Siga Pakaradjaan bay Pinalahil 3 - Sabahagiꞌ Kitab Tawrat: Panagnaan ni Awwal Jaman maka Kitab Injil

Umanat si Isa pa mman baanan sukuꞌ na ndooy ni Saldis

¹ Pasunuꞌ, yuk na niyaku, “Nuwat gi ko pilay pa mman pa-mmean looy ma ngantanan baanan sukuꞌ ku ndooy ni Saldis. Bong ko nuwat, yuk nu meꞌ tuu, “Bitsala tuu lakka man ilooy ma luu niiya Rū Tuhan sampay ma ngantanan potean looy siꞌ sikapituꞌ. Yuk na meꞌ tuu, “Kaam ina, katoonan ku du meka jama māꞌ kaam baanan tapit pa Tuhan, sugaꞌ sabana na, sibuꞌ du kam ka matoy pa Tuhan.

² Sangkon matiꞌ na teꞌ kam. Patakkoun bi na pangando bi niyaku padpad luu gi takapin dangkitiꞌ, taggahaꞌ lungay na baw mintu labbasakayi. Batan ndaꞌ ku tangge-tingkōꞌ bi yaꞌ gi sikatuwaꞌ ka kahandak Tuhan.

³ Kannahun bi na umanat ma bay takale bi sampay bay kinapitsayaan meꞌ bi sibuwa. Daa takupan bi. Maka tawbatan bi na dusa bi. Bong ina kam yaꞌ matiꞌ, malaingkan kakuratan sina kam mintu ni katakka ku ngahukum manusiyaꞌ. Sibuꞌ du sina mintu karuha bi ka jama kakuratan meꞌ sugaru batan yaꞌ katoonan bi bong sumilan katakka ku.

⁴ Sugaꞌ yaꞌ du baw tu ga labbasakayi na kam susunan ku, batan luu gi du baw sina disu-disu nnaa ni Saldis masi sutsiꞌ. Dari ko ngawon, yaꞌ sila bay matamakan pamakoy da. Sila ina mintu kapahaboy niyaku ddas ka pamakoy poteꞌ sabap tawop sila niyaku.

⁵ “Na soysoy ina kanaalla mmeꞌ niyaku tanne-pasuꞌ, malaingkan pinapatukan du sina mintu pamakoy poteꞌ. Maka basta yaꞌ du sina pawman ku awon da man jawom Būk Kaallum man ngalista awon sagannap ma luu kasampulnaan nyawa da saumu-umu. Boꞌ na, mangaku du sina ku sila sukuꞌ ku ni awpan Mmaꞌ ku Tuhan ka ga malaikat na.

⁶ “Na kaam ma pakale, kannahun bi paayad halling Rū Tuhan ningkaam siga baanan sukuꞌ ku.”

Umanat si Isa pa mman baanan sukuꞌ na ndooy ni Piladelpiya

⁷ Pasunuꞌ, yuk Papuꞌ Isa niyaku, “Nuwat gi ko pilay pa mman pa-mmean looy ma ngantanan baanan sukuꞌ ku ndooy ni Piladelpiya. Bong ko nuwat, yuk nu meꞌ tuu, “Bitsala tuu lakka man iya, ilooy ma Mahasutsiꞌ ka intong saꞌ alang-alang. Iya ilay ngantanan kunsiꞌ lawang pa jawom pamarinta Tuhan meꞌ karuha kawasa-kapatut Sultan Daud bay ngantanan pamarinta na. Bong iya bay mukisan lawang looy, yaꞌ luu soy maka soy na katambo. Damikiyan bong ya bay nambo, yaꞌ du luu kabukis. Yuk na meꞌ tuu,

⁸ “Kaam ina, katoonan ku du yaꞌ meꞌ noy gaos bi, sugaꞌ masi gi du kam tattap ngasip ni bitsala ku. Maka tuktuk jama māꞌ sukuꞌ ta kam, yaꞌ du kam bay maylu. Sangkon lay na sina kam bukisan ku lawang ma yaꞌ luu katambo.

⁹ “Na luu siga jama nnaa ma mangaku bangsa Yahudi sila bahasa sukuꞌ Tuhan sila, sugaꞌ ngandustaꞌ jaꞌ sina sila. Ni sabana na, sukuꞌ Ibilis sila. Ndaun bi sa, pasujud ku du sina mintu sila ni battis bi. Maka bohoꞌ da ina mintu makibana na kaasean ta kam.

