Siga Pakaradjaan bay Pinalahil 14 - Sabahagiꞌ Kitab Tawrat: Panagnaan ni Awwal Jaman maka Kitab Injil

Bili-bili ka siga sukuꞌ na

¹ Pag-anu siꞌ, takita ku na baw Bili-bili looy nangge taꞌ Punu Zayon. Maka meka du manusiyaꞌ ndooy ni bihing na. Eka da siꞌ dahatus mpatpuꞌ-mpat libu maka saliꞌ-saliꞌ sila bay sinuwatan taꞌ tundun da awon Bili-bili looy ka awon Mmaꞌ na.

² Maka luu takale ku man sulgaꞌ meꞌ halling boheꞌ sōng ngallub tumpa man taꞌ pampang. Boꞌ luu gi guntu basag magtagubtub. Maka luu gi meꞌ halling biyulla meka kinabbit.

³ Kuwan ga jama looy siꞌ ma dahatus mpatpuꞌ-mpat libu, bbuwatan da ngalang kalangan bahau ni awpan paningkoan Tuhan ka ni awpan ga balnyawa looy siꞌ sika-mpat sampay ga matatoa looy sikaduwampuꞌ-mpat. Boꞌ yaꞌ luu toon kalangan looy sarī man ga jama looy siꞌ sikadahatus mpatpuꞌ-mpat libu, yana sagannap ma lay na nilakkat meꞌ Bili-bili looy man komkoman Ibilis jaman da masi ni junyaꞌ.

⁴ Sutsiꞌ sila. Kanaalla sila pa Tuhan. Sibuꞌ du karuha da ka lalla ma yaꞌ kuhi magjina. Maka paninggai-paninggai Bili-bili looy, luu na pin sila patuhut niiya. Sila ilay yana sagannap manusiyaꞌ ma lay nilakkat man komkoman Ibilis supaya sila dari sukuꞌ Tuhan. Sila meꞌ sapantun buwaꞌ kattoman ma pabiddaꞌ ayad na sinongan pa Tuhan ka Bili-bili looy.

⁵ Yaꞌ sila ngandustaꞌ maka yaꞌ luu sutsutan njataꞌ da.

Tallu malaikat moo tallu umanat

⁶ Pag-anu siꞌ, ngita na baw ku disu malaikat lomeng taꞌ langit moo umanat mahap ma yaꞌ halin saumu. Umanat looy siꞌ pinasaplag meꞌ na ni sikamimon kabangsa-bangsahan taꞌ babaw junyaꞌ ni mimon kalahat-lahatan, kaniya-kaniya ka jinisan pallun da.

⁷ Dari lay ya ngahowap, yuk na, “Isbatun bi Tuhan maka pudjihun bi ya, batan taabut na situ waktu man na ngahukum mimon manusiyaꞌ. Meꞌ iya bay mapayak gumi ka langit, dilawut ka mimon poon boheꞌ langngin, sumbahun bi ya.”

⁸ Pag-anu siꞌ, luu na baw pasunuꞌ disu malaikat, yuk na, “Binasa na Babilon! Binasa na daira tanyag looy. Batan siga jama daira looy ilay bay kaboo-boo jama man mimon kabangsa-bangsahan nikutan Tuhan. Sibuꞌ du karuha daira looy ka disu puta ma bay mainum jama alak na supaya sila mmeꞌ meꞌ uwahan na magjina.”

⁹ Pag-anu siꞌ, luu na baw malaikat ni katallu na pasunuꞌ ngahowap, yuk na, “Sagannap ma numba sattuwa looy ka jama-jama bay pinabuwat ni limbagan na sampay lay sinapan tundun da atawa tangan da ka sāp sattuwa looy,

¹⁰ yaꞌ luu pag-agak, mastiꞌ pinakissahan na sina mintu mulkaꞌ Tuhan. Ibaratan nginum, pinaggos na sila nginum inuman pait saꞌ alang-alang. Pinidjalaꞌ na sina sila ka api noleyab magsakot ka manilang ndooy ni awpan siga malaikat Tuhan ka Bili-bili looy.

