Siga Pakaradjaan bay Pinalahil 12 - Sabahagiꞌ Kitab Tawrat: Panagnaan ni Awwal Jaman maka Kitab Injil

Naga ka danda battong

¹ Pag-anu siꞌ, luu na baw kahaylan-haylan takita ku taꞌ langit. Batan luu ndooy disu danda ma pamakoy na mataallaw, boꞌ lay gi nangge taꞌ buwan. Maka luu sapu-duwa potean taꞌ kōk na meꞌ bantuk karuna.

² Iya siꞌ tu battong maka magkamaddi-maddi na ya. Dari bbuwatan na ngandahing kabisahan maddi.

³ Pag-anu siꞌ, luu na baw pasunuꞌ kahaylan-haylan takita ku taꞌ langit du, yana naga akket ka mehe. Eka kōk na pituꞌ, saliꞌ-saliꞌ ddas ka karuna da. Maka luu gi tanduk na sapū.

⁴ Pag-anu siꞌ, lay ya bay ngalabaran ingko na sampay maglatakan na ga sabahagiꞌ tallu potean pa taꞌ junyaꞌ. Pus meꞌ looy, lay ya patiluꞌ pa danda looy ma magkamaddi-maddi na, boꞌ na nangge ni awpan na supaya tahan na nabbat anak na pag pōꞌ na.

⁵ Na pag maddi danda looy siꞌ, anak na lalla. Dari saddong anak-anak looy dak sinabbat meꞌ naga looy, ilooy ma lay ya ndagmit inangkat pa Tuhan, boꞌ na lay pinatingkōꞌ ni paningkoan Tuhan. Anak-anak looy siꞌ tu ndang bay ginantaꞌ marintahan mimon kabangsa-bangsahan taꞌ babaw junyaꞌ. Boꞌ tud adil pamarinta na.

⁶ Kuwan danda looy siꞌ, lay na lahi pa lahat lau-lau yaꞌ maglumaꞌ ndooy ni lahat ma ndang bay hinalliꞌ meꞌ Tuhan niiya. Maka ndooy na ya bay inayaran njawom dalibu duwa hatus nnompūꞌ ngallaw.

⁷ Pag-anu siꞌ, luu na baw bonoꞌ mehe ni sulgaꞌ. Mikail ka siga malaikat ndiyoan na lay sibonoꞌ ka naga looy ka siga malaikat ndiyoan na.

⁸ Boꞌ lay ā naga looy meꞌ Mikail. Dari lay na pinaggos naga looy ka malaikat na nohoꞌ lakka man sulgaꞌ.

⁹ Sampay lay na sila hiniyakan pa junyaꞌ. Na naga mehe looy ilay siꞌ, yana sō looy na ni awwal jaman ma pinag-awnan Ibilis atawa panghuluꞌ seytan. Iya ilay tukang magsian manusiyaꞌ ni sikaliput junyaꞌ.

¹⁰ Pag-anu siꞌ, kale na baw ku suwara haddo lakka man sulgaꞌ, yuk na, “Batnaa luu na takka kasalamatan ka kawasa man Tuhan tabi ddas ka pamarinta na. Maka luu na takka kawasa-kapatut Almasi, ilooy ma bay pineneꞌ meꞌ Tuhan marinta. Batan lai na Ibilis pinōꞌ man sulgaꞌ, panumbung looy ma sangom-llaw malaat siga pagkahi tabi sukuꞌ Almasi pa Tuhan.

¹¹ Lipara lay na tumanjataꞌ siga pagkahi tabi man Ibilis man sabapan lahaꞌ Bili-bili looy bay tumpa man muwasan dusa da. Maka disu gi danan man da bay tumanjataꞌ sabap meꞌ da bay masaplag umanat Tuhan. Yaꞌ na sila bay sēngan umu da san gi man da matoy kalnaꞌ Bili-bili looy.”

¹² Maka halling suwara looy lagi, “Na kaam ma luu na ntuu ni sulgaꞌ, subay kam gāk banahan sabap lai na Ibilis pinōꞌ mantuu. Sugaꞌ kaluuy-luuy kam nnaa taꞌ junyaꞌ, pa dile pa dilawut, batan luu na Ibilis bay duwai pilu pa mman bi. Biddaꞌ na sina lasu na batan katoonan na dangkitiꞌ sa masa man na madara maksud na.”

¹³ Na pag ndaꞌ naga looy siꞌ lay na ya hiniyakan pa junyaꞌ, lay na onse na danda ma bay maddihan anak-anak looy.

¹⁴ Sugaꞌ danda looy siꞌ tu, lay na baw binuwanan meꞌ Tuhan duwa pikpik meꞌ karuha pikpik belleꞌ mehe supaya ya kapalomeng pa lahat lau-lau yaꞌ maglumaꞌ. Lahat looy ilay ndang bay hinalliꞌ meꞌ Tuhan niiya. Ndooy siꞌ, lay ya bay inayaran njawom tallun taun ka tongaꞌ sampay yaꞌ na ya taabut meꞌ naga looy.

¹⁵ Dari buwatan naga looy baw siꞌ tu, napputan boheꞌ paeka man behe na, subay ga sōng, man na ngalimbo danda looy ka liyud landos.

¹⁶ Sugaꞌ yaꞌ bay luu dapat na sabap danda looy lay tinabang meꞌ gumi. Batan lay bakkaꞌ gumi sampay nallon mimon boheꞌ ma bay sapputan naga looy.

¹⁷ Pag ndaꞌ naga looy yaꞌ luu dapat na, tud bay dugahan ya ni danda looy. Dari lay ya lakka mandooy ngalān siga anak danda looy ilooy kasohean. Siga anak na ilay, yana sagannap manusiyaꞌ ma mean panohoan Tuhan ka magkanaalla ngantanan tōꞌ si Isa.

¹⁸ Pag-anu siꞌ, lay na baw naga looy nangge ndooy ni tapiyan.