¹⁰ Pagka kam tattap mean bitsala ku nohoꞌ natasan kabinsanaan kalnaꞌ awon ku, agpangan ta sa kam mintu pag taabut luu katiksaan ni mimon kalahat-lahatan. Batan song takka na sina katiksaan mehe ma nuwayan iman mimon manusiyaꞌ taꞌ babaw junyaꞌ.

¹¹ “Indanan bi. Basta tapit na sina katakka ku. Sangkon kuwangkutan bi na pin kabanahan ma ndang luu na ntanan bi mari yaꞌ luu kataban karuna bi. Hati na, mari yaꞌ lungay tungbas ayad ma bay hinalliꞌ meꞌ Tuhan ningkaam.

¹² “Na soysoy ina kanaalla mmeꞌ niyaku tanne-pasuꞌ, malaingkan pabuwat ku ya meꞌ karuha tehang pagon ni lumaꞌ Tuhan batan tattap ndooy na ya saumu-umu. Maka sāpan ku ya ka awon Tuhan sampay awon daira Tuhan, yana Jerusalem ma bahau ma pinaduwai man sulgaꞌ lakka man Tuhan. Damikiyan sāpan ku du ya ka awon ku ma bahau.

¹³ “Na kaam ma pakale, kannahun bi paayad halling Rū Tuhan ningkaam siga baanan sukuꞌ ku.”

Umanat si Isa pa mman baanan sukuꞌ na ndooy ni Leyodisiya

¹⁴ Pasunuꞌ, yuk na niyaku, “Nuwat gi ko pilay pa mman pa-mmean looy ma ngantanan baanan sukuꞌ ku ndooy ni Leyodisiya. Bong ko nuwat, yuk nu meꞌ tuu, “Bitsala tuu lakka man ilooy ma ginalla Amin, yana ilooy ma kanaalla maka taasahan masampay kabanahan pasal Tuhan. Iya na sina man Tuhan bay mapayak mimon-mimon. Yuk na meꞌ tuu,

¹⁵ “Kaam ina, katoonan ku du kadarihan bi nnaa. Ndaꞌ ku, mmeꞌ-saꞌ kam mmeꞌ niyaku. Bong nnaꞌ ta pa boheꞌ ininum, yaꞌ baw kam pasuꞌ, yaꞌ baw kam tanne. Sugaꞌ kahandak ku, bong kam mmeꞌ niyaku, subay mmeꞌ banahan. Bong kam mmeꞌ-saꞌ mmeꞌ, gam na kam daa na mmeꞌ samasakali.

¹⁶ Batan meꞌ kaam ina tongaꞌ-tongaꞌ, tud sukang ku. Bong ibaratan inuman, tud kamaatan ku lassa sampay song luwaan ta na kam sina.

¹⁷ Kaam ina, baꞌ-bāꞌ bi dayahan na kam maka yaꞌ na luu kulang bi. Sugaꞌ bong pa Tuhan, miskin sina kam, kaluuy-luuy kam, buta kam, nantang kam, maka kasipin-sipin kam.

¹⁸ Sangkon sohoꞌ ta na kam malli niyaku mmas porol ma bay na llakkahan sakot na ka api supaya kam dayahan na ni mata Tuhan. Maka malli na kam pamakoy poteꞌ niyaku mari katambunan na kaiyaan bi nantang. Maka malli na kam niyaku uliꞌ man bi muusan mata bi mari kam ngita.

¹⁹ “Na soysoy ina kaasean ku, mastiꞌ saggong ku sampay adjal ku. Sangkon bong kam doman paintong, tawbatan bi na dusa bi, boꞌ pupusan bi na meꞌ bi mmeꞌ niyaku.

²⁰ “Aku itu meꞌ sapantun jama nangge ni poan lawang bi nugtug kawu-kawu binukisan. Na soysoy ina bay kale suwara ku sampay nohoꞌ aku paasok, malaingkan paasok du ku pa mman na sampay mmeꞌ na ku pasawu mangan niiya.

²¹ “Na soysoy ina kanaalla mmeꞌ niyaku tanne-pasuꞌ, malaingkan buwanan ku sina mintu kapatut ningkōꞌ ni bihing ku mmeꞌ marinta niyaku. Aku pun itu, lay du ku magkanaalla mmeꞌ ni Mmaꞌ ku tanne-pasuꞌ sampay luu na pin ku ningkōꞌ ni bihing na mmeꞌ marinta.

²² “Na kaam ma pakale, kannahun bi paayad halling Rū Tuhan ningkaam siga baanan sukuꞌ ku.”