Siga Pakaradjaan bay Pinalahil 16 - Sabahagiꞌ Kitab Tawrat: Panagnaan ni Awwal Jaman maka Kitab Injil

Pituꞌ pinggan pannoꞌ leꞌ mulkaꞌ Tuhan

¹ Pag-anu siꞌ, kale na baw ku suwara haddo pōꞌ man jawom langga looy, yuk na ni malaikat looy sikapituꞌ, “Pilay na kam. Tumpahan bi na pa taꞌ junyaꞌ mulkaꞌ Tuhan man jawom pinggan bi sikapituꞌ.”

² Dari siꞌ, lai na malaikat looy ma duhuꞌ lakka sampay lay na tumpahan na isi pinggan na pa taꞌ junyaꞌ. Dari siꞌ, sagannap manusiyaꞌ ma bay sinapan ka sāp sattuwa looy sampay bay numba jama-jama bay pinabuwat ni limbagan na, saliꞌ-saliꞌ lay na ga tuwaꞌ kato bisa ma kasipin-sipin.

³ Pag tumpahan malaikat looy ni kaduwa na isi pinggan na, lay tuwaꞌ pa dilawut. Dari siꞌ, boheꞌ ni dilawut lay na ga padari lahaꞌ meꞌ karuha lahaꞌ jama matoy, sampay lay na ga matoy mimon balnyawa ni dilawut.

⁴ Pag tumpahan malaikat looy ni katallu na isi pinggan na, lay tuwaꞌ pa jawom siga sōng sampay siga poon boheꞌ langngin ni sikaliput junyaꞌ. Dari siꞌ, mimon boheꞌ ndooy lay na du dari lahaꞌ.

⁵ Pag-anu siꞌ, takale ku na baw suwara malaikat ma ngantanan kapatut njataꞌ mimon boheꞌ ni junyaꞌ, yuk na, “Ū Tuhan Mahasutsiꞌ ma ndang luu man maruhuꞌ-ruhuꞌ sampay batnaa, tud intong hukuman nu ni manusiyaꞌ.

⁶ Sagannap ma bay maduwai lahaꞌ siga sukuꞌ nu sampay lahaꞌ kanabi-nabihan, pag batnaa, pataꞌ na du sila buwanan nu lahaꞌ man mainum sila.”

⁷ Pag-anu siꞌ, kale na baw ku suwara lakka man tagan lamisahan man nunu bbūg, yuk na, “Ū Tuhan, Papuꞌ Sangat Kawasa, tud intong siga hukuman nu. Yaꞌ luu salla na.”

⁸ Na pag tumpahan malaikat looy ni ka-mpat na isi pinggan na, lay tuwaꞌ pa taꞌ mataallaw. Dari siꞌ, lay na ga magdaruhun pasuꞌ na sampay lay na ga lūs manusiyaꞌ.

⁹ Sugaꞌ san sila lay na lūs meꞌ hawa pasuꞌ saꞌ na alang-alang, masi du sila yaꞌ kuhi nawbatan dusa da. Maka masi sila yaꞌ kuhi maehe Tuhan. Gam pin, palaat da lagi pagka iya poonan ga balaꞌ looy.

¹⁰ Pag tumpahan malaikat looy ni kalima na isi pinggan na, lay tuwaꞌ pa parinta sattuwa looy siꞌ ma bay pōꞌ man jawom dilawut. Dari siꞌ, ilooy ma ngalindom na mimon kalahat-lahatan njawom sakup na. Kuwan siga raayat na, buwatan da ngattop dallaꞌ da na ga sabapan basag kamalasahiyan da.

¹¹ Sugaꞌ san meꞌ looy, masi du sila yaꞌ kuhi nawbatan dusa da. Gam pin darahan da lagi meꞌ da malaat Tuhan sabapan bisa kato da.

¹² Pag tumpahan malaikat looy ni ka-nnom na isi pinggan na, lay tuwaꞌ pa jawom Sōng Yupretes. Dari siꞌ, ilooy ma lay na kumattaꞌ boheꞌ na. Kon na bay tinakdil meꞌ looy supaya kamurahan siga sultan ka ga sundalu da pagattas pag pōꞌ da man kalahat-lahatan huwin pa mataallaw.

¹³ Pag-anu siꞌ, ngita na baw ku tallu seytan meꞌ dagbos bingkatak. Disu pōꞌ man jawom behe naga looy siꞌ, disu man jawom behe sattuwa looy siꞌ ma duhuꞌ, kuwan ilooy disu man jawom behe sattuwa looy siꞌ ni kaduwa na, yana disu nabi palsu.

¹⁴ Siga seytan looy siꞌ luu kawasa da buwat jinisan pakaradjaan kahaylan-haylan. Dari bbuwatan da, lay patiluꞌ pa mman siga sultan ni sikaliput junyaꞌ. Maksud da moo-moo siga sultan kumpo-kumpo naggaꞌ Tuhan Sangat Kawasa ni bonoꞌ mehe pag taabut llaw bay ginantaꞌ meꞌ Tuhan man na ngahukum manusiyaꞌ.

^15-16 Na siga sultan looy siꞌ, lay du takoleꞌ meꞌ siga seytan looy inoyo-oyohan sampay lay na binoo ddas ka ga sundalu da pa lahat inawnan Armageddon ni pallun Hibrani. Pag-anu siꞌ, takale ku na baw suwara Papuꞌ Isa, yuk na, “Indanan bi. Ni katakka ku ina mintu, kakuratan sina manusiyaꞌ meꞌ karuha jama kakuratan meꞌ sugaru. Sugaꞌ njawom supaat sina soysoy ma ngilagan dī na ka saddiya ni katakka ku. Sibuꞌ du sina mintu karuha na ka jama ndang lay na mamakoy, saddiya ni katakka bōs na. Yaꞌ sina ya mintu meꞌ karuha jama kaiyaꞌ-iyaan taabut nantang.”

¹⁷ Na pag tumpahan malaikat looy ni kapituꞌ na isi pinggan na, lay tuwaꞌ pa taꞌ baliyu. Pag lupus, luu na baw pōꞌ suwara haddo man tagan paningkoan looy ni langga looy ni sulgaꞌ, yuk na, “Lupus na.”

¹⁸ Pag-anu, ilooy ma ngallub na ga lahat haboyan guntu ka mangirat. Boꞌ luu gi linug biddaꞌ na basag na. Halloman manusiyaꞌ taꞌ junyaꞌ, yaꞌ gi bay luu lumingkaꞌ linug meꞌ looy na basag na.

¹⁹ Boꞌ lay na ga sobak tallu Babilon, daira tanyag looy. Sampay katis na ga lubu siga daira ni sikaliput junyaꞌ. Dari ilooy na silay siꞌ hisab njataꞌ jama Babilon sabapan kalaatan da. Tud yaꞌ du bay takupan Tuhan kajahatan da. Dari lay na pupusan Tuhan mulkaꞌ na njataꞌ ga jama Babilon sabap biddaꞌ na duga na ninsila. Ibaratan nginum, pinaggos na sila nginum inuman pait saꞌ alang-alang.

²⁰ Sabapan linug looy siꞌ, mimon kanusa-nusahan lay na limun sampay mimon kapunu-punuhan yaꞌ na du luu.

²¹ Pag-anu, luu gi sakiyan ayis batu labuꞌ man taꞌ langit saliꞌ-saliꞌ luu ga limampūꞌ kilu bohat da. Dari sabapan ehe kamalasahiyan manusiyaꞌ leꞌ balaꞌ looy, magdaruhun gi meꞌ da malaat Tuhan.