Siga Pakaradjaan bay Pinalahil 2 - Sabahagiꞌ Kitab Tawrat: Panagnaan ni Awwal Jaman maka Kitab Injil

Umanat si Isa pa mman baanan sukuꞌ na ndooy ni Epesus

¹ Pag-anu siꞌ, yuk na lagi niyaku, “Nuwat ko pilay pa mman pa-mmean looy ma ngantanan baanan sukuꞌ ku ndooy ni Epesus. Bong ko nuwat, yuk nu meꞌ tuu, “Bitsala tuu lakka man ilooy ma ngantanan siga potean sikapituꞌ ni kawnan na sampay ma lumān ni tangngaan pananggehan palitaan mmas sikapituꞌ. Yuk na meꞌ tuu,

² “Kaam ina, katoonan ku du kadarihan bi nnaa. Ndaꞌ ku, basag kam maghulas-sangsāꞌ kalnaꞌ awon ku sampay basag kam natasan jinisan kamalasahiyan. Maka katoonan ku du nulang kam jama maat. Sampay lay na tatongkad bi niyat atay siga jama nnaa ma buwat dī da rasul ku, maka tabistu bi na ngandustaꞌ jaꞌ sila.

³ Damikiyan, katoonan ku du basag kam natasan jinisan laug kalnaꞌ awon ku. Maka ndaꞌ ku, yaꞌ kam jamu nanggehan aku.

⁴ Sugaꞌ luu gi du baw tu disu man ku kasallahan ningkaam. Aseꞌ bi niyaku lay na pakulang, saꞌ na meꞌ maruhuꞌ jaman bi bohoꞌ pitsayaꞌ niyaku.

⁵ Kamura-murahan tabista bi du ehe pagbiddaan bay aseꞌ bi niyaku maruhuꞌ maka batnaa, boꞌ bi nawbat. Bong ina kam yaꞌ nawbat, pilu du sina ku, boꞌ lakkahan ku palitaan bi ddas ka pananggehan na.

⁶ Sugaꞌ luu du baw tu sanglit ku ningkaam sabap meꞌ aku du kam lammis ni kalaatan siga jama ma mmeꞌ ni tōꞌ ga si Nikolay.

⁷ “Na kaam ma pakale, kannahun bi paayad halling Rū Tuhan ningkaam siga baanan sukuꞌ ku. “Soysoy ina kanaalla mmeꞌ niyaku tanne-pasuꞌ, malaingkan buwanan ku ya kapatut mangan buwaꞌ kayu looy ma muwan kaallum ma yaꞌ luu katapusan na ndooy ni sulgaꞌ.”

Umanat si Isa pa mman baanan sukuꞌ na ndooy ni Ismirna

⁸ Pasunuꞌ, yuk na niyaku, “Nuwat gi ko pilay pa mman pa-mmean looy ma ngantanan baanan sukuꞌ ku ndooy ni Ismirna. Bong ko nuwat, yuk nu meꞌ tuu, “Bitsala tuu lakka man ilooy ma panagnaan ka katapusan ni mimon-mimon, yana ilooy ma bay pingkaꞌ matoy boꞌ lay du llum pabalik. Yuk na meꞌ tuu,

⁹ “Kaam ina, katoonan ku du kabinsanaan njataꞌ bi sampay kamiskinan bi. Sugaꞌ ni sabana na, dayahan kam. Tasayu ku du pitna inuwan njataꞌ bi meꞌ siga Yahudi ma nulang kaam. Sila ina mangaku sukuꞌ Tuhan, mingkan kumpulan sukuꞌ Ibilis sila.

¹⁰ Na mari katoonan bi, luu gi sina mintu kabinsanaan mehe tuwaꞌ njataꞌ bi. Kasohean kam ina tajīl man kapandoyan Ibilis. Sinuwayan sina mintu pangando bi niyaku. Njawom sapū ngallaw yaꞌ sina luu hantiꞌ laug njataꞌ bi. Sugaꞌ daa kam tawu. Magkanaalla jaꞌ kam mmeꞌ niyaku san gi man bi matoy, boꞌ bi sa tungbasan ku ka kaallum ma yaꞌ luu katapusan na.

¹¹ “Na kaam ma pakale, kannahun bi paayad halling Rū Tuhan ningkaam siga baanan sukuꞌ ku. “Soysoy ina kanaalla mmeꞌ niyaku tanne-pasuꞌ, malaingkan niyaꞌ na ya lumingkaꞌ njawom katiksaan nalkaꞌ ma ginalla kapatoy ni kaduwa.”

Umanat si Isa pa mman baanan sukuꞌ na ndooy ni Pelgamam

¹² Pasunuꞌ, yuk na niyaku, “Nuwat gi ko pilay pa mman pa-mmean looy ma ngantanan baanan sukuꞌ ku ndooy ni Pelgamam. Bong ko nuwat, yuk nu meꞌ tuu, “Bitsala tuu lakka man ilooy ma dapu kataliꞌ tawom sikaduwambilaꞌ mata na. Yuk na meꞌ tuu,

¹³ “Kaam ina, katoonan ku du maglahat kam ni lahat ma pinagbayaan meꞌ Ibilis. Sugaꞌ tumatandaꞌ masi gi du baw kam tattap mmeꞌ niyaku. Yaꞌ du bay labbahan bi pangando bi niyaku san lay na tasakup bi si Antipas, yana sosohoan ku ma kanaalla, bay pinapatoy nnaa ni daira bi ma kinomkoman meꞌ Ibilis.

