Siga Pakaradjaan bay Pinalahil 21 - Sabahagiꞌ Kitab Tawrat: Panagnaan ni Awwal Jaman maka Kitab Injil

Jerusalem bahau

¹ Pag-anu siꞌ, luu na baw takita ku langit bahau ka junyaꞌ bahau, batan langit maruhuꞌ ka junyaꞌ maruhuꞌ lay na lanyap. Dilawut pun, yaꞌ na du luu.

² Maka luu gi takita ku duwai man sulgaꞌ daira sutsiꞌ, yana Jerusalem bahau lakka man Tuhan. Daira looy siꞌ tud dorogan. Bong nnaꞌ ta pa danda, subay ga disu pangantin danda ayad gamis na. Maka lakkop na ya meꞌ mmas man na magpalingkat banahan pag taabut na kinawin ka pangantin ma lalla.

³ Pag-anu siꞌ, kale na baw ku suwara haddo lakka man tagan paningkoan looy, yuk na, “Batnaa tu magdambuwaꞌ na Tuhan ka manusiyaꞌ. Batan patannaan na sibuꞌ du ka ninsila. Batnaa sukuꞌ na na sila maka iya na Tuhan da ma tattap lungbid ka sila.

⁴ Sagannap ma tumabeꞌ njawom daira looy, pinuusan na sina meꞌ Tuhan mimon boheꞌ mata da. Yaꞌ na luu kinasusahan ndooy. Kapatoy pun, ya na du luu. Damikiyan dukka maka tangis sampay paddi, yaꞌ na du luu ndooy, batan siga pakaradjaan maruhuꞌ meꞌ looy lay na lanyap.”

⁵ Pag-anu siꞌ, yuk ilooy ma ningkōꞌ ni paningkoan mehe looy siꞌ, “Batnaa, pabahauwan ku na situ mimon-mimon!” Maka yuk na niyaku, “Suwatan nu mimon ma bay takale nu siꞌ batan bitsala looy ilay siꞌ kanaalla maka taasahan.”

⁶ Maka yuk na lagi, “Magjatu na situ mimon ma bay ginantaꞌ meꞌ ku. Aku itu Alpa ka Omega, yana panagnaan ka katapusan mimon-mimon. Soysoy tohoꞌ kallong na, painum ku boheꞌ man poon boheꞌ looy ma muwan kaallum ma yaꞌ luu katapusan na. Boꞌ boheꞌ looy ilay libre jaꞌ, san yaꞌ na luu bayad na.

⁷ Na sagannap ma kanaalla mmeꞌ niyaku tanne-pasuꞌ, pusakahan ku ka ilooy mimon ma bay sabbut ku siꞌ. Aku na Tuhan da maka anak ku na sila.

⁸ Sugaꞌ kuwan sagannap ma nuwak aku sabap tawu sila bininsanaꞌ sampay sagannap ma yaꞌ kuhi pitsayaꞌ niyaku, saꞌ sila sukuꞌ ku. Sila ina ka sagannap ma buwat kasabuhan, ma mapatoy jama, ma magjina, ma makoy ilmuꞌ seytan, ma numba siga tuhan-tuhan, sampay mimon ma ngandustaꞌ, ilooy du sukuꞌ da yana danaw looy ma pannoꞌ leꞌ api ka manilang ngereꞌ. Boꞌ ilooy na silay inawnan kapatoy ni kaduwa na.”

⁹ Pag-anu siꞌ, luu na baw pasōng disu ni siga malaikat looy sikapituꞌ ma bay numpahan isi pinggan da pannoꞌ leꞌ katapusan balaꞌ looy siꞌ sikapituꞌ, yuk na niyaku, “Tu ko, pakitahan ta doꞌ ko pangantin ma danda ma song kinawin ka Bili-bili looy.”

¹⁰ Dari lay ku pinakitahan pandapat meꞌ Rū Tuhan. Njawom pandapat ku, lay na ku binoo meꞌ malaikat looy pa taꞌ punsak punu mehe-langkaw. Ndooy siꞌ, lay na ku pakitahan na daira sutsiꞌ looy, yana Jerusalem bahau duwai man sulgaꞌ lakka man Tuhan.

¹¹ Daira looy siꞌ ninag na ga meꞌ sahayaꞌ Tuhan. Maka nginggat na subay ga palmata jaspel ma tallak meꞌ karuha sammin na.

¹² Kuwan kutaꞌ ma ngaliput daira looy, tud langkaw boꞌ kapa lagi. Eka lawang na sapu-duwa, maka saliꞌ-saliꞌ ddas ka malaikat na nganjaga. Ni siga lawang looy siꞌ, saliꞌ-saliꞌ bay sinuwatan ka awon anak Nabi Yaꞌkub sikasapu-duwa, yana poonan bangsa Israil.

¹³ Lawang looy siꞌ sikasapu-duwa, tallu awop pa mataallaw, tallu awop pa uttaraꞌ, tallu awop pa sātan, maka tallu awop pa saddopan.

¹⁴ Pananggehan kutaꞌ daira looy siꞌ batu mehe, sapu-duwa eka na. Boꞌ siga batu looy siꞌ, saliꞌ-saliꞌ bay sinuwatan ka awon siga rasul sikasapu-duwa ma bay pineneꞌ meꞌ Bili-bili looy.

¹⁵ Kuwan malaikat looy siꞌ ma bay mitsala niyaku, luu ntanan na sukuran mmas meꞌ hantang batang kayu-kayu man na nukud daira looy ka kutaꞌ na sampay ga lawang na.

¹⁶ Daira looy siꞌ masagiꞌ. Sibuꞌ du tahaꞌ na ka lambu na. Pag sukud malaikat looy, tahaꞌ na ka lambu na saliꞌ-saliꞌ duwa libu mpat hatus batu. Langkaw na pun meꞌ looy du.

¹⁷ Pag-anu, lay na baw sukud malaikat looy kutaꞌ ma ngaliput daira looy. Langkaw na ga nnompuꞌ-liman meter. Sukuran ma bay pinakoy meꞌ malaikat looy sibuꞌ du ka sukuran manusiyaꞌ.

¹⁸ Kutaꞌ looy siꞌ bay pinabuwat ka palmata jaspel. Kuwan daira looy, labbasakayi lay pinabuwat ka mmas porol banahan, boꞌ tallak meꞌ sammin na.

¹⁹ Kuwan siga batu pananggehan kutaꞌ looy, lakkop meꞌ jinisan palmata hagaan. Ni batu looy ma duhuꞌ, lay inari-arihan ka palmata jaspel. Ni batu ni kaduwa na, lay inari-arihan ka palmata sapayil. Batu ni katallu na yana palmata salsidoni, ka-mpat na yana palmata emerald,

²⁰ kalima na, yana palmata oniks, ka-nnom na, yana palmata kalnilyan, kapituꞌ na, yana palmata krisalayt, kawawuꞌ na, yana palmata beril, kasiyam na, yana palmata topaz, kasapū na, yana palmata krisopres, kasapu-dambuwaꞌ na, yana palmata jasin. Kuwan batu looy ni kasapu-duwa, yana palmata amatis man bay ngari-ngarihan iya.

²¹ Kuwan ga lawang kutaꞌ looy siꞌ sikasapu-duwa, mutsaꞌ mehe jaꞌ saliꞌ-saliꞌ, njawom disu lawang, disu mutsaꞌ. Maka lān daira looy mmas porol, tallak meꞌ sammin na.

²² Bong langga, yaꞌ ku bay ngita ni daira looy batan ndang luu na pin ndooy Papuꞌ tabi Tuhan Sangat Kawasa ka Bili-bili looy. Dari ni pag-awpan da na mismu man manusiyaꞌ numba.

²³ Maka ni daira looy, san yaꞌ na luu mataallaw atawa buwan, batan ndang luu na sahayaꞌ Tuhan ninag ndooy. Maka Bili-bili pun yana sūꞌ ni daira looy.

²⁴ Mimon kabangsa-bangsahan ni junyaꞌ ngita sabapan dantaꞌ pōꞌ man sinag daira looy. Maka siga sultan man sikaliput junyaꞌ moo altaꞌ da pa jawom daira looy.

²⁵ Siga lawang kutaꞌ daira looy siꞌ wā bukaꞌ. Niyaꞌ luu masa da tinambo batan yaꞌ luu sangom ndooy.

²⁶ Mimon kabantugan ka altaꞌ kabangsa-bangsahan luu na binoo meꞌ jama pa jawom daira looy.

²⁷ Sugaꞌ oy-oy jaꞌ kalalamaan ma katamak ni manusiyaꞌ, saumu yaꞌ dari paasok pa jawom daira looy. Damikiyan, soysoy buwat kasabuhan atawa ngandustaꞌ yaꞌ du dari paasok. Ilooy du kapaasok pilay yana sagannap ma bay tasuwatan awon da njawom Būk Kaallum. Ilooy ilay siꞌ yana Būk Bili-bili looy man ngalista awon sagannap ma luu kaallum da saumu-umu njawom okoman Tuhan.