Siga Pakaradjaan bay Pinalahil 18 - Sabahagiꞌ Kitab Tawrat: Panagnaan ni Awwal Jaman maka Kitab Injil

Binasa Babilon

¹ Pus meꞌ looy, ngita na baw ku disu malaikat mehe kawasa-kapatut na duwai man sulgaꞌ. Ni kabasag sahayaꞌ na, dantaꞌ na ga ni sikaliput junyaꞌ.

² Bbuwatan na ngahowap, yuk na, “Binasa na Babilon! Binasa na daira tanyag looy! Lai na dari katattogan jinisan seytan ka siga sattuwa haram ma kasipin-sipin. Sampay pinagsangan na ga leꞌ mimon manuk-manuk ma haram.

³ Kon na binasa na sabap iya bay moo-moo manusiyaꞌ ni mimon kabangsa-bangsahan buwat jinisan kalaatan. Babilon ina tadalil pa disu puta ma bay moo-moo jama nginum alak na supaya sila mmeꞌ meꞌ uwahan na magjina. Sampay siga sultan ni sikaliput junyaꞌ, bay du mmeꞌ magjina ka iya. Ni kamulakab napsu danda looy, yaꞌ na taambat altaꞌ bay balli na para dī na. Sangkon lay na magkadayahan siga tukang maglilitu ni sikaliput junyaꞌ.”

⁴ Pus meꞌ looy, kale na baw ku suwara pōꞌ man sulgaꞌ, yuk na, “Kaam, siga sukuꞌ ku, palawak na kam man Babilon supaya kam yaꞌ kalakkotan meꞌ dusa na maka supaya kam yaꞌ talapay ni siga balaꞌ ma song takka pa jataꞌ na.

⁵ Batan siga dusa Babilon ina, ibaratan lambunan, nungkuꞌ langit na langkaw na. Boꞌ yaꞌ na sina takupan meꞌ Tuhan kalaatan na.”

⁶ Maka yuk suwara looy siꞌ, “Talpaksaꞌ jaꞌ sina Babilon kalabuan mulkaꞌ magpataꞌ ka bay kalaatan na ni jama, bong saꞌ lipat min duwa lagi. Bong nnaꞌ ta pa inuman pait, sa basag-basag pait inuman ma bay painum Babilon ni jama, pag iya pinainum, subay lipat min duwa lagi pait na.

⁷ Babilon, kau ma induꞌ siga puta, bay jaꞌ ko ngumpohan dī nu altaꞌ sakiyan, boꞌ tud abbuhan lagi ko. Dari pooy-pooy eka altaꞌ nu ka ehe abbu nu, mastiꞌ meꞌ naa du eka kamalasahiyan ka ehe dukka labuꞌ pa jataꞌ nu. Batan ni kabasag abbu nu, halling njawom atay nu, ‘Aku bitu disu danda ma magpanghuluꞌ ngantanan kawasa mehe. Basta yaꞌ na bitu luu masa ku malasahi atawa maglindu meꞌ kadari bawu.’

⁸ Dari pagka meꞌ looy akka Babilon, luu du sina mintu masa na sarunduun llabuan siga balaꞌ, yana kapatoy, kasusahan ka gotom. Sampay ampud du sina ya meꞌ api tandaꞌ ehe kawasa Tuhan ngalabuan iya hukuman.

⁹ Kuwan siga sultan ni sikaliput junyaꞌ ma bay pingkaꞌ magjina ka Babilon sampay bay hampit ni altaꞌ na sakiyan, nangis banahan na sina mintu pag takita da dutai na humbu lakka man daira looy tutung.

¹⁰ Sugaꞌ maiman sa sina sila man katāhan batan tawu sila talapay ni mulkaꞌ njataꞌ na. Yuk da ina mintu saliꞌ-saliꞌ, ‘Allanēꞌ! Tud senseng la daira looy meꞌ looy na bay ehe tanyag na ka kawasa na! Njawom danjām du lay na ya magti timmos kalabuan balaꞌ.’

¹¹ Damikiyan, siga tukang maglilitu pun ni sikaliput junyaꞌ, nangisan daira looy du sina mintu ni kaehe dukka da batan yaꞌ na luu jama man daira looy malli barang da.

¹² Labba man mmas da, pilak porol da, siga palmata, ga mutsaꞌ, ka kakanaꞌ hagaan yana lanay ka kakanaꞌ tawuk atawa akket, yaꞌ na luu jama man Babilon malli. Sampay kakayu-kayuhan hamut ka jinisan barang pinabuwat ka tanduk gadja, sampay kayu ma hagaan ka tumbagaꞌ, bassi, ka malbol, yaꞌ na du luu malli.