¹¹ Humbu lakka man api looy ina mintu ma niksaꞌ sila, paangkat saumu. Llaw-sangom yaꞌ luu hantiꞌ da kabisahan. Ilooy na silay mintu palas sagannap ma bay numba sattuwa looy ka jama-jama looy sampay bay kuhi sinapan ka awon sattuwa looy.”

¹² Sangkon sagannap sukuꞌ Tuhan, yana sagannap ma ngasip ni siga panohoan na, subay takkoꞌ pangando da ni si Isa maka subay pandoy natas njawom kabinsanaan.

¹³ Pag-anu siꞌ, kale na baw ku suwara lakka man sulgaꞌ, yuk na, “Suwatan nu ituu: Labba man batnaa, njawom supaat sina sagannap ma matoy sabap meꞌ da mmeꞌ ni Papuꞌ Isa.” Pag-anu siꞌ, sinambag na baw meꞌ Rū Tuhan, yuk na, “Bana sina, njawom supaat sila. Bohoꞌ da kapahali man mimon bay hulas-sangsāꞌ da. Maka taboo da du sina mintu pa ahirat mimon kaayaran bay pabuwat da.”

Manusiyaꞌ ni junyaꞌ meꞌ sapantun kinattom

¹⁴ Pag-anu siꞌ, ngita na baw ku tayiꞌ baliyu poteꞌ malaas. Njataꞌ na luu ningkōꞌ meꞌ bantuk Anak Manusiyaꞌ ddas ka karuna mmas taꞌ kōk na ka tasanggot tawom ni tangan na.

¹⁵ Pag-anu, luu na baw disu malaikat pōꞌ man langga ni sulgaꞌ mitsala pahaddo ni ilooy ma ningkōꞌ taꞌ tayiꞌ baliyu looy, yuk na, “Pilayun na. Labaran nu na tasanggot nu. Taabut na situ timpu ngattom batan buwaꞌ tinanom ni junyaꞌ tahak na.”

¹⁶ Dari siꞌ, lai na labaran na tasanggot na, sampay lay na katis kaddoꞌ na kattoman ni junyaꞌ.

¹⁷ Paddus meꞌ looy siꞌ, luu gi disu malaikat pasunuꞌ pōꞌ man jawom langga looy du ndooy ni sulgaꞌ. Boꞌ luu du ka tasanggot na tawom.

¹⁸ Pag-anu siꞌ, luu na baw disu malaikat pōꞌ man tagan lamisahan man nunu bbūg ndooy ni langga looy. Iya ilay tukang nungguan api ni lamisahan looy. Bbuwatan na ngahowapan malaikat looy siꞌ ma ngantanan tasanggot tawom, yuk na, “Pilayun na. Labaran nu na tasanggot nu. Sanggotun na siga pungutan anggul ni junyaꞌ sabap tahak na.”

¹⁹ Dari siꞌ, lai na sanggot malaikat looy siga pungutan anggul ni junyaꞌ. Pag lupus, lay na sila kinumpo, boꞌ da hiniyakan pa jawom tapaggaꞌ mehe. Kamaatunan siga pungutan anggul looy njawom tapaggaꞌ mehe, yana sagannap manusiyaꞌ ma pinakissahan basag mulkaꞌ Tuhan.

²⁰ Dari siga manusiyaꞌ looy siꞌ ma yaꞌ ngisbat Tuhan lay na pinapatoy ndooy ni poan daira. Lahaꞌ da ilay bay tumpa, subay ga disu sōng paliyud. Tahaꞌ liyuran na luu ga tallu hatus batu. Lawom na, lay na ngabut ga sa ila ka tongaꞌ. Dari ko ngawon, liyuran lahaꞌ da meꞌ karuha liyuran boheꞌ lakka man buwaꞌ anggul sakiyan njawom tapaggaꞌ mehe.