pinapatukan na baw ya karuna yana sipat ni kawasa-kapatut ndean iya. Iya ilay paglallahan wā kaā sibonoꞌ. Dari lay na ya lakka mandooy maā banta na sikamimon.

³ Na pag lukap Bili-bili looy kanjiꞌ ni kaduwa na, lay ku kale balnyawa looy ni kaduwa na mitsala, yuk na, “Pōꞌ na ko pitu.”

⁴ Pag ndaꞌ ku, luu na baw pōꞌ kuraꞌ akket. Ilooy ma bakuraꞌ lay pina-ntanan kataliꞌ mehe, boꞌ na binuwanan kawasa-kapatut ngalakkahan kasalassayan taꞌ junyaꞌ supaya sibonoꞌ-bonoꞌ na manusiyaꞌ.

⁵ Pag lukap Bili-bili looy kanjiꞌ ni katallu na, lay ku kale balnyawa looy ni katallu na mitsala, yuk na, “Pōꞌ na ko pitu.” Dari pag ndaꞌ ku, luu na baw pōꞌ kuraꞌ itom. Kuwan ilooy ma bakuraꞌ, mengket timbangan.

⁶ Pag-anu siꞌ, kale na baw ku suwara lakka man tangngaan siga balnyawa looy siꞌ sika-mpat, yuk na, “Luu sina mintu takka gotom mehe ni sikaliput junyaꞌ. Gadji jama dangallaw, sakilu du taligu taballi na. Atawa gadji jama dangallaw, mbaꞌ gantang bohas du taballi na. Sugaꞌ daa palangkawan nu hagaꞌ insallan ka tubaꞌ anggul.”

⁷ Pag lukap Bili-bili looy kanjiꞌ ni ka-mpat na, lay ku kale balnyawa looy ni ka-mpat na mitsala, yuk na, “Pitu na ko.”

⁸ Dari pag ndaꞌ ku, luu na pōꞌ kuraꞌ pusat. Kuwan ilooy ma bakuraꞌ, awon na Kapatoy. Maka luu patuhut niiya inawnan Tahanan Jama Matoy. Pag-anu siꞌ, lay sila binuwanan kapatut mapatoy sabahagiꞌ mpat manusiyaꞌ taꞌ babaw junyaꞌ makoy bonoꞌ, gotom, saki ka siga sattuwa tawun.

⁹ Pag lukap Bili-bili looy kanjiꞌ ni kalima na, ngita na baw ku pangulbanan. Ndiyoꞌ na luu ndooy siga nyawa sagannap ma bay pinapatoy sabap meꞌ da bay masaplag palman Tuhan ka meꞌ da kanaalla masampay kabanahan pasal Almasi.

¹⁰ Bbuwatan da mitsala pahaddo, yuk da, “Ū Tuhan, meꞌ kau sutsiꞌ ka intong, meꞌ noy gi tu hallom na boꞌ nu ngalabuꞌ hukuman ni siga jama maat taꞌ junyaꞌ? Sumilan kami bawsan nu sabapan lahaꞌ kami bay tumpahan da?”

¹¹ Pag-anu siꞌ, lay na sila binuwanan juba poteꞌ saliꞌ-saliꞌ boꞌ da nohoꞌ ngagad-ngagad gi dangkitiꞌ. Noy konoꞌ mintu ngabut na gantaan eka pagkahi da ata Tuhan pinapatoy meꞌ karuha da du, boꞌ da binawsan.

¹² Pag-anu siꞌ, takita ku na baw Bili-bili looy ngalukap kanjiꞌ ni ka-nnom na. Magsabtan du baw, sarunduun du luu linug basag taꞌ junyaꞌ. Kuwan mataallaw, lay na palindom meꞌ karuha kakanaꞌ itom. Kuwan buwan, lay na paakket, subay ga lahaꞌ.

¹³ Kuwan siga potean, maglatakan na pa taꞌ junyaꞌ, subay ga buwaꞌ kayu mataꞌ maglabuan bay jogjog meꞌ bagju.

¹⁴ Sampay langit mismu, lay na ga salik duwa boꞌ na palogod subay ga katas llogoran. Maka mimon punu sampay mimon nusa mag-usikan na man bay limpaꞌ da.

¹⁵ Dari manusiyaꞌ ni sikaliput junyaꞌ, saꞌ biddaꞌ bong oy ntan da, lay na miha man da tapuk. Siga sultan ka siga jama balkanan, siga pa-mmean sundalu, ga jama miskin atawa dayahan, jama luu kawasa da ka siga ata ka saꞌ ata, mimon sila lay na tapuk pa jawom siga lowang pampang ka ni sallangan kabatuhan mehe ni kapunu-punuhan.

¹⁶ Ni katawu da, lay na ga sila ngahowapan kabatuhan sampay kapunu-punuhan, yuk da, “Luntuhan bi na kami supaya kami yaꞌ takita meꞌ ilooy ma ningkōꞌ taꞌ paningkoan mehe looy, maka supaya yaꞌ na kami taabut mulkaꞌ Bili-bili looy!

¹⁷ Batan saꞌ ga bitu oy, ituu na llaw man da mupusan mulkaꞌ da! Soy katatas meꞌ tuu?”