Siga Pakaradjaan bay Pinalahil 5 - Sabahagiꞌ Kitab Tawrat: Panagnaan ni Awwal Jaman maka Kitab Injil

Logoran suwat ddas ka pituꞌ kanjiꞌ na

¹ Pag-anu siꞌ, ngita na baw ku logoran suwat ni kawnan ilooy ma taꞌ paningkoan looy. Logoran suwat looy siꞌ lay bay sinuwatan parambilaꞌ-parambilaꞌ maka lay bay pinalakkotan kanjiꞌ pituꞌ eka na mari yaꞌ pabakka.

² Maka luu gi bay takita ku disu malaikat basag kawasa na lay ngahowap, yuk na, “Soy ina tawop ngalukapan siga kanjiꞌ logoran suwat naa sampay matsa?”

³ Sugaꞌ yaꞌ luu bay katampung. Labba man taꞌ babaw junyaꞌ ngabut pa taꞌ langit sampay pa ahirat, yaꞌ luu bay tatammu tawop ngungkad logoran suwat looy sampay matsa isi na.

⁴ Dari siꞌ, lay ga ku kapanangis ni kasusa ku pag ndaꞌ ku yaꞌ luu san disu bay tawop ngungkad suwat looy.

⁵ Lipara, luu disu ni baanan ga matatoa looy siꞌ bay maan aku, yuk na, “Daa na ko ba nangis. Luu du ilooy ma ginalla Halimaw, yana panubuꞌ Sultan Daud, pōꞌ man paglūng si Juda. Lay na silay ā meꞌ na mimon banta manusiyaꞌ. Ngkon luu kapatut na ngalukap kanjiꞌ looy sikapituꞌ sampay ngungkad suwat looy.”

⁶ Pag-anu siꞌ, ngita na ku Bili-bili nangge ni bihing paningkoan mehe looy siꞌ ni tangngaan siga balnyawa looy siꞌ sika-mpat ka ga matatoa looy sikaduwampuꞌ-mpat. Pangandaan ku, luu siga pawut na meꞌ bantuk bay na ya pingkaꞌ sinumbaliꞌ. Eka tanduk na, pituꞌ. Mata na pun, pituꞌ du, yana sipat ni Rū Tuhan ma ginalla Rū Sikapituꞌ. Rū looy ilay sinohoꞌ ngalataan sika-mpat pidju alam.

⁷ Pag-anu siꞌ, lay na pasōng Bili-bili looy pa paningkoan looy ngaddoꞌ logoran suwat looy man kawnan ilooy ma ningkōꞌ ndooy.

⁸ Luu jaꞌ siꞌ mman na, kuwan ga balnyawa looy siꞌ sika-mpat ka ga matatoa looy sikaduwampuꞌ-mpat, lay magti sujud ni awpan na. Saliꞌ-saliꞌ na luu ka biyulla da sampay pinggan mmas pannoꞌ meꞌ bbūg. Kuwan bbūg looy, yana sipat ni siga duwaa ga sukuꞌ Tuhan.

⁹ Maka bbuwatan da ngalang kalangan bahau man mudji Bili-bili looy, yuk da, “Kau du tawop ngaddoꞌ suwat naa sampay ngalukap siga kanjiꞌ na sabap lay ko bay nongan umu nu man maddusan manusiyaꞌ man komkoman Ibilis. Lahaꞌ nu bay pinaduwai supaya dari sukuꞌ Tuhan na jama ni mimon kalahat-lahatan ka mimon kabangsa-bangsahan, kaniya-kaniya ka jinisan pallun da.

¹⁰ Boꞌ lay gi sila pabuwat nu bangsa sultan ka bangsa imam ma ngisbat Tuhan tabi. Maka sila na sina mintu tumabeꞌ ningkau marinta ni junyaꞌ bbos-bbos.”

¹¹ Mindangoy ko, ngita na baw ku sampay kale gi ku laksaꞌ-laksaan malaikat ni sikaliput paningkoan looy ka ga balnyawa looy sika-mpat sampay ga matatoa looy.

¹² Bbuwatan da labbasakayi haboy-haboy ngahowap, yuk da, “Bili-bili tuu ma bay pingkaꞌ sinumbaliꞌ tud tawop pinudji sampay binuwanan kabantugan mehe. Tawop ya ngantanan mimon kawasa, mimon daya, mimon pangahati, ka mimon gaos.”

¹³ Pag-anu siꞌ, lay na baw ku kale suwara mimon balnyawa ma bay pinapayak, labba man junyaꞌ sampay pa ahirat, labba man taꞌ langit sampay pa taꞌ gumi ka dilawut, yuk da, “Pudji tabi ilooy ma ningkōꞌ taꞌ paningkoan sultan. Maka pudji tabi Bili-bili looy. Paehe tabi sila maka buwanan tabi sila kabantugan mehe batan sila magbayaꞌ saumu-umu!”

¹⁴ Pag-anu siꞌ, nampung na baw siga balnyawa looy sika-mpat, yuk da, “Amin.” Kuwan siga matatoa looy baw siꞌ tu sikaduwampuꞌ-mpat, haboy-haboy labbasakayi sujud sampay numba Tuhan ka Bili-bili looy.