Siga Pakaradjaan bay Pinalahil 13 - Sabahagiꞌ Kitab Tawrat: Panagnaan ni Awwal Jaman maka Kitab Injil

Sattuwa pōꞌ man jawom dilawut

¹ Pag-anu, ngita na baw ku disu sattuwa pōꞌ man jawom dilawut. Luu tanduk na sapū maka eka kōk na pituꞌ. Saliꞌ-saliꞌ tanduk na ddas ka karuna na. Maka lay gi ku ngita taꞌ siga kōk na saliꞌ-saliꞌ siga awon pangka ma madiyoꞌ Tuhan.

² Sattuwa looy siꞌ ingbas ka miyong tawun ma mehe banahan. Battis na subay ga battis baluwang. Kuwan behe na, meꞌ behe halimaw. Pag-anu siꞌ, lay na dean naga looy kawasa-kapatut na ka pamarinta na ni sattuwa looy man na marinta taꞌ junyaꞌ.

³ Ni jataꞌ disu kōk sattuwa looy, luu limpaꞌ bakat mehe adak bay kapatoy niiya. Sugaꞌ pagka lay gi ya kaulian, manusiyaꞌ ni sikaliput junyaꞌ tud bay hilbat ni sattuwa looy sampay lay na ga mmeꞌ niiya.

⁴ Dari siꞌ, manusiyaꞌ lay na ga numba naga looy sabap iya poonan kawasa-kapatut sattuwa looy. Sattuwa looy pun lay na du bay sinumba meꞌ manusiyaꞌ sampay kapahalling na ga sila, “Yaꞌ na bilay la luu sibuꞌ sabanding sattuwa looy! Yaꞌ luu kaatu niiya.”

⁵ Na sattuwa looy siꞌ tu lay jaꞌ pinabiya meꞌ Tuhan ngabbu ka malaat iya. Boꞌ lay gi ya nduwan marinta njawom mpatpuꞌ-duwam buwan.

⁶ Tud yaꞌ ya bay paagak malaat Tuhan. Wā ya madiyoꞌ-diyoꞌ awon Tuhan sampay patannaan na ni sulgaꞌ sampay sagannap ma maglahat ndooy.

⁷ Lay jaꞌ ya pinabiya ngalān siga sukuꞌ Tuhan sampay lay sila tumandiyoꞌ meꞌ na. Maka lay gi ya binuwanan kawasa-kapatut marintahan manusiyaꞌ ni mimon kalahat-lahatan ka ni mimon kabangsa-bangsahan, kaniya-kaniya ka jinisan pallun da.

⁸ Dari dak mimon na manusiyaꞌ taꞌ babaw junyaꞌ numba sattuwa looy na. Ilooy du yaꞌ numba iya yana sagannap ma lay na sinuwatan awon da njawom Būk Kaallum man ngalista awon sagannap ma luu kasampulnaan nyawa da saumu-umu. Awon da ilay ndang lay na sinuwatan njawom būk looy labba man kapayak junyaꞌ. Ilooy ma dapu būk looy yana Bili-bili looy ma bay pingkaꞌ pinapatoy.

⁹ Na kaam ma pakale, kannahun bi paayad bitsala tuu.

¹⁰ Sagannap kam ma luu kadal bi tasungkub, mastiꞌ tasungkub jaꞌ sina kam. Damikiyan sagannap kam ma luu kadal bi pinapatoy, mastiꞌ pinapatoy jaꞌ sina kam. Sangkon meꞌ kaam siga sukuꞌ Tuhan, subay kam pandoy natas njawom kamalasahiyan sampay tattap mangando ni si Isa.

Sattuwa pōꞌ man gumi

¹¹ Pag-anu siꞌ, ngita na baw ku disu sattuwa pōꞌ man jawom gumi. Luu tanduk na duwa meꞌ tanduk bili-bili. Bila ya mitsala, subay ga suwara naga.

¹² Lay pakoy na kawasa-kapatut bay ndean iya meꞌ sattuwa looy ma duhuꞌ, ilooy ma lay na kaulian, dak bay matoy leꞌ bakat mehe. Bbuwatan na maggos mimon manusiyaꞌ ni sikaliput junyaꞌ numba sattuwa looy ma duhuꞌ.

¹³ Lay gi ya bay buwat pakaradjaan kahaylan-haylan. Takaya na sampay api pinalabuꞌ man taꞌ langit pa taꞌ gumi ni pag-awpan jama.

¹⁴ Dari man sabapan siga sipat kawasa bay tapabuwat sattuwa looy ma dambuli kalnaꞌ sattuwa looy ma duhuꞌ, lay takoleꞌ na inakkahan mimon manusiyaꞌ ni junyaꞌ ma saꞌ sukuꞌ Tuhan. Sampay lay gi sila sohoꞌ na buwat jama-jama ni limbagan sattuwa looy ma duhuꞌ, ilooy ma lay na kaulian, dak bay matoy meꞌ bakat kataliꞌ.

¹⁵ Boꞌ sattuwa looy siꞌ ma dambuli, lay gi binuwanan kawasa man na muwanan jama-jama looy siꞌ napas supaya kabitsala. Dari bbuwatan jama-jama looy, lay nohoꞌ mapatoy soysoy yaꞌ kuhi numba iya.

¹⁶ Pag-anu siꞌ, sattuwa looy ma dambuli lay maggos sikamimon, balkanan saꞌ balkanan, miskin-dayahan, ata saꞌ ata, nohoꞌ sinapan tangan da huwin pa kawnan atawa taꞌ tundun da.

¹⁷ Sāp looy siꞌ yana awon sattuwa looy ma duhuꞌ bong saꞌ numbul ma sipat ni awon na. Boꞌ yaꞌ luu kaballi atawa kapadagang bong yaꞌ luu sāp looy.

¹⁸ Na numbul looy ilay siꞌ luu kamaatunan na. Bong jama tawom pamiki na, takaya na makkasan kamaatunan na. Numbul looy ilay nnom hatus nnompuꞌ-nnom maka inaa tuwaꞌ pa manusiyaꞌ.