¹⁴ Sugaꞌ luu gi du baw ina man ku kasallahan ningkaam. Kasohean kam nnaa, bbuwatan bi ngikut akka si Balaam mattoꞌ ma bay magpandoyan Sultan Balak bong pooy meꞌ na magsian bangsa Israil. Sabapan palbiatan si Balaam, lay na ga bay taboo-boo siga sukuꞌ Tuhan mangan sumbalian ma bay pingkaꞌ sinongan pa siga tuhan-tuhan, boꞌ lay gi sila taboo-boo magjina.

¹⁵ Pag batnaa, sampay kaam kasohean nnaa, sibuꞌ du karuha bi ka si Balaam magsian sukuꞌ Tuhan, yana kaam ma mmeꞌ ni tōꞌ ga si Nikolay.

¹⁶ Sangkon tawbatan bi na dusa bi. Bong ina kam yaꞌ nawbat, pilu du sina ku deꞌ-dēꞌ monoꞌ kaam ka kataliꞌ ma pōꞌ man behe ku.

¹⁷ “Na kaam ma pakale, kannahun bi paayad halling Rū Tuhan ningkaam siga baanan sukuꞌ ku. “Na soysoy ina kanaalla mmeꞌ niyaku tanne-pasuꞌ, malaingkan buwanan ku ya kinakan man sulgaꞌ inawnan manna. Maka buwanan ku ya disu batu poteꞌ man bay nuwatan awon na bahau ma yaꞌ luu toon sarī man iya ma binuwanan.”

Umanat si Isa pa mman baanan sukuꞌ na ndooy ni Tayatira

¹⁸ Pasunuꞌ, yuk na niyaku, “Nuwat gi ko pilay pa mman pa-mmean looy ma ngantanan baanan sukuꞌ ku ndooy ni Tayatira. Bong ko nuwat, yuk nu meꞌ tuu, “Bitsala tuu lakka man Anak Tuhan. Mata na meꞌ dagbos api noleyab ka battis na subay ga tumbagaꞌ porol ma bay pinangiin. Yuk na meꞌ tuu,

¹⁹ “Kaam ina, katoonan ku du basag aseꞌ bi ka pangando bi niyaku. Maka basag kam maghulas-sangsāꞌ kalnaꞌ awon ku sampay natasan jinisan kamalasahiyan. Maka ndaꞌ ku, basag gi kam batnaa man maruhuꞌ buwat kaayaran.

²⁰ Sugaꞌ luu gi du baw situ man ku kasallahan ningkaam. Bbuwatan bi mabiya si Jesebel magsian sagannap ma ngisbat aku. Iya ilay danda jahallis, bahasa iya tukang masampay palman Tuhan. Boꞌ ko, njawom tōꞌ na, yaꞌ du konoꞌ dari hāl na san jama buwat kajinahan atawa pun mangan sumbalian ma bay pingkaꞌ sinongan pa siga tuhan-tuhan.

²¹ Hallom na situ ku bay paagad-agad, kawu-kawu tawbatan danda looy na kajinahan na, sugaꞌ yaꞌ du ya kuhi nawbat.

²² Sangkon buwanan ku na sina ya saki paya gantaꞌ man na yaꞌ na kapabangun man taꞌ bangkuꞌ na. Kuwan sagannap ma bay kapagjina ka iya, bong yaꞌ tawbatan da bay kasabuhan da ka danda looy, malaingkan patannaan ku du sila kamalasahiyan mehe.

²³ Mimon ma mmeꞌ meꞌ uwahan na, papatoy ku du sina. Dari pag mintu meꞌ looy, tabista na sina meꞌ mimon baanan sukuꞌ ku, mastiꞌ tasayu ku jaꞌ bong oy njawom atay manusiyaꞌ ka pamiki da. Maka aku du nungbasan sila saliꞌ-saliꞌ magbēꞌ ka pabuwatan da mahap-maat.

²⁴ “Na kasohean kaam nnaa ni Tayatira yaꞌ bay ngikut tōꞌ danda looy. Yaꞌ kam bay mmeꞌ ni ilooy ma pinagbahasa meꞌ kasohean ilmuꞌ lawom. Boꞌ ko, ni sabana na, lakka man Ibilis. Dari ituu meꞌ ku ka kaam: Yaꞌ du baw tu ku doman mabognahan kaam ka jinisan panohoan.

²⁵ Basta daa jaꞌ labbahan bi ntan ma ndang luu na bay bogbogan bi ngabut sampay ku pabeleng ni sinōng.

^26-27 “Na soysoy ina kanaalla mmeꞌ niyaku tanne-pasuꞌ maka amu-amu buwat kahandak ku ngabut sampay pa katapusan, malaingkan buwanan ku sila kapatut meꞌ ilooy ma bay dean Mmaꞌ ku niyaku. Sila na marintahan kabangsa-bangsahan. Boꞌ tud adil sina mintu meꞌ da marinta. Soysoy ina nulang sila, hinansu meꞌ saparati pinggan pinassaꞌ ka takaka bassi.

²⁸ Maka dean ku na du sila Kababbasan.

²⁹ “Na kaam ma pakale, kannahun bi paayad halling Rū Tuhan ni siga baanan sukuꞌ ku.”