¹³ Damikiyan, yaꞌ na du luu malli jinisan lampa-lampahan da, mana da, bbūg, insallan hamut, insallan, tubaꞌ anggul, taligu, bohas, ga sapiꞌ, kuraꞌ, bili-bili, ka kalesa da. Sampay jama ma pinadagangan meꞌ da binuwat ata, yaꞌ na du luu malli.

¹⁴ Yuk siga tukang maglilitu looy ilay mintu ni Babilon, ‘Mimon ma kinasengan meꞌ nu lay na lungay. Mimon altaꞌ nu ka mimon dorog nu, yaꞌ na luu. Boꞌ yaꞌ na sina tabawiꞌ saumu.’

¹⁵ Maka siga maglilitu looy ilay, yana sagannap ma bay magkadayahan sabapan daira looy, maiman sa du sina mintu man katāhan, batan tawu du sila talapay ni mulkaꞌ njataꞌ na. Maka bbuwatan da ina mintu, nangisan daira looy ni kaehe dukka da.

¹⁶ Yuk da ina mintu, ‘Allanēꞌ! Tud senseng la daira looy meꞌ looy na tanyag na saꞌ alang-alang! Sibuwa subay ga ya danda bay matuk pamakoy tawuk ka akket ma tud hagaan, boꞌ langkap gi ya meꞌ mmas ka ga palmata hagaan sampay ga mutsaꞌ.

¹⁷ Pag batnaa, njawom danjām du, magti lay katis mimon altaꞌ na.’ Na ni waktu looy du ilay mintu, mimon kapitan adjung ka ga tindog da ka siga pasahero sampay mimon jama ma ngusaha pa dilawut, maiman sa du sina mintu man katāhan

¹⁸ pag takita da humbu daira looy tutung na. Yuk da ina mintu, ‘Noy gi man tabi nammu gantiꞌ daira tanyag meꞌ looy?’

¹⁹ Ni kaehe susa da ina mintu, bbuwatan da nimbuhan momok tanaꞌ pa taꞌ kōk da sambayan da nangis ni kadukka da, yuk da, ‘Allanēꞌ! Tud senseng la daira looy! Bistahun bi doꞌ, mimon jama ma luu adjung da lay na magkadayahan sabapan barang daira looy sakiyan. Sugaꞌ njawom danjām du, lay na lubu labbasakayi!’ ”

²⁰ Pag-anu, yuk suwara looy lagi, “Kaam, siga kanabi-nabihan ka ga rasul sampay mimon sukuꞌ Tuhan ma luu na ntuu ni sulgaꞌ, subay kam gāk banahan. Subay kam gāk sabap lai na daira looy llabuan meꞌ Tuhan hukuman, yana hisab ni kalaatan bay pabuwat na ningkaam.”

²¹ Pag-anu siꞌ, luu na baw takita ku disu malaikat ma basag kawasa na ngangkat batu mehe banahan, boꞌ hiniyakan pa dilawut sambayan na halling, “Meꞌ naa du sina mintu meꞌ Tuhan mabinasa daira Babilon. Yaꞌ na luu masa na takita pabalik.

²² Yaꞌ na sina mintu luu halling jama ngalang atawa halling siga biyulla ka ga suling atawa tabuliꞌ ndooy. Damikiyan, siga tukang buwat oy-oy sadjaꞌ, yaꞌ na du sina mintu luu tatammu ndooy pabalik. San talutub jama magginduwa nappa, yaꞌ na du sina luu takale ndooy pabalik.

²³ Yaꞌ na sina mintu luu palitaan akket ni Babilon pabalik. Damikiyan, yaꞌ na du luu takale jama maglami-lami ngawin ndooy batan yaꞌ na luu jama na. Inaa na sina mintu palas Babilon batan bbuwatan siga tukang maglilitu ni daira looy subay ga siga sultan magbayaan manusiyaꞌ ni sikaliput junyaꞌ. Ilooy gi ilay mintu man Babilon talpaksaꞌ tuwaꞌ hisab sabap luu ilmuꞌ seytan na man na bay magsian mimon kabangsa-bangsahan.

²⁴ Maka ndooy na du silay ni Babilon man lahaꞌ kanabi-nabihan ka ga pagkahi da sukuꞌ Tuhan bay tumpa. Sarī man sila, mimon manusiyaꞌ ma bay pinapatoy taꞌ junyaꞌ, ndang man sabapan Babilon du.”