Siga Pakaradjaan bay Pinalahil 19 - Sabahagiꞌ Kitab Tawrat: Panagnaan ni Awwal Jaman maka Kitab Injil

Kagakan ni sulgaꞌ sabapan kabinasahan Babilon

¹ Pus meꞌ looy, luu na baw takale ku siga suwara manusiyaꞌ sakiyan ni sulgaꞌ ngahowap, yuk da, “Pudji mehe pa Tuhan tabi! Iya du kasalamatan tabi. Biddaꞌ na ehe kawasa na. Kabantugan na yaꞌ luu sibuꞌ sabanding na.

² Pudji tabi ya sabap intong sadjaꞌ mimon hukuman na, yaꞌ luu salla na. Lay na labuan na hukuman Babilon, puta looy ma tanyag, ma bay moo-moo manusiyaꞌ ni sikaliput junyaꞌ mmeꞌ ni kasabuhan na. Lay na ya hinisab meꞌ Tuhan sabap meꞌ na bay mapatoy siga sosohoan na.”

³ Pag-anu siꞌ, bbalik na baw ngahowap ga jama looy siꞌ ni sulgaꞌ, yuk da, “Pudji mehe pa Tuhan! Humbu daira looy tutung yaꞌ na luu hantiꞌ na dutai saumu.”

⁴ Kuwan ga matatoa looy baw siꞌ tu sikaduwampuꞌ-mpat ka ga balnyawa looy siꞌ sika-mpat, pag lay jaꞌ takale da meꞌ looy siꞌ, ilooy ma lay na sila sujud numba Tuhan ma ningkōꞌ taꞌ paningkoan na sambayan da halling, “Amin! Pudji mehe ningkau Tuhan!”

⁵ Pag-anu siꞌ, luu na baw suwara pōꞌ man tagan paningkoan Tuhan, yuk na, “Kaam, siga sosohoan Tuhan, yana kaam ma ngisbat iya, balkanan saꞌ balkanan, pudjihun bi du Tuhan tabi.”

⁶ Pag-anu siꞌ, luu na baw takale ku meꞌ halling manusiyaꞌ sakiyan ngahowap, subay ga halling sōng mehe tumpa man taꞌ pampang ngallub atawa meꞌ halling guntu nagubtub pabasag, yuk da, “Pudji mehe pa Tuhan Sangat Kawasa batan iya Papuꞌ tabi magbayaꞌ ni mimon-mimon!

⁷ Subay mehe meꞌ tabi gāk. Maka subay tabi muwan kabantugan mehe niiya. Batan taabut na llaw man ilooy ma ginalla Bili-bili kinawin. Kuwan pangantin ma danda, lay na nakapan dī na mari tahan da kinawin.

⁸ Pakayan bay ndean ni pangantin ma danda kakanaꞌ ayad banahan, poteꞌ malaas na, yaꞌ luu tamak na.” Na kakanaꞌ poteꞌ ma yaꞌ luu tamak na tuwaꞌ pa mimon kaintongan siga sukuꞌ Tuhan.

⁹ Pag-anu siꞌ, yuk disu malaikat niyaku, “Suwatan nu ituu: Njawom supaat sina soysoy bay kinaddoꞌ nohoꞌ ngaluruk pangawinan Bili-bili looy.” Maka yuk na lagi, “Bitsala tuu itu siꞌ, mastiꞌ bana jaꞌ batan lakka man Tuhan.”

¹⁰ Pag takale ku meꞌ looy, ilooy ma lay na ku sujud ni battis na numba iya. Sugaꞌ yuk na, “Daa ko ba buwat meꞌ naa. Tuhan jaꞌ sumbahun. Aku bitu ata Tuhan sadjaꞌ meꞌ kaam du ka siga danganakan nu ma ngantanan umanat Papuꞌ Isa. Boꞌ umanat looy ilay ma bay pinasampay meꞌ Papuꞌ Isa yana kabanahan ma bay tinunaꞌ meꞌ kanabi-nabihan mattoꞌ.”

