Siga Pakaradjaan bay Pinalahil 22 - Sabahagiꞌ Kitab Tawrat: Panagnaan ni Awwal Jaman maka Kitab Injil

Sōng ma muwan kaallum

¹ Pag-anu siꞌ, pinakitahan na baw ku meꞌ malaikat looy disu sōng ma muwan kaallum saumu boheꞌ na. Sōng looy siꞌ nginggat na maka tallak meꞌ sammin na, pōꞌ man paningkoan Tuhan ka Bili-bili looy.

² Boꞌ ngaliyud ni tangngaꞌ lān daira looy. Ni sikaduwambilaꞌ sōng looy luu poon kayu ma muwan du kaallum saumu. Kayu looy siꞌ tu buwaꞌ buwan-buwan, min sapu-duwa njawom dantaun. Kuwan dawun na, pinakoy man ngulian jama ni mimon kabangsa-bangsahan.

³ Ni daira looy siꞌ, yaꞌ luu sumpaꞌ Tuhan ni oy maka oy na. Maka luu na du ndooy paningkoan Tuhan ka Bili-bili looy man da ningkōꞌ marinta. Siga sukuꞌ Tuhan pun sikamimon, luu na du ndooy numba iya

⁴ sampay takita da na luwa na. Boꞌ luu gi awon na bay sinuwatan ni tundun da.

⁵ Njawom daira looy siꞌ, yaꞌ luu sangom. San yaꞌ na luu palitaan siga sukuꞌ Tuhan atawa dantaꞌ mataallaw ndooy sabap luu du Papuꞌ da Tuhan mismu muwan dantaꞌ ninsila. Maka maglimbang na sila ka iya marinta saumu-umu.

Katapusan bitsala

⁶ Pag-anu, yuk malaikat looy siꞌ niyaku, “Na ilooy ilay siꞌ mimon ma bay bināꞌ ningkau, kanaalla jaꞌ silay maka taasahan. Maruhuꞌ ilay, siga kanabi-nabihan bay sohoꞌ Papuꞌ ta Tuhan malahil kabanahan. Pag batnaa, itu na baw ku, disu malaikat na, sohoꞌ na malahil ningkaam, siga sosohoan na, hāl ma deꞌ-dēꞌ na binakbul.”

⁷ Pag-anu siꞌ, yuk Papuꞌ Isa na baw, “Pakale kam. Tapit na sina katakka ku. Njawom supaat sina sagannap ma nganna siga tunaꞌ njawom kitab tuu.”

⁸ Na ilooy ilay siꞌ mimon ma bay tuntut ku, aku na mismu, yana si Yahiya, bay kale sampay bay ngita. Pus ku bay pinakitahan mimon pakaradjaan looy siꞌ meꞌ malaikat looy, ilooy ma magti ku sujud numba ni battis na.

⁹ Sugaꞌ yuk na niyaku, “Uy, daa ba. Tuhan jaꞌ sumbahun. Aku bitu ata Tuhan sadjaꞌ meꞌ kau du ka siga danganakan nu sukuꞌ Tuhan. Saliꞌ du kitabi ata Tuhan sadjaꞌ meꞌ karuha kanabi-nabihan ka mimon ma mogbogan isi kitab tuu.”

¹⁰ Maka yuk malaikat looy siꞌ niyaku, “Amay-amay daa sipukun siga tunaꞌ njawom kitab tuu, batan tapit na situ masa man da binakbul.

¹¹ Kuwan sagannap ma nabiat buwat kalaatan ka kasabuhan, pabiyahun bi na jaꞌ sila amu-amu maabak kalaatan da ka kasabuhan da. Kuwan sagannap ma buwat kaintongan, subay bogbogan da lagi kaintongan da. Damikiyan sagannap ma sutsiꞌ, subay du bogbogan da kasutsian da.”

¹² Pag-anu, yuk Papuꞌ Isa, “Iyakin kam batan tapit na sina katakka ku. Pag takka ku, tungbasan ku na sina mintu sikamimon manusiyaꞌ magpataꞌ ka bay pabuwatan da.

¹³ Aku itu Alpa ka Omega. Aku na situ ilooy ma duhuꞌ-duhuꞌ ka ilooy ma dambuli banahan. Aku yana panagnaan ka katapusan ni mimon-mimon.

¹⁴ “Njawom supaat sina sagannap ma mopoan juba da mari yaꞌ na luu tamak na, batan binuwanan sila kapatut pingkaꞌ man siga lawang paasok pa jawom daira looy. Maka binuwanan du sila kapatut mangan buwaꞌ kayu looy ma muwan kaallum ma yaꞌ luu katapusan na.

¹⁵ Sugaꞌ kuwan sagannap ma jahallis, meꞌ sapantun jama ma makoy ilmuꞌ seytan, ma magjina, ma mapatoy jama, ma numba siga tuhan-tuhan, ma tigiꞌ ngandustaꞌ ka ngalilu, yaꞌ dari paasok pa jawom daira looy.”

¹⁶ Yuk si Isa lagi, “Aku na mismu bay nohoꞌ malaikat ku malahil siga pakaradjaan tuu siꞌ ningkaam siga baanan sukuꞌ ku. Aku na situ panubuꞌ Sultan Daud ma bay tinunaꞌ njawom kitab. Maka aku itu ginalla Kababbasan Dantaꞌ.”

¹⁷ Pag-anu, yuk Rū Tuhan ka sagannap ma ginalla pangantin ma danda, yana mimon sukuꞌ Papuꞌ Isa, “Pitu na ko.” Damikiyan sagannap ma pakale ni bitsala njawom kitab tuu siꞌ halling du, “Pitu na ko.” Na soysoy tohoꞌ kallong bi, pitu na kam nginum boheꞌ ma muwan kaallum. Libre jaꞌ sina ni soysoy doman nginum.

¹⁸ Na kaam mimon ma bay kale ni siga bitsala ka ga tunaꞌ ni kitab tuu, bandaan ta kam: Amay-amay daa kam ngalabihan umanat na. Soysoy ina bay ngalabi, mastiꞌ pinakissahan jaꞌ sina meꞌ Tuhan siga balaꞌ ma bay sinabbut njawom kitab tuu.

¹⁹ Damikiyan, bong luu bay ngulangan siga bitsala atawa ga tunaꞌ ni kitab tuu, mastiꞌ kinaddoan jaꞌ sina meꞌ Tuhan sukuꞌ na ni poon kayu looy ma muwan kaallum. Maka kinaddoan du sukuꞌ na ni daira sutsiꞌ looy.

Katapusan bitsala si Yahiya

²⁰ Na mimon pakaradjaan looy ilay siꞌ ma bay pinalahil niyaku, Papuꞌ Isa mismu māꞌ mastiꞌ bana sadjaꞌ. Sampay bay gi ya halling, “Yaꞌ na hallom, pilu na du ku.” Pag tampung ku, “Ohoꞌ Papuꞌ Isa. Pitu na ko deꞌ-dēꞌ!”

²¹ Dambuli man inaa, barakat man Papuꞌ Isa ningkaam sikamimon. Wassalam