Siga Pakaradjaan bay Pinalahil 17 - Sabahagiꞌ Kitab Tawrat: Panagnaan ni Awwal Jaman maka Kitab Injil

Daira Babilon ndalil pa disu puta

¹ Pus meꞌ looy, luu na baw pasōng pa mman ku disu ni siga malaikat looy sikapituꞌ ma bay numpahan isi pinggan da, yuk na, “Tu ko, pakitahan ta ko bong pooy meꞌ induꞌ siga puta minulkaan, yana ilooy ma ningkōꞌ ni tagan sōng meka.

² Sampay siga sultan ni sikaliput junyaꞌ lay du bay pingkaꞌ magjina ka iya. Manusiyaꞌ pun ni sikaliput junyaꞌ lay na du bay taboo-boo meꞌ na palamud ni kasabuhan na. Sibuꞌ du karuha da ka siga jama ma bay pinalango meꞌ danda looy ka alak na supaya yaꞌ na luu kaiyaan da buwat kalalamaan.”

³ Dari siꞌ, lay na baw ku pinakitahan pandapat leꞌ Rū Tuhan. Njawom pandapat ku, lay ku binoo meꞌ malaikat looy nsiniꞌ pa lahat lau-lau yaꞌ magjama. Ndooy siꞌ, ngita na baw ku disu danda bakuraꞌ taꞌ disu sattuwa akket. Sattuwa looy siꞌ luu kōk na pituꞌ ka tanduk na sapū. Maka lapat baran na meꞌ jinisan awon ma pangka pa Tuhan.

⁴ Kuwan danda looy siꞌ, ayad banahan pamakoy na, walnaꞌ na tawuk ka akket. Maka lakkop ya meꞌ mmas ka ga palmata hagaan sampay ga mutsaꞌ. Maka luu ntanan na sawan mmas pannoꞌ meꞌ inuman yana sipat ni jinisan kasabuhan sampay na kajinahan ma pinaabak meꞌ na.

⁵ Taꞌ tundun danda looy siꞌ, luu bay sinuwatan awon lawom kamaatunan na. Batsahan na: “Aku itu Babilon, daira tanyag, induꞌ siga puta ka poonan mimon kasabuhan taꞌ junyaꞌ.”

⁶ Pag ndaꞌ ku, lango na danda looy meꞌ lahaꞌ siga sukuꞌ Tuhan bay ininum meꞌ na, yana lahaꞌ sagannap ma bay pinapatoy sabap meꞌ da bay masaplag pasal si Isa. Dari siꞌ, tud bay inu-inu ku ngandaꞌ iya.

⁷ Pag-anu siꞌ, yuk malaikat looy niyaku, “Ongoy subay na pin ko inu-inu? Baan ta sa ko ba bong oy kamaatunan danda looy ka sattuwa looy man na bakuraꞌ ma pituꞌ kōk na ka sapū tanduk na. Meꞌ tuu situ:

⁸ Kuwan sattuwa looy siꞌ ma bay takita nu, ndang bay luu silay maruhuꞌ-ruhuꞌ, pag batnaa lay na ya limbu. Sugaꞌ yaꞌ na du sina hallom, luu na du ya kaluwa pabalik man jawom lowang tangob looy ma yaꞌ mag-ngkoran lawom na. Sugaꞌ pag beleng na ina mintu, yaꞌ du hallom, tanalkaꞌ du ya. Pag ilay mintu pōꞌ sattuwa looy, tud inu-inu jama sukuꞌ junyaꞌ, yana sagannap ma ndang yaꞌ bay sinuwatan awon da njawom Būk Kaallum labba man kapayak junyaꞌ. Ngkon da ina mintu inu-inu ni sattuwa looy sabap ndang luu na ya maruhuꞌ, pag-anu, lay na limbu, sugaꞌ luu na sina mintu kaluwa pabalik.”

⁹ Maka yuk malaikat looy lagi, “Na ituu tu batnaa subay jama tawom pamiki na, boꞌ na kahati. Na kōk sattuwa looy siꞌ sikapituꞌ yana sipat ni pituꞌ punu man danda looy siꞌ ningkōꞌ. Sugaꞌ dari du tuwaꞌ pa pituꞌ sultan.

¹⁰ Ni siga sultan looy sikapituꞌ, kuwan lima, lay na lungay ntan da marinta. Kuwan ilooy disu, luu gi sampay batnaa marinta. Kuwan ilooy ma katapusan, ni sinōng gi boꞌ na magkawasa. Sugaꞌ pag pōꞌ na ina mintu, yaꞌ du humallom pamarinta na.

¹¹ Na kuwan sattuwa looy ma bay awnan ku siꞌ ma bay luu maruhuꞌ-ruhuꞌ, pag batnaa niyaꞌ na, iya pun disu sultan du ni ka-wawuꞌ na pasunuꞌ man siga sultan looy siꞌ sikapituꞌ. Sugaꞌ ndang luu na silay gantaan niiya pinidjalaꞌ njawom nalkaꞌ.

¹² “Na kuwan ga tanduk looy siꞌ sikasapū bay takita nu, yana sapū sultan ma yaꞌ gi bay nagnaꞌ marinta. Binuwanan silay sila mintu kapatut magsultan haboy ka sattuwa looy siꞌ, sugaꞌ yaꞌ du sina mintu humallom pagkasultan da.

¹³ Sila ilay siꞌ sikasapū, dambuwaꞌ mukalnaꞌ sampay magtaayun ma-ntan kawasa-kapatut da pa mman sattuwa looy man nanggehan pagkasultan na.

¹⁴ Bbuwatan da ina mintu, moo Bili-bili looy sibonoꞌ. Sugaꞌ ā du sila meꞌ Bili-bili looy ka siga sukuꞌ na, yana sagannap ma bay peneꞌ na sampay liyun na pa jawom okoman na, ma magkanaalla mmeꞌ niiya. Kon na ina mintu ga Bili-bili looy kaā sabap iya Papuꞌ ninggi taꞌ mimon papuꞌ; Sultan ninggi taꞌ mimon sultan.”

¹⁵ Maka yuk malaikat looy lagi niyaku, “Kuwan siga sōng looy ilay siꞌ ma bay takita nu man puta looy siꞌ ningkōꞌ, yana sipat ni manusiyaꞌ man mimon kalahat-lahatan ka kabangsa-bangsahan ddas ka jinisan pallun da.

¹⁶ Na sattuwa looy siꞌ ka siga tanduk na sikasapū, yana sikasapū sultan looy siꞌ, luu sina mintu masa da lammis na ni puta looy. Bbuwatan da ina mintu nantangan puta looy sampay ngaddoꞌ mimon altaꞌ na. Boꞌ kakan da lagi isi baran na sampay tunu da lagi oy-oy ma takapin.

¹⁷ Kon ilay mintu sila buwat meꞌ looy batan Tuhan matannaan sila pamiki mari binakbul na njataꞌ da bay garaꞌ na. Sangkon magtaayun na sina mintu pamiki da ma-ntan kawasa-kapatut siga pamarinta da pa mman sattuwa looy. Boꞌ ndang bay silay ginantaꞌ meꞌ looy ngabut sampay magjatu na mimon ma bay pinalman meꞌ Tuhan.

¹⁸ Kuwan danda looy ilay siꞌ ma bay takita nu, yana sipat ni daira tanyag looy ma magbayaan siga sultan ni sikaliput junyaꞌ.”