Siga Pakaradjaan bay Pinalahil 15 - Sabahagiꞌ Kitab Tawrat: Panagnaan ni Awwal Jaman maka Kitab Injil

Pituꞌ malaikat matakka siga balaꞌ

¹ Paddus meꞌ looy, ngita na baw ku balik sipat kahaylan-haylan taꞌ langit. Luu pituꞌ malaikat bay kabuwanan kapatut matakka pituꞌ balaꞌ, yana siga balaꞌ katapusan. Batan pag ilay mintu katis na siga balaꞌ looy pinatakka, ilooy na katobtoban mulkaꞌ Tuhan.

² Pag-anu siꞌ, ngita na baw ku meꞌ bantuk dilawut tallak meꞌ sammin na magsakot ka api. Ndooy siꞌ, meka manusiyaꞌ nangge. Sila ilay siꞌ yana sagannap ma bay tumanjataꞌ ni sattuwa looy ka jama-jama bay pinabuwat ni limbagan na, batan yaꞌ sila bay kuhi sinapan ka numbul awon sattuwa looy. Saliꞌ-saliꞌ sila ngantanan biyulla bay dean Tuhan ninsila

³ sambayan da ngalang kalangan ata Tuhan mattoꞌ, yana Nabi Musa. Kalangan looy siꞌ yana kalangan Bili-bili looy du. Kalangan looy siꞌ meꞌ tuu: “Papuꞌ, meꞌ kau Tuhan Sangat Kawasa, mimon pabuwat nu kainu-inu ka biddaꞌ na hāp na. Kau sultan mimon kabangsa-bangsahan. Mimon-mimon ma pabuwat nu intong jaꞌ maka yaꞌ luu salla na.

⁴ Papuꞌ, soy yaꞌ ngisbat kau ka maehe awon nu meꞌ naa na isu-isu kau sutsiꞌ. Manusiyaꞌ man mimon kabangsa-bangsahan kumpo-kumpo sina mintu numba kau sabap katoonan da intong jaꞌ mimon ma pabuwat nu.”

⁵ Paddus meꞌ looy, takita ku na langga bukaꞌ ndooy ni sulgaꞌ. Maka takita ku na du Bilik Pinakasutsiꞌ njawom.

⁶ Maka luu pōꞌ man langga looy ga malaikat looy siꞌ sikapituꞌ ma bay kabuwanan kapatut matakka pituꞌ balaꞌ. Pamakoy da siꞌ malaas na poteꞌ na, yaꞌ luu tamak na samasakali. Maka saliꞌ-saliꞌ sila luu ka kindang da mmas.

⁷ Pag-anu siꞌ, sikapituꞌ sila saliꞌ-saliꞌ lay pina-ntanan pinggan mmas meꞌ disu ni siga balnyawa looy siꞌ sika-mpat. Siga pinggan looy siꞌ saliꞌ-saliꞌ pannoꞌ meꞌ mulkaꞌ lakka man Tuhan sabanna ma llum saumu-umu.

⁸ Pag-anu siꞌ, pannoꞌ na baw langga looy meꞌ humbu sabapan sahayaꞌ Tuhan ka kawasa na. Boꞌ yaꞌ luu kapaasok pilay ngkod-ngkoran yaꞌ gi bay katis tinumpahan balaꞌ looy siꞌ sikapituꞌ meꞌ siga malaikat looy.