Si Isa Almasi takita taꞌ kuraꞌ poteꞌ

¹¹ Pus meꞌ looy siꞌ, takita ku na langit bukaꞌ maka luu ndooy kuraꞌ poteꞌ. Ilooy siꞌ ma bakuraꞌ njataꞌ na inawnan Kanaalla ka Bonto. Intong jaꞌ hukuman na, maka bila ya monoꞌ banta na, mastiꞌ intong jaꞌ du sabapan na.

¹² Mata na, meꞌ api noleyab maka meka karuna taꞌ kōk na. Boꞌ luu gi awon bay sinuwatan taꞌ tundun na, sugaꞌ yaꞌ luu toon bong oy hatiyan na sarī man dī na.

¹³ Pamakoy na juba bay tinalloban njawom lahaꞌ, maka meꞌ nganggalla iya, Palman Tuhan.

¹⁴ Ni dambulihan na luu patuhut baanan sundalu man sulgaꞌ saliꞌ-saliꞌ taꞌ siga kuraꞌ poteꞌ du. Maka pamakoy da sikamimon kakanaꞌ ayad banahan, poteꞌ malaas na ma yaꞌ luu tamak na.

¹⁵ Kuwan ilooy siꞌ ma ginalla Palman Tuhan, luu ka kataliꞌ tawom pōꞌ man jawom behe na man na ngalān sagannap ma yaꞌ ngahasi iya ni mimon kabangsa-bangsahan. Sagannap ma nulang iya, mastiꞌ pinakaat jaꞌ meꞌ na meꞌ karuha jama kinaka ka bassi. Sibuꞌ du sina mintu karuha da ka siga pungutan anggul giniok-giok sampay pinaggaꞌ. Batan pakissahan na na sila duga ka mulkaꞌ Tuhan Sangat Kawasa yana hisab ni siga dusa da.

¹⁶ Na ni juba ilooy siꞌ ma ginalla Palman Tuhan, luu bay sinuwatan ni tagan paa na meꞌ tuu: “Sultan ninggi taꞌ mimon sultan maka Papuꞌ ninggi taꞌ mimon papuꞌ.”

¹⁷ Pag-anu, ngita na baw ku disu malaikat nangge taꞌ mataallaw. Bbuwatan na siꞌ nginganan sikamimon manuk-manuk ma mangan sumpatoy, yuk na, “Kumpo kam pitu. Luu na situ ntuu makanan meka sinaddiya meꞌ Tuhan ningkaam.

¹⁸ Pitu na kam, boꞌ kakanun bi na isi mayat banta Tuhan sikamimon. Kakanun bi na isi mayat siga sultan ka ga sundalu da ka siga komandel da sampay isi siga kuraꞌ ddas ka jama ma bay makuraan sila. Kakanun bi na isi ata, saꞌ ata, jama balkanan saꞌ balkanan.”

¹⁹ Pag-anu, takita ku na baw sattuwa looy siꞌ ma bay pōꞌ man dilawut. Maka luu mmeꞌ niiya siga sultan ni sikaliput junyaꞌ ddas ka ga baanan sundalu da. Bbuwatan da kumpo-kumpo sibonoꞌ ka ilooy ma bakuraꞌ taꞌ kuraꞌ poteꞌ ka ga baanan sundalu na.

²⁰ Sugaꞌ yaꞌ bay luu dapat sattuwa looy sabap lay ya tasungkub haboy ka nabi palsu looy ma bay mōꞌ siga sipat kahaylan-haylan kalnaꞌ sattuwa looy. Sabapan siga sipat bay pōꞌ na, lay takoleꞌ na inakkahan sagannap ma bay sinapan ka sāp sattuwa looy, sampay mimon ma bay numba jama-jama looy ma bay pinabuwat ni limbagan na. Dari siꞌ, hisab ni sattuwa looy ka nabi palsu looy, lay hiniyakan, kaallum-llum da, pa jawom danaw looy ma pannoꞌ leꞌ api ka manilang ngereꞌ.

²¹ Kuwan ga baanan soheꞌ da, lay pinapatoy ka kataliꞌ ma pōꞌ man behe ilooy ma bakuraꞌ taꞌ kuraꞌ poteꞌ looy siꞌ. Dari baanan ga manuk-manuk looy siꞌ, lay na pilay magpakaruwan mangan siga mayat ndooy.