Siga Pakaradjaan bay Pinalahil 4 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Yahiya pinakitahan siga pakaradjaan ni sulgaꞌ

¹ Pus meꞌ looy, takita ku na baw lawang sulgaꞌ bukaꞌ. Maka takale ku na baw balik suwara looy siꞌ ma meꞌ haddo tabuliꞌ mitsala niyaku, yuk na, “Dutai ko pitu, boꞌ nu pakitahan ku ga pakaradjaan ma talpaksaꞌ tinakdil ni sinōng.”

² Pag-anu siꞌ, sarunduun du lay ku pinakitahan pandapat meꞌ Rū Tuhan. Njawom pandapat ku, luu na ku ndooy ni sulgaꞌ. Pag ndaꞌ ku, luu ni awpan ku disu paningkoan mehe-dorogan meꞌ bantuk paningkoan sultan. Boꞌ luu disu ningkōꞌ ndooy.

³ Dagbos na ngillap meꞌ sahayaꞌ palmata jaspel ka palmata kalnilyan. Maka luu ngaliput paningkoan looy bangaw nginggat na meꞌ dagbos palmata emerald.

⁴ Maka luu gi ndooy ngaliput paningkoan mehe looy siꞌ duwampuꞌ-mpat paningkoan meꞌ paningkoan sultan du. Maka luu duwampuꞌ-mpat matatoa ningkōꞌ taꞌ ga paningkoan looy. Pamakoy da poteꞌ maka saliꞌ-saliꞌ luu ka karuna mmas taꞌ kōk da.

⁵ Maka luu na pin mangirat ka ngallub sampay guntu pōꞌ man paningkoan mehe looy ni tangngaan da. Luu gi ni awpan paningkoan looy pituꞌ paliyatut noleyab na, yana sipat ni Rū Tuhan ma ginalla Rū Sikapituꞌ.

⁶ Maka ndooy siꞌ ni awpan paningkoan looy, luu gi meꞌ bantuk dilawut tallak meꞌ sammin na. Ndooy siꞌ, luu gi ngaliput paningkoan looy mpat balnyawa lapat meꞌ mata pa awpan pa bukut.

⁷ Disu ingbas ka halimaw, disu ingbas ka sapiꞌ. Kuwan ilooy disu, ingbas luwa na ka manusiyaꞌ. Maka ilooy disu, ingbas ka belleꞌ lomeng.

⁸ Ga balnyawa looy siꞌ sika-mpat, saliꞌ-saliꞌ luu ka pikpik da nnom lapat meꞌ mata pa jawom pa poan. Bbuwatan da mudji Tuhan sangom-llaw. Yaꞌ luu hognaꞌ da halling, “Sutsiꞌ, sutsiꞌ, sutsiꞌ Tuhan Sangat Kawasa, yana Papuꞌ ma ndang luu na maruhuꞌ-ruhuꞌ ngabut batnaa sampay saumu ni sinōng.”

⁹ Wā sila mudji ka mantug sampay muwan pagsukuhan pa ilooy ma llum saumu-umu, yana Tuhan, ilooy ma ningkōꞌ taꞌ paningkoan looy marinta. Na sasang da meꞌ looy,

¹⁰ kuwan ga matatoa looy baw siꞌ sikaduwampuꞌ-mpat, bbuwatan da sujud sampay numba ilooy ma taꞌ paningkoan looy marinta, yana ilooy ma llum saumu-umu. Maka bbuwatan da ngannaꞌ siga karuna da ni awpan paningkoan looy sambayan da halling,

¹¹ “Kau ina Papuꞌ kami maka Tuhan kami. Tawop ko binuwanan pudji ka kabantugan mehe. Kau Sangat Kawasa batan kau bay mapayak mimon-mimon. Yaꞌ luu oy maka oy na bong saꞌ man kahandak nu.”