Siga Pakaradjaan bay Pinalahil 20 - Sabahagiꞌ Kitab Tawrat: Panagnaan ni Awwal Jaman maka Kitab Injil

Naga pinusas njawom dalibu taun

¹ Pag-anu, ngita na baw ku disu malaikat duwai pōꞌ man sulgaꞌ mengket karina mehe. Maka luu gi ntanan na kunsiꞌ tangkop lowang tangob looy ma yaꞌ mag-ngkoran lawom na.

^2-3 Pag-anu siꞌ, lay sungkuban na naga looy siꞌ, yana sō looy ma ndang luu ni panagnaan awwal jaman, yana Ibilis, panghuluꞌ seytan. Pag-anu, boꞌ na pinusas meꞌ malaikat looy sampay hiniyakan pa jawom lowang tangob looy. Pag lupus, lay tangkop malaikat looy lowang looy, boꞌ lay lagi kinunsiꞌ patakkoꞌ supaya yaꞌ na luu dapat naga looy pōꞌ magsian kabangsa-bangsahan. Naga looy siꞌ lay katimpuhan tinahan ndooy njawom dalibu taun. Paddus jaꞌ timpu na, pinōꞌ du ya sugaꞌ yaꞌ du humallom.

⁴ Pag-anu siꞌ, ngita na baw ku siga paningkoan ga sultan. Kuwan siga jama ma ningkōꞌ ndooy, lay kabuwanan kapatut ngahukum. Maka luu gi bay takita ku tabeꞌ ninsila siga nyawa sagannap ma bay pinonggolan kallong da sabap meꞌ da bay masaplag pasal si Isa Almasi ka palman Tuhan. Yaꞌ sila bay pingkaꞌ numba sattuwa looy atawa jama-jama bay pinabuwat ni limbagan na. Damikiyan, yaꞌ du sila bay kuhi sinapan ka sāp sattuwa looy ni tundun da atawa ni tangan da. Dari llum na sila pabalik sampay lay na tumabeꞌ ni Almasi magsultan njawom dalibu taun.

^5-6 Ga jama looy siꞌ yana baanan manusiyaꞌ ma duhuꞌ pinakallum pabalik. Njawom supaat sila maka initung meꞌ Tuhan sutsiꞌ. Yaꞌ sila ngissahan kapatoy ni kaduwa na, yana kamalasahiyan njawom danaw looy ma pannoꞌ leꞌ api. Gam pin lay gi sila binuwat baanan imam ma numba Tuhan ka Almasi. Boꞌ na, tumabeꞌ gi sila ni Almasi magsultan njawom dalibu taun looy. Kuwan manusiyaꞌ ilooy kasohean ma lay na matoy, noy paddus na dalibu taun looy boꞌ da pinakallum.

Kasongan Ibilis ni katapusan

⁷ Na pag mintu paddus dalibu taun looy, pinōꞌ na du silay Ibilis man jawom pilisu na yana lowang tangob looy.

⁸ Pag pōꞌ na ina mintu, ngalataan sika-mpat pidju alam ngandupang jama ni mimon kabangsa-bangsahan pabalik. Inoyo-oyohan sila meꞌ na nohoꞌ kumpo-kumpo magtaayun ngalān siga sukuꞌ Tuhan. Boꞌ eka da ina mintu subay ga ungus ni tapiyan. Gallahan ninsila Gog ka Magog.

⁹ Pag taabut da ina mintu ngalān, palintas sina sila ni kaluhān junyaꞌ boꞌ da ngappung daira ma kinasengan meꞌ Tuhan man siga sukuꞌ na maglahat. Sugaꞌ yaꞌ du luu dapat da batan kalabuan sina sila api man taꞌ langit sampay man da na katis ampud.

¹⁰ Kuwan Ibilis ma bay ngoyo-ngoyohan sila, hiniyakan na sina pa jawom danaw looy ma pannoꞌ leꞌ api ka manilang ngereꞌ. Boꞌ ndooy na ya tiniksaꞌ llaw-sangom saumu-umu dambuwaꞌ ka sattuwa looy ka nabi palsu looy ma ndang bay duhuꞌ hiniyakan pilay.

Llaw hukuman Tuhan

¹¹ Pag-anu siꞌ, ngita na baw ku disu paningkoan sultan, tud mehe ka poteꞌ. Maka luu na du takita ku ilooy ma ningkōꞌ ndooy. Kuwan junyaꞌ ka langit, lay na lanyap man pag-awpan na sampay yaꞌ na takita pabalik.

^12-13 Pag-anu siꞌ, takita ku na baw mimon manusiyaꞌ ma bay matoy, balkanan maka saꞌ balkanan, nangge ni awpan paningkoan looy. Mimon manusiyaꞌ ma bay matoy pa dile pa dilawut, yana mimon manusiyaꞌ ma bay njawom tahanan jama matoy, luu na nangge ndooy ni awpan paningkoan looy. Dari siꞌ, inungkad na Būk Kaallum man bay ngalista awon sagannap ma luu kasampulnaan nyawa da saumu-umu. Maka lay na du inungkad siga būk man bay nuwatan mimon kawul-piil manusiyaꞌ mahap-maat halloman da bay taꞌ junyaꞌ. Sampay lay na binotangan hukuman ga jama looy siꞌ labbasakayi pinagpataꞌ ka bay pabuwatan da jawom siga būk looy siꞌ.

^14-15 Dari sagannap ma yaꞌ bay tasuwat awon da njawom Būk Kaallum, lay na hiniyakan pa jawom danaw looy ma pannoꞌ leꞌ api. Na ilooy ilay siꞌ inawnan kapatoy ni kaduwa na. Kapatoy pun sampay tahanan jama matoy, lai na du hiniyakan pa jawom danaw looy. Dari labba mandooy ilay mintu, yaꞌ na luu kapatoy maka tahanan jama